Wenía 31
31
Jacopa Labão kayashoti ivo yoã
1Askáki txipo Jacopa ãwẽ rayósenẽ vakerasĩ vana nĩkãki. “Nokẽ papã awemẽsho mestẽki, keyoki viãkãkõvarãai”, ikívo. 2Askáki arí ãwẽ rayóse onãtakĩ oĩóki, vevo ãwẽ avé taképaoatõ aoma.
3Aská oĩinã Yavepa Jacó tanamakĩ. “Arimẽse mĩ papanĩsho mĩ ewã maĩ, iokaĩta mĩ wetsama niánamã. Mĩ kamaĩnõ mia ẽ vesokatsa”, akĩ.
4Aská nĩkãvaíki, atõ inárasĩ shokoanamã nishõ Raquelnĩ Lia “neno verína iki”, iinã ato ãwẽ kenaa, 5atõ tachivaĩmaĩnõ ato aská akĩ. “Ramaro matõ papa ẽ onãtakĩ oĩai, vevotiã ea ãwẽ apawa keskáma, enõ noímase, askámẽkĩ ẽ papã ravia Yoveparo ea enekéma, ea vesovaĩvaĩa. 6Mã tanaitĩ, earvi matõ papamẽ yomãnái mee ikiya. 7Askámẽkĩ ea ma parãkõvarãki ãtsaka, 10tíi akĩ, ‘iná mia inãnõ’, iinã ea tanáki teki ashõpakevarãki. Aská akĩ ea ãwẽ ichnák paketsikimẽkĩ Yové Koĩni ea teashokõvarãai. 8Matõ papã ‘ramaro iná toteyavo mia kopíma keskáse ikatsaivere’, ea ãwẽ amaĩnõ, vakeya toteyavomamẽse para ikívo. ‘Ramaro iná pokeyavo mia kopíma keskáse ikatsai’, ea ãwẽ aomaĩnõ anosho katsése pokeyavorasĩ para ikí. 9Askásho Yové Koĩni mĩ papã inárasĩ viãkãsho ea eneshokõvarãai. 10Askávai shavá wetsã, inárasĩni atõ aĩ aká ivo shavapa namáki ẽ oĩa, atõ aĩ matxi papíkenáro pokeyavo, toteyavo, patsáyavo aká ẽ oĩchná. 11Aská ẽ oĩanamãsho Yové Koĩni Yonoa Yovepa ea kenachná. ‘Jacopá’, ea ãwẽ amaĩnõ, ‘ẽe, neno ẽ niá’, ẽ achĩa. 12‘Naa oĩwẽ, iná venerasĩnã, atõ aĩ akayavorasĩ, pokeyavo, toteyavo, patsáyavo aká. Eatsikĩ Labãone mia aská parãkatsiimaĩnõ mia ashõyanã. 13Ea Yové Betelnamãsho mĩ oĩmta ivonã, ano shasho masõnísho azeite shenĩ mĩ voimtá, aská ashõ tekísma ivo vana mĩ nẽemtá. Ramaro kashma avaí naaivo mai enevaĩi kashõ mĩ anõ vaketi ivo maĩ arimẽse iokaĩta’, ea achĩa”, akĩ ãwẽ aĩvorasĩ yoãshokĩ.
14Ãwẽ askái vanamaĩnõ ãwẽ aĩvorasĩni revíki. “Nokẽ papa vopimaĩnõ ãwẽ mekẽya awechta noke yama ikatsai. 15Yora wetsa akátõ noke amíska. Nõ veneyamẽsho ãwẽ viti ivo keyoki ichná akõvarãai. 16Yové Koĩni nokẽ papã awe viãkãa ivoro nokená, nokẽ vakerasĩná aká, askásho mia ãwẽ yonoa ivo keská akĩ ashõtso”, akávo.
17Ãwẽ aská nĩkãinã Jacopa, ãwẽ aĩvorasĩ ãwẽ vakerasĩ aká camelorasĩ matxi ato kãtxiníki. 18Askávai ãwẽ inárasĩ Padã-Arãnamã ãwẽ vivaivaĩna ivorasĩ, awerasĩ aká kawivaĩi, ãwẽ papa Isaquẽ maĩ, Canaãnamã kaí.
19Askámaĩnõ Labãoro ãwẽ txivorasĩ atõ rani mashko anõ iinã ãwẽ kavai wetsanamã. Askái ano ãwẽ nimaĩnõ, atõ voti vevo Raquẽl ãwẽ papã arí ravia ivo iwi yochĩrasĩ onẽkãki, ãwẽ shovonamã. 20Askáki ãwẽ rayóse, arameu yora tanamamase kayashokĩ. 21Kakĩ ãwẽ awerasĩ keyoki kawivaĩi, Eufrates waka pokevaĩi, Gileade mainamã matóyãwakiri kaí.
