João 12

Betânia shavo Jesusmẽ eséyati ivo yoã

1Askái Páscoa saí iki omakaĩa, 6 shavákase iyakeanamãsho Jesus Betânianamã Lázaro ãwẽ wenímachĩa ivo niánamã nokókaĩi. 2Ãwẽ askámaĩnõ, piti kashma avaikĩ Martãro ato take akĩ tsaõki. Lázaroro avé tsaósho pikĩ. 3Askámaĩnõ Mariã ene inĩka vaná “nardo” akĩ atõ anea meĩnáma oraka ivo otopa tsaóa vivaikĩ Jesusnẽ taeki voivaíki ãwẽ võose toshkoki. Ãwẽ aská aká shovo naki inĩse tsaói. 4Ãwẽ aská amaĩnõ Jesusnẽ shokõkena wetsa Judas Iscariotes aatishõkamase yomẽ akatsaiya ivo askái vanainái. 5“Naaivo ene orakarvi. 300 prata kopímatirvi. Anõsho kopímati vivaikĩ yora onís aweyavorasĩ onis atiki ikíkĩ?” ikí. 6(Ãwẽ askái vanaro yora onís aweyavorasĩ ato onis akatsi ãwẽ ikímarívi, kopímati vesoshokĩ atõ nanea ivorasĩ kerõmakãi nishõ ãwẽ ikí.) 7Ãwẽ askái vanamaĩnõ Jesusnẽ “aa Maria meskoroa. Ẽ vopikatsakiri chinãsho ãwẽ akárvi. 8Yora onís aweyavorasĩ matonĩ shokoserívi, askámaĩnõ matonĩ askatase ea niátĩpá”, ato akĩ.

9Aská Jesus “Betânianamã niá”, ikí nĩkãinã yorarasĩni chinãvaĩvo. Jesus westíkase atõ chinãvaĩmasevi, Lázaro ãwẽ wenímavai ivo “oĩi anõ”, iinã atõ voá. 10Askáinã Yové Koĩ ato vana ashõya kakáyavorasĩni, “Lázaro nõ yamamanõ”, ikívo. 11Aaro awesáma, Lázaromẽsho yora ravétõ atõ kakáyarasĩ enekésho Jesus anõ ayakéavo iinã atõ aká.

12Askái shaváma yorarasĩ saí ikinamã kãtxívaĩyavõ “Jesus Jerusalémkiri oa”, ikí nĩkãinã, 13ashkãsho epe pei keská ivo “wekõshonõ”, iinã vivaikĩ “Jesus nõ veyanõ”, iinã oi shokonívo. “Hosana! Yora Ivõ anemẽsho oá ivo, Israel kakáyaro, Yové Koĩni roapa ivo ashõtiki irawẽ”, ikívo. 14Atõ askámaĩnõ, Jesusro jumento vake nokotachísho anõ tsaóinái, vana neemta ivo yoãnatõse ikí. 15“Rakétsomároa Sião#12.15 “Sião”, ikíro Jerusalém ane sheni. yorarasĩní, matõ kakáya jumento vakẽ tsaósho oa”, ititõ ioi. 16(Jesus askámaĩnõ ãwẽ shokõkenavo vana neeakiri chinãma ikívo, askámaĩnõ vopivai, naí shavapa ãwẽ kamaĩnõ txiporvi ãwẽ ati ivorasĩ chinãi, ãwẽ vana neeakiri chinãi ativo.) 17Aská Jesusnẽ Lázaro anõ onéa pepi kesó nishõ kenaki ãwẽ wenímavaitxĩni, ashkãsho oĩvaivõ kakavo. 18Askáshovísi yora ravétõ chinãvaĩvo, “ãwẽ aská avai roaka”, ikí nĩkãinã. 19Atõ askámaĩnõ fariseurasĩ ravé arí tanamakĩnanãvo. “Oĩ, nõ teaki atimaai, ashkãsho chinãvaĩvaĩsaivo”, ikívo.

20Aská Jerusalémnamã Páscoa atõ saí imaĩnõ, Grego yorarasĩ “Yové Koĩ nõ ravinõ”, iinã ano shokoóvo. 21Askái atovõ Galileia mai naki Betsaidanamã niaya Filipe chinãvaĩsho meravaíki anõ eséyakĩ vana akĩ. “Jesus nõ oĩnõ, noke oĩma”, iinã atõ yokátõsho 22Filipenĩ André tanamavaikĩ avésho Jesus ãwẽ chinãvaĩatõsho 23ato aská akĩ. “Rama ‘Yorã Vake’, ikí anea ivo, ãwẽ papa anõ eséyati ivo shavá nokóai. 24Neskávere nĩkãtsoma. Trigo eshe maĩ pakésho ãwẽ shaká ichnámaĩnõ vimisho revokaĩkatsa. Askámaĩnõ ãwẽ ichnáma ivoro aa westíse nii nikatsa. 25Yora naa mai shavapashõ arí noítái niaya ivoro veíkatsa, askámaĩnõ, arí noítáimai niayaro, awe mekétatõ ikí awetima ikitákatsa. 26Ẽ yonoa yora shovikatsiinãro ãwẽ etxõti. Ẽ niátipai aaivo yora evése nikatsai. Aaivo yora ẽ papa anõ eséyakatsai. 27Rama ea chinã naí raképatõ iki. ‘Aaivorasĩ ea pashama, papá’, ikĩ nĩkãpá? Aama, ‘ẽ askánõ’, iinãvísi ẽ oárvi. 28Papá, yorã mia oĩtati ivo ato oĩmatso”, ãwẽ imaĩnõ naĩsho vanainái. “Ase, ato ma ẽ oĩmaai. Txipo askásevi akĩ ato ẽ oĩmaókatsa”, ikí. 29Ãwẽ askámaĩnõ, ano shokoyavõ ashkãsho naĩsho ãwẽ askái vana nĩkãvai neskái vanavo, “naí terẽ iki taíse”, wetsarasĩ ioiro “naĩsho yonótaya yové avé vanaa taíse”, ikívo.

