João 11

Lázaro vopiti ivo yoã

1Aská yora Betânianamã niaya, ãwẽ anero Lázaro isĩ tenei. Ãwẽ aweshavovoro Maria, Marta aká. 2(Aaivo Mariaro isĩ teneyatõ take, ene inĩkatõ Jesusnẽ tae voivaíki ãwẽ võose toshkoya ivo.)

3Askáki ãwẽ aweshavovõ Jesus aská akĩ vana yonoshoávo. “Yora Ivó, mĩ anõ noíka ivo isĩ teneai”, atõ ikí nĩkãinã 4askái vanai. “Isĩ teneai ãwẽ askámẽkĩ vopima ikatsai. Anõsho ãwẽ aká oĩsho Yové Koĩ ravikatsavo. Askánamãshorívi, ãwẽ vake askásevi aokatsavo”, ikí.

5Aská Jesus, Marta, Maria, Lázaro akámẽ noíkamẽkĩ 6ato rayá chinãvaĩma. Ãwẽ niánamãsho shavá ravévakĩ tavái niisi, Lázaro aská kakáa nĩkãsmẽinã. 7Askávaíki ãwẽ shokõkenavo txipo ato aská akĩ. “Arimẽse Judeiakiri nõ iovaĩónõ”, ato ãwẽ akátõsho 8“yosin ikiyá, ramapase judeu vevokerasĩni shashõ tsakaki mia yamamakatsívaivomẽkĩ arimẽse mĩ iokaĩkatsikírkĩ?” atõ akátõsho 9ato revíki. “Varikawãa westíkase 12 horastserã? Variké yora niáro oshkorósma, naaivo mai shavapa amo naopa niásho. 10Askámaĩnõ yamé niáro oshkoromtsãwa, amõ naó yamasho”, atõ akĩ.#11.10 Naaivo vanaro Jesus arí tanái ãwẽ vanati, “ea amo keská”, iinã. Yorarasĩ avé shokoshoro, ichnáki pakésma. 11Askái mashtévaí vanainaói. “Nõ avé takéa Lázaro oshamẽkĩ ẽ vesõi kakatsai”, ato ãwẽ akátõsho 12“Yora Ivó, ‘oshaai’, mĩ ikí roase, tãti akatsai”, akávo. 13(Jesus askái vanaro “Lázaro vopiai”, iinã ãwẽ ikí. Askámẽkĩ atovõ chinãkiro “oshaa”, ãwẽ yoãravã akávo.) 14Anosho Jesusnẽ meki akĩ ato yoãshokĩ. “Lázaro vopiai. 15Ẽ ano niáma ivaisho mekíai ea, anõsho ea mã anõ akatsai iinã. Rama nõ oĩi vonõ, ano”, ato akĩ.

16Ãwẽ aská nĩkãinã Tomé, “Ravé Pakéa#11.16 Ravé pakéa Gregõ akáro “Dídimo.”” ivõ avé yosĩnáya wetsarasĩ akí, “kaõ. Noke yosĩyanĩrvi nõ yamai vonõ”, ato akĩ.

17Askái ano nokókaĩsho “Lázaro atõ onevai ma 4 shaváai”, ikí nĩkãki. 18(Betâniaro Jerusalém orakama, 3 quilômetropáchta tanáti. 19Askásho judeurasĩni Martanĩ Maria onísmaĩnõvo atõ ronaa tãti amai ano kãtxívo.)

20Askánamãsho Marta “Jesus oa”, ikí nĩkãinã veyai kaí. Askámaĩnõ Mariaro ano shovõse. 21Askákaĩi kakĩ Martã Jesus nokovaĩsho aská akĩ. “Yora Ivó, mia nenose mĩ niáro ẽ take vopima ikenkeãvai. 22Askámẽkĩ miã Yové Koĩ mĩ tanamáa ramase katsése mia ãwẽ ashõkatsa ẽ tanasai”, ãwẽ akátõsho 23“mĩ take nioinaókatsa”, ãwẽ imaĩnõ 24“ẽe, aaro ẽ tanasai, enékaĩa shavapa weníokatsarvi”, akĩ ãwẽ revíatõsho 25“eatsikĩ, wenímaiya, awetima akaya akánã. Ea anõ akayaro vopismẽinã weníokatsa. 26Askái ea anõ akí niayaro, veítĩpá. Neská ivonã mĩ anõ atirá?” ãwẽ akátõsho, 27“Yora Ivó, miaro Cristo ẽ tanai, Yové Koĩni vake naaivo mai shavapa oá ivo tanaói ẽ aka”, akĩ.

28Aská avaini kashõ ãwẽ take kenavaíki aská akĩ. “Yosin ikiya neno nokói oshõ mia kenaai”, akĩ. 29Maria aská nĩkãinã vestẽi weníinavai kakĩ Jesus merai kakĩ. 30(Askámaĩnõ Jesusro Betânianamã nokókaĩma, Martã veyatachianamãse nii.) 31Askámaĩnõ judeurasĩ Mariã shovõ ronaa tãti amai kãtxíyavorasĩ askái vestẽkai weníinakaĩi ãwẽ kaa oĩinã atxõvaĩvo, “ãwẽ take onévainamãsho wai iki kaai”, ravãki. 32Askákaĩi kakĩ Jesus niá nokovaĩsho aa veyó pakéi kashõ “Yora Ivó, mia nokenĩse mĩ niáro ẽ take vopima ikenkeãvai”, akĩ.