22Ãwẽ askámaĩnõ 3 shavá tavákeanamãshorívi Labãone Jacó kayavai tanaki. 23Anosho ãwẽ wetsamavo, venerasĩmamẽ mekikinanãvaíki, Jacótxõvaĩvo. Askávai vokĩ, 7 shavákaĩki, txivãtachívo, Gileade matóyãwakanamãsho. 24-25Ano Jacopa peshé aká nokovaĩsho, ano arí peshé aovo, txivãvaĩyavõ. Askái aaivo yamepa ã rayósenẽ namáki ãwẽ oĩa Yové tachikarãsho vanai. “Oĩtso, Jacóki ichnái vanaroa”, akĩ.
26Askáki ãwẽ rayósenẽ, Jacó meravaíki, tanamakĩ. “Awesakĩ ea mĩ parãvarãvai? Ẽ vakerasĩ pakã ashõ kawivarãtõ ea mĩ akãvarãvaikatá. 27Awesainã ea parãvarãai, ea tanamáma mĩ kayashovairá? Okatsiinã ea mĩ tanamavairo mia ẽ saí imakeãvai metsáki, anõ koká ikí ivorasĩ tambornĩ harpa manesho. 28Aská avaikĩ ẽ vavavo, ẽ vakerasĩ aká ea mĩ ato mekí amaómakasevi, iovai. Yora tanasma ivõ tanátinĩ mĩ ikarãvai. 29Mato ichná ati roakamẽkĩ, shaváma namáki ẽ oĩa mĩ papã ravia Yové Koĩni ea tanamavai. ‘Oĩtso, Jacóki ichnái vanaroa’, ea avai. 30Rama ẽ tanasai, mĩ shavá chinãi mĩ ovairívi. Askámẽkĩ awesainã erí ẽ ravia ivo yové yochĩrasĩ ea mĩ onẽvarãvairá”, akĩ.
31Ãwẽ askámaĩnõ ãwẽ rayóse revíki. “Mia rakéshoi ẽ ivairívi, tanamamase kayavai. Mĩ vakerasĩ ea mĩ nĩnĩkãmísi iinã ẽ ivai. 32Askámaĩnõ, mĩ ravia ivo yové yochĩrasĩ ivoro, neno yora wetsanamã mĩ meraa ivoro aaivo yora vopikatsa. Mĩ awe ichnáchta askásevi, nokẽ wetsamavorasĩni oĩníse neno mĩ meraa ivoro, vivaĩtánosho, roase minárvi”, akĩ. Aská akĩ ãwẽ yoãmẽkĩ ãwẽ aĩni onevai tanama.
33Aská aka ãwẽ rayósenẽ, yové yochĩrasĩ meranõ iinã Jacopa peshé nakipari ikosho oĩvãki. Aská avaikĩ Liana ivonamã oĩi, ãwẽ mee ima aĩvo ravévakĩ rakánamã oĩi, ãwẽ akámẽkĩ meráma. Anosho kayakaĩvaí, Raquẽl peshepa erékosho oĩóki. 34Askámaĩnõ camelõ papia anõ awe tĩi aká ivo maĩ rakáa. Aská aka Raquelro aa naki onevai matxi pãtesho tsaóa. Askáki ã peshepa keyoki ãwẽ oĩvãomẽkĩ merama.
35Askáki anosho ãwẽ papa tanamakĩ, “papá, ẽ weníináma oĩinã ea ichnaroa, ea maĩ iki”, akĩ. Askáki ãwẽ yové yochĩrasĩ itimamẽkĩ merama.
36Ãwẽ askámaĩnõ Jacopa ichnákéki ãwẽ rayóse aská akĩ. “Awesa ivo anõ itimatõ ẽ iki mĩ oĩinã? Mĩ tanáti awesa ivo mia ẽ ichnãkãtõsho rateki ea mĩ txivãvarãvairá? 37Ramaro ẽ awerasĩ keyoki ea mĩ meskõkãai, miná keská wetsanã mĩ onãai? Neno potavarãta, awerasĩ, mĩ wetsama, ẽ wetsama aká veyó. Ato ivo anõpáraki ave oĩnõvo.
