መተ 47
47
1-2ዮሰፍ ባ እሻታፐ እቻሻታ ዶርድ ግብፀ ካዋኮ ገልድ ሀይሳዳ ያግስ፤ “ታ አዋይነ ታ እሻት፥ ባንታ ዶርሳ፥ ባንታ ዴሻ፥ ባንታ መህያነ ባንታዉ ደእያባ ኡባ ኤክድ ካናነ ቢታፈ ይድ፥ ሀእ ጌሳመን ደኦሶና” ያግስ።
3ካዎይ ሄ እሻታኮ፥ “ህንተ ኦሶይ አይቤ?” ያግድ ኦይችስ።
ኤንቲ ካዋኮ፥ “ኑኒ ነ አይለት ኑ አዋታዳ ዶርሰ ሃርያ አሳታ” ያግድ ዛርዶሶና። 4ቃስካ ኤንቲ እያኮ፥ “ካናነ ቢታን ኮሽ ከይዳ ግሾነ ኑ መህያስ ምያባይ ይዳ ግሾ፥ ኑኒ ሀይሳን ዳናዉ ይዳ። ሀያና ኑና ነ አይለታ ጌሳመ ቢታን ደኦ ጋርክ” ያግዶሶና።
5ካዎይ ዮሰፋኮ፥ “ነ አዋይነ ነ እሻት ኔኮ ይዶሶና። 6ህዛ ግብፀ ቢታይ ነ ኩሸና። ሀ ቢታን ኡባፈ አድ ሎእያ በሳን ነ አዋነ ነ እሻታ ዎ፤ ኤንቲ ጌሳመ ቢታን ደኦና። ኤንታ ግዶፈ ዱማ ቃራተ ደኤይሳት ደእኮ፥ ሄሳታ ታ መህያ ቦላ ሹማ” ያግስ።
7ሄሳፈ ጉየ፥ ዮሰፍ ባ አዋ ያይቆባ ገልስድ፥ ካዋ ስን አስ። ያይቆብ ግብፀ ካዋ አንጅዳፐ ጉየ፥ 8ካዎይ ያይቆባ፥ “ነዉ አፑን ላይ?” ያግድ ኦይችስ።
9ያይቆብ ካዋኮ፥ “ታኒ ዳቡርሳን ደእዳ ላይይ ፄታነ ሀስታማ። ታ ላይይ በን ታ አዋት ዳቡርሳን ደእዳ ላይፈ ጉነ መቶይ ዳርዳ ላይ” ያግስ። 10ሄሳፈ ጉየ፥ ያይቆብ ካዋ አንጅድ፥ እያ ስንፈ ካረ ከይስ።
11ዮሰፍ ካዎይ ኪትዳይሳዳ ባ አዋነ ባ እሻታ ግብፀ ቢታን ራምሰ ካታማ ማታን ደእያ ኡባፈ አዳ አራዳ ቢታን ኤንታ ዎስ። 12ዮሰፍ ባ አዋስ፥ ባ እሻታስነ ባራ ደእያ ኡባስ ኤንታ ናይታ ታይቡዋዳ ካ እሚስ።
ግብፀ ኮሻ
13ቢታ ኡባን ኮሽ ሱልዳ ግሾ ቢታን ኡባን ካ ባዋ፤ ግብፀይነ ካናነ ቢታይ ቆሄትዶሶና። 14ዮሰፍ ግብፀ ካ ባይዝድ፥ ግብፀንነ ካናነ ቢታታን ደእያ ሚሽያ ኡባ ሺሽድ ግብፀ ካዋ ኬ ገልስስ። 15ግብፀ ሚሸይነ ካናነ ሚሸይ ዉርዳ ዎደ ግብፀ አሳ ኡባይ ዮሰፋኮ ይድ “ኑስ ካ እማ። ኑ ሚሸይ ዉርዳ ግሾ ኑኒ ነ ስንን አይስ ኮሻን ሀይቃኔ?” ያግዶሶና።
16ዮሰፍ ኤንታኮ፥ “ህንተ መህያ ኤክ ዪተ። ህንተ ሚሸይ ዉርዳባ ግድኮ፥ ታኒ ካ ህንተ መህያራ ላማና” ያግስ። 17ሄሳ ግሾ፥ ኤንቲ ባንታ መህያ ዮሰፋስ ኤህዶሶና። ዮሰፍ ኤንታ ፓራ፥ ዶርሳ፥ ዴሻ፥ ሚዛነ ሀርያ ካራ ላምስ። እ ሄ ላይ ኤንታ መህያ ኡባራ ካ ላምድ፥ ኤንታ ሙዝድ ሻችስ።
