Улон-вылон 43
43
43-тӥ ЛЮКЕТ
1Музъем вылын сютэм улон кужмояз. 2Египетысь ваем няньзэс сиыса быдтэм беразы атайзы соослы шуиз: «Нош ик отчы мыныса, асьмелы кӧня ке но сиён басьтэ». 3Иуда солы тазьы шуиз: «Со адями ӝот-ӝот вераз: ”Вындэс сьӧрады ӧд ке вае, мынам син азям эн ик лыктэ”. 4Вынмес сьӧрамы лэзид ке, соку мыномы но тыныд сиён басьтомы; 5ӧд ке лэзьы, соку ум мынэ, уго со адями милемлы шуиз: ”Мынам син азям эн ик возьматске, вындэс сьӧрады ӧд ке вае”». 6Израиль шуиз: «Малы тӥ мон понна сыӵе урод уж лэсьтӥды, – со адямилы тӥляд вынды вань на шуиды?» 7Соос шуизы: «Со адями ми сярысь но, асьмелэн ӵыжы-выжыосмы сярысь но юалляськиз, улэп на-а, пе, тӥляд атайды? Вань-а, пе, тӥляд братты? Мар юаз, ми солы верамы. Тодӥмы-а ми солэсь ”вындэс татчы вае” шуэмзэ?» 8Иуда нош атаезлы, Израильлы, тазьы шуиз: «Пинал пиез мон сьӧры лэзь, ми султомы но мыномы, улэп кылёмы, ми но, тӥ но, нылпиосмы но уз кулэ; 9со понна мон кыл кутӥсько, сое мон киулысь курод; сое мон тон доры ӧй ке вутты, тынад азяд ӧй ке султыты, соку мон вань улоно нуналъёсы ӵожелы тон азьын янгыше кылисько; 10ӝегаса ке ӧй улысалмы, кык пол ветлыса вуысалмы ни». 11Соослэн атайзы, Израиль, соослы шуиз: «Тазьы ке, соку тани тазьы каре: та музъемын будэм емышъёсты сьӧрады басьтэ но со адямилы соосты саламлы нуэ, нуэ кӧня ке но бальзам, кӧня ке но чечы, стиракс но ладан, фисташка но миндаль мульыосты бордады кутэ. 12Таре сьӧрады кык пол тросгес азвесь кутэ, пуйыослэн пасязы берен понэм азвесез ас киыныды берыктыны мед быгатоды: оло нош со янгышен понэмын вал. 13Вындэс но бордады кутэ, султэ но со адями доры нош ик мынэ. 14Ваньмызлэсь Кужмо Инмар со адямиез тӥледыз гажась-жалясь мед кароз но со тӥледын ӵош бертыны мукетсэ но браттэс мед лэзёз, Вениаминэз но; нош мыным нылпиосытэк кылёно ни ке, мед кылём ни, мар карод». 15Та адямиос саламъёссэс-кузьымъёссэс кутӥзы, киязы кык пол тросгес азвесь кутӥзы, Вениаминэз но бордазы кутӥзы; султӥзы но Египетэ кошкизы, Иосиф азе вуизы. 16Иосиф пӧлысьтызы Вениаминэз [вынзэ, анаезлэсь пизэ] адӟиз но юртэзлэн кузёезлы шуиз: «Та адямиосты корка пырты но кудзэ ке но пудоез ванды, сиён дася, малы ке шуоно та адямиос монэн ӵош нуназеялозы». 17Та адями Иосифлэсь косонзэ быдэстӥз, со та адямиосты Иосифлэн корказ пыртӥз. 18Та адямиос кышказы, Иосифлэн корказ пыртӥзы шуыса, соос шуизы: «Азьвыл татчы вуылыкумы, пуйыосамы тырем азвесь берен татчы вуэм понна, асьмеды янгыше уськытыса, выламы урдскыны, ляльчи карыны, ишакъёсмес таланы соос асьмеды та корка пыртӥзы». 19Иосифлэн юртэныз кивалтӥсь доры соос лыктӥзы но корка пырон ӧс дорысен солы вераны кутскизы, 20соос шуизы: «Кузёмы, кылзы милемыз, ми азьвыл но сиён октыны вуылӥмы ни, 21озьы пӧрмиз: кӧлон интые вуимы но пуйыосмес усьтӥмы, – но тани, котькудмылэн ю басьтыны тырем азвесьмы пуйымылэн пасяз кылле; сое таре ас киынымы берыктӥськомы; 22нош сиён басьтыны киямы мукет азвесь вайимы; ми ум тодӥське, кин милям пуйыосамы азвесьмес тыриз». 23Со шуиз: «Эн куалекъялэ, эн кышкалэ; тӥляд Инмарды, тӥляд атайдылэн Инмарез пуйыосады ватэм байлык сётӥз; тӥляд азвесьты мон доры вуиз». Соос доры Симеонэз вайиз. 24Со адями та муртъёсты Иосифлэн корказ пыртӥз но ву сётӥз, соос пыдзэс миськизы; ишакъёссылы но сиён сётӥз. 25Иосиф нуназе шор вуыкулы саламъёссэс-кузьымъёссэс дасязы, уго соос кылӥзы, соос отын нуназе карозы шуыса. 26Иосиф дораз бертӥз но таос сьӧразы ваем саламъёссэс-кузьымъёссэс со доры вайизы, музъемозь со азе йыбырттӥзы. 27Соослэн тазалыксы сярысь юаса шуиз: «Атайды, пересь мурт, сярысь тӥ верады вал. Кыӵе солэн тазалыкез? Улэп на-а со?» 28Таос шуизы: «Тынад ляльчиед, милям атаймы, таза, улэп на». [Со шуиз: «Та адями Инмарен бакель каремын».] Соос йырзэс мыкыртыса йыбырттӥзы. 29[Иосиф] синзэ ӝутӥз но вынзэ, анаезлэсь пизэ, Вениаминэз, адӟиз но шуиз: «Та тӥляд покчи вынды-а, со сярысь-а тӥ мыным вералляды?» Собере шуиз: «Пие, Инмарлэн гажан-жалянэз тон бордын мед улоз!» 30Соку Иосиф ӝогак султыса кошкиз, уго вынзэ яратонэз тыл кадь пушказ ӝуатскиз, со бӧрдыны дась вал ини; соку со, пыдлось бӧльмы сьӧры пырыса, бӧрдыны кутскиз. 31Собере со ымнырзэ миськиз, ассэ кияз кутӥз но потыса шуиз: «Сиён-юон пуктылэ». 32Талы нимаз сиён-юон пуктӥзы, соослы но нимаз пуктылӥзы, соин ӵош сиськись египет пиослы но нимаз сётӥзы, египет пиос еврей пиосын огазьын сиськыны уг быгато уго, малы ке шуоно египет пиос понна та – юрӟым уж. 33Со азе соос пуксизы, – нырысь вордскемез бордысен кутскыса пиналыз дорозь арлыдзыя соос пуктылэмын вал, – ог-огзы шоры паймыса учкизы. 34Солэн дорысьтыз соослы сиён-юон сётылӥзы, Вениаминлэн люкетэз вить пол бадӟымгес вал, мукетъёсызлэн люкетъёссы сярысь. Соос юизы, соин ӵош соос умой гинэ юизы.
Currently Selected:
Улон-вылон 43: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016