33Aská Maria wai ikí, avé voayavo judeurasĩ wai ikí aká oĩinã Jesus onísi chinã naíkatõ ikí. 34“Atonamã mã roa avai?” ato ãwẽ akátõsho “Yora Ivó, neno oĩi kawã”, atõ imaĩnõ 35wai iinái. 36Askái ãwẽ wai imaĩno yorarasĩni “anõ noíkasho ãwẽ ikíki, oĩ”, ikívo. 37Askámaĩnõ wetsarasĩ “yora vesho ãwẽ roa aka nõ oĩvaimẽkĩ Lázaroro awesakĩ ãwẽ tenãrkĩ?” ikívo.

38Aská nĩkãinã Jesus ronã atxivarãóa tanainã ãwẽ onéa shasho pepinamã kaí. Anõ atõ kepovai ivo shasho anika kepióa. 39Aská anosho “naa shasho vepẽvãna”, ato ãwẽ akátõsho vopivaiyatõ aweshavo Marta askái. “Yora Ivó, ma ichnákawãai, ãwẽ anõ onévai ma 4 shaváaikatá”, ãwẽ akátõsho, 40“‘ea anõ akí mĩ niáro Yové Koĩni weeyai nishõ aká mĩ oĩkatsa’, ẽ ikitĩ”, akĩ. 41Aská avaikĩ shasho pepi anõ ãwẽ kepóa ivo shasho sherekévo. Askánamãshóse Jesus naíkiri oĩnivaí askái vanai. “Papá, ea mekíai, ea mĩ nĩkãtõsho. 42Ẽ tanasai, askatase mia ẽ yokáa ea mia nĩkãmtsãwa, askámẽkĩ neskái ẽ vana, naa ea kesó shokoarasĩni ‘“Yové Koĩni yonoáse”, ikĩ ea ave anõ anõvo’, iinã ẽ vanavere”, akĩ.

43Askái vanai enetaníse isĩinasho vanai. “Lázaró, kayakarã”, ãwẽ imaĩnõse, 44vopivaiya kayakarãi. Ãwẽ mevi, ãwẽ tae aka õpo kashkerasĩni rakópakéa, ãwẽ vemanero õpo kashke westítõse verákmeóa. Askámaĩnõ Jesusnẽ “kochana, ave katãnõ”, ato akĩ.

45Askávai judeurasĩ ravétõ Maria oĩi vevaiyavõ Jesusnẽ aská aká oĩinã anõ ayakeávo. 46Aská ravétõro Jesusnẽ aská aká ivo fariseurasĩ yoãshoi voávo. 47Atõ askámaĩnõ fariseurasĩ, Yové Koĩ ato vana ashõya kakáyavorasĩ aatíisho judeu vevokeparasĩ#11.47 Naaivo esé vana meki akayavorasĩni anero “Sinédrio.” ato kenavarãsho kãtxísho vanavo. “Nõ awesakatsai? Aa yorã ãwẽ yové akarasĩ ãtsaka akĩ ato oĩmaai. 48Ãwẽ aská akarasĩ nõ teakémaro ashkãsho anõ amísivo. Romanorasĩni aská nĩkãinã nokekíse vesokéki, Yové Koĩni shovo, nokẽ mai aká noke ivõkemísivo”, ikívo.

49Askáki atopa yora wetsa, Caifás, Yové Koĩ ato vana ashõya kakáyapa ivo vanainái. “Mato tanama. 50Noke ashkãka noke keyóro roakamáse. Yora westíse ashkãmẽsho ikí ãwẽ vopiro roapáse”, ato akĩ. 51Askái ãwẽ vanaro arí chinãne ãwẽ ikíma, aatiã Yové Koĩ ato vana ashõya kakáyapa ivosho “nokemẽsho ikí Jesus vopi askákatsa”, iinã vevo ãwẽ yoãrívi. 52Judeurasĩ westíchta ravĩi ãwẽ ikatsaima. Yora õsi õsipa Yové Koĩni vakerasĩ maitioi peás ikí shokoyavo westíse keská iyakekatsai yoãnávere.

53Aatiã ãwẽ aska aka oĩinãse “Jesus nõ yamamanõ”, ikí vanai shovivo. 54Aská ato nakosho niátĩpase oĩinã, Jesus kaí, askata wenẽ kesotõ “Efraim” akĩ atõ anea shavapa ãwẽ shokõkenavonĩ nii kaí. 55Aská ano ãwẽ niátiã Jerusalémnamãsho Páscoa saí iki shavá omakaĩmaĩnõ judeurasĩ ano võo või, saí ikatsai vevo “nõ kashmai yoínõ”, iinã. 56Askái ano Yové Koĩni shovo veyó shokosho Jesus itimavaí arí vanavo. “Awesakatsí mã chinãnã? Okatsairmẽ, neno saí ikinamãnã”, ikívo. 57Anoshósevi Yové Koĩ ato vana ashõya kakáyarasĩ, fariseurasĩ aatíisho kepokatsikívo. Askáinã “Jesus meravaíki noke yoãshotsoma”, ikí shokovo.

Currently Selected:

João 11: YKV

Highlight

Copy