Luka 11

Küĝüw go dadrüw

1Sünda i jaga a ye küĝüngkoi. I küĝüfiahuñe, í shürhaw namko yo a ye í che, “He Tawgyewwa, Yohan i í shürhaw ná küna veduw küĝüdrüdama baje ñi süna veduw küĝüdrüwe.” 2I í che, “Djo küĝüwñe, chejodawe:

‘He Tawgyewwa,

Bañiñ güdraw vejome, ba ĝadzü kakülyawe.’

3‘Ñi shüwa yo tsaw-tuw djüijodawe.’

4‘Sünda ñi lalo na muchoaijo dawe,

Hado chemeje ñi je, ñi mauw dado na muuchoaijome,

Sünda ñi mauw daw yo ĝaksüiwe.’”

Prünggudruwe

5Sünda i ná che, “Djumko ye üdraw a duw ye djuwa, sünda i ñegingko ge pakülyeñe ichi ge ji í che, ‘He drawa; no oje üla dzü djüwe. 6Hado chemeje, kahiw ge draw a ye nochi ge jikuda, sünda uvro ge veijo nochi ge haje ñi.’ 7Sünda i djeañe ñu che, no duhu djudjüwe che; hesalu ñegüdrüŝü je dugoajemme, sünda nosa na nodra buĝo ge ĝüsadame, sündada no bá pakülyeñe haje madjüfijomme. 8No ba trungkoime, üdraw dalyeñe je í pakülyeñe haje madjüfisabamme, í shüwa dunggudruw bo i küña tsüdama süña ye pakülyeñe djüjoŝome. 9Sünda no djo cheime; prümeje, djo djüjome; tchümeje djo pajome; dümeje, djobo voaijome. 10Hado chemeje dju prüima, ná pajome; sünda dju tchüima, na pajome; seyo dju düima, nabo voaijome. 11Djomkoye dju ana awu duwa, üsaw oje prülaimeje, kunnu djü, seyo tchü prülaimeje, byu djü? 12Jeje prülaiye, mütü güdzü djü? 13Sünda, ba maulyeñe je basa ná gye-ĝuvo uw djüjo danghumeje, djo ñedzü go Awu, í nudzo nüna prüi ná hado ĝulo güdraw madjüjowa.”

Jisu ñe mütü na go dyewfo

14I mulyo uĝulo mauw a lahuatcho; mütü ye kahuahuñe, mulyo ye ütrü zekülye; sünda nüna mavenghuatsü. 15Séŝo namko ye küña na cheda, “I bo uĝulo na mütü ubo yo lahuahuba.” 16Utro na í dafima hojoñe í ñedzü udru ge hadamge sheweñe che prü. 17Séŝo i, nadrü-nalü ge vedaw i danghulyeñe, na che, “Ha ha ĝadzü ge baĝüima, se ĝadzü ye mauw lyajobamme; sünda ha ñe ye baĝüima, se ñe ye je mauwlyajobamme. 18Sünda mütü ye í nudzo í lusuvyutchome, í ĝadzü kündañe ĝyojowa? Hado chemeje djobo nó mütü udru yo uĝulo mauw na lahuahuba cheibi. 19No mütü udru yo uĝulo na lahuameje, nameje djosa na djudru yo kakülyada? Sündada djobo uw mauw ná na hovojobamme. 20Séŝo no Tawgyew udruyo yo uĝulo mauw na lahuameje, Tawgyew i ĝadzü djotrü ge kakujome. 21Nüna gow na ñe i ĝaksüw vetsüñe-müñe shela ĝyomeje, üsaw-üsam na ĝaksüjome. 22Se i gofo djuma í tumuvojoñe í foahuñe, í se vetsü-mu djú i veksüdama, se ye ñiatralye sünda í veksüw ye habraĝia. 23Dju nodra ñima se ye no veñiwme, seyo dju nodra ma güdrüma se ye kahu-kanuĝiajome.

Ñiŝüksüñ ĝulo ñe tchüw

24“Nüna usso go ñiŝügzüñ ĝulo kahuahuñe nokro ge ĝyogojo tchüĝijome, sünda mapawñe i chejome, no ha ñe yo kahua dama se ñe ge kamyotchojome. 25Sünda kakuwñe i gümsa-gümĝañe howsa hohujome. 26Sünda i kakuñe udra ye je uĝulo mauw mro lakujome, sünda na kamyoñe sayo sa ĝyojome, sünda se nüna ye uvro gow ije mauwfo yo je mauw lyajome.” 27I he ñu i trungkoi ye upu go mim a ye gow yo che, “Ulu yo uw cheime djulhudrü ge ba ĝyodama seyo ha apu i ba mütsüdama.” 28I che, “Am; séŝo ulu yo uw cheime, dju Tawgyew i ñu dzühuñe i chew dzüma.”

