ከሳ 3

ሙሰ ፄገተ

1እስ ዎደ ሙሰይ ምድያመ ቢታ ካህንያ፥ ባ ቦሉዋ ዮቶራ ዶርሳነ ዴሻ ሄሜስ። እ ሄ ዉድያ ላግ ኤክድ መላ ቢታ ጋፃን ፆሳ ዙማ ጌተትድ ፄገትያ ኮሬባ#3:1 ኮሬባ: ኮሬባ ዙማስ ሀራ ሱንይ ሲና ዙማ። ዙማ ቦላ ኤፍስ። 2ሄ በሳን ጎዳ ኪታንቾይ #3:2 ጎዳ ኪታንቾይ: ሀ በሳን ጎዳ ኪታንቾ ጌተትዳይ አሳስ ቆንጭያ ጎዳ ዎይኮ ፆሳ ጉሱ። ቱሽያን ኤፅያ ታማ ላጩዋ ግዶን እያዉ በንትስ። ሙሰይ ቱሸይ ታማን ኦይከትንካ ታማይ ቱሽያ ሞናይሳ በእድ፥ 3“ታኒ ይያ ባዳ፥ ቱሸይ አይስ ታማን ሜተቶናኮ ሄ ኦራባ ሺቃዳ በአና” ግድ ቆፕስ።

4እ በአናዉ ሺቅዳይሳ ጎዳይ በእድ፥ ቱሽያ ግዶፈ፥ “ሙሰ! ሙሰ!” ግድ ፄግስ።

ሙሰይ፥ “ሄኮ፥ አበ ጎዳዉ” ግድ ኮይስ።

5ፆሳይ እያኮ፥ “ሃ ሺቆፓ። ኔኒ ኤቅዳ ቢታይ ጌሽ ግድያ ግሾ፥ ነ ቶሁዋን ደእያ ጫማ ከሳ” ያግስ። 6ጎዳይ እያኮ፥ “ታኒ ነ አዋታ፥ አብራሃመ፥ ይሳቃነ ያይቆባ ፆሳ” ያግስ። ሙሰይ ፆሳ ባአናዉ ያይዳ ግሾ፥ ባ ሶምኡዋ ካምስ።

7ጎዳይ ቃስካ ሀይሳዳ ያግስ፤ “ታኒ ግብፀን ደእያ ታ አሳይ አይ መላ ዋያኮ በአስ። ኤንቲ ባንታና ኡንኤድ ሃረይሳታፐ አሻና መላ ታኮ ዋስያ ዋሱዋ ስአስ። ኤንታ ዋያካ ኤራይስ። 8ሄሳ ግሾ፥ ታኒ ኤንታ ግብፀ አሳ ኩሸፐ አሻናዉነ ሄ ቢታፈ ኤንታ ከሳዳ፥ ሀእ ካናነት፥ ህተት፥ አሞረት፥ ፓርዘት፥ ህወትነ ያቡሰት ደእያ ቢታ፥ ማነ ኤስ ኩምዳ ሎኦ ቢታ ኤሀናዉ ዎስ። 9ታ ደርያ ዋሶይ ሀእ ታና ጋክስ። ግብፀ አሳት ኤንታ ቆህዳ ቆሁዋ ታኒ በአስ። 10ሄሳ ግሾ ሀእ ኔኒ ታ አሳ እያ ቢታፈ ከሳና መላ ግብፀ ካዋኮ ታኒ ነና ኪታይስ” ያግስ።

11ሽን ሙሰይ፥ “ካዋኮ ባናዉነ እስራኤለታ ግብፀፈ ከሳናዉ ታኒ ኦኔ?” ያግስ።

12ፆሳይ ዛሪድ፥ “ታኒ ኔራ ግዳና። ቃስ ታኒ ነና ኪትዳይሳስ ማላይ ሀይሳ፤ ኔኒ ታ አሳ ግብፀፈ ከስያ ዎደ ሀ ዙማ ቦላ ህንተ ታና ጎይናና” ያግስ።

13ሙሰይ ፆሳኮ፥ “ግዶሽን፥ ታኒ እስራኤለታኮ ባዳ ኤንታኮ፥ ‘ህንተ አዋታ ፆሳይ ታና ህንተኮ ኪትስ’ ያግኮ፥ ኤንቲ ታና፥ ‘እያ ሱንይ ኦኔ?’ ያግድ ኦይችኮ፥ ታኒ ኤንታዉ ዎይጋዳ ዛሮ” ያግስ።

14“ፆሳይ ሙሰኮ፥ ‘ደኤይስነ ዳናይስ፥ ታና’ ኔኒ እስራኤለታኮ፥ ‘ታን ታና ግድዳይስ’ ታና ህንተኮ ክትስ ያጋ” ያግስ።

15ፆሳይ ዛሪድ፥ “ኔኒ እስራኤለታ ጎዳይ ህንተ አዋታ፥ አብራሃመ፥ ይሳቃነ ያይቆባ ፆሳይ፥ ታና ህንተኮ ኪትስ። ሀይስ ታ መርና ሱን፤ ያና የለተ ኡባይ ሀ ሱንን ታና ፄጋና።

16“ባዳ እስራኤለ ጭማታ ሺሻዳ፥ ጎዳይ ህንተ አዋታ ፆሳይ፥ አብራሃመ፥ ይሳቃነ ያይቆባ ፆሳይ ነዉ ቆንጭዳይሳ ኦዳ። ግብፀን ኤንቲ ዋየትያ ዋይያ ታኒ ፆሞሳዳ በእዳይሳ ኤንታዉ ኦዳ። 17ታኒ ኤንታና ግብፀ ዋያፐ ከሳዳ ማነ ኤስ ኩምዳ፥ ካናነታ፥ ህተታ፥ አሞረታ፥ ፓርዘታ፥ ህወታነ ያቡሰታ ቢታ ኤፋናዉ ቃላ ገላስ።

18“እስራኤለ ጭማት ነ ግያባ ስአና። ሄሳፈ ጉየ ኔንነ እስራኤለ ጭማት ግብፀ ካዋኮ ብድ፥ ‘ጎዳይ፥ እብራወታ ፆሳይ፥ ኑስ ቆንጭስ። ሀእ ኑኒ ሄ ጋላሳ ኦገ መላ ቢታ ብድ፥ ጎዳስ፥ ኑ ፆሳስ ያርሾ ያርሻና መላ ኑና የዳ’ ያግተ። 19ሽን ዎልቃን ግዶና እፅኮ፥ ግብፀ ካዎይ ህንተና የዶናይሳ ታኒ ኤራይስ። 20ሄሳ ግሾ ታኒ ታ ዎልቃን ዱማ ዱማ ማላታታ ኦዳ ግብፀታ ሾጫና። ሄሳፈ ጉየ እ ህንተና የዳና።

21“ቃስ ታኒ ግብፀ አሳ ስንን ቴሞ ህንተዉ እማና። ያንያ ግሾ ህንተ ከይያ ዎደ መላ ኩሸ ከየከታ። 22እብራወ ማጫስ ኡባይ ባ ሾሮን ደእያ ግብፀ ማጫሳኮነ ባ ሶን ደእያ ግብፀ ማጫሳኮ ብድ፥ ብራ አሌቆ፥ ዎርቃነ ማኦ እምተ ግድ ኦይቻና። ህንተ ሄሳ ኤክድ ህንተ ናይታ ማይዛና። ሄሳዳ ኦድ ህንተ ግብፀ ሻሎ ኡባ ኤክድ ባና” ያግስ።

Currently Selected:

ከሳ 3: GFBEVF

Highlight

Copy