ሀዋረታ 10
10
ጰፅሮሳነ ቆርነልዮሳ
1ቅሳረን፥ “ፃለ ኦላ አሳታ” ጌተትያ ኦላንቾታ ግዶን እስ ቆርነልዮሳ ጌተትያ ማቶ ሀላቃይ ደኤስ። 2ቆርነልዮስ ባ ሶ አሳራ ፆሳ ምን አማንያ አስነ ፆሳ ጎይንያ አስ። አይሁደ ማንቆታካ ዳሮ ማዴስ፥ ቃስ ፆሳ ኡባ ዎደ ዎሴስ። 3እስ ጋላስ ኡዱፉን ሳተ ሄራን ፆሳ ኪታንቾይ እያኮ ይድ፥ “ቆርነልዮሳ” ግድ ፄግሽን እ ቆንጨን ጌሽድ በእስ።
4ቆርነልዮስ ዳጋምድ ኪታንቹዋ ትሽ ኦ ፄልድ፥ “ጎዳዉ፥ እ አይቤ?” ያግስ።
ኪታንቾይ ዛሪድ፥ “ነ ዎሳይነ ማንቆታ ነ ማደይስ ፆሳ ስንን ሀሳየትስ። 5ሀእ ዮጰ አሰ ኪታዳ፥ ጰፅሮሳ ጌተትያ ስሞና ኤህሳ። 6ጰፅሮስ አባ ዶናን ጋልባ ሃሽያ ስሞና ሶን እማተ ሲራትስ” ያግስ።
7ቆርነልዮስ ባዉ ኦድዳ ኪታንቾይ ብን፥ ባ አይለታፐ ናምአታነ ፆሳ ጎይንያ ባ ማታ ዎታዳረታፐ እሱዋ ፄግድ፥ 8ኤንታዉ ኡባባ ኦድድ ዮጰ ኪትስ።
9ዎንተ ጋላስ ኤንቲ ብድ፥ ዮጰ ካታማ ማትሽን ኡሱፑን ሳተ ሄራን ፆሳ ዎሳናዉ ጰፅሮስ ፖቀ ቦላ ከይስ። 10እ ኮሻትድ ካ ማናዉ ኮይስ፥ ሽን ካ ካፅሽን እ ቆንጨ በእስ። 11ሳሎይ ዶየትን፥ ግታ አፍላ ዳንያባይ ኦይዱ ባጋራ ኦይከትድ ዎሽን እ በእስ። 12እያን ኦይዱ ቶሆራ ደእያ መሄት፥ ዎራ ዶአት፥ ኡሎራ ጎሸትያ መተትነ ሳሎ ካፎት ኡባይ ደኤስ። 13ሄ ዎደ፥ “ጰፅሮሳ፥ ደንዳ ኤቃዳ ሹካዳ ማ” ግያ ቃላይ እያኮ ይስ።
14ሽን ጰፅሮስ፥ “ጎዳዉ፥ አካይ! ታ ቱናባ ኡባራካ ማ ኤርከ” ያግስ።
15ቃስ፥ “ፆሳይ ጌሽዳይሳ ኔኒ ቱና ጎፓ” ግያ ቃላይ ናምአን እያኮ ይስ። 16ሄስካ፥ ሄ ቶሆ ሀንዳፐ ጉየ ሄ ግታ አፍላ ዳነይስ ኤለስድ ፑደ ሳሎ ኤከትስ።
17ጰፅሮስ ባ በእዳ ቆንጨ ብርሸይ፥ “አይ ግዳንደሻ?” ግድ ባ ዎዛናን ቆፕሽን፥ ቆርነልዮስ ኪትዳ አሳት ስሞና ሶ ኦይች ደምድ ካረን ኤቅዶሶና። 18ባንታ ቃላ ቁ ኦድ፥ “ጰፅሮሳ ጌተትያ ስሞና ጌተትያ እማይ ሀይሳን ደኢ?” ያግድ ኦይችዶሶና።
