ሀዋረታ 13
13
ባርናባሳነ ሳኦላ
1አንፆከን ደእያ ዎሳ ኬን ናበትነ አስታማረት ደኦሶና። ኤንቲ ባርናባሳ፥ ካሬ ጌተትያ ስሞና፥ ቀሬናፐ ይዳ ሉክዮሳ፥ ካዋ ሄሮዲሳራ ድጭዳ ምናሄነ ሳኦላ። 2ኤንቲ ጎዳ ጎይንሽንነ ፆምሽን ጌሻ አያናይ፥ “ታኒ ፄግዳ ኦሱዋስ ባርናባሳነ ሳኦላ ታዉ ዱማይተ” ያግስ።
3ሄሳ ግሾ፥ ኤንቲ ፆምዳፐነ ዎስዳፐ ጉየ ባንታ ኩሽያ ኤንታ ቦላ ዎድ የድዶሶና።
ባርናባስነ ሳኦል ቆጵሮሳን
4ሄሳ ግሾ፥ ጌሻ አያናይ ኤንታ ኪትስ። ሰለዉቀ ብዶሶና፤ ያፐ ማርካበን ገልድ ቆጵሮሳ ሃን ተቀትዳ ቢታ ብዶሶና። 5ኤንቲ ስልማና ጋክድ አይሁደ ዎሳ ኬታን ፆሳ ቃላ ኦድዶሶና። ዮሃንስ#13:5 ዮሃንስ፦ ሀ በሳን ፃፈትዳ ዮሃንስ፥ ሀዋርያ ዮሃንሳ ግዶናሽን ዮሃንስ ማርቆሳ ጌተትያ ማርቆሳ ዎንገላ ፃፍዳይሳ። ማድሸ ኤንታራ ደኤስ።
6ኤንቲ ዩሾይ አባን ተቀትዳ ቢታ፥ ቆጵሮሳ ካንድ ጳፉ ጋክያ ዎደ፥ እስ ዎርዳንቾ ናብያ፥ ባር-የሱሳ ጌተትያ አይሁደ ማሩዋ ደምዶሶና። 7ሄ ማሮይ ደርያ አይስያ ሳርግዮስ ጳዉሎሳ ጌተትያ አኬካንቾ አድያራ ደኤስ። ሳርግዮስ ጳዉሎስ ባርናባሳነ ሳኦላ ባኮ ፄግድ ፆሳ ቃላ ስአናዉ ኮይስ። 8ሽን ግርከ ዶናን ማሩዋ ሱንይ “ኤልማሳ” ጌተቴስ። እ ደርያ ሃረይስ አማኖና መላ ድጋናዉ ኮይድ ባርናባሳራነ ጳዉሎሳራ ኤቀትስ።
9ሽን ጳዉሎሳ ጌተትያ ሳኦል ጌሻ አያናን ኩምድ ማሩዋ ጫድ ፄልድ፥ 10“ላ፥ ፃላሄ ናአዉ፥ ኢታተ ኡባይ ኩምዳይሶ፥ ፅሎተ ኡባስ ሞርክያዉ፥ ሱረ ጎዳ ኦግያ ምርቀይሳ አግኪ? 11ሄኮ፥ ሀእ ጎዳ ኩሸይ ነ ቦላ ደኤስ። ኔኒ ቆቀ ግዳና፤ ጉ ዎደስ አዋ ፖኦ በአካ” ያግስ።
ኢራ ጫጋንነ ሚ እያ አይፍያ ጎዝን፥ ባ ኩሽያ ኦይክድ ካለያ አስ ኮይሸ ዩይስ። 12ደርያ አይሰይስ ሄሳ በእዳ ዎደ ጎዳባ ታማርስያ ትምርትያን ማላለትድ አማንስ።
ባርናባስነ ጳዉሎስ ጵስደ አንፆከን
13ጳዉሎስነ እያራ ደኤይሳት ጳፉፐ ደንድድ፥ ጵንፍለን ደእያ ጳርገ ማርካበራ ብዶሶና። ዮሃንስ ኤንታፈ ሻከትድ የሩሳላመ ስምስ። 14ሽን ኤንቲ ጳርገፈ አድ ጵስደን ደእያ አንፆከ ጋክዶሶና። ሳምባታ ጋላስ አይሁደ ዎሳ ኬ ገልድ ኡትዶሶና። 15ሙሰ ህገይነ ናበታ ማፃፋይ ናባበትዳፐ ጉየ አይሁደ ዎሳ ኬ ሀላቃት፥ “ኑ እሻቶ፥ አሳ ምንያ ቃል ህንተዉ ደእያኮ አሳስ ኦደርከት” ያግድ ኤንታኮ ኪትዶሶና።
16ጳዉሎስ ደንድ ኤቅድ ባ ኩሸ ማልድ፥ “እስራኤለ አሳቶነ፥ ፆሳ ጎይንያ አይሁደ ግዶና አሳዉ፥ ስእተ። 17ሀ እስራኤለ አሳ ፆሳይ ኑ ማይዛታ ዶርስ። ግብፀ ቢታን እማተን ኤንቲ ደእሽን፥ ኤንታ ዳርስድ ባ ግታ ዎልቃን ግብፀ ቢታፈ ኤንታ ከስስ።#ከሳ 1:7፤ ከሳ 12:51. 18መላ ቢታን ኦይታሙ ላይ መላ ኤንታ ዳንዳእስ።#ታይቦ 14:34፤ ዛረ 1:31. 19ካናነ ቢታን አይሁደ ግዶና ላፑን ካዎተታ ድግድ ኤንታ ቢታ ባ አሳ ላትስስ።#ዛረ 7:1.
