यूहन्ना 1
1
यीशु ही जीवन को वचन च
1शुरुवात मा वचन छौ। अर उई वचन परमेस्वर का दगड़ा मा छौ। अर उई वचन परमेस्वर छौ। 2यू ही शुरुवात मा परमेस्वर का दगड़ा मा छौ। 3अर सब कुछ वेसे बणयै गै अर जु कुछ भि बणयै गै, उ सब कुछ वेका ही द्वारा बणयै गै। 4यू वचन जीवन देण वळु छौ अर यू जीवन ही मनखियों खुणि उज्याळु#1:4 इख मा उज्याळु को मतलब यीशु मसीह च। लेके ऐ। 5अर यू उज्याळु अन्धेरा मा चमकदु च, पर अन्धेर न वेतैं स्वीकार नि कैरी।
यीशु ही जीवन को उज्याळु च
6तब परमेस्वर की तरफा बटि भेज्यूं एक मनखि ऐ, वेको नौ यूहन्ना#1:6 यू लिखण वळु यूहन्ना नि च बल्किन मा यूहन्ना बपतिस्मा देण वळु च। छौ। 7उ गवै देणु खुणि ऐ, ताकि उ उज्याळा का बारा मा गवै दे सैको अर वेका द्वारा सभि मनखि बिस्वास करण लगि जां। 8उ खुद त उज्याळु नि छौ, पर वे उज्याळा का बारा मा गवै देणु खुणि अयूं छौ।
9अर सच्चु उज्याळु जु हरेक मनखि तैं उज्याळु देन्दु, उ दुनियां मा औण वळु छौ। 10अर उ दुनियां मा छौ अर दुनियां वेका द्वारा ही बणयै गै, पर दुनियां का लोगु न वेतैं नि पछ्याणी। 11उ अपणा निज लोगु का बीच मा ऐ, पर वेका अपणा लोगु न वेतैं स्वीकार नि कैरी। 12पर जथगा लोगु न वेतैं स्वीकार कैरी, याने कि जथगा वे पर बिस्वास करदिन, वेन ऊंतैं परमेस्वर की औलाद होण को अधिकार दियूं च। 13अर ऊ नऽ त ल्वे#1:13 इख मा ल्वे को मतलब मनखियों की पीढ़ी मा जनम लोगु से च। बटि, नऽ त सरील की इच्छा बटि, अर ना ही मनखियों की योजना बटि पैदा ह्वेनि, बल्किन मा ऊ त परमेस्वर की औलाद छिन अर ऊं खुणि वेकी इच्छा या ही छै।
14अर उ वचन सरील का रुप मा मनखियों का बीच मा ऐ। अर हम पर भरपूर किरपा कैरिके अर परमेस्वर की पूरि सच्चै हमतै बतै के हमरा बीच मा रै। अर वेकी महानता तैं हमुन देखि। अर पिता परमेस्वर न वेतैं बिजांम महान बणै, किलैकि उ वेको इकलौतु पुत्र च। 15तब यूहन्ना बपतिस्मा देण वळन वेका बारा मा गवै दे, अर चिल्लै-चिल्लै के इन बोलि कि, “यू मनखि उई च, जैका बारा मा मिन बोलि छौ, उ जु मेरा बाद औण वळु च, उ मिसे भि महान च किलैकि उ मिसे भि पैलि बटि छौ। 16अर वेकी भरपूर किरपा बटि हम सभ्यों तैं आसीस पर आसीस मिली।” 17भौत पैलि मूसा का द्वारा त नियम-कानून दिये गैनी, पर यीशु मसीह का द्वारा ही हमतै किरपा मिली अर परमेस्वर की सच्चै परगट ह्वे। 18अर परमेस्वर तैं कैन कभि नि देखि, पर वेकू इकलौतु पुत्र, जु पिता की गोद मा बैठदु च, वेन ही वेतैं परगट कैरी।
यूहन्ना बपतिस्मा देण वळे की खुद खुणि गवै
(मत्ती 3:1-12; मर 1:1-8; लूका 3:1-18)