Ñedzü go ñu prüw

29Nüna upu gutsüwñe, i che, “He ñeto yo nüna maume; na chi shew tchünggudru; se ná Yona i chi shew í tralye haje ch mashejome. 30Jona í küna veduw Ninwe ñetrü go chi shew vewma, sünambo nüna üsa ye he ñeto yo nüna chi shew vedujome. 31Müdza go nugom niyay djüw ñeto ye gudzukülyeñe, na mauw dadameñe chejome, hado chemeje i Suleman i ñu dzü druguw-drulyiw udza go jikuda, sünda holabya ha yo ha a Sulema ije dyewfo a du. 32Ninwe go nüna na Niyay djüw ñeto ye hesalu yo nüna nadra gudzuñe, naso ge truchoaijome; hado chemeje na Yona i ñu tru í dzüñe nadra-nalu muchoagye sünda howe, age Yona ije dyewfo a dume.”

Usso go mütrü tchüw

33“Dju nüna je mütrü tchühoñe ĝumŝü ge seyo ñeshü ge mavewme, seŝo mütrü ubo ge dzügo vewme hado chemeje nüna jikui na hohujo. 34Basso go mütrü tchüw ye bañi ye me, sündada bañi güdrameje, vyow basso naje müsajome; séŝo se ye maumeje, basso ge je nukuĝujome. 35Sündada vemche ĝyowe, bachi go müsaw duwyeje nukuĝuañeme. 36Sündada basso ye müsameje, seyo usso ge hangeje manukrumeje, vyow ana veduw müsajome, se ñeto go müsambo, mütrü tchüho i müsaw jezeĝiambo.”

Mim na seyo Farisi na gohaw

37I ñu trungkoi ye, djudamje Farisi a ye i che, nochi ge jiñe ava tsawe; sünda i djañe djemyoñe ava tsajoñe ĝyoag. 38Farsi ye i ava matsalu üshi-upo machew í holyeñe lumashü veag. 39Tawgyew i che, “O Fariŝa, ba tola seyo bela na udru udru go drüŝoi, séŝo balung ge ŝakütchü seyo mauw vesumokradama. 40Chimadanghuw nawa, dju ñepsü ge dadama, se ye haña ulung go i madaima? 41Am séŝo, ulung go gañ-miĝi duw na chi djüajo dawe, sündameje bábo vyow güdraw lyajome.” 42“Se Fariŝia nawa, djo lalo pawe! Ba pudina seyo üĝe ichi, seyo vyow ñomñow sheĝe djüw, séŝo Niayñe seyo Tawgyew i nülvo í vesüñaha; he naje seyo se naje nülvo danggudruwe. 43Farsia nawa, djo lalowe! Djo psüĝo ñe ge nugo buĝo laĝoñ ve seyo bajar ge ye djó gaga tsüw. 44Djo lalowe! Hado chemeje djo pelyahuw nuĝu vedudame, hai nüna na madanghuw dügrü jiwma.” 45Sündawñe mükyew a ye che, “Dadrüwa, ana cheñe ba ñi tchüĝoime.” 46I che, “O mükyew nawa, djoje lalowe! Djo nüna ná magifiw kosto ye gigyelyeñe séŝo djo se kosto í djogzütsüsa yo je makidüjo. 47Djo lalowe! Djo ñihow truw na nuĝu chiw, dju djo aki-awu na shilyedama. 48Sünda: djo hohusawme, seyo djo aki-awu na dalyedaw yo uw ve; hado chemeje na ná shiw sünda djo ná nuĝu daw. 49Sündada Tawgyew i patsü-sholu je che, no nachi ge ñihow truw seyo shürhaw kiyajome, sünda na seyo küña na shijojema seyo küña na shü-düw üŝü ñi dajojema. 50Sündameje küña ñihow truw duma naŝü í he shülyilai yo tuĝu-tumo na he druguw-drulyiw í dakülyejoñe tsüda. 51Habil í shiw yo dalalye Jakaria í shiw kuw se psüĝoñe mügañe naksümko ye shiw: no djo umso truime; he í he shülyilai nachi yo laĝüjome. 52Mükyew djo lalowe! Djo patsü-sholu bo ladaŝome, sé djo nudzo ge makimyome, seyo nudzo ge kimyogñe veduw datchüda.” 53I sa yo kahuahuñe, mügaw na seyo Farsi na ufum dalatsüñe i dagtso-damrhüñe, ha ha ñu poĝi, 54sünda na i ha ñu chehualaima ĝyokrü ĝyo.

Currently Selected:

Luka 11: HBe

Highlight

Copy