ሀዋረታ 12
12
ጰፅሮስ ቃሾ ኬፈ ከስ ኤክስ
1ሄ ዎደ ካዎይ ሄሮዲስ#12:1 ካዎይ ሄሮዲስ፦ ሀይስ ካዎይ ሄሮዲስ፥ ሄሮዲሳ አግርጳ ጌተትያ ኮይሩዋ። እ፥ 37-44 ማሮተ ላይ ጋካናዉ ሃርስ። እ ካዋ ሄሮዲሳስ ናአ ናአ ዎሳ ኬ አሳፐ ባጋ ጎዳ ዶምስ። 2ዮሃንሳ እሻ ያይቆባ ማሻን ዎስስ። 3ሄስ አይሁደታ ኡፋይስዳይሳ በእድ፥ ጉጅድ ጰፅሮሳካ ኦይስ። ሄስ ሀንዳይ ፓስካ ባኣለ ቦንችያ ጋላሳታና። 4ጰፅሮሳ ኦይክድ ቃችስ። ፓስካ ቦንችያ ጋላሳታፐ ጉየ ደርያ ስን አናዉ ቆፕድ፥ ኦይዱ ኦይዱ ዎታዳረት እያ ናጋና መላ ታማነ ኡሱፑን ዎታዳረታስ አድ እሚስ።#ከሳ 12:1-27. 5ሄሳ ግሾ፥ ጰፅሮስ ቃሾ ኬን ናገቴስ። ሽን ዎሳ ኬ አሳይ እያዉ ምንድ ፆሳ ዎሶሶና።
6ሄሮዲስ ጰፅሮሳ አሳ ስን ሺሻናፐ ካሰ ቃማ ጰፅሮስ ናምኡ ባጋራ ናምኡ ዎታዳረታራ ሳንላታን ቃሸትድ ኤንታ ግዶን ስክስ። ናገይሳት ቃሾ ኬ ፐንገታን ኤቅድ ናጎሶና። 7አኬኮና ደእሽን ጎዳ ኪታንቾይ ቆንጭስ። ቃሾ ኬን ፖኦይ ፖእስ። ኪታንቾይ ጰፅሮሳ ምያ ቦች ባርክስድ፥ “ኤለ ደንዳ” ያግስ። ኢራካ ሳንላታይ እያ ኩሽያፐ ዎ አግስ። 8ኪታንቾይ እያኮ፥ “ነ ማኡዋ ማአ፥ ነ ጫማካ አ” ያግስ። ጰፅሮስ ሄሳዳ ኦስ፤ ኪታንቾይ፥ “ነ ላፃና ማአዳ ታና ካላ” ያግስ።
9ጰፅሮስ ቃሾ ኬፈ ከይድ ኪታንቹዋ ካልስ። እያዉ ቆንጨ በእያባ ዳንስፐ አትሽን፥ ኪታንቾይ ኦያባይ ቱማ ዳንቤና። 10ኪታንቾይነ ጰፅሮስ ኮይሩዋነ ናምአን ዎታዳርያ አድ ካታማ ኤፍያ ብራታ ፐንግያኮ ጋክዶሶና። ፐንገይ ኤንታዉ ባርካ ዶየት አግስ። ኤንቲ ከይድ እስ ኦግያራ ብሽን ኪታንቾይ አኬኮና ጰፅሮሳፐ ሻከት አግስ።
11ጰፅሮሳስ ዎዛን ስምን፥ “ታና ጎዳይ ባ ኪታንቹዋ ኪትድ፥ ሄሮዲሳ ኩሸፐነ ናግድ ኡትዳ አይሁደ አሳ ኡባፈ አሽዳይሳ ሀእ ቱማ ኤራስ” ያግስ።
12እ ሄሳ አኬክዳ ዎደ ዳሮ አሳይ እስፈ ሺቅድ ፆሳ ዎስያ በሳ፥ ማርቆሳ ጌተትያ ዮሃንሳ አየ ማይራም ሶ ብስ። 13ያን ካረን ኤቅድ ፄግስ። እስ ሮዳ ጌተትያ ኦሳንችያ ፐንግያ ዶያናዉ ያሱ። 14ሮዳ ጰፅሮሳ ቃላ ግድዳይሳ ኤርዳ ዎደ ኡፋይሳን ኩማዳ ካርያ ዶየና ጉየ ዎፃ ባዳ፥ “ጰፅሮስ ካረን ኤቅስ” ያጋዳ አሳስ ኦዳሱ።
15አሳይ ኢኮ፥ “ኔኒ ጎያይ!” ያግዶሶና። ሮዳ ጰፅሮሳ ግድዳይሳ ጌሻዳ ኦዳሱ። ኤንቲ፥ “ሄስ እያ ናግያ ኪታንቹዋ” ያግዶሶና።
16ሽን ጰፅሮስ ካረን ኤቅድ ፄግድ አጎና እፅን አሳይ ካርያ ዶይድ እያ በእድ ማላለትዶሶና። 17ሽን ኤንቲ ስእ ጋና መላ ጰፅሮስ ባ ኩሽያን ማልድ ጎዳይ ቃሾ ኬፈ እያ ዋት ከስዳኮ ኤንታዉ ቆንጭስ ኦድድ፥ “ሀይሳ ያይቆባስነ አማንያ አሳታስ ኦድተ” ግድ ያፐ ከይድ ሀራሶ ብስ።
18ሳአይ ዎንትያ ዎደ፥ “ጰፅሮስ አዉ ብደ” ግድ ዎታዳረት ዎል ግዶን ዳሮ ካጭዶሶና። 19ሄሮዲስ ጰፅሮሳ ኮይስን፥ እ ይዳ ዎደ ናገይሳታ ቆርድ፥ ኤንታ ዎና መላ ኪትስ። ሄሳፈ ጉየ፥ ሄሮዲስ ይሁዳፐ ቅሳረ ዎድ ያን ጉ ዎደ ኡትስ።
ሄሮዲሳ ሀይቁዋ
20ሄሮዲስ ፅሮሳ አሳ ቦላነ ስዶና አሳ ቦላ ዳሮ ሀንቀትስ። ኤንታ ቢታይ ካ ሄሮዲሳ ቢታፈ ደምያ ግሾ ኤንቲ እስፈ ግድድ እያ ሞርና ብላስፆሳ ባንታዉ ጭማ ኦድ ጊጋናዉ ሄሮዲሳኮ ብዶሶና።
21ሄሮዲስ ባርዳ ጋላሳን ባ ካዎተ አፍላ ማእድ፥ አራታ ቦላ ኡትድ አሳስ ኦድስ። 22አሳይ፥ “ሄስ ፆሳ ቃላ፥ አሳ ቃላ ግደና” ያግድ ዋስዶሶና። 23ሄሮዲስ ፆሳ ቦንችቦና ግሾ ኢራካ ጎዳ ኪታንቾይ እያ ደችን ጉፁነን ሜተትድ ሀይቅስ።
24ሽን ፆሳ ቃላይ ድጭሸነ ዳልግሸ ቤስ።
25ባርናባስነ ሳኦል ባንታ ኦሱዋ ፖልድ ማርቆሳ ጌተትያ ዮሃንሳ ባንታራ ኤክድ የሩሳላመፐ ስምዶሶና።
Currently Selected:
ሀዋረታ 12: GFBEVF
Highlight
Share
Copy
Want to have your highlights saved across all your devices? Sign up or sign in
The Word for the World International and The Word for the World Ethiopia