19ጰፅሮስ ቆንጨን በእዳባ ቆፋ ቦላ ደእሽን፥ ጌሻ አያናይ እያኮ፥ “ሄኮ፥ ሄ አሳት ነና ኮዮሶና። 20ደንዳዳ ዎ፥ ታኒ ኤንታ ኪትዳ ግሾ ስና ኤንታራ ባ” ያግስ።
21ጰፅሮስ አሳታኮ ዎድ፥ “ህንተ ኮየይ ታና፤ አይስ ይደቲ?” ያግስ።
22ኤንቲ ዛሪድ፥ “ኑና ማቶ ሀላቃይ ቆርነልዮስ ኪትስ። እ ፅሎ፥ ፆሳ ጎይንያ አስነ አይሁደ አሳ ኡባን ዳሮ ቦንቸትዳ አስ። ቆርነልዮስ፥ ነና ባ ሶ ኤህስድ ቃላ ኔፐ ስአና መላ ጌሻ ኪታንቾይ እያዉ ኦድስ” ያግዶሶና። 23ጰፅሮስ አሳታ ሶ ገልስድ ሞክስ።
ዎንተ ጋላስ፥ ደንድድ ኤንታራ ብስ። ዮጰ ካታማን ደእያ አማነይሳታፐ እሶት እሶት እያራ እስፈ ብዶሶና። 24ዎንተ ጋላስ፥ ቅሳረ ጋክዶሶና። ቆርነልዮስ ባ ዳቦታነ ባ ማታ ላገታ እስፈ ፄግ ሺሽድ፥ ጰፅሮሳ ናጌስ። 25ጰፅሮስ ሶ ገላና ሀንሽን፥ ቆርነልዮስ እያራ ጋሄትድ እያ ስንን ኩንድድ እያዉ ጎይናናዉ ኮይስ። 26ሽን ጰፅሮስ፥ “ደንዳ፥ ታካ ታ ሁጰን ነ መላ አሰ” ያግድ እያ ደንስ።
27ጰፅሮስ ቆርነልዮሳራ ኦደትሸ ሶ ገልያ ዎደ ዳሮ አሳይ ሺቅዳይሳ ደምስ። 28እ አሳኮ፥ “አይሁደ አስ ሀራ ደረራ እስፋናዉ ዎይኮ ጋሄታናዉ ዎጋ ግዶናይሳ ህንተ ኤሬታ። ሽን ታኒ ኦናካ ቱና ዎይኮ ጌሽ ግደና ጎና መላ ፆሳይ ታና በስስ። 29ሄሳ ግሾ፥ ህንተ ታኮ ኪትን እፆይ ባይና ያስ። ሀእ ታና አይስ ፄግስዳኮ ታዉ ኦድተ” ያግስ።
30ቆርነልዮስ፥ “ታኒ ሀች ኦይዱ ጋላሳፐ ካሰ ሀኖደ ኡዱፉን ሳተ ዎሳ ዎስሽን፥ ጶልያ ማኦ ማእዳ አስ ታ ስንን ኤቅስ። 31እ ታኮ፥ ‘ቆርነልዮሳ፥ ፆሳይ ነ ዎሳ ስእስ፥ ኔኒ ማንቆታ ማድዳይሳካ ሀሳይስ። 32ህዛ፥ አሰ ዮጰ ኪታዳ፥ ስሞን ጰፅሮሳ ገይሳ ፄግሳ። ስሞን ጰፅሮስ ስሞና ጌተትያ ጋልባ ሃሽያ ኡራ ሶን አባ ዶናን ሲራትስ’ ያግስ። 33ሄሳ ግሾ፥ ታኒ ኔኮ ኤለሳዳ ኪታስ፤ ነ ሎኦ ያዳሳ። ህዛ፥ ፆሳይ ነና ኪትዳባ ኡባ ስአናዉ ሀእ ኑኒ ኡባይ ሀይሳን ጎዳ ስንን ደኦስ” ያግስ።
ጰፅሮሳ ሃሳያ
