Wenía 32
32
Jacopa ãwẽ take weníkarãa nĩkãti ivo yoã
1Askái Jacó iokaĩmaĩnõ Yové Koĩni yonoa yovérasĩni meratachívo. 2Askái ato oĩvai vanai. “Nenoro Yové Koĩni shokõa shavá keská”, ikĩ oĩinã naaivo shavá “Maanaim”, akĩ aneki.#32.2 Hebraicõ vana “Maanaim” ikíro “shavá koĩkama ravévakĩ” 3Askáki ãwẽ take Esaú merakatsiinã yorarasĩ ato yonoki. Aaro Seir shavánamã niá, Edom mai naki. 4Aská akĩ ato yonokatsiinã, ato tanamakĩ. “‘Jacó askáikatá’, ea ashõtatsoma. ‘“Earo Jacóvere, mĩ yonoa keská niá ea. Vari ãtsa tavái, nokẽ koka Labãonamã ẽ nikaikaĩna. 5Inárasĩ naatii ea aya. Txasho, jumento, txivo, cabra, askávaíse ẽ mee ima yorarasĩ aká ea aya. Neská akĩ vana mia ẽ yonoshomaĩnõ roai enõ mekítso”, ikikatá’, ea ashõtsoma”, ato akĩ.
6Aská akĩ ato ãwẽ yonovairasĩni oĩtani veshõ yoãshoávo. “Mĩ take nõ meratavai. Ma oa, 400 venerasĩnĩ”, akávo.
7Aská akĩ atõ yoã nĩkãinã, Jacó rakéi ranóma, ãwẽ chinã tsakákẽwãi. Anoshose ãwẽ yorarasĩ avé shokoyavo, ãwẽ txivorasĩ, cabrarasĩ, txashorasĩ, jumentorasĩ, camelorasĩ aká ato oshkevakĩki. 8Aská akĩ arí chinãki, “yora shokoa wetsa ẽ takẽ ato pakã amaĩnõro wetsarasĩro ave poshónõvo”, ikĩ chinãki. 9Askái ano Yavénĩ vanai. “Yavepá, mia ẽ ochtxó Abraãonĩsho, ẽ papa Isaquẽ ravipaóa Yové mia. Ea mĩ aská avai. ‘Arimẽse mĩ maikiri mĩ wetsamavorasĩnamã iokaĩtátso. Ano mĩ nimaĩnõ roakakĩ mia ẽ nitxĩkatsa’, iinã ea mĩ yonovai. 10Earo ichnárvimẽkĩ, enõ noípakĩ petxitima chinãsho ea mĩ vesokõvarãai. Roaka ivorasĩ ea mĩ ashõrívi. Jordão waka txĩtĩchtase otésho ẽ pokemtá, askámẽkĩ ramaro yora shoko ravévakĩ aya ea. 11Ẽ takẽ, ea, ẽ aĩvorasĩ, ẽ vakerasĩ aatii yamamamísi iinã ãwẽ chinã onika ivo ea teashotso. 12Mĩ chinãsaitĩ, ‘minõsho revokaĩarasĩ yorã tanátĩpa machi pototii ikatsai’, mĩ iti”, akĩ.
13Askái aaivo yamé ano oshavaíki vesokaĩki ãwẽ inárasĩ wetsa kashma akĩ kavẽki, Esaú anõ onis akí kanosho iinã. 14Aská akĩ 200 cabra aĩ, 20 ãwẽ vene, 200 txivo aĩ, 20 ãwẽ vene akĩ ato kavẽpakéki. 15Aská avaikĩ 30 camelo aĩ, ãwẽ shoma akayavorasĩ, 40 txasho aĩ, 10 ãwẽ vene, 20 jumento aĩ, 10 ãwẽ vene aatii kavẽsho ato oshkepakéki. 16Aská akĩ yoinavorasĩ ato oshkepakevaíki ato ãwẽ mee ima yorarasĩ ato vesomapáki. Askávai vanai. “Neská atsoma vevovaĩi, wetsa atxõ, wetsa atxõ akí orapachta shokovaĩtsoma”, iinã ato tanamakĩ.
