Lujia 9

12 Gie Shitune Peizhi Echighazho

(Mat 10:5-15; Mak 6:7-13)

1 Ersa 12 gie tujini uruzhi hhantulaghadene hhelade soyuji sheitan hanshilieku, gien goudaghaku nenli, qienli ogiwo. 2Hhelai peizhi echighadene Hudai gojiai chonjizhi gientulai goudagha giezho. 3Hhelade kieliewo, "Mo yose zhugun, kuabao, ijiuni, baerlai bu barei. Pse jien ghua bu barei. 4Ta alinie giede orose hhe oronse likai gietula hhe giede sou. 5Alinie chenshide tai ulie jienliese hhense likai giekude kon jieredu turane kui boughazhi fandui giezhi zhenmin gie."

6Ingie tujila go chenshi, aghinlade echizhi Hudai kielienyi chonjizhi gien goudaghazho.

Hherode Honshan Munan Giesan

(Mat 14:1-12; Mak 6:14-29)

7Ingiekude Hherode honshan fashen giesan shiqinlai man sonosudene matui imutunyi shiqin wo giezho. Kunla kieliese fugusan Yaheiya aminne oluwo giezho. 8Niezhan kunla kieliese Iliya chuxien giewo giezho. Pseshiku kunla kieliese nie melieshiku xienzhi aminne oluwo giezho. 9Hherode "Yaheiyani qiorunyi bi pienjiwo. Bi sonosusan ene kun daojishi kien wine" giezhi kieliewo. Ingie banfa xianjizhi nie uzhele echine giezho.

Ersa 5000 Kun Chudughazho

(Mat 14:13-21; Mak 6:30-44; Yah 6:1-13)

10Shitula kharei iredene giesan shiqinlai man Ersade kieliewo. Ersa hhelai konkonji uduru Bosaida chenshide echiwo. 11Kunla mejiedene hhei daghazho. Ersa hhelai jienliedene Hudai gojiai jianjizhi gientulai goudaghazho.

12Naran pudakude 12 gie shitu Ersai melie ire kieliewo, "Kunlai sandaghazhi hhela aghinlade ijiezhi kijieku oronne ereile echigieba, eneshi hontan wo." 13Ersa kieliewo, "Ta hhelade ogizhi ijiegha." Hhela kieliewo, "Matande zinie tawun ginanji ghua zhaghasun wo. Imeghei kunlade pse agile echinu?" 14Hhende chabudu 5000 ere kun wo. Ersa kieliewo, "Ta hhelai chabudu 50 gie 50 gieji nie tozi nie tozi sougha." 15Tujila Ersa kieliesan mutun kunlai man soughawo. 16Ersa tawun ginan, ghua zhaghasunyi barei asimanyi uzhe, Hudade mafan kieliedene ghulu keigha, tujilade ogise tujila kunlai melie teiwo. 17Dajiala man ijie chududene feiliesan zhazhai hhantulaghase 12 gie lanzi zhonlowo.

Ersashi Mexiha Enbene

(Mat 16:13-19; Mak 8:27-29)

18Niudude Ersa niezheghanne onxian giekude tujilaniye hhantu wo. Ersa hhelade asawo, "Kunla kieliese bishi kien wo giezho?" 19Hhela kieliewo, "Kunla kieliese xili gieghasan Yaheiya wo giezho. Niezhan kunla kieliese Iliya wo giezho. Pse niezhan kunla kieliese eqighanku nie xienzhi aminne oluwo giezho." 20Ersa hhelade kieliewo, "Ta kieliese bishi kien wo?" Beduru kieliewo, "Chishi Mexiha wo." 21Ersa ene shiqinyi kiemade bu kielie giezhi hhelade hende fenfulawo, 22"Kunnikewon matugieseda hende shouku giezhi zhanlao, fugie buwa, jinwun hanjiala mii fandui giezhi alane. Ghurudude aminne olune."

23 Ersa kunlade kieliewo, "Kien mii daghane giese goyane sheidene niudunie shizijiane beiliezhi mii daghakuni wo. 24Kien aminne jiuine giese aminne widaghane. Made oluzhi aminne widaghase hhe kun aminne jiuine. 25Kun duyani man zhenjidene goyane peizhi widaghase yande gou wo? 26Kien mase pse kieliensemi jiuren giese Kunnikewon goyane famade, pse Ada, zhiguitu qienxienlai famade irekude hhenseye jiuren giene. 27Bi tande shuhua kielieye, enende beisan kun dunda niezhanla Hudai gojiani ulie chanlatula ulie fugune."