18ኤንቲ ካልያ ላይን እያኮ ይድ “ኑኒ ኑ ጎዳፐ ቆስያባይ ባዋ፤ ኑ ሚሸይ ኡባይ ዉርስ። ኑ መህያካ ነዉ እም ድግዳ። ኑ ቦላፈነ ኑ ጋድያፐ አትሽን፥ ኑ ጎዳስ እማናባይ ሀራባይ ባዋ። 19ኑኒ ነ በእሽን አይስ ኮሻን ሀይቃኔ? ኑ ጋደይካ አይስ ዪ? ኑናካ ኑ ጋድያካ ሻማዳ ኑስ ካ እማ። ኑኒ ካዋስ አይለታና፥ ኑ ጋደይካ እያባ ግዶ። ኑኒ ሀይቆና አታና መላ ኑ ጋደይካ ኦፆና መላ ዘረ ኑስ እማ” ያግዶሶና።
20ዮሰፍ ግብፀ ቢታ ኡባ ካዋስ ሻምስ። ኮሽ ሱልን፥ ግብፀ አሳይ ኡንኤትድ ባንታ ጋድያ ባይዝን ጋደይ ካዉዋባ ግድስ። 21ዮሰፍ አሳ ኡባ ግብፀስ ሀ ጋፃፐ ህን ጋፃ ጋካናስ ካዋስ አይለ ኦስ። 22ሽን ካዎይ ካህነታስ ካ እምያ ግሾ ዮሰፍ ኤንታ ጋድያ ሻምቤና። ሄሳ ግሾ፥ ባንታ ጋድያ ባይዝቦኮና።
23ዮሰፍ አሳኮ፥ “ህዛ ሀች ታኒ ህንተናነ ህንተ ጋድያ ካዋስ ሻምዳ ግሾ፥ ዘረ ኤፍድ ህንተ ጋደን ዘርተ። 24ሽን ካ ሺሽያ ዎደ አይፍዳባፐ እቻሹ ኩሽያፐ እስ ኩሽያ ካዋስ እምተ። አትዳ ኦይዱ ኩሸይ ህንተ ጋድያስ ዘረ፥ ህንተዉነ ህንተ ሶ አሳስ ካ ግዶ” ያግስ።
25ኤንቲ፥ “ኔኒ ኑና አሻዳሳ። ኑ ጎዳ ስንን ኑኒ ሳበትኮ፥ ኑኒ ካዋስ አይለታና” ያግዶሶና። 26ሄሳ ግሾ፥ ዮሰፍ ግብፀ ቢታን አይፍዳባፐ እቻሹ ኩሽያፐ እሱዋ ካዋስ እመይሳ ህገ ከስስ። ሄ ዎጋይካ ሀች ጋካና ኤቅድ ደኤስ። ካህነታ ጋድያፐ አትሽን፥ ሀር ኡባይ ካዉዋባ ግድስ።
27እስራኤለት ግብፀ ቢታን ጌሳመ ግያ በሳን ደእዶሶና። ኤንቲ ያን ዱረትዶሶና፤ የለት ዳርዶሶና።
28ያይቆብ ግብፀ ቢታን ታማነ ላፑን ላይ ደእስ። ያይቆብ ደእዳ ላይይ ፄታነ ኦይታማነ ላፑና። 29እስራኤለስ ሀይቅያ ዎደይ ማታትን፥ ባ ናኣ ዮሰፋ ፄግስድ ሀይሳዳ ያግስ፤ “ታኒ ነ ስንን ሳበትዳባ ግድኮ፥ ነ ኩሽያ ታ ሸምፑዋ ቦላ ዎ። ኔኒ ታዉ ምሸትያባ ግድኮ ታና ግብፀን ሞግከ ጋዳ ታዉ ጫቃ። 30ሽን ታኒ ሀይቅያ ዎደ ታና ግብፀፈ ኤፋዳ፥ ታ ማይዛት ሞገትዳሱዋን ሞጋ” ያግስ።
ዮሰፍ፥ “ታኒ፥ ነና ነ ግዳይሳዳ ኦና” ያግስ።
31ያይቆብ እያኮ፥ “አነ ታዉ ጫቃ” ያግስ። ዮሰፍ እያዉ ጫቅስ። ሄሳፈ ጉየ፥ እስራኤለይ ባ ጉፍያ ቦላ ካትድ ፆሳ ጎይንስ።
Currently Selected:
መተ 47: GFBEVF
Highlight
Share
Copy
Want to have your highlights saved across all your devices? Sign up or sign in
The Word for the World International and The Word for the World Ethiopia