मरकुस 16
16
यीशु को मौत से ज्यून्दु होण
(मत्ती 28:1-8; लूका 24:1-12; यूहन्ना 20:1-10)
1अर जब सब्त को दिन खतम ह्वे गै, त मगदला गौं की मरियम अर याकूब की माँ मरियम, अर सलोमी न खुशबुदार चीजों तैं खरीदी, ताकि जैके यीशु की लांश पर लगौ। 2अर हप्ता का पैला दिन याने कि इतवार की सुबेर जब घाम औणु ही छौ, त ऊ कबर जनै गैनी। 3अर वु अपणा आपस मा इन बोन्नि छै कि, “हम खुणि वे डांग तैं कु जि हटालु जु कि कबर का मुख पर लग्यूं च?” 4मगर जब ऊंन कबर जनै देखि, त ऊंन देखि की डांग त पैलि बटि हटयुं च। अर उ डांग भौत ही बड़ु छौ। 5अर जब वु कबर का भितर गैनी, त ऊंन देखि कि एक ज्वान सफेद कपड़ा पैरयूं दैंणी तरफा बैठयूं च, अर वेतैं देखि के वु भौचक ह्वे गैनी। 6पर वेन ऊंकू बोलि, “सुणा, ताजुब नि कैरा, नासरत गौं का जै यीशु तैं क्रूस पर चड़ये गै छौ, जैतैं तुम खुज्याणा छाँ, उ मुरदो मा बटि ज्यून्दु ह्वे गै। अर देखा, या वा ही जगा च जख ऊंन वेतैं रखी छौ, मगर अब उ इख नि च। 7पर तुम जा, अर वेका चेलों अर पतरस कू बोला कि उ तुम से पैलि गलील मुलक कू जाणु च। अर जन वेन तुम कू बोलि छौ वेका मुताबिक तुम लोग वेतैं उखि दिखल्या।” 8तब वु जनानियां कबर बटि भैर ऐनी अर उख भागी के चलि गैनी, ऊ भौत हकदक अर कौंपणी छै, अर ऊंन या बात कैतैं नि बतै, किलैकि ऊ भौत डऽरयां छा।
मगदला गौं की मरियम तैं यीशु को दिख्यौण
(मत्ती 28:9,10; यूहन्ना 20:11-18)
[9हप्ता का पैला दिन सुबेर होन्दी यीशु मुरदो मा बटि ज्यून्द होण पर सबसे पैलि मगदला गौं की मरियम तैं दिखै, अर या वा ही जनानि च जिं मा बटि यीशु न सात खबेसों तैं निकाळि छौ। 10अर जु लोग यीशु का पिछनै चलण वळा छा, ऊ बड़ु शोक कना अर रुंणा छा। अर वींन ऐके ऊंतैं या खबर सुणै। 11मगर जब ऊंन सुणी कि उ ज्यून्दु ह्वे गै अर वींन यीशु तैं देखि, त ऊंन वीं की बातों पर बिस्वास नि कैरी।
दुई चेलों तैं यीशु को दिख्यौण
(लूका 24:13-35)
12अर येका बाद यीशु का दुई चेला कै गौं कू जाणा छा, तब यीशु ऊं दुईयों तैं कै अलग ही रुप मा दिखै। 13तब ऊंन जैके दुसरा लोगु तैं ईं बात कि खबर दिनी, मगर ऊं लोगु न फिर भि यों की ईं बात पर यकीन नि कैरी।
ग्यारा चेलों तैं यीशु को दिख्यौण
(मत्ती 28:16-20; लूका 24:36-49; यूहन्ना 20:19-23; खास चे 1:6-8)
14अर येका बाद जब यीशु का ग्यारा चेला खाणुक खाणु खुणि बैठयां छा, त वे बगत उ ऊंतैं दिखै। तब यीशु न ऊंका निठुर मन अर बिस्वास की कमी की वजै से ऊंतैं झिड़की, किलैकि ज्यून्द होण का बाद जौं लोगु न वेतैं देखि छौ, ऊंकी बातों पर भि यों न यकीन नि कैरी।
15अर वेन ऊंकू बोलि, “तुम पूरि दुनियां मा जैके शुभ समाचार को परचार दुनियां का सब लोगु तैं सुणा। 16अर जु मनखि बिस्वास करलु, अर बपतिस्मा ल्यालु, वेतैं ही बचयै जालु, पर जु मनखि बिस्वास नि करलु, वु दोषी ठैरैये जालु। 17अर बिस्वास करण वळा लोगु मा यू चिन्न होला, वु मेरा नौ से खबेसों तैं निकळळा, अर नई-नई भाषा बुलला, 18वु गुरौऔं तैं भि उठे द्याला, इख तक की अगर वु बिस भि पे द्याला, तभि भि ऊंतैं कुछ नुकसान नि होलु,#16:18 यीशु इख मा सच्चि मा गुरौ तैं उठौणु खुणि, या बिस पीण की बात नि च कनु, पर उ इन बतौण चान्दु कि जु कुई वे पर बिस्वास करलु, अगर कुई भि दुख-तकलीफ वे मनखि पर आली त परमेस्वर वेकी मदद करलु। वु बिमार लोगु पर अपणु हाथ रखला अर ऊ खूब ह्वे जाला।”
यीशु को स्वर्ग मा उठये जाण
(लूका 24:50-53; खास चे 1:9-11)
19अर जब प्रभु यीशु ऊंका दगड़ा बात कैरी दिनी वेका बाद उ स्वर्ग मा उठये गै, अर परमेस्वर की दैंणी तरफा आदर-सम्मान वळी जगा मा बैठि गै। 20अर चेलों न उख बटि निकळि के हरेक जगा जैके परचार कैरी। अर प्रभु भि ऊंका दगड़ा-दगड़ि काम कनु रै। अर ऊंका द्वारा जु चिन्न-चमत्कार का काम होणा छा, वेका द्वारा वेन इन साबित कैरी, कि जै वचन को परचार ऊ कना छिन उ वचन सच्चु च।]
Currently Selected:
मरकुस 16: GBM
Highlight
Share
Copy
Want to have your highlights saved across all your devices? Sign up or sign in
© (Active) Wycliffe Bible Translators, Inc. All rights reserved.
