ሀዋረታ 11
11
ጰፅሮስ ባ ኦዳ ኦሱዋ ኦድስ
1ሀዋረትነ ይሁዳ ኡባን ደእያ አማነይሳት፥ አይሁደ ግዶናይሳትካ ፆሳ ቃላ ኤክዳይሳ ስእዶሶና። 2ጰፅሮስ የሩሳላመ ብዳ ዎደ ቃፃረትዳ አማነይሳት፥ 3እያኮ፥ “ኔኒ ቃፃረትቦናይሳታኮ ገላዳ ኤንታራ ካ አይስ ማዲ?” ያግዶሶና።
4ሽን ጰፅሮስ ሀንዳባ ኮይሮፐ ዶምድ ማራን ማራን ኦድስ፦ 5“ታኒ ዮጰ ካታማን ፆሳ ዎሳሸ ቆንጨ በአስ። ግታ አፍላ ዳንያባይ ኦይዱ ባጋራ ኦይከትድ ሳሎፐ ዎሸ ታኮ ይስ። 6ታኒ ትሽ ኦ እያ ግዶ ፄልያ ዎደ ኦይዱ ቶሆራ ደእያ መሄታ፥ ዎራ ዶአታ፥ ኡሎራ ጎሸትያ መተታነ ሳሎ ካፎታ በአስ። 7‘ጰፅሮሳ፥ ደንዳ፥ ሹካዳ ማ’ ግያ ቃላ ስአስ።
8“ሽን ታኒ፥ ‘ጎዳዉ፥ አካይ፥ ቱናባይ ዎይኮ ጌዮናባይ ኡባካ ታ ዶናኮ ሺቅ ኤረና’ ያጋስ።
9“ ‘ፆሳይ ጌሽዳይሳ ኔኒ ቱና ጎፓ’ ግያ ቃላይ ናምአን ሳሎፐ ይስ።
10“ሄስ ሄ ቶሆ ሀንን፥ ዉርሰን ኡባባይ ሳሎ ፑደ ኤከትስ። 11ሄ ሳተንካ ሄ አሳት ቅሳረፐ ታኮ ኪተትድ ታኒ ደእያ ኬ ጋክ አግዶሶና። 12ስና ኤንታራ ባና መላ አያናይ ታዉ ኦድስ። ቃስ ሀ ኡሱፑን እሻት ዮጰፈ ታራ ቅሳረ ብዳይሳታራ ቆርነልዮሳ ሶ ገልዳ። 13ኪታንቾይ እያ ሶን ኤቅድ፥ ‘ዮጰ ኪታዳ ጰፅሮሳ ጌተትያ ስሞና ፄግሳ። 14ነናነ ነ ሶ አሳ ኡባ አሽያ ቃላ እ ነዉ ኦዳና’ ግዳይሳ ቆርነልዮስ ኑስ ኦድስ።
15“ታኒ ሃሳያ ዶምያ ዎደ ጌሻ አያናይ ኮይሮ ኑ ቦላ ዎዳይሳዳ ኤንታ ቦላካ ዎ አግስ። 16ሄ ዎደ፥ ‘ዮሃንስ ሃን ፃማቅስ፥ ሽን ህንተ ጌሻ አያናን ፃማቀታና’ ያግዳ ጎዳ ቃላይ ታዉ ቆፈትስ።#ሀዋ 1:5. 17ፆሳይ ኑስ ጎዳ የሱስ ክርስቶሳ አማንዳይሳታስ እምዳ እሞታ አይሁደ ግዶናይሳታስካ እምኮ፥ ያትን ፆሳ ድጋናዉ ታኒ ኦኔ?” ያግስ።
18ኤንቲ ሄሳ ስእዳ ዎደ ባንታ ፓላማ አግድ፥ “ያትን፥ ፆሳይ አይሁደ ግዶናይሳትካ ናጋራፐ ስሚድ ደኦን ዳናዳ ቃዳ እሚስ” ያግድ ፆሳ ጋላትዶሶና።
አንፆከ ዎሳ ኬ
19እስፅፋኖሰ ሀይቆስ ጋዳ ጎዳ ጋሶን ላለትዳ አማነይሳት ቃላ አይሁደታ ፃላላስ ኦድሸ ስሮፍንቀ፥ ቆጵሮሳነ አንፆከ ጋካናዉ ዩይዶሶና።#ሀዋ 8:1-4. 20ሽን ቆጵሮሳፐነ ቀሬናፐ ይዳ እስ እስ አማንያ አሳት አንፆከ ብድ፥ ጎዳ የሱሳ ዎንገላ ግርከ አሳስካ ኦድዶሶና። 21ጎዳ ዎልቃይ ኤንታራ ደኤስ፤ ቃስ ዳሮ አሳይ አማንድ ጎዳኮ ስምዶሶና።
22ሄ ኦዳ የሩሳላመን ደእያ ዎሳ ኬይ ስእዳ ግሾ ባርናባሳ አንፆከ ኪትስ። 23ባርናባስ አንፆከ ብዳ ዎደ ፆሳ አ ኬሀተ ኦሱዋ በእድ ኡፋይትስ። ኤንቲ ኡባይ ባንታ ኩመ ዎዛናን ጎዳን ምንድ ዳና መላ ኤንታ ዞርስ። 24ባርናባስ ጌሻ አያናይነ አማኖይ ኩምዳ ሎኦ አስ ግድያ ግሾ ዳሮ አሳይ ጎዳ አማንዶሶና።
25ሄሳፈ ጉየ፥ ባርናባስ ሳኦላ ኮያናዉ ታርሰሳ ብስ። 26ያን ሳኦላ ደምዳ ዎደ አንፆከ ኤክድ ይስ። ባርናባስነ ሳኦል ዎሳ ኬ አሳራ ላይ ኩመ ኡትድ ዳሮ አሳ ታማርስዶሶና። አማነይሳት አንፆከን “ክርስታነ” ጌተትድ ኮይሮ ፄገትዶሶና።
27ሄ ዎደ እስ እስ ናበት የሩሳላመፐ አንፆከ ዎዶሶና። 28ኤንታ ግዶፈ አጋቦሳ ገይስ ደንድድ ቢታ ኡባን ግታ ኮሽ ከያናይሳ አያና ዎልቃን ትንብተ ኦድስ። ሄስ ሀንዳይ ሮመ ካዋ ቃላዉድዮሳ ዎደና።#ሀዋ 21:10. 29አማነይሳት ሁጰን ሁጰን ባንታ ዎልቃ መላ ሚሸ ከስድ ይሁዳን ደእያ አማነይሳታስ ማደ የዳናዉ ቆፋ ቃችዶሶና። 30ኤንቲ ሄሳዳ ኦድ፥ ሚሽያ ባርናባሳ ቦላነ ሳኦላ ቦላ ዎሳ ኬ ጭማታስ የድዶሶና።
Currently Selected:
ሀዋረታ 11: GFBEVF
Highlight
Share
Copy
Want to have your highlights saved across all your devices? Sign up or sign in
The Word for the World International and The Word for the World Ethiopia