19जब यहूदियों का मुख्यों न यरूशलेम नगर बटि पुरोहितों अर लेवियों तैं यूहन्ना का पास वे बटि यू पूछणु कू भेजि, “तुम कु छाँ?” तब वेकी गवै या च। 20अर वेन ऊंका समणि कुछ भि नि छिपै, पर साफ-साफ बोलि कि, “मि मसीह नि छौं।” 21तब ऊं लोगु न वे बटि पूछी, “त क्या तुम #मलाकी 4:5एलिय्याह छाँ?” वेन बोलि, “ना।” “त क्या तुम उ रैबर्या छाँ? जु औण वळु च,” तब वेन बोलि, “मि नि छौं।” 22अर ऊं लोगु न वे बटि पूछी, “त तुम कु छाँ? अर हमतै बतौ कि तुम अपणा बारा मा क्या बुल्द्यां, ताकि हम जैके अपणा भेजण वळो तैं जबाब दे सैका।” 23तब यूहन्ना न बोलि, “जन परमेस्वर का रैबर्या यशायाह न बोलि छौ कि,
#
यशा 40:3
“‘मि निर्जन जगा मा पुकरण वळे की एक धै छौं।
वेन बोलि छौ, कि प्रभु को बाटु सैणु कैरा।’”
यूहन्ना बपतिस्मा देण वळे की यीशु खुणि गवै
24तब जौं लोगु तैं फरीसी दल का लोगु न भेजि छौ, 25ऊं लोगु न यूहन्ना तैं पूछी, “जब नऽ त तुम मसीह छाँ, नऽ त एलिय्याह, अर ना ही परमेस्वर को उ रैबर्या, त फिर बपतिस्मा किलै देणा छाँ?” 26तब यूहन्ना न ऊंकू बोलि, “मि त पाणिळ बपतिस्मा देन्दु छौं, पर तुमरा बीच मा एक मनखि खड़ु होयुं च, जैतैं तुम नि जणद्यां की उ कु च। 27यू उई च, जु मेरा बाद औण वळु छौ।#1:27 कुछ कागज्दों मा “उ मिसे पैलि छौ” लिख्यूं च। मि इथगा लैख भि नि छौं कि वेका जुतों का तसमा भि खोली सैकु।”
28यू सब कुछ त यरदन गाड का पल्या छाला, याने की पूरब दिसा का बैतनिय्याह गौं मा ह्वेनि, जख यूहन्ना बपतिस्मा देन्दु छौ।
परमेस्वर को मेम्ना
29अर दुसरा दिन यूहन्ना न यीशु तैं अपणी तरफा औन्द देखि अर बोलि, “अफार देखा, परमेस्वर को भेज्यूं मेम्ना, जु कि अपणु बलिदान देके दुनियां का लोगु का पापों तैं उठे के लि जान्दु। 30अर यू उई च जैका बारा मा मिन बोलि छौ कि, ‘उ जु मेरा बाद औण वळु च, उ मिसे भि महान च किलैकि उ मिसे भि पैलि बटि छौ।’ 31अर मि यू नि जणदु छौ कि यू उई च, पर मि पाणि बटि बपतिस्मा देन्दु छौं, ताकि उ इस्राएली लोगु मा पछ्याणे जौ।”
32अर फिर यूहन्ना न या भि गवै दे, “मिन स्वर्ग बटि पवित्र आत्मा तैं एक कबूतर का रुप मा उतरद देखि अर उ यीशु पर ठैरि गै। 33अर मि त वे मनखि तैं नि पछ्याणदु छौ, पर जै परमेस्वर न मितैं पाणि बटि बपतिस्मा देणु कू भेजि, वेन मिकू बोलि, कि ‘जै पर तू पवित्र आत्मा तैं उतरद अर ठैरिद दिखली, उई#1:33 उई पवित्र आत्मा देके लोगु का मन अर दिलों तैं शुद्ध करण वळु च। पवित्र आत्मा बटि बपतिस्मा देण वळु च।’ 34अर मिन यू खुद देखि च अर इन गवै देन्दु छौं, कि यू ही परमेस्वर को पुत्र च।”
यीशु न अपणा पैलि चेलों तैं बुलै
