लूका 4

शैतान को यीशु तैं पाप खुणि भकलौण

(मत्ती 4:1-11; मर 1:12,13)

1फिर यीशु पवित्र आत्मा बटि भरपूर ह्‍वेके यरदन गाड बटि वापिस ऐ गै, अर पवित्र आत्मा वेतैं चालीस दिनों तक निर्जन जगा कू लि गै। 2अर उख शैतान चालीस दिनों तक वेतैं भकलौणु रै, अर ऊं दिनों मा यीशु न कुछ भि नि खै। अर जब ऊ दिन पूरा ह्‍वे गैनी, तब वेतैं भूक लगि। 3तब शैतान न वेकू बोलि, “अगर जु तू परमेस्वर को पुत्र छैई, त ये ढुंगा कू बोल कि, रुट्‍टी बण जा।” 4मगर यीशु न वेकी बात तैं नकारी के जबाब दिनी,

“पवित्रशास्‍त्र मा लिख्यूं च कि,

# व्यव 8:3 ‘मनखि केवल रुट्‍टी बटि ही ज्यून्दु नि रालु।’”

5तब शैतान वेतैं एक ऊँची जगा पर लि गै, अर झट वेतैं दुनियां का सब राज्य दिखैनि। 6अर वेन यीशु कू बोलि, “मि यों सब राज्यों पर अधिकार अर येकी सब धन-दौलत त्वेतै द्‍यूलु। किलैकि यू सब मि मा सौप्युं च, अर मि जैतैं चान्दु वेतैं दे सकदु छौं। 7अगर जु तू मेरी पूजा करली, त यू सब कुछ तेरु ह्‍वे जालु।” 8तब यीशु न वेकी बात तैं नकारी के जबाब देई,

“पवित्रशास्‍त्र मा लिख्यूं च कि,

# व्यव 6:13 ‘तू केवल अपणा प्रभु परमेस्वर की ही पूजा कैर,

अर बस वेकी ही सेवा कैर।’”

9फिर शैतान वेतैं यरूशलेम नगर मा लि गै, अर मन्दिर की सबसे ऊँची जगा पर खड़ु कैरी। अर वेन यीशु कू बोलि, “अगर तू परमेस्वर को पुत्र छैई, त इख बटि मूड़ी फाल मारी दे। 10किलैकि पवित्रशास्‍त्र मा लिख्यूं च कि, #भजन 91:11-12 ‘तेरी हिफाजत करणु खुणि उ अपणा स्वर्गदूतों तैं आज्ञा द्‍यालु। 11अर वु त्वेतै तुरन्त अपणा हाथों मा उठे द्‍याला, ताकि कखि इन नि हो कि तेरा खुटों मा ढुंगे की चोट लगि जौ।’” 12तब यीशु न वेकी बात तैं नकारी के जबाब देई,

“पवित्रशास्‍त्र मा इन भि लिख्यूं च कि,

# व्यव 6:16 ‘तू अपणा प्रभु परमेस्वर तैं नि भकलौ।’”

13अर जब शैतान न यीशु तैं हरेक किसम से भकलै दिनी, तब दुसरो मौका मिलण तक उ वेका पास बटि चलि गै।

सेवा का कामों की शुरुवात

(मत्ती 4:12-17; मर 1:14-15)

14येका बाद यीशु पवित्र आत्मा की शक्‍ति का द्‍वारा गलील मुलक कू लौटी गै। अर वेकी चर्चा आस-पास का ग्‍वोंऽ मा फैली गै। 15अर उ ऊंका प्रार्थना भवनों मा उपदेस देण लगि गै, अर सब लोग वेकी बडै करदा छा।

नासरत नगर मा यीशु तैं नकरण

(मत्ती 13:53-58; मर 6:1-6)

