João 17

1Askávai vanai mashtékaĩvaí, Jesus naíkiri oĩnii vanaói. “Papá, ẽ shavá ma nokóai. Ea yorã oĩtati ivo shovimatso, enõsho yorã oĩtati ivo mia shoviónõ iinã. 2Aaro awesáma, katsése yorarasĩ ato yonoya ea mĩ nitxĩa, anõsho yora ea mĩ kavẽshoa ivorasĩ ave awetima ikitánõvõ iinã. 3Askái awetima chinãro neskávere. Mia Yové Koĩ westíse ivo anõ akí, ea Jesus Cristo ato mĩ yonoshoyãta ivo anõ akí ave anõvo. 4Mee iti ea mĩ eneshoa ivo mashteki, naa mai shavapashõ yorã oĩtati ivo mia ẽ shovimaai. 5Papá, ramaro vevo aská shovimatiã yové naó txiwánanãsho nõ shokotitõ ikí, yorã oĩtati ivo ea shovimaótso. 6Askásho eã naa ivo mai shavapa ea mĩ eneshoa ivorasĩ ave tananõvo iinã mia ma ẽ oĩmaiya ato. Atovoro minárvimẽkĩ ea mĩ eneshoáya, askásho mĩ vana anõ akõvarãaivo. 7Ramaro aská, vana katsése ea mĩ eneshoarasĩ ‘Yové Koĩmẽsho veárvitserã’, ikĩ tanaaivo. 8Askásho vanarasĩ ea mĩ eneshoti ivo ato ẽ yoãshoa anõ akavo. Minõsho ẽ oyãtá ivo anõpakĩ tanakoĩi, ea mĩ yonomtá anõ akí amískavo aká.

9Naaivo yorarasĩ ato mia ẽ tanamashõvere. Enáma ivorasĩ mia ẽ ashõmarvi. Ea mĩ eneshoa ivo yorarasĩ ato ẽ ashõrívi, minárasĩ chinãsho. 10Yora ẽ shokõkena ivorasĩ minásevirvi, mĩ shokõkena ivorasĩ enáserívi aká. Aská atomẽsho yorã oĩtati ivo ẽ shovirívi. 11Ramaro aská, mianamã ẽ kakatsai. Atovoro naa mai shavapa shokoskatsavo, askámaĩnõ earo neno nioma ikatsai. Papá, awesá ivorvi mia. Noke nõ ikítõ ikí westíse keskái ave shokonõvo iinã aa mĩ inãti ivo weemẽsho ato vesotso. 12Askái atonĩ mai shavapa nishõ, aa ivo mĩ eneshotimẽsho ato ẽ vesovaĩvaĩa. Askáki wetsa pashkatakĩma, ato ẽ vesokõvarãmẽkĩ westíkase veíya, ‘askákatsa’ ikí vana neea ivo ave nokónõ iinã. 13Askámaĩnõ ramaro aská, mianamã ẽ kakatsai. Neskái anõ ẽ vanayáro, naa maĩsho ẽ ikírvi, ẽ metsá ave anose kesonõvo iinã. 14Ẽ shokõkenavo mĩ vana ato ẽ eneshoa. Askámẽkĩ naa mai shavapa ea anõ amísma ivorasĩniro ato roa akáma ikivo. Aaro awesáma, ẽ shokõkenavo ẽ ikítõ ikí neno aa yoramásevirvi. 15‘Ea anõ amísma ivorasĩ shokoanamãsho ato kawinítso’ iinã ẽ ikímarívi, ‘Satanás ato teashotso’, iinã ẽ ikírvi. 16Atovoro ea keskásevi, naa mai shavapa shokoyavomarívi. 17Askái mĩ anõpa ivo vanãsho miaravĩki ato shokõtso. Mĩ vana aaivoro anõpa ivoserívi. 18Askáki naa mai shavapa yorarasĩ ea mĩ yonomtatõ akĩ, eã ato ẽ yonoóa. 19Mia ravĩi ẽ ninõ, mĩ anõpa ivo vanãsho ‘mia ravĩisevi ave ionõvo’, iinã. 20Naarasĩchtase mia ẽ yokáshoamarívi. Atovõ wetsarasĩ yosĩómaĩnõ ea anõ amaĩnõvo, ato mia ẽ yokáshoóa, 21westíse keskái ave shokonõvo iinã. Askái ea mivé txiwánanãsho nõ shokoatõ ave ionõvo. Atõ askámaĩnõ naa mai shavapa ea anõ amísma ivorasĩni ea mĩ yonomtá ivo ave anõ anõvo. 22Enõ eséyakĩ ea mĩ nitxĩa keská akĩ atomẽ eséyakĩ ato ẽ shokõai, noke westíse shokoi ikítõ ikí ave shokoónõvo iinã. 23Askásho, ea ato txiwásho nii, mia ea txiwásho nii nõ akáro aská, chinã westíse toĩsho anose kesosho shokokatsavo. Aská oĩinãro naa mai shavapa shokoyavorasĩni ‘ãatõ yonomtátserã’, ikĩ mia chinãshoí, ‘enõ mĩ noíatõsevi ikí atomẽ noí aoi’, akĩ tanakatsavo. 24Papá, yorarasĩ ea ato mĩ eneshoa ivo ẽ niátipaíse evése shokotikiã ẽ iki. Yové naóyakĩ ea mĩ nitxĩa ivo ave oĩnõvo. Aaro awesáma, naa mai shoviti vevo enõ mĩ noíserívi. 25Papá, miaro chinã meki. Mai shavapa shokoyavõ mia tanama, askámaĩnõ eãro mia ẽ tanaai. Naarasĩni askásevi, ‘ea mĩ yonomtá’, tanaóaisevi. 26Mia ave tananõvo iinã mia ma ẽ oĩmaiya ato. Ato mia ẽ oĩmaókatsa, mĩ enõ noíatõsevi ikĩ arí noínanãi ave shokoónõvo iinã. Ea askásevi, ato txiwásho ẽ niokatsa”, akĩ.

Currently Selected:

João 17: YKV

Highlight

Copy