Wenía 30
30
1Askái Raquel “earo vakeyámaka”, iinã ãwẽ takemẽ naíi, ãwẽ venenĩ vanai. “Ea mĩ vake merashoámaro ẽ vopikatsa”, akĩ.
2Ãwẽ aská akatõsho, ã vene naíkawãi vanai. “Eanã Yovérá? Aatsikĩ mĩ revokatsikimẽkĩ mia teayanã”, akĩ.
3Ãwẽ askámaĩnõ, “ramaro aská, ẽ mee ima ivo Bila mia ẽ eneshomaĩnõ, aa tasatso, anõsho vake meranoshõ. Mĩ anõsho meraásmẽkĩ nokená keskáse ikatsai”, akĩ.
4Aská akĩ Bila ãwẽ eneshoatõsho avé meenanãi. 5Askái Jacopa Bilamẽsho venevake meraki. 6Askái Raquel vanai. “Ẽ onís awemaĩnõ, Yové Koĩni ea meki ashõai. Ẽ yokáamẽsho vake ea inãi”, iinã “Dã”, akĩ aneki.#30.6 Hebraicõ vana “Dã” ikíro “meki aká” keská ivo 7Askái txipo Bilamẽsho venevake wetsa meraóki. 8Askái Raquel “ẽ take evé tavananãa ivo ẽ viakea”, iinã “Naftali”, akĩ aneki.#30.8 Hebraicõ vana “Naftali” ikíro “tavananãa” keská ivo
9Askámaĩnõ Liã revoa enésho, ãwẽ toĩa aĩvo Zilpa “naa tasatso”, iinã ãwẽ vene eneshokĩ. 10Anosho ãwẽ venẽ Zilpamẽsho venevake meraki. 11Ãwẽ askámaĩnõ Lia “mekírvironã”, iinã “Gade”, akĩ aneki.#30.11 Hebraicõ vana “Gade” ikíro “roakarkĩ” keská ivo 12Askáki txipo Zilpamẽsho venevake wetsa ãwẽ meraómaĩnõ 13Liã, “ea mekíai, evé aĩvorasĩni ‘metsápai tsaóai’, ikĩ ea yoãkatsavo”, iinã “Aser”, akĩ aneki.#30.13 Hebraicõ vana “Aser” ikíro “mekía” keská ivo
14Askásho txipo trigo atõ tovamaĩnõ, Rúben wai matxi too rao wetsa#30.14 Naaivo vanáro taeya, ãwẽ anero “mandrágora.” Aatiã atõ onãtakáro too rao meravaíki ãwẽ ewa Lia inãki. Askámaĩnõ Raquẽl ãwẽ take yokáki. “Mĩ vakẽ vivarãa ivo wetsachta ea inã”, akĩ.
15Ãwẽ askámaĩnõ, “ẽ vene ea mĩ viãkechnamẽkĩ, ẽ vakẽ vaná ea ãwẽ vishõvarãa ivo ea mĩ viãkãotsikírá?” akĩ.
Ãwẽ aská akatõsho, Raquel vanai. “Nõ viãnanãnõ. Miãro vaná ea mĩ inãmaĩnõ miaro aská. Naaivo yamé Jacónĩ oshatso”, akĩ.
16Askái yãtã, Jacó, ãwẽ inárasĩ shokoanamã itãi nokókarãmaĩnõ, Liã aská akĩ. “ramaro naaivo yamé ravé nõ oshanõ. Ẽ vakẽ meraaivo too rao anõ askátivísi ma ẽ kopímaai”, ãwẽ akátõsho Jacó yamé avé oshai. 17Askái Liã Yové Koĩ ãwẽ yokáatõsho ashõki. Askái tooinasho, 5 vake ivo meraki. 18Askái vanai. “Ẽ toĩa aĩvo vene ẽ eneshochĩatõsho Yové Koĩni vake ea kopiki inãai”, ikĩ chinãsho, “Issacar”, akĩ aneki.#30.18 Hebraicõ vana “Issacar” ikíro “kopia” keská ivo 19Askávai txipo tooinaóki, 6 vake ivo meraki. 20“Yové Koĩni ea onis amaĩnõ ramaro ẽ venẽ ea enetĩpa, 6 vake ẽ meramatõsho”, iinã “Zebulom”, akĩ aneki.#30.20 Hebraicõ vana “Zebulom” ikíro “enetĩpa”, “onis aká” aatíi 21Askái revoi enekaĩnamãchtasho aĩvake merasho “Diná”, akĩ aneki.