17Aská avaikĩ vevokaĩya ivo tanamakĩ. “Ẽ takẽ veyatachísho mia nĩkãkatsa. ‘Tsoarkĩ mĩ kakáyanã? Awetonamã mĩ kaará? Tsoanárkĩ naa yoinavorasĩ mĩ kawivãanã?’ iinã mia ãwẽ nĩkãmaĩnõ, 18neská akĩ revítso. ‘Naa yoinavorasĩro Jacó, mĩ yonoa ivo keskáná. Mia ivosho, anõ mia onis ati, miaravĩki ãwẽ yonoa nõ kawivarãa. Aa askásevi, aa noke txipo oa’, atso”, akĩ yosĩki. 19Aská avaikĩ atxõ shokoyavo wetsa, atxõ shokoyavo wetsa, iná vesoyavorasĩ aatii ato tanamaóki. “Matõ Esaú nokovaĩsho inárasĩ askásevi akĩ yoãoshotsoma. 20Askávaíse, ‘Jacó noke txipo oa’, aotsoma”, akĩ. Aská akĩ, “onis akĩ awe vevo ẽ yonoshoatõsho, ẽ take rawekatsa taíse. Ẽ meramatõsho, enõ mekískatsa taíse”, ikĩ chinãki. 21Aská akĩ anõ onis ati awerasĩ vevo yonovaí peshénamã oshai.
22Askái aaivo yamepáse weníkaĩki Jaboque ivo teã atonĩsho pokevaĩi, ãwẽ aĩvorasĩ, ato ãwẽ mee ima ravévakĩ, ãwẽ vakerasĩ 11 akánĩ. 23Askávaíki arimẽse iokaĩsho, ãwẽ awerasĩ pokékemaóvai 24aríse niakéi txipo. Askánamãsho yora wetsa tachikarãsho avé wea ikinanãi, ii ii shavá mashtévo. 25Aská akĩ wea akĩ akátĩpa tanainã ãwẽ kichi shao txiwánamã tsipískãki. 26Aská avaí vanai. “Ea ene, ma shaváai”, ãwẽ imaĩnõ, “vana roapa ea mĩ netãma ivoro, ea mia enetĩpa”, akĩ Jacopa.
27“Mĩ ane awerá?” ãwẽ imaĩnõ “earo Jacó”, akĩ.
28“Rama mia anekiro ‘Jacó’ mia aotĩpá. Venerasĩ, Yové akánĩ mĩ wea ikinanãki miãse mĩ aka, askásho rama mĩ anero ‘Israelvere’”, akĩ.#32.28 Hebraicõ vana “Israel” ikíro “Yovénĩ wea ikinanãa”
29Ã aská akatõsho, “miã mĩ ane awerá”, iinã ãwẽ nĩkãtõsho, “awesainã ẽ ane mĩ nĩkãtsikirá?” akĩ. Aská avaikĩ anosho ãwẽ vana roapatõ Jacó netãki.
30Ãwẽ aská akatõsho, Jacó vanai. “Yové Koĩ kayakavi ẽ oĩmẽkĩ, ea vopima”, iinã aaivo shavá aneki “Peniel”, akĩ aneki.#32.30 Hebraicõ vana “Peniel” ikíro “Yovepa vesó” 31Askái shavá nakoi vari tachiinámaĩnõ Jacó Penielnamãsho#32.31 Hebraicõ vana “Peniel” wetsaro “Penuel” nití nitii kaí, ãwẽ kichi shao tsipískméyasho. 32Askásho rama shavapa Israel yorarasĩ kichi txiwá nami pimísmavo, ano ãwẽ tsipískmemtakiri chinãsho atõ ikí.
Currently Selected:
Wenía 32: YKV
Highlight
Share
Copy
Want to have your highlights saved across all your devices? Sign up or sign in
Active: © Wycliffe Bible Translators, Inc. All rights reserved