30Atõ askámaĩnõ, Jesusnẽ “enõsho oámarívi aaivo vana, matomẽsho ãwẽ oa. 31Naaivo mai shavapa yorarasĩ itimatõ atõ imaĩnõ Yové Koĩni ‘awesavevakĩtiskárki oĩnõ’, ikĩ ato chinãshokatsai. Ramaro naaivo mai shavapa kakáyai niaya ivo kayãnakõkatsa. 32Askámaĩnõ maĩsho ea atõ ronõnímaĩnõ ashkã akĩ ato ẽ shokõvarãkatsa”, ato akĩ.#12.32 “Ronõinákatsa”, ãwẽ ikíro iwi mekóchkiti yoí ãwẽ ikí. 33(Askái ãwẽ vanaro “neskái ẽ vopikatsa”, iinã ãwẽ ikí.) 34Ãwẽ askámaĩnõ, ano shokoyavorasĩni aská akávo. “Nokẽ esénamã yoãnáro neská ‘Cristo awetimai nikatsai’, ikí. Awesainã ‘Yorã Vake ronõníkatsavo’, mĩ ikírá? Tsoa yoí mĩ ikíra?” atõ akátõsho, 35“amo matonĩ aatishõkamase nikatsai. Askásho ãwẽ naopa shokotsoma, vakíchinĩ pakékemísi mato. Aaro awesáma, vakíchinamã niáro ‘atonamã ẽ kaarmẽ’, ikĩ oĩtĩpá. 36Mato amo ayamaĩnõse anõ atsoma. Mã askáro amoyai mã shokokatsa”, iinã tanái askái vanavaíse kaí, yorarasĩ ato onéshokĩ.

37Aská Jesusnẽ yové akarasĩ katsése atõ oĩvaĩvaĩmẽkĩ anõ akáma ikívo. 38Atõ anõ ayamáro awesáma, Yové Koĩni vana teki akaya Isaías ivõ yoãti ivo ave nokónõ iinã ikí. “Yora Ivó, nõ yoã ivo wetsãchta anõ akáma ikivo, mĩ wee ato oĩmamẽkĩ”, iti. 39Askáshovísi onãtakĩ oĩsho anõ akáma ikívo, Isaíasnẽ yoãti wetsa keskásevi. 40“Ãatõ ato vesho akí, atõ chinã kepõi akĩ oĩsho tanamísivo ikĩ, arimẽse vesokeómaĩnõ ‘ato ẽ roa amísi’, iinã”, ioti. 41Isaíasnẽro awesainã ãwẽ yoãtima, Jesus weeyai nimaĩnõ oĩsho “askái”, ikĩ ãwẽ ati yoãki. 42Askámaĩnõ judeu vevokerasĩro ãtsashósevi Jesus anõ akávo, askámẽkĩ ashkã akĩ ato tanamáma ikívo. Fariseurasĩ rakéshoinã, “sinagoganamãsho noke poshakõmísivo”, ikĩ atõ chinãtõ askávo. 43Yové Koĩni ato ravitikiríro chinãkamase ikívo. Arí atõ ravínanãtikirise chinãvo.

44Anosho Jesus isĩinasho vanai. “Ea anõ akaya ivoro ea westíse ãwẽ anõ akamarívi. Ea yonoya ãwẽ anõ aorívi. 45Ea oĩya ivo ea yonoyasevi ãwẽ oĩorívi. 46Earo naaivo mai shavapa amo keskái ẽ oá, ea anõ akaya ivo vakíchinamã niomísi iinã. 47Yorã ẽ vana nĩkãki anõ ayamámaĩnõ eã ‘yostanõ’, ikĩ ato chinãshoatĩpá. Ea naaivo mai shavapa oshõ ato aská anõ iinã ẽ oámarívi. Ato shavá amanõ iinã ẽ oárvi. 48Askámaĩnõ ea ichnaki ẽ vana anõ amísma ivo yostakatsaya ayase. Ẽ vanã yorã akátõ akĩ keyókaĩa shavapa ato yostakatsa. 49Aaro awesáma, erí chinãne ikí ẽ vanamarvi. Ẽ papã ea yonoyasho, ãwẽ yosĩa ivo ẽ yoãrívi. 50Eãro ãwẽ esé vana ẽ tanasai, awetima akaya ivo aaro. Askásho neskái ẽ vanaa ea ãwẽ yonoatõse ẽ ikírvi”, ato akĩ.

Currently Selected:

João 12: YKV

Highlight

Copy