35अर दुसरा दिन फिर यूहन्ना अपणा दुई चेलों का दगड़ा मा उखि खड़ु होयुं छौ। 36अर वेन यीशु तैं जान्द देखि के बोलि, “अफार देखा, यू परमेस्वर को भेज्यूं मेम्ना च।” 37जब ऊं दुई चेलों न वेतैं यू बुल्द सुणी, तब वु यीशु का पिछनै चलि गैनी। 38अर यीशु न मूड़ी के ऊंतैं अपणा पिछनै औन्द देखि अर ऊंतैं पूछी, “तुम कैतैं खुज्याणा छाँ?” ऊंन वेकू बोलि, “रब्बी तुम कख रौन्द्यां?” (रब्बी जैको मतलब गुरुजी च)। 39तब वेन ऊंकू बोलि, “आ, अर देखि ल्यावा।” अर वु गैनी अर जख उ रौन्दु छौ वा जगा देखि। वे बगत दिन की करीब चार बजणी छै। इलै वे दिन वु यीशु का दगड़ा मा ही रैनी।
40अर यूहन्ना की बात सुणी के जु दुई चेला यीशु का पिछनै ह्वे गै छा, ऊं मदि एक शमौन पतरस को भै अन्द्रियास छौ। 41वेन पैलि अपणा सगा भै शमौन बटि मिली के वेकू बोलि, “हमतै ख्रीष्ट, याने कि ‘मसीह’ मिली गै।” 42अर उ वेतैं यीशु का समणि लेके ऐ। तब यीशु न वेतैं देखि के बोलि कि, “तू यूहन्ना#1:42 यू बपतिस्मा देण वळु यूहन्ना नि छौ, पर शमौन को बुबा छौ। को नौनु शमौन छैई, त्वेकू आज बटि कैफा#1:42 इब्रानी भाषा मा कैफा अर यूनानी भाषा मा पतरस दुईयों को मतलब “ढुंगो” से च। मतलब पतरस बुले जालु।”
यीशु न फिलिप्पुस अर नतनएल तैं बुलै
43दुसरा दिन यीशु न गलील का मुलक मा जाणु को पक्कु इरादा कैरी। तब उ फिलिप्पुस बटि मिली अर वेकू बोलि, “मेरा पिछनै औंऽऽ।” 44फिलिप्पुस त बैतसैदा नगर को रौण वळु छौ, जख अन्द्रियास अर पतरस भि रौन्दा छा। 45तब फिलिप्पुस नतनएल बटि मिली अर वेन वेकू बोलि, “जैका बारा मा मूसा न अपणा नियम-कानून मा अर परमेस्वर का रैबर्यों न अपणी किताबों मा लिख्यूं च, उ हमतै मिली गै। अर उ यूसुफ को नौनु नासरत गौं को यीशु च।” 46तब नतनएल न वे बटि बोलि, “कभि, नासरत बटि भि कुछ भलु निकळि सकदु च?” अर फिलिप्पुस न वेकू बोलि, “चल, अर खुद देखि ले।”
47यीशु न नतनएल तैं अपणी तरफा औन्द देखि के वेका बारा मा बोलि, “देखा, यू सच्चु इस्राएली च जैमा कुई कपट नि च।” 48तब नतनएल न वे बटि पूछी, “तुम मितैं कनकै जणद्यां?” फिर यीशु न वेकू बोलि, “फिलिप्पुस न जब त्वेतै बुलै, वेसे पैलि मिन त्वेतै तिमला का डाळा तौळ देखियाली छौ।” 49अर नतनएल न वेकू बोलि, “गुरुजी, तुम परमेस्वर का नौना छाँ अर तुम ही इस्राएल का राजा छाँ” 50फिर यीशु न वेतैं जबाब देई, “मिन जु त्वेकू बोलि कि, ‘मिन त्वेतै तिमला डाळा का तौळ देखि,’ क्या इलै ही तू मि पर बिस्वास करदी? मि तुमतै बतै देन्दु, कि तुम येसे भि बड़ा-बड़ा कामों तैं दिखल्या।” 51अर यीशु न वेकू यू भि बोलि, “मि तुम लोगु बटि सच्चि ही बोन्नु छौं, कि तुम स्वर्ग तैं खुल्यूं अर परमेस्वर का स्वर्गदूतों तैं उब जान्द अर जख मनखि को पुत्र, याने मि छौं, उख उतरद दिखल्या।”
Currently Selected:
यूहन्ना 1: GBM
Highlight
Share
Copy
Want to have your highlights saved across all your devices? Sign up or sign in
© (Active) Wycliffe Bible Translators, Inc. All rights reserved.