20“ሄሳፈ ጉየ፥ ናብያ ሳሜላ ዎደ ጋካናዉ ኦይዱ ፄታነ እሻታሙ ላይ መላ አይስያ ዳይናታ ኤንታዉ እሚስ።#ዛረ 2:16፤ 1 ሳሜ 3:20. 21ሄሳፈ ጉየ፥ ኤንቲ ባንታዉ ካዎ እማና መላ ዎስን፥ ፆሳይ ብንያመ ሼሻፐ ቂሳ ናኣ፥ ሳኦላ ኦይታሙ ላይ ካዎታና መላ ኤንታዉ እሚስ።#1 ሳሜ 8:5፤ 10:21. 22ፆሳይ ሳኦላ ሻርዳፐ ጉየ ኤንታ ቦላ ዳዊታ ካዎስ። ፆሳይ ዳዊታባ ማርካትሸ፥ ‘ታኒ ኮይያ ኡባ ታ ዎዛና መላ ኦያ እሰየ ናኣ ዳዊታ ደማስ’ ያግስ።#1 ሳሜ 13:14፤ 16:12፤ ማዝ 89:20.
23“ፆሳይ፥ ‘ታኒ ዳዊታ ሼሻፐ እስራኤለ ደርያ አሸይሳ ኤሀና’ ግዳይሳ መላ የሱሳ ኤህስ። 24የሱሲ ያናፐ ስን እስራኤለ አሳ ኡባይ ባንታ ናጋራፐ ስሚድ ፃማቀታና መላ ዮሃንስ ቃላ ኦድስ።#ማር 1:4፤ ሉቃ 3:3. 25ቃስ ዮሃንስ ባ ኦሱዋ ዉርሳና ሀንሸ አሳኮ፥ ‘ታና ኦና ግድ ቆፔቲ? ታኒ ህንተ ናግያ ክርስቶሳ ግድከ፥ ሽን ታኒ እያ ጫማ ብርሻናዉ ታዉ በሶናይስ ታፐ ጉየራ ዬስ’ ያግስ።#ማቶ 3:11፤ ማር 1:7፤ ሉቃ 3:16፤ ዮሀ 1:20፥ 27.
26“ታ እሻቶ፥ አብራሃመ ሼሻቶ፥ ቃስ ሀይሳን አይሁደ ግዶናሽን ፆሳስ ያየይሳቶ፥ ሀ አቶተ ቃላይ ኑስ ኪተትስ። 27አይስ ጊኮ፥ የሩሳላመን ደእያ አሳይነ ኤንታ ሀላቃት የሱሳ ኤርቦኮና። ሳምባታ ኡባን ናባበትያ ናበታ ቃላ አኬክቦና ግሾ እያ ቦላ ፕርድድ ናበት ኦድዳ ቃላ ፖልዶሶና። 28የሱሳ ዎሳናዉ እስ ጋሶይካ ኤንታዉ ይን ጵላፆስ እያ ዎና መላ ዎስዶሶና።#ማቶ 27:22-23፤ ማር 15:13-14፤ ሉቃ 23:21-23፤ ዮሀ 19:15. 29ኤንቲ የሱሳባይ ጌሻ ማፃፋን ፃፈትዳባ ኡባ ፖልዳ ዎደ ማስቃልያፐ እያ ዎስድ ሞግዶሶና።#ማቶ 27:57-61፤ ማር 15:42-47፤ ሉቃ 23:50-56፤ ዮሀ 19:38-42. 30ሽን ፆሳይ ሀይቆፐ የሱሳ ደንስ። 31ሄሳፈ ጉየ፥ እ ባራ ጋልላፐ የሩሳላመ ይዳይሳታስ ዳሮ ቶሆ በንትስ። ኤንቲ ሀእ እያባ አሳስ ማርካቶሶና።#ሀዋ 1:3.
32“ፆሳይ ኑ አዋታስ እማና ግዳ ዎንገላ ኑኒ ህንተዉ ኦዶስ። 33ዳዊቲ ባ ማዝሙረ ማፃፋን ናምአን ሸምፑዋን፥
“ኔኒ፥ ታ ናአ፥
ታኒ ሀች ነና የላስ”
ጌተትድ ፃፈትዳይሳ የሱሳ፥ ፆሳይ ሀይቆፐ ደንድ ኑ ማይዛታስ እማና ግዳይሳ ኑስ ኤንታ ናይታስ ፖልስ።#ማዝ 2:7. 34እ ዎቆና መላ ፆሳይ ሀይቆፐ እያ ደንን ኤርሳናዉ፥
“ ‘ታኒ ዳዊታስ እማና ግዳ
አማነትዳ ጌሻ አንጁዋ ህንተዉ እማና’ ያግድ ኦድስ።#እሳ 55:3.
