መተ 46
46
ያይቆብ ግብፀ ቡሳ
1እስራኤለይ ባዉ ደእያባ ኡባ ኤክድ፥ በርሳበ ጋክዳ ዎደ ባ አዋ ይሳቃ ፆሳስ ያርሾ ያርሽስ። 2ፆሳይ ቃማ እስራኤለስ ቆንጭድ፥ “ያይቆባ፥ ያይቆባ” ያግስ።
እካ፥ “ሄኮ፥ አበ ጎዳዉ” ግድ ኮይስ።
3ፆሳይ እያኮ፥ “ታኒ ፆሳ፥ ነ አዋ ፆሳ፤ ኔኒ ግብፀ ባናዉ ባቦፋ። ታ ነ ሼሻ ያን ግታ ደረ ከሳና። 4ታኒ ኔራ እስፈ ግብፀ ባና፤ ታኒ ነ ሼሻ ያፐ ከሳዳ ሃ ኤሀና። ነ ሀይቅያ ዎደ ዮሰፍ ነ አይፍያ ኦይካና” ያግስ።
5ሄሳፈ ጉየ፥ ያይቆብ በርሳበፐ ደንድስ። እስራኤለ አደ ናይት ባንታ አዋ ያይቆባ፥ ባንታ ናይታነ ባንታ ማቸታ ግብፀ ካዎይ ኤንታዉ የድዳ ግታ ፓራ ጋረ ቦላ ኡትስድ ኤፍዶሶና። 6ኤንቲ ካናነ ቢታን ሃርዳ ሃሩዋነ መሄ ኡባ ኤክ ብዶሶና። ያይቆብ ባ ሶ አሳ ኡባ ኤክድ ግብፀ ብስ። 7እ ባ ሶ አሳ ኡባ፤ አደ ናይታነ ባ አደ ናይታ ናይታ፥ ባ ማጫ ናይታነ ባ ማጫ ናይታ ናይታ፥ ኡባ ባራ ኤክድ ግብፀ ብስ።
8እስራኤለራ ግብፀ ቢታ ብዳ እያ ናይታ ሱንይ ሀይሳፈ ካልድ ፃፈትዳይሳ።
ያይቆባ ባይራ ናአይ ሮቤላ፤ 9ሮቤላ አደ ናይት ሀኖካ፥ ፓላ፥ ሄስሮናነ ካርማ። 10ስሞና አደ ናይት ያሙኤላ፥ ያምና፥ ኦሀዳ፥ ያክና፥ ፆሃራነ ካናነ ማጫሴፐ የልዳ ሳኡላ። 11ሌወ አደ ናይት ገድሶና፥ ቃሀታነ መራራ። 12ይሁዳ አደ ናይት ኤራ፥ ኦናና፥ ሴላ፥ ፓረሳነ ዛራ። ሽን ኤርነ ኦናን ካናነ ቢታን ሀይቅዶሶና። ፓረሳ አደ ናይት ሄስሮናነ ሀሙላ። 13ይሳኮራ አደ ናይት ቶላ፥ ፑአ፥ ዮባነ ሽምሮና። 14ዛብሎና አደ ናይት ሳረዳ፥ ኤሎናነ ያህላላ። 15ሀ አደ ናይትነ ማጫ ናእያ ዲና፥ ልያ ማሰጰፆመ ቢታን ያይቆባስ የልዳይሳታ። ዲና ጉጅን እያ ናይትነ ናይታ ናይት ኩመ ሀስታማነ ሄ።
16ጋደ አደ ናይት ፃፎና፥ ሀገ፥ ሹና፥ ኤፅቦና፥ ኤር፥ አሮዳነ አርኤላ። 17አሴራ አደ ናይት ይምና፥ የሱዋ፥ ይስዋነ በርአ። ኤንታ ምችያ ሳራሆ። በርአ አደ ናይት ሄቤራነ ማልክኤላ። 18ሀይሳቲ ላቢ ባ ናኤ ልያስ እምዳ ዛላፋ ያይቆባስ የልዳ ናይታ። ኤንቲ ኩመ ታማነ ኡሱፑና።