16फिर यीशु नासरत नगर मा ऐ, जख उ पाली-पोसि के बड़ु ह्‍वे छौ। अर हमेसा की तरौं उ सब्त का दिन प्रार्थना भवन मा गै अर पवित्रशास्‍त्र पढणु खुणि खड़ु ह्‍वे गै। 17तब परमेस्वर का रैबर्या यशायाह की किताब वेतैं दिये गै। अर वेन किताब खोली के वा जगा निकाळि जख मा इन लिख्यूं छौ कि,

18 # यशा 61:1-2 “प्रभु की आत्मा मि मा च,

किलैकि वेन गरीबों तैं शुभ समाचार सुनाणु कू मितैं चुण्यूं च।

अर बन्धियों तैं छुटकारा का बारा मा,

अर अन्धों तैं फिर से दिखण का बारा मा परचार करणु खुणि,

अर सतयां लोगु तैं छुटकारा देणु खुणि

वेन मितैं भेजि च।

19अर यूई प्रभु को खुश होणो कू साल च,

इन परचार करणु खुणि भि वेन मितैं भेजि।”

20तब यीशु न किताब बन्द कैरिके प्रार्थना भवन का सेवक तैं वापिस दे दिनी अर फिर बैठि गै। अर प्रार्थना भवन का सब लोगु की नजर वे पर ही लगि रै। 21तब यीशु न ऊंकू बोलि, “आज पवित्रशास्‍त्र की या बात ज्वा तुमुन सुणी वा उबरि पूरि ह्‍वे गै।” 22अर सभ्यों न वेकी तारीफ कैरी, अर जु भलै की बात वेन बुलिनी, ऊंतैं सुणी के सब लोग हकदक ह्‍वे गैनी। अर ऊ बुलण लगि गैनी, “अरे यू त यूसुफ को नौनु च?”

23तब यीशु न ऊंकू बोलि, “तुम जरुर मि खुणि या औखाण बोलिल्या कि, ‘हे बैद, पैलि खुद तैं खूब कैर।’ अर तुम इन भि बोलिल्या कि, ‘जौं चमत्कारिक कामों का बारा मा हमुन सुणी, कि तुमुन कफरनहूम नगर मा कैरी, ऊंतैं इख अपणा नगर मा भि कैर।’ 24पर मि तुम बटि सच्‍चि बोन्‍नु छौं, कि कै भि रैबर्या तैं वेका अपणा घौर का लोग स्वीकार नि करदिन।

25“अर मि तुम बटि सच्‍च बोन्‍नु छौं कि, #1 राजा 17:1-16 एलिय्याह रैबर्या का दिनों मा जब सढ़े तीन साल तक सरग नि बरखी, अर पूरा देस मा अकाळ पोड़ि छौ, त उबरि इस्राएल मा भौत सरी विधवा छै। 26पर ऊंमा बटि कै का पास भि परमेस्वर न एलिय्याह तैं नि भेजि, पर केवल सैदा मुलक का सारपत नगर की एक विधवा का पास ही भेजि, ज्वा कि इस्राएली नि छै।

27 # 2 राजा 5:1-14 “अर ठिक इन्‍नि एलीशा रैबर्या का बगत मा भि इस्राएल देस मा भौत जादा कोड़ी छा। पर ऊंमा बटि कुई भि शुद्ध नि किये गै। पर केवल सीरिया देस का #2 राजा 5:1-14नामान नौ का मनखि तैं ही वेका कोड़ बटि शुद्ध करै गै।”

28“अर यों बातों तैं सुणदी ही प्रार्थना भवन का सब लोगु तैं भौत गुस्सा ऐ गै। 29अर ऊंन उठी के यीशु तैं नगर बटि भैर खदेड़ दिनी, अर जै पाड़ पर ऊंको नगर बस्यूं छौ वेका ढौंडा मा लि गैनी, ताकि वेतैं मूड़ी भ्योंलुन्द ढोळि द्‍या। 30मगर उ ऊंका बीच मा बटि निकळि के चलि गै।”

यीशु द्‍वारा खबेस लग्यां एक मनखि तैं खूब करण

(मर 1:21-28)