35ሄሳ ግሾ፥ ማዝሙረ ማፃፋን ሀራ በሳን፥
“ ‘ነ ጌሻ ናኣ አሀ ዎቅሳካ’ ያጌስ።#ማዝ 16:10.
36“ዳዊቲ ባ ዎደ ፆሳ ቆፋ ፖልዳፐ ጉየ ሀይቅድ ባ አዋታራ ሞገትድ ዎቅስ። 37ሽን ፆሳይ ሀይቆፐ ደንዳይስ ዎቅቤና።
38“ሄሳ ግሾ፥ ታ እሻቶ፥ ናጋራ አቶተይ የሱሳ ባጋራ ካሰትድ ህንተዉ ኦደትዳይሳ ኤርተ። ሙሰ ህገይ ናጋራፐ ፅልሳናዉ ዳንዳኤና። 39ሽን የሱሳ አማንያ ኡባይ ናጋራፐ ፅሌስ። 40ሄሳ ግሾ፥ ናበት ግዳይስ ህንተ ቦላ ጋኮና መላ ናገትተ።
41“ ‘ፆሳይ ግዳባ ለቅሰይሳቶ!
በእተ! ማላለትተ! ይተ!
ኦንካ ኦድን፥ ህንተ አማኖና ኦሱዋ
ታኒ ህንተ ዎድያን ኦና’ ” ያግስ።#እብራ 1:5.
42ጳዉሎስነ ባርናባስ አይሁደ ዎሳ ኬፈ ከይሽን፥ ካልያ ሳምባታን ሄሳ ጉጅድ ኦዳና መላ አሳይ ኤንታና ዎስዶሶና። 43ሺቆይ ላለትዳፐ ጉየ፥ ዳሮ አይሁደትነ አይሁደታ አማኑዋን ገልድ ፆሳ ጎይንያ ዳሮት ጳዉሎሳነ ባርናባሳ ካልዶሶና። አማንዳይሳት ፆሳ አ ኬሀተን ምንድ ዳና መላ ኤንታ ዞርዶሶና። 44ካልያ ሳምባታን ካታማን ደእያ አሳፐ ዳሮት ፆሳ ቃላ ስአናዉ ሺቅዶሶና። 45ሽን አይሁደት ዳሮ አሳ በእዳ ዎደ ጳዉሎሳ ቃናትድ እያ ሃሳያ እፅድ እያ ጫይዶሶና።
46ጳዉሎስነ ባርናባስ ያዮና፥ “ፆሳ ቃላይ ኮይሮትድ ህንተዉ ኦደታናዉ ኮሼስ። ሽን ህንተ ቃላ እፅድ መርና ደኡዋ ኤካናዉ ኑስ በሰና ግድ ህንተ፥ ህንተ ሁጰን ፕርድዳ ግሾ ህዛ ኑኒ አይሁደ ግዶናይሳታኮ ስሞስ። 47ጋሶይካ ጎዳይ፥
“ ‘አላመ ኩመይ ነ ባጋራ አታና መላ፥
ታኒ ነና አይሁደ ግዶና ደርያስ ፖኦ ኦስ’ ያግድ ኑና ኪትስ” ያግዶሶና።#እሳ 42:6፤ 49:6.
48አይሁደ ግዶናይሳት ሄሳ ስእዳ ዎደ ኡፋይትድ ፆሳ ቃላ ቦንችዶሶና። ቃስ መርና ደኡዋስ ዶረትዳ ኡባይ አማንዶሶና።
49ጎዳ ቃላይ ሄ ቢታ ኡባ ጋክስ። 50ሽን አይሁደት፥ አይሁደ ግዶና ፆሰ ጎይንያ ዱረ ማጫሳታነ ካታማን ደእያ ግታ አሳታ ጳዉሎሳ ቦላነ ባርናባሳ ቦላ ደንዶሶና። ሄ አሳት ኤንታ ጎዳ ዶምድ ባንታ ቢታፈ ከስዶሶና። 51ሽን ጳዉሎሳራነ ባርናባሳራ እፀይሳታስ ማላ ግዳና መላ ባንታ ቶሁዋፐ ባና ፕትድ እቆንዮነ ካታማ ብዶሶና።#ማቶ 10:14፤ ማር 6:11፤ ሉቃ 9:5፤ 10:11. 52ቃስ አንፆከን ደእያ አማነይሳት ጌሻ አያናንነ ኡፋይሳን ኩምዶሶና።
Currently Selected:
ሀዋረታ 13: GFBEVF
Highlight
Share
Copy
Want to have your highlights saved across all your devices? Sign up or sign in
The Word for the World International and The Word for the World Ethiopia