19ያይቆባ ማቸ ራሄል አደ ናይት ዮሰፋነ ብንያመ። 20ኦና ካታማ ካህነ ጶፅፋራ ናእያ አስናታ ዮሰፋስ ግብፀን ምናሰነ ኤፍሬማ የላሱ። 21ብንያመ ናይት ቤላ፥ በከራ፥ አስቤላ፥ ጌራ፥ ናማነ፥ ኤሀ፥ ኦሮሻ፥ ሙፍማ፥ ሁፍማነ አራዳ። 22ሀይሳቲ ያይቆባስ የለትዳ ራሄል አደ ናይታ። ኤንቲ ኩመ ታማነ ኦይዳ።
23ዳነ አደ ናአይ ሁሽማ። 24ንፍታለመ አደ ናይት ያህፄላ፥ ጉና፥ የፀራነ ሽለመ። 25ሀይሳቲ ላፑናት ላቢ ባ ናኤ ራሄልስ እምዳ ባል ያይቆባስ የልዳ ናይታነ ናይታ ናይታ።
26ያይቆባራ ግብፀ ብዳ፥ እያ ጉልባታፐ ከይዳ ናይት፥ እያ ናይታ ማቸታ ጉጆና ኡሱፑን ታማነ ኡሱፑና። 27ግብፀን ዮሰፋስ የለትዳ ናምኡ ናይታ ጉጅኮ፥ ግብፀ ብዳ ያይቆባ ሶ አሳይ ኩመ ላፑን ታማ።
28ጌሳመ ቢታን ባንታና ሞካና መላ ያይቆብ ይሁዳ ባፐ ስን ዮሰፋኮ ኪትስ። ኤንቲ ያ ጋክያ ዎደ፥ 29ዮሰፍ ባ ፓራ ጋርያ ጊግስድ፥ ባ አዋ እስራኤለራ ጋሄታናዉ ጌሳመ ብስ። ዮሰፍ ባ አዋ ደምዳ መላ እያ ቆያን ፃፀትድ ዳሮ ዎደ ዬክስ።
30እስራኤለይ ዮሰፋኮ፥ “ኔኒ ፓፃ ደእሽን፥ ታኒ ነ አይፍያ በእዳ ግሾ፥ ህዛ ታኒ ሀይቅኮካ አይኮይ ባዋ” ያግስ።
31ሄሳፈ ጉየ፥ ዮሰፍ ባ እሻታነ ባ አዋ ሶ አሳታኮ፥ “ታኒ ግብፀ ካዋኮ ባዳ እያኮ፥ ‘ካናነ ቢታን ደእያ ታ እሻትነ ታ አዋ ሶ አሳይ ታኮ ይዶሶና። 32ኤንቲ መሄ ሃረይሳታ፥ ኤንቲ ባንታራ ባንታ ዶርሳ፥ ባንታ ዴሻ፥ መህያነ ባንታዉ ደእያባ ኡባ ኤክድ ይዶሶና’ ያጋና። 33ካዎይ ህንተና ፄግስድ፥ ‘ህንተ ኦሶይ አይቤ?’ ግድ ኦይችኮ፥ 34ህንተ እያኮ፥ ‘ኑኒ ነ አይለት ናአተፈ ዶምድ ኑ አዋታዳ መሄ ሄሞስ’ ያግተ። ዶርሰ ሃርያ አስ ግብፀ አሳን ካትዳባ ግድያ ግሾ፥ እ ህንተ ጌሳመ ቢታን ዳና መላ ኦና” ያግስ።
Currently Selected:
መተ 46: GFBEVF
Highlight
Share
Copy
Want to have your highlights saved across all your devices? Sign up or sign in
The Word for the World International and The Word for the World Ethiopia
