मरकुस 3
3
यीशु द्वारा सुख्यां हाथ वळा तैं खूब करण
(मत्ती 12:9-14; लूका 6:6-11)
1अर येका बाद यीशु फिर से यहूदी लोगु का प्रार्थना भवन मा ऐ, अर उख एक आदिम छौ जैको हाथ सुक्यूं छौ। 2अर कुछ लोग यीशु की ताक मा छा, कि उ सब्त का दिन पर वे मनखि तैं खूब करदु च कि ना, ताकि वु वे पर इळजाम लगै सैका। 3तब यीशु न वे सुख्यां हाथ वळा आदिम कू बोलि, “उठ, अर इख बीच मा खड़ु ह्वे जा।” 4तब यीशु न ऊंकू बोलि, “सब्त का दिन क्या करण ठिक च भलु करण या बुरु करण? पराण तैं बचौण या नास करण?” मगर वु सन्ट रैनी। 5अर ऊंका निठुर पराण तैं देखि के यीशु तैं बड़ु दुख ह्वे, अर गुस्सा मा चौतरफि देखि के वेन सुख्यां हाथ वळा मनखि कू बोलि, “अपणु हाथ अगनै बढ़ो।” अर जब वेन अपणु हाथ अगनै बढै, तब वेकू हाथ खूब ह्वे गै। 6अर यू देखि के फरीसी दल का लोग तुरन्त उख बटि भैर निकळि गैनी। अर राजा हेरोदेस का कुछ खास लोगु का दगड़ा मा मिली के यीशु का खिलाप मा जाळसाजि करण लगि गैनी, कि वेतैं कनकै खतम किये जौ।
भीड़ का लोगु को यीशु का पिछनै चलण
7अर यीशु अपणा चेलों का दगड़ा झील का छाला पर चलि गै, अर गलील मुलक बटि एक बड़ी भीड़ वेका पिछनै चलण लगि गै। 8अर यीशु का बड़ा-बड़ा कामों का बारा मा सुणी के यहूदिया मुलक बटि, अर यरूशलेम नगर बटि, अर इदूमिया मुलक अर यरदन गाड का दुसरा छाला बटि, अर सूर अर सैदा नगरों का आस-पास का मुलक बटि भि एक बड़ी भीड़ वेका पास ऐ। 9तब भीड़ की वजै से यीशु न अपणा चेलों कू बोलि, “मि खुणि एक छुटी नाव तयार रखा, ताकि भीड़ की वजै से कखि मि दबी नि जौं।” 10किलैकि वेन भौत सा लोगु तैं खूब कैरी छौ, इलै रोगी लोग वेतैं छूण चाणा छा, अर रोगियों की संख्या भौत छै, अर बड़ी धक्का-मुक्की चलणी छै। 11अर जौं लोगु पर खबेस लग्यां रौन्दा छा, जब वु यीशु तैं दिखदा छा, त खबेस वेका खुटों मा पोड़ि के चिल्लै-चिल्लै के बुल्दा छा कि, “तू परमेस्वर को पुत्र छैई।” 12मगर यीशु ऊंतैं आदेस देके बुल्दु छौ कि, “मेरा बारा मा इन परगट नि कैरा कि मि कु छौं।”
यीशु द्वारा बारह चेलों तैं चुनण
(मत्ती 10:1-4; लूका 6:12-16)
13अर वेका बाद यीशु एक पाड़ पर चैड़ि गै, अर वेन ऊं लोगु तैं अपणा पास बुलै जौं तैं अपणा पास रखण की वेकी इच्छा छै, तब वु लोग वेका पास गैनी। 14अर वेन ऊंमा बटि बारह लोगु तैं चुणी अर ऊंकू खास चेला बोलि, ताकि ऊ यीशु का दगड़ा मा रा अर वु ऊंतैं परचार करणु कू भेजूँ, 15अर ऊंमा खबेसों तैं निकळण को अधिकार हो। 16अर ऊं बारह चेलों का नौ इन छिन,
शमौन, जैको नौ वेन पतरस रखी,
17अर जबदी का दुई नौना याकूब अर वेको भै यूहन्ना, जौं तैं यीशु न बुअनरगिस नौ दिनी, जैको मतलब इन च कि गगड़ट को नौनु,
18अन्द्रियास अर फिलिप्पुस,
बरतुल्मै,
मत्ती,
थोमा,
हलफई को नौनु याकूब,
तद्दै,