31फिर यीशु गलील मुलक का कफरनहूम नगर कू गै, अर जब सब्त को दिन ऐ त उ लोगु तैं उपदेस देणु छौ। 32अर वेको उपदेस सुणी के लोग दंग रै गैनी, किलैकि उ एक अधिकार पयां मनखि का जन बोन्‍नु छौ। 33अर उख प्रार्थना भवन मा एक आदिम छौ, जै पर खबेस लग्यूं छौ। अर उ जोर-जोर से चिल्‍लै के बोन्‍न लगि गै कि, 34“हे नासरत गौं का यीशु, हमतै त्वेसे क्या मतलब? क्या तू हमतै नास करणु कू अईं छैई? मि जणदु छौं कि तू कु छैई, तू परमेस्वर को पवित्र जन छैई।” 35तब यीशु न वेतैं झिड़की के बोलि, “चुप रौ, अर वेमा बटि निकळि जा।” तब वे खबेस न वेतैं लोगु का बीच मा पटकी, अर बगैर कुई नुकसान पौंछयां उ वे मनखि मा बटि निकळि गै। 36अर यू देखि के सब लोग दंग रै गैनी। अर ऊ एक-दुसरा बटि बुलण लगि गैनी कि, “येका शब्दों मा कन्दरि ताकत च? किलैकि यू खबेसों तैं भि अधिकार अर शक्‍ति से आज्ञा देन्दु, अर ऊ निकळि जनदिन।”

37फिर चारो तरफा हर जगा यीशु की चर्चा होण लगि गै।

यीशु का द्‍वारा शमौन की सासु तैं खूब करण

(मत्ती 8:14-17; मर 1:29-34)

38तब यीशु प्रार्थना भवन मा बटि उठी के शमौन का घौर मा गै। अर शमौन की सासु तैं भौत जौर चड़यूं छौ। तब ऊंन यीशु बटि बिन्ती कैरी कि उ वींतैं खूब कैरी द्‍यो। 39अर यीशु वींका पास खड़ु ह्‍वे, अर जौर तैं झिड़की। अर वींको जौर उतरि गै, अर वा तुरन्त उठी के ऊंकी सेवा-भगत करण लगि गै।

यीशु का द्‍वारा भौत सरा लोगु तैं खूब होण

40अर रुमुक का बगत जौं-जौं का इख बन्‍नि-बन्‍नि किसमे की बिमारि मा लोग पोड़यां छा, ऊ सब ऊं लोगु तैं यीशु का पास लैनि। अर वेन एक-एक पर हाथ रखी के ऊंतैं खूब कैरी देई। 41अर खबेस भि चिल्‍लै-चिल्‍लै के बुल्दा छा कि, “तू परमेस्वर को पुत्र छैई,” अर इन बोलि के खबेस लोगु मा बटि निकळि जान्दा छा। पर यीशु खबेसों तैं झिड़कुदु छौ, अर ऊंतैं बोन्‍न नि देन्दु छौ, किलैकि ऊ जणदा छा कि वु मसीह च।

प्रार्थना भवनों मा यीशु को परचार

(मर 1:35-39)

42अर जब सुबेर ह्‍वे, तब यीशु निकळि के एक निर्जन जगा मा गै। अर भीड़ की भीड़ वेतैं खुज्यान्द-खुज्यान्द वेका पास ऐ गै। अर ऊ वेतैं रुकण लगि गैनी, कि उ ऊंका पास बटि नि जौ। 43पर यीशु न ऊंकू बोलि, “मितैं परमेस्वर का राज को शुभ समाचार दुसरा नगरों मा भि जैके सुनौण जरुरी च, किलैकि मितैं ये ही मकसद खुणि भेज्यूं च।” 44फिर उ यहूदिया#4:44 इख मा यहूदियों का पूरा मुलक का बारा बतये जाणु च। मुलक का प्रार्थना भवनों मा उपदेस देण लगि गै।

Currently Selected:

लूका 4: GBM

Highlight

Copy