मरकुस 4
4
बीज बुतण वळो को उदारण
(मत्ती 13:1-9; लूका 8:4-8)
1एक बार फिर यीशु झील का छाला पर कुछ लोगु तैं सिखौणु छौ, अर वेका पास इथगा भीड़ जमा ह्वे गै, कि वु एक नाव मा चैड़ि के बैठि गै, पर भीड़ का लोग झील का छाला पर ही खड़ा छा। 2अर वेन ऊं लोगु तैं भौत उदारण देके ऊंतैं भौत सि बात सिखैनी। 3अर अपणा उपदेस मा वेन बोलि कि, “ध्यान से सुणा, एक बार एक किसान बीज बुतण कू गै। 4अर जब उ बीज बुतणु छौ, त कुछ बीज बाटा का किनरा पोड़ीनी, अर पंछियों न ऐके ऊंतैं चुगि दिनी।
5“अर ऊं बीजों मा बटि कुछ बीज ढुंग्याण जमीन पर पोड़ीनी, अर उख जादा माटु नि छौ अर जादा माटु नि मिलण की वजै से बीज जल्दी उपजी गैनी, 6पर जब घाम ऐ त ऊ पौधा झुलसि गैनी, अर जलुड़ा मजबूत नि छा इलै वु सूखि भि गैनी।
7“अर ऊं बीजों मा बटि कुछ बीज झिबलांणो मा पोड़ीनी, अर झिबलांण भि वेका दगड़ा मा बढिनि, अर ऊंन ऊंतैं दबै दिनी अर ऊं पर फल नि लगिनी।
8“मगर कुछ बीज अच्छी जमीन मा पोड़ीनी, अर वु उपजण लगि गैनी अर ऊं पर खूब अच्छा फल लगिनी, कै पर तीस गुणा, कै पर साठ गुणा, अर कै पर सौ गुणा।”
9तब यीशु न ऊंकू बोलि, “जैका पास सुनणु खुणि कन्दूड़ छिन, उ सुणी ल्यो।”#4:9 अगर जु तुम ध्यान से सुणिल्या, त तुमरि समझ मा आलु।
उदारणों को मकसद
(मत्ती 13:10-17; लूका 8:9-10)
10अर जब यीशु इखुली छौ, त जौं लोगु न वे उदारण का बारा मा सुणी छौ ऊं मदि वेका बारह चेला न, अर कुछ और लोगु न वे उदारण को मतलब वेसे पूछी। 11अर वेन ऊंतैं जबाब दिनी, “तुमतै त परमेस्वर का राज का भेदों तैं समझण को दान दियूं च, पर दुसरा लोगु तैं मितैं उदारण मा बतौण पोड़दु, 12ताकि पवित्रशास्त्र की वा बात पूरि हो ज्वा की इन च कि,
#
यशा 6:9-10; यिर्म 5:21 “वु लोग देखि के भि देखि नि सैका,
अर सुणी के भि समझि नि सैका,
कखि इन नि हो कि वु अपणा पापों बटि पस्ताप कैरा,
अर ऊंतैं माफी दिये जौ।”
बीज बुतण वळा उदारण को मतलब
(मत्ती 13:18-23; लूका 8:11-15)
13तब यीशु न अपणा चेलों कू बोलि, “क्या तुम ये उदारण को मतलब नि समझयां? अर अगर जु तुम यू नि समझद्यां, त फिर दुसरा उदारणों को मतलब कनकै समझि ल्या? 14बीज बुतण वळु इन च जन की कुई परमेस्वर का वचन तैं बुल्दु।
15“अर बाटा का किनरा पोडयां बीज का दगड़ा मा जु कुछ भि ह्वे, उ इन च कि कुछ लोग परमेस्वर का राज का बारा मा वचन तैं सुणदा त छिन, मगर वेको मतलब ऊंका बिंगण मा नि औन्दु, अर शैतान ऐके वे वचन तैं छिनी के लि जान्दु, जु कि वेका मन मा बुतै गै छौ।
16“अर ठिक उन्नि ढुंग्याण जमीन पर पोडयां बीज का दगड़ा मा जु कुछ भि ह्वे, उ इन च कि कुछ लोग परमेस्वर का वचन तैं सुणी के बड़ी खुशी से स्वीकार त करदिन, 17मगर बिस्वास मा जड़ नि होण की वजै से वु कुछ बगत तक ही बिस्वास मा बणयां रौनदिन। इलै वचन की वजै से जब कुई दुख-तकलीफ या कुई सतौ ऊंका जीवन मा औन्दिन, त वु लोग बिस्वास करण छोड़ि देन्दिन।
18“अर झिबलांणो मा पोड़यां बीज का दगड़ा मा जु कुछ भि ह्वे, उ इन च कि कुछ लोग परमेस्वर का वचन तैं सुणदा त छिन, 19मगर ईं दुनियां मा अगनै चलि के जीवन की चिन्ता-फिकर, अर धन-दौलत को धोखा, अर इन्नि दुसरि चीजों को लालच भि ऊंमा ऐ जान्दु। अर ऊ वे वचन तैं दबै देन्दिन, इलै ही वे पर फल नि लगदिन। 20अर अच्छी जमीन मा पोड़यां बीज का दगड़ा मा जु कुछ भि ह्वे, उ इन च कि कुछ लोग परमेस्वर का वचन तैं सुणी के वेतैं स्वीकार करदिन, अर फल लेके औन्दिन, कै पर तीस गुणा, कै पर साठ गुणा, अर कै पर सौ गुणा।”
द्यू को उदारण
(लूका 8:16-18)