शमौन कनानी#3:18 शमौन कनानी जैकू शमौन जेलोतेस भि बुले जान्दु अर वेका नौ को मतलब एक देसभक्त अर उत्साही से च।
19अर यहूदा इस्करियोती जैन बाद मा यीशु तैं धोखा देके पकड़वै दिनी।
यीशु शैतान से भि जादा ताकतबर
(मत्ती 12:22-32; लूका 11:14-23; 12:10)
20अर जब यीशु अर वेका चेला एक घौर मा ऐनी, त उख एक भौत बड़ी भीड़ इकट्ठा ह्वे गै, इख तक कि वु रुट्टी भि नि खै सकिनी। 21अर जब यीशु का परिवार का लोगु न यू सुणी, त वु यीशु तैं पकड़णु कू गैनी, किलैकि वु इन बुल्दा छा कि, “वेकू दिमाग ठिकणा पर नि च।” 22अर जु शास्त्री लोग यरूशलेम नगर बटि अयां छा, वु भि इन बुल्दा छा कि, “त्वेमा त बालजबूल#3:22 शैतान को एक नौ बालजबूल भि च। च,” अर “उ खबेसों का अधिकारी बालजबूल याने कि शैतान की मदद से लोगु मा लग्यां खबेसों तैं निकळदु।” 23अर यीशु न ऊंतैं अपणा पास बुलै के बोलि, “शैतान खुद ही शैतान तैं कनकै निकाळि सकदु।” 24तब वेन ऊंतैं एक उदारण देके समझै, “सुणा, अगर कै राज्य का दुई हिस्सा ह्वे जा, त उ राज्य बरबाद ह्वे जान्दु। 25अर अगर कै परिवार मा दुई हिस्सा ह्वे जा, त उ भि बरबाद ह्वे जान्दु। 26ठिक उन्नि अगर जु शैतान ही शैतान तैं निकळण लगि जालु, त इन कैरिके वु खुद ही अपणा खिलाप ह्वे जालु, त फिर इन बता कि वेको राज कनकै बणयूं रालु? अरे इन कैरिके त वेको अन्त ही ह्वे जालु। 27अर अगर कुई मनखि कै ताकतबर मनखि का घौर मा घुसी के वेको समान चुरण चान्दु हो, त वेतैं पैलि वे ताकतबर मनखि तैं बन्धण पोड़लु। तब उ मनखि वेका घौर का समान तैं आराम से चुरै सकदु। 28अर मि तुमतै सच्चि मा बतै देन्दु कि मनखियों द्वारा किये जाण वळु हरेक पाप अर परमेस्वर की बेजती माफ किये जालि, 29पर अगर कुई पवित्र आत्मा की बेजती करलु, त वेको यू अपराध माफ नि किये जालु, बल्किन मा वु त पाप खुणि सदनि खुणि दोषी ठैरलु।” 30अर यीशु न या बात इलै बोलि किलैकि वु लोग इन बोन्ना छा कि, “वेमा त एक खबेस रौन्दु।”
यीशु की माँ अर भै
(मत्ती 12:46-50; लूका 8:19-21)
31तब यीशु की माँ अर वेका भै वे बटि मिलणु कू ऐनी, तब ऊंन कै मा यीशु तैं भैर बुलाणु खुणि रैबार भेजि। 32अर भीड़ का लोग यीशु तैं घेरि के बैठयां छा अर ऊंन वेकू बोलि, “गुरुजी सुणा, तुमरि माँ अर तुमरा भै अर बैंण भैर खड़ा होयां छिन अर ऊ तुम बटि मिलण चाणा छिन।” 33यीशु न ऊंकू बोलि, “सच्चि मा मेरी माँ अर मेरा भै कु छिन?” 34फिर यीशु न अपणा आस-पास बैठयां लोगु जनै देखि के बोलि, “देखा, मेरी माँ अर मेरा भै यू ही छिन। 35किलैकि जु लोग परमेस्वर का वचन तैं सुणदिन अर वेका मुताबिक चलदिन, वा ही मेरी माँ अर ऊ ही मेरा भै-बैंणा छिन।”
Currently Selected:
मरकुस 3: GBM
Highlight
Share
Copy
Want to have your highlights saved across all your devices? Sign up or sign in
© (Active) Wycliffe Bible Translators, Inc. All rights reserved.