34ካልድካ፥ ጰፅሮስ፥ “ፆሳይ አሳ ሶምኦ በእድ አሰ አሳፐ ሻከና።#ዛረ 10:17. 35ሽን አሰ ኡባ ኦና ግድኮካ ባዉ ያየይሳነ ፅሎ ኦሶ ኦይሳን ፆሳይ ኡፋይተይሳ ታኒ ቱማ አኬካስ። 36ፆሳይ፥ ኡባ ጎዳ ግድዳ የሱስ ክርስቶሳ ባጋራ ሳሮተ ኦድሸ ሀ ዎንገላ እስራኤለ አሳስ ኪትዳይሳ ህንተ ኤሬታ። 37ዮሃንስ ፅንቃተባ ጋልላን ሳባክዳ ዎድያፐ ዶምድ ይሁዳ ቢታ ኡባ ጋካናዉ ሀንዳባ ህንተ ኤሬታ። 38ፆሳይ ናዝረተ የሱሳስ ጌሻ አያናነ ዎልቃ እሚስ። ፆሳይ እያራ ደእያ ግሾ ሎኦባ እ ኦሸ ፃላሄ ኩሸን ሃረትዳ ኡባ ፓሸ ዩይስ።
39“አይሁደ ቢታንነ የሩሳላመን እ ኦዳ ኡባባስ ኑኒ ማርካታ። ኤንቲ ማስቃልያ ቦላ ካቅድ እያ ዎዶሶና። 40ሽን ፆሳይ ሄን ጋላሳን ሀይቆፐ እያ ደንድ አሳስ ቆንጫና መላ ኦስ። 41ሄ ቆንጨይ ፆሳይ ኮይሮ ዶርዳ ማርካታሳፈ አትሽን፥ አሳ ኡባሳ ግደና። እ ሀይቆፐ ደንድዳፐ ጉየ እያራ ምዳነ ኡይዳ። 42ፆሳይ ዎንገላ አሳስ ኑኒ ኦዳና መላነ ፓፃ ደኤይሳታ ቦላነ ሀይቅዳይሳታ ቦላ ፕርዳናዉ ሹመትዳይ የሱሳ ግደይሳ ማርካታና መላ ኑና ኪትስ። 43ፆሳይ እያ አማንያ ኡባ ናጋራይ፥ እያ ሱንን አቶ ጌተተይሳ ናበት ማርካቶሶና” ያግስ።
44ጰፅሮስ ቡሮ ሄ ኦዳ ኦንጎናሽን ቃላ ስእያ ኡባ ቦላ ጌሻ አያናይ ዎስ። 45ጰፅሮሳራ ዮጰፈ ይዳ አማንያ ቃፃረትዳ አይሁደ ኡባይ፥ አይሁደ ግዶናይሳት ቦላ ጌሻ አያናይ ጉክዳ ግሾ ማላለትዶሶና። 46ጋሶይካ፥ ኤንቲ ዱማ ዱማ ዶናን ኦደትሽንነ ፆሳ ግታተ ሳቢሽን ስእዶሶና።
ሄ ዎደ ጰፅሮስ ዛሪድ፥ 47“ሀይሳቲ ቃስ ኑ መላ ጌሻ አያና ኤክዳይሳት ፃማቀቶና መላ ሃ ድጋናይ ኦኔ?” ያግስ። 48ኤንቲ የሱስ ክርስቶሳ ሱንን ፃማቀታና መላ ኤንታ ኪትስ። ሄሳፈ ጉየ፥ ኤንቲ ባንታራ ጉ ጋላስ ኡታና መላ ጰፅሮሳ ዎስዶሶና።
Currently Selected:
ሀዋረታ 10: GFBEVF
Highlight
Share
Copy
Want to have your highlights saved across all your devices? Sign up or sign in
The Word for the World International and The Word for the World Ethiopia