21अर यीशु न ऊंकू इन भि बोलि, “कुई भि द्यू बाळि के कटोरा का तौळ ढकै के नि रखदु, अर ना ही खाट का तौळ रखदु, पर एक ऊँची जगा पर रखदु। 22अर इन्दरि कुई भि बात नि च ज्वा की परमेस्वर बटि छिपी हो, अर ना ही कुई इन्द्रयो गुप्त भेद लुक्युं ज्यां को वेतैं पता नि हो, अर उ वेको खुलासा उज्याळा मा करलु। 23अगर कै मा सुनणु खुणि कन्दूड़ छिन, त वु सुणी ल्यो।”#4:23 अगर जु तुम ध्यान से सुणिल्या, त तुमरि समझ मा आलु।
24फिर यीशु न ऊंकू बोलि, “इलै ध्यान द्या की तुम क्या सुनणा छाँ, अर जै नापळ तुम नपद्यां, ठिक उन्नि तुम खुणि भि नपै जालु, अर तुमतै और जादा दिये जालु। 25किलैकि जु कुई भि परमेस्वर का राज तैं बिंगणे की इच्छा रखदु, वेतैं वेका बारा मा बिंगण को और भि जादा ज्ञान दिये जालु। मगर जु मनखि इन सोचदु, कि मितैं भौत ज्ञान च, त वे बटि वु ज्ञान भि छिनै जालु।”
उगण वळा बीज को उदारण
26येका बाद यीशु न इन भि बोलि कि, “परमेस्वर को राज इन च, जन की कुई मनखि पुंगड़ा मा बीज बुतदु। 27अर राति वु आदिम सै जान्दु अर दिन-भर उठयूं रौन्दु, पर वु यू नि जणदु कि वु बीज कनकै उपजणु अर कनकै बढणु च। 28जमीन अफि उपज का फल तैं पैदा करदी, पैलि अंकुर, तब बलडा अर वेका बाद पूरा बीज ही बीज। 29अर जब फसल पक्की जान्दी, तब उ तुरन्त दथड़ु लेके पुंगड़ा मा पौंछी जान्दु अर कटण शुरु कैरी देन्दु, किलैकि लवै करण को बगत ऐ गै।”
लय्या का बीज को उदारण
(मत्ती 13:31,32,34; लूका 13:18-19)
30अर येका बाद यीशु न ऊंकू इन भि बोलि, “हम परमेस्वर का राज की तुलना कै का दगड़ा मा कैरा? अर वेको बखान क्या जि उदारण देके बता? 31अरे, परमेस्वर को राज त लय्या का बीज की तरौं च, जब वु बुतै जान्दु त जमीन का सब बीजों मा सबसे छुटो होन्दु, 32मगर जब बुतै जान्दु, त उपजी के सब पौधों मा बटि सबसे बड़ु ह्वे जान्दु, अर वेका फौंका इथगा बड़ा ह्वे जनदिन कि पंछि वेका फौंक्यों मा ऐके अपणु घोल बणौन्दिन।”#4:32 इस्राएल देस मा लय्या का पौधा 8 से 12 फिट तक बड़ा ह्वे जनदिन, इख तक की पंछि ऐके वेमा अपणा घोल बणौन्दिन।
33अर यीशु न लोगु तैं सिखौणु खुणि इन्नि भौत सा उदारणों को इस्तेमाल कैरी, अर ऊंतैं उथगा ही बतै जथगा वु समझि सकदा छा। 34अर यीशु बगैर उदारण दियां लोगु बटि कुछ भि नि बुल्दु छौ, मगर जब यीशु अपणा चेलों का दगड़ा मा होन्दु छौ, त हरेक बात को मतलब ऊंतैं समझै देन्दु छौ।
यीशु द्वारा आंधी तैं शान्त करण
(मत्ती 8:23-27; लूका 8:22-25)
35अर वे ही दिन जब रुमुक होण लगि गै, त यीशु न चेलों कू बोलि, “चला, हम झील का पल्या छाला चलद्यां।” 36इलै ऊ वीं भीड़ तैं उखि छोड़ि के यीशु तैं ठिक उन्नि अफ दगड़ि लि गैनी, जन वु नाव मा छौ। अर वीं नाव का दगड़ा मा उख दुसरि नावें भि छै।
37अर जब वु झील मा जाणा छा, त एक बड़ी आंधी ऐ। अर पाणि की लैर नाव से इथगा जोर से लगिनी, कि नाव पाणिळ भुरेण लगि गै। 38मगर यीशु नाव का पिछनै का हिस्सा मा मुण्ड़ तौळ तकिया रखी के सिणु छौ। अर चेलों न वेतैं बिंजाळी के बोलि, “गुरुजी हे गुरुजी, तुमतै त हमरि कुई भि चिन्ता-फिकर नि च, कि हम मुरण वळा छां।” 39तब वेन उठी के आंधी तैं झिड़की, अर पाणि की बौछारों कू बोलि, शान्त ह्वे जा अर रुकी जा, अर ऊ रुक गैनी अर सब कुछ शान्त ह्वे गै। 40अर यीशु न चेलों कू बोलि, “तुम किलै डऽरणा छाँ? क्या तुमतै अभि तक बिस्वास नि च?” 41तब यू देखि के चेला भौत डौऽरी गैनी अर आपस मा बोन्न लगि गैनी, “अरे, आखिर मा यू छैई कु च? जु कि आंधी अर पाणि तैं आज्ञा देन्दु, अर ऊ वेकी मणदिन।”
Currently Selected:
मरकुस 4: GBM
Highlight
Share
Copy
Want to have your highlights saved across all your devices? Sign up or sign in
© (Active) Wycliffe Bible Translators, Inc. All rights reserved.