22Askávai txipo Yové Koĩni Raquel chinãshokĩ. Askáki ãwẽ yokáa nĩkãinã ashõki, revomakĩ. 23Askái tooinasho vake venevake meraki. “Vakema nishõ ẽ ravĩkaĩkaĩ ivo Yové Koĩni ea enémaai. 24Yavepa vake wetsa ea inãotikĩ ẽ iki”, iinã “José”, akĩ aneki.#30.24 Hebraicõ vana “José” ikíro “inãóa” keská ivo
Jacó awẽ mãaimai shovisho niti ivo yoã
25Askái José pakéa txipo, Jacopa ãwẽ rayóse tanamakĩ. “Arimẽse ẽ vaketi maĩ ẽ iokaĩtanõ. 26Ẽ vakerasĩ, ẽ aĩvorasĩ aká, atomẽsho ẽ mevi yomãnái mia mee ishõi niti ivo ea ato enesho. Roaka akĩ mia ẽ mee ishõkõvarãai, chinãtso”, akĩ.
27Ãwẽ askámaĩnõ ãwẽ kokã revíki, “Ea enevaĩroa, nenose nirí. Ea erísmasho mia ẽ onãtakĩ oĩai. Yavepa minõsho roapa ivo ea ashõkõvarãai. 28Awetishõ mia ẽ kopímakatsai? ‘Aatishõ’, ea mĩ amaĩnõ, mia inãnõ”, akĩ.
29Askái ã vanamaĩnõ, “mĩ inárasĩ mia ẽ vesoshovaĩvaĩna ivo mĩ tanai. 30Neno tachikarãki ẽ oĩa, mĩ inárasĩ ãtsapamarívi iyãta, ramaro itãtĩpa. Yavepa ẽ niátipakĩse mia roapa ashõkõvarãai. Ramaro ẽ vakerasĩkase ato ẽ vesonõ”, akĩ.
31Ãwẽ askámaĩnõ ãwẽ rayóse vanaói. “Neno mĩ nimaĩnõ awetishõ mia ẽ kopímatira?” akĩ.
Ãwẽ askámaĩnõ, “Roase, mĩ inárasĩse ẽ vesoshoókatsa. Ramaro nõ neská anõ. 32Kashõ mĩ iná patsáyavorasĩ, txeshekavorasĩ aká ẽ kavẽi kakatsai. Ẽ aská aká ea kopímati aya keskáse ikatsai. 33Txiporvi ea mĩ onãtakĩ oĩkatsa, ẽ mee iti tanákõvaĩanamãsho. Txivõ vakerasĩ patsáya, toteya, txesheka aká ivoro enámamẽse. Askámẽkĩ aa keskáma mĩ meraa ivoro, ‘kerõmaka’, ea mĩ aká roase”, akĩ.
34Ãwẽ askámaĩnõ, “Mã ase, mĩ vana ẽ anõ anõ”, akĩ, ãwẽ rayósenẽ. 35Askái ã vanamẽkĩ naaivo shavapáse cabra vene ãwẽ patsáyavorasĩ, toteyavorasĩ, cabra aĩ oshõ toteyavorasĩ, txivo peshkó isokarasĩ aká arí kavẽkevaíki, ã vakerasĩ inãkãki, Jacopa vimísi iinã. 36Askái 3 shavákaĩi kaatishõ kayaki enevaĩki. Askámaĩnõ Jacóro, ãwẽ rayósenẽ iná wetsarasĩ vesosho nii.
37Askái iwi meã álamo, wetsaro aveleira, wetsaro platano aká ivorasĩ shatevaíki, shokaki oshoka akĩ tõo nẽepakevarãki. 38Iwi meãrasĩ aská ashõ inapa wakapasha akánamã masõsho eneki. Ano wakapasha kesósho atõ aĩvorasĩ ichná amískavo iinã ãwẽ aká. 39Iwi meã aská ashõ ãwẽ eneshoa, iná revokaĩa wetsaro pokeyavo, wetsaro toteyavo, wetsaro patsáyavo aká merávaĩvo. 40Askáki Jacopa aaivorasĩ aríkakĩ ato shokõpakéki. Aská ashõ Labãonarasĩ pokeyavo, isokavo aká ave oĩnõvo iinã vesõvakĩsho ato shokõki. Aská akĩ ãwẽ rayósenẽ inárasĩ oshkesho ivokãkéki. 41Iná vestẽka ivorasĩni atõ aĩ akatsiimaĩnõ Jacopa wakapasha akánamã veyó iwi meãrasĩ masõsho eneki, oramachtasho atõ aĩ anõvo iinã. 42Askámẽkĩ iná yomechta ivorasĩ veyóro, masõshoáma. Aská ashõ, Labão ãwẽ yomechtarasĩ kavẽsho shokõkeshokĩ, vestẽkarasĩro arí viakekĩ. 43Anõsho chinã ashõ onãtĩpai ikãkaĩi awẽ mãaimai shovii, ãwẽ inárasĩ westíma, ãwẽ mee ishõya venerasĩ, aĩvorasĩ aká, camelorasĩ, jumentorasĩ aká iti.
Currently Selected:
Wenía 30: YKV
Highlight
Share
Copy
Want to have your highlights saved across all your devices? Sign up or sign in
Active: © Wycliffe Bible Translators, Inc. All rights reserved
