ከሳ 2
2
ሙሰ የለተ
1ሄ ዎደ ሌወ ቆሞ ግድዳ እስ ኡራይ ሌወ ማጫስ እስዉ ኤክስ። 2ሄ ማጫስያ አደ ናአ የላሱ። ናአይ ማላ ሎኦ ግደይሳ በአዳ ሄ አጌና ቆሳሱ። 3ሽን እያ ሄሳፈ ዳሮ ቆሳናዉ ዳንዳኦናይሳ ኤራዳ፥ ማቃፈ ዳቾ ዳዳዳ፥ ማደ መላባ ትያዳ ናኣ እያን ዎሱ። ያታዳ ናይለ ሻፋ ጋፃን ማይጫ ግዶን ዎሱ። 4እያ ምችያ እያ ጋክያባ በአናዉ ሃሆን ኤቃሱ።
5ግብፀ ካዉዋ ናእያ ቦላ ሜጨታናዉ ናይለ ሻፋ ዎሱ። እ ማጫ አይለት ሃ ዶናን ይያ ሃ ስመረቶሶና። እያ ዳቾ ማይጫ ግዶን ደማዳ፥ ባ አይልዉ ባዳ ኤሀና መላ ኪታሱ። 6ዳቾ ዶያዳ ሄ ጉ ናኣ በአሱ። እ ዬከይሳ በአዳ ቃታዳ፥ “ሀይስ እብራወታ ጉ ናይታፐ እሱዋ” ያጋሱ።
7ሄ ዎደ እያ ምችያ ካዉዋ ናኤኮ፥ “ሀ ናኣ ንና መላ እብራወ ማጫስ ነዉ ኤሆ?” ያጋዳ ኦይቻሱ።
8እያ፥ “ኤ፥ ኤሀ” ያጋሱ። ናእያ ባዳ ናኣ አይዉ ኤሀሱ። 9ካዉዋ ናእያ ማጫስዉ፥ “ሀ ናኣ ኤፋዳ፥ ታዉ ን፤ ድቻ፤ ታኒ ነዉ ዳሞዘ ቃንፃና” ያጋሱ። ማጫስያ ናኣ ኤፋዳ ንሱ። 10ናአይ ድጭን፥ ካዉዋ ናኤኮ ኤሀሱ፤ እ እዉ ናአ ግድስ። “ታኒ ሃፈ እያ ከሳ ኤካስ” ጋዳ፥ እያ ሙሰ#2:10 ሙሰ: እብራወ ዶናን ሙሰ ጉሳይ “ከሶ” ጉሱ ጋዳ ሱንሱ።
ሙሰይ ምድያመ ቢታን
11ሙሰይ ድጭዳፐ ጉየ እስ ጋላስ ባ አሳ በአናዉ ብድ፥ ኤንቲ ዴፆ ኦሶ ኦሽን ኤንታ በእስ። ግብፀ አስ እሶይ እብራወታፐ እሱዋ ባ ያራ ዋሽን በእስ። 12እ ይያ ሃ ፄልን፥ ኦንካ ባይናይሳ በእድ፥ ሄ ግብፀ ኡራ ዎድ ሻፈን ቆስስ። 13ዎንተ ጋላስ ከይድ፥ ናምኡ እብራወት ዋትሽን በእስ። ቆሄይሳኮ፥ “ኔኒ ነ ዳቡዋ አይስ ሾጫይ?” ያግድ ኦይችስ።
14ሄ ኡራይ፥ “ነና ኑ ቦላ ሃረይሳነ ዳይና ኦዳይ ኦኔ? ኔኒ ዝነ ግብፀ ኡራ ዎዳይሳዳ፥ ታናካ ዎናዉ ኮያይ?” ያግስ። ሙሰይ ሄ ዎደ፥ “ታኒ ኦዳባይ አሳን ኤረትስ” ያግ ቆፕድ ያይስ።
15ካዎይ ሄሳ ስእዳ ዎደ፥ ሙሰ ዎሳናዉ ኮይስ። ሽን ሙሰይ በትድ፥ ምድያመ ቢታን ደአናዉ ብስ።
እስ ጋላስ እ ሃ ኦላ ዶናን ኡትስ።
16ሄ ዎደ ምድያመ ካህነ እሱዋስ ላፑን ማጫ ናይት ደኦሶና። ኤንቲ ባንታ አዋ ዶርሳታ ጎንገን ሃ ዱቅ ኡሻናዉ ይዶሶና። 17ሄንንቾት ይድ ማጫ ናይታ ጎድዶሶና። ሽን ሙሰይ ኤንታ ማድድ ኤንታ ዶርሳታ ሃ ኡሽስ።
18ኤንቲ ባንታ አዋ የቶራኮ ይዳ ዎደ፥ “ሀች ዋን ኤለስ ይደቲ?” ያግድ ኦይችስ።
19ኤንቲ ዛሪድ፥ “ግብፀ አስ እሶይ ኑና ሄንንቾታፐ አሽስ። ሃ ዱቅድ ዶርሳታ ኡሽስ” ያግዶሶና።
20እ ባ ማጫ ናይታ፥ “ያትን እ አዉን ደኢ? ህንተ ሄ ኡራ አይስ አግድ ይደቲ? ኑራ ካ ማና መላ አነ እያ ፄግተ” ያግስ።
21ሙሰይ ሄ አድያራ ያን ደአናዉ ቆፋ ቃችስ። ዮቶር ባ ናእዉ ስፖሮ ሙሰስ ማቾ ኦድ እሚስ። 22ስፖራ አደ ናአ የልን፥ ሙሰይ እያ፥ “ታኒ ሀ ቢታን በተ አስ” ግድ ገርሳማ ግድ ሱንስ።
23ዳሮ ላይፈ ጉየ ግብፀ ካዎይ ሀይቅስ። ሽን እስራኤለት ባንታ አይለተን ኡንኤትድ ዋስዶሶና። ባንታ አይለተን ኤንቲ ዋስዳ ዋሶይ ፆሳኮ ጋክስ። 24ፆሳይ ኤንታ ዋሱዋ ስእድ፥ እ አብራሃመራ፥ ይሳቃራነ ያይቆባራ ጫቅዳ ጫቁዋ ሀሳይስ። 25ፆሳይ እስራኤለታ አይለተ ኡንኣ በእድ ኤንታና ቆፕስ።
Currently Selected:
ከሳ 2: GFBEVF
Highlight
Share
Copy
Want to have your highlights saved across all your devices? Sign up or sign in
The Word for the World International and The Word for the World Ethiopia