Ula Jiere Ersani Yanzi Bienjizho

(Mat 17:1-8; Mak 9:2-8)

28Ene kielienyi kieliezhi chabudu neimudu oludene Ersa Beduru, Yaheiya, Yagebui udurudene ulade onxian giele khireiwo. 29Onxian giekude ungieni bienjidene jiensei chighan gon faizho. 30Menzhali Musa, Iliya ghuala Ersare kielien kieliezho. 31Hhela fama dunda khizhedene Ersa Yelusalende fuguzhi Hudai jihua chenjikui shanlian giezho. 32Beduru, Bedurui nokielani hende nokuru hhunturazho. Hhela xiereisenu Ersai gonqii chanlawo. Hherezhe ghua kun hhantu beizho. 33Hhela likai giekude Beduru Ersade kieliewo, "Ezhan, matan enende gou wo. Enende ghuran zhanfan daiye. Niei chade, niei Musade, niei Iliyade." Hhe yan kieliesanne ulie mejiene. 34Hhe kieliekude niegieda olien khase hhela ayizho. 35Ingiekude olien dundase nie shenqi ire kieliewo, "Eneshi bi sunghusan mii kewon wo. Ta hhei kielienyi chenlie!" 36Shenqi daose Ersa niezheghan feiliezho. Hhe uduse khuinashi tujila chanlasan shiqinyi kiemade ese kieliewo.

Sheitan Heisan Kewonni Goudaghazho

(Mat 17:14-18; Mak 9:14-27)

37Khuichudu ulase bouzhekude olon kunla Ersai ochirale irewo. 38Kunlai dundase nie kun waradazhi kieliewo, "Loushi, chini nie xiahua gieye. Kewonyimi nie uzhezhi ogi. Made zi niekozi kewosi wo. 39Sheitan hhei barei agise menzhali onghonoghane. Nie tigharaghase amansei momozi khizhene. Shan dailaghazhi deigo likai ulie giene. 40Bi tujilaichii xiahua giezhi nie tou khigha giese hhela khigha dawo."

41 Ersa kieliewo, "Ai, ta ene xianxin gieku witu, xiemecha yochen kunla. Bi tanse rennai giezhi giedoghoncha beine? Chi kewonne uduru enende ire." 42Hhe irekude sheitan qila benda hende tigharaghawo. Ersa zannan ruhheryi nie sugie kewonni goudagha adadei jiuizhi ogiwo. 43Hudai fugie nenlii uzhedene kunla man ghanira beizho.

Ersa Duya Ijiekune ji 2 Hui Kieliezho

(Mat 17:22-23; Mak 9:30-32)

Ersa giesan shiqinyi kunla uzhedene ghanirakude Ersa tujiladene kieliewo, 44"Ta ene kielienyi goude chenliezhi jila, Kunnikewonyi kunlai khade jiuine." 45Hhela ene kielienyi dunjire dazho. Isiini hhelade niuighazhi ese mejieghazho. Hhela ayizhi asaye dazho.

Hudani Gojiade Zui Fugieni

(Mat 18:1-5; Mak 9:33-37)

46Hhelai dunda kien zui fugie wo giezhi nienieji zhenjindu qiiwo. 47Ersa hhelai zhughede yan sumulasanyi mejiedene nie kewosii uduru ire kanzidene beigha 48hhelade kieliewo, "Kien mii niereghala ene kewosii jienliese mii jienliezho. Mii jienliese mii peisan Hudai jienliezho. Tai dunda kien zui meilashi hhe zui fugie wo."

Ersani Niereghala Sheitan Touchen Kun

(Mak 9:38-40)

49 Yaheiya kieliewo, "Ezhan, bijien nie kunyi uzhese chii niereghala sheitan touzho. Bijien danlazhi ese toughawo. Hhe bijienre hhantu chii ese daghazho." 50Ersa kieliewo, "Bu danla. Tai fandui ulie giese tande oluzhi giezho."

Samaliya Kunla Ersani Fandui Giezho

51 Ersa asiman jiere khireiku ghujinlase jiejin giezhi Yelusalende ijinyo echine giezho. 52Ingie giedun kunyi dafaladene Samaliya aghinde Ersa irekuni zhunbei gieghale echiwoma, 53Yelusalende echikui mejiedene hhela Ersai ese jienliewo. 54Ersai tuji Yagebu, Yaheiya ene shiqinyi uzhedene kieliewo, "Ezhan, chi bijienyi fenfulaghazhi asiman jierese khan bouzheghadene enelai sidera widaghase olunulie?" 55Ersa ochira hhelai sugiewo. 56Ingiedene hhela pse nie aghinde echiwo.

Ersani Daghaku Daijia

(Mat 8:19-22)

57Hhela mo yokude nie kun Ersade kieliewo, "Chi khala echise bi chii daghane." 58Ersa kieliewo, "Funieghede dun wine, asiman jieredu bunzhude ho wine, Kunnikewonde nie zhentou teiku oronda uwo."

59 Ersa pse nie kunde "Chi mii dagha." giezhi kieliese hhe kun "Ezhan, bi xien adane bulale echiye." giezhi kieliewo. 60Ersa kieliewo, "Fugusan kun fugusan kunlane bulale echi gie, chi Hudai gojiai chonjile echi."

61Da nie kun kieliewo, "Ezhan, bi chini daghanema, xien echidene giededu kunladene nie kieliedei ireye." 62Ersa kieliewo, "Anzhasunyi bareidene khuinane uzhesan kun Hudai gojiai pei dane."

Currently Selected:

Lujia 9: sce

Highlight

Copy