Марк 16
16
Иисусонь вельмамац
(Матф. 28:1-8; Лук. 24:1-12; Иоанн 20:1-10)
1Ваймамань шида меле Магдаласта Мария, Иаковонь тядяц Мария и Саломия рамасть Иисусонь вадендемс питни вай. 2И нинге шинь стяма ланга, недляшиня састь калмоть ваксс. 3Эсь ётковаст корхтасть: «Кие шашфтсы тейнек калму сувама вастста кевть?» 4Тяса няезь: кевсь шаштф; а сон пяк оцюволь.
5Аватне сувасть калму, види ширеса няйсть од цёра, кона щафоль акша щамса; и пяк эводсть. 6Од цёрась корхтай тейст: «Тяда пеле. Тинь вешендьсасть Назаретонь Иисусть, конань эськодезь крёз лангс. Сон вельмась, Сон аш тяса. Вага ся вастсь, коза Сон путфоль. 7Арда азость Сонь тонафниензонды, Пёторондиге: "Иисус тиндедонт инголи моли Галилеяв; тоса тинь няйсасть Сонь, кода Сон Сонць азозе тейнть"».
8Аватне лиссть и ласькозь тусть калмоста; синь трнатсть и дивандакшнесть, и киндинге мезевок ашесть аза, сяс мес пельсть.
Иисус няфти пря Магдалань Мариянди
(Матф. 28:9,10; Лук. 24:13-35; Иоанн 20:11-18)
9Иисус вельмась варьхмодемшовор недляшиста. Васенда няфтсь пря Магдалань Мариянди, конань потмоста панць сисем кяжи ваймопожфт. 10Мария мольсь и азондозе сятненди, конат инголи яксесть Иисусонь мархта, а тяни авардсть и пичедсть инксонза. 11Но мзярда марязь: Иисус вельмась и Мария няезе Сонь, – синь тянди ашесть кема.
12Сяда меле Иисус няфтезе прянц лия шамаликса эздост кафттненди, мзярда сят мольсть вели. 13Сят мрдасть меки, азондозь лиятненди; но сятнендинге ашесть кема.
Иисус максы тонафнихненди оцюдонга оцю тев: шарфтомс ломаттнень Шкайти
(Матф. 28:16-20; Лук. 24:44-53; Иоанн 20:19-23; Апост. т. 1:6-11)
14Тяда меле Иисус няфтсь пря кефкие тонафнихненди, мзярда синь ярхцасть. Иисус апрякась эсост аф кемамаснон и калгода седиснон инкса, мес ашесть кема сятненди, кит няезь Сонь вельмафста. 15Сон мярьгсь тейст: «Ётада сембе масторть ланга и азонкшнесть Пара кулять эрь ломанти. 16Кие кемай и кстиндафты пря, ся идеви; а кие аф кемай, ся ули судендаф. 17Кемайхненди кармайхть тиендевома тяфтама тяштькст: Монь лемсон кармайхть панцемост кяжи ваймопожфнень, корхтама од кяльса, 18кядьса сявондемс куйхнень, и кда симихть кодамовок урафтомада, кальдяв тейст аф тиеви. Кармайхть кядьснон путнема сярядихнень лангс, и сят пчкяйхть».
19Синь мархтост тяфта корхнемда меле Иисус Азорсь кепотьфоль менели и озась Шкайть види кядь ширесонза. 20А тонафнихне тусть и азонкшнезь Пара кулять сембе вастова. Азорсь лездсь тевсост и кемокснезе синь азондомаснон тяштькснень вельде. Аминь.
Currently Selected:
Марк 16: ОС16
Highlight
Share
Copy
Want to have your highlights saved across all your devices? Sign up or sign in
Библиянь ётафтома институтсь, 2016