3820 vari tavái nishõ mia mee ishõkõvarãai. Mĩ txivorasĩ, cabrarasĩ aká, atõ vake para ikí, westíchta pashkatakĩma. Txivo vene askásevi, westíchta richkĩsho mia piãmasevi ẽ ava avaĩchná. 39Mĩ inárasĩ yoini oniparasĩni mia nachãkãmaĩnõ, eãse pãtemaí ená akátõse akí. Variké, yamé aká atõ onea ivorasĩ askásevi, ‘miã kopíma’, iinã ea yokái mĩ avaivaĩchná, chinãtso. 40Askái ẽ nikaikaĩchná, varikéro vari amai, yaméro matsi amai. Awetii yamé ẽ oshá ichná apawarmẽ irawẽ. 41Askáse, 20 vari mĩ shavapa ẽ nikaikaĩchná. 14 vari mia ẽ mee ishõmaĩnõ mĩ vake aĩvake ravévakĩ ea mĩ inãchná. Askái 6 vari mee iosho mĩ inárasĩ viói. Ẽ askámaĩnõ 10tíi akĩ ‘iná mia inãnõ’, iinã ea mĩ tanáki teki ashõpakevarãki. 42Ẽ shenirasĩni Yové, Abraão raviti ivo, Isaquẽ rakéshopawa ivo, ea take akámaro, awe yama akĩ ea mĩ yonokeãi. Askámaĩnõ naaro Yové Koĩni ẽ onís awei mee iki ea oĩvaĩvaĩa. Askáshovísi, shaváma yamé mia vatxĩvai”, akĩ.
43Ãwẽ askái vanamaĩnõ ãwẽ rayósenẽ aská akĩ. “Naa ẽ vakerasĩ, ẽ vavavo, yoinavorasĩ, katsése mĩ oĩarasĩ earvi, ato ivo. Askámẽkĩ arimẽse ea ato kawivaĩtĩpa. 44Askásho ramaro neská tanáti tavámakĩnanãimai nõ shokonõ, anõshorívi noke ave onãtakĩ oĩnõvo”, akĩ.
45Ãwẽ aská akatõsho, Jacopa shasho mashko vivaikĩ nitxĩníki. 46Aská avaikĩ ãwẽ wetsamavorasĩ “shasho mashko masõnióna”, ato akĩ. Aská akĩ ato ãwẽ yonoatõsho, shasho masõnivaíki, aa tavásho piti naí ashõ ashkãsho pii mekikinanãvo. 47Ano aská ashõ Labãone anekiro “Jegar Saaduta”, akí, Jacopa anekiro “Galeede”, akí atõ vanã ishõ anevakĩvo.#31.47 Aramaicõ vana “Jegar Saaduta” ikíro “anõsho chinãmakinanãti mató”, askávaíse Hebraicõ vana “Galeede” ikíro aaivosevi
48Aská ashõ Labão vanaói. “Naaivo matopashõ nõ chinãmakinanãnõ”, iinã “Galeede”, akĩ anevo. 49-50“Yavepa nõ ravé pashkávakĩmaĩnõ noke ave vesonõ. Ẽ vakerasĩ roakĩ oĩma, aĩvo wetsarasĩmẽ mĩ kẽea ivoro, ‘awesaivormẽ’, ẽ ikímẽkĩ, ãatõ ato oĩskatsa”, iinã “Mispa”, akĩ aneóki, Labãone.#31.49-50 Hebraicõ vana “Mispa” ikíro “anõ vesoti ivo shavá” keská 51Askái ãwẽ rayóse vanaói. “Naa masoi, nitxĩi ẽ aká ivo noke tõovakĩ. 52Shashõsho nõ chinãnanãnõ ravé. Eã nerishõ mia meskotĩpá. Miã arishõ ea mĩ meskotĩpásevi noke avévakĩa. 53Nokẽ papavo, mĩ ochtxó Abraão, ẽ ochtxó Naor aatiisho atõ ravipaóa Yové noke meki ashõya ave ninõ”, akĩ.
Ãwẽ askámaĩnõ Jacó vanaói. “Ẽ papa Isaquẽ rakéshopawa ivo Yovepa anemẽsho tavámatima ivo mia ẽ ashõvere”, akĩ. 54Askávaíki matopashõ yoini maki avaikĩ, ãwẽ wetsamavorasĩ ato kenavarãsho atonĩsho pivai oshai.
55Askávai Labão shavá nakoi vesokaĩsho, ãwẽ vakerasĩ, ãwẽ vavavo aká ato mekí apavaíki ãwẽ vana roapa netãvaí, arimẽse iokaĩóti, ã maikirí.
Currently Selected:
Wenía 31: YKV
Highlight
Share
Copy
Want to have your highlights saved across all your devices? Sign up or sign in
Active: © Wycliffe Bible Translators, Inc. All rights reserved
