Yohanes 11
11
Yesus umpi Lasarus bolum hopuli
11:1-44
1Oko ico dulun co hotoro. Araieh Lasarus. Are nukui nyan desa Betania samah-samah ma duo konduang eh Maria doruo Marta. 2(Maria yoh iyohco bawe co piji nitik minyak harum nyan paan Tuhan hintang molap eh ma baloueh. Lasarus iyohco konduang eh.) Nyan ico kotika Lasarus hotoro, 3Duo bawe cioh ngirim tarung hia Yesus: “Tuhan, kawal kohaet-Mu, hotoro.”
4Kotika Yesus ngoneh tarung cioh, Are mantun, “Toro cotuh aroko angar umpi are matoi. Tapi otuh tojadi ina dulun lian noto bahawa Mohotara korinah bokuasa hintang ina porahan Anak Mohotara mahi bokuasa ka.”
5Yesus mula masi iroh tolu hokonduang yoh; Marta, Maria hintang Lasarus. 6Tapi kotika Yesus haba tarung bahawa Lasarus hotoro, tonganta-Eh nukui nyan ika-Eh duo ondo oni. 7Opah iyoh, punai Are kolu nyari Lasarus. Hie-Eh ma kawan murid-Eh, “haas ito hopuli kole hia Yudea.”
8Hien doh, “Pa Guru, arinai tahi opah kawan dulun Yahudi nyan idi jonyo medak Iko ma batu. Kura Iko incah nyau hopuli hia idi?”
9Useh Yesus, “Kotika ondo pandau oko duo balas jam. Dulun co nyalan hiah waktu maondo, are aroko tontonop awi are kito kopandau dunia tuh. 10Tapi, dulun co nyalan hiah waktu mamalom, are tontonop awi arelu oko kopandau nyan ponah arop eh.”#11:9-10 Yesus hapo tindung cotuh ika monjelas ma kawan murid-Eh bahawa amun iroh umba Are, iroh angar aman. Arelu oko ome-ome co angar tojadi ma Yesus nyan luar roncana Mohotara. Yesus iyohco ‘kopandau dunia’ yoh. Dulun Yahudi porocaya bahawa ito sobulih oko ‘kopandau’ ponah arop eh ika noto. Isan iyoh ka, ito sobulih porocaya ma Yesus ika tonyolamat. 11Saniohboh hien Yesus. Opaiyoh, Are mantun ma iroh, “Lasarus, jolahan to, ocop tontirui. Tapi, Akuh angar tulak hia idi ika monyun are.”
12Hien kawan murid-Eh, “Tuhan, amun Lasarus tirui, daai are angar mambuh.”
13Sobujur eh, ma antun ‘tirui’ maksut Yesus Lasarus ocop matoi. Tapi iroh bopikir maksut Yesus yoh Lasarus baya tirui isan biasa. 14Tului iyoh Yesus mantun sak rak: “Lasarus ocop matoi. 15Tapi Akuh jorih bahawa Akuh arelu oko nyan idi. Awi, aang cioh meleh pio indam me, iyohonon ikan angar meleh porocaya. Haasboh ito tulak makitu hia Lasarus.”
16Paluh, Tomas, ico ingkan murid Yesus co mahi tomonggalar ‘Anak Tatup’, are mantun ma kawan murid co bokon. Hieeh, “Amun Yesus angar matoi nyan idi, Haas ito umba tulak ina to matoi homboh Are.”
17Kotika Yesus dapot, Lasarus ocop nyan guha kolowong kotahin opat ondo. 18Desa Betania hokomatung dokin kota Yerusalem, kira-kira tolu kilometer kocuieh. 19Jadi, orong dulun Yahudi ocop dombut nyari Marta doruo Maria ika mohibur iroh tului konduang doh matoi. 20Kotika Marta ngoneh bahawa Yesus dombut, Marta tulak ika nohawoh-Eh. Tapi Maria nukui nyan lopo. 21Hien Marta ma Yesus, “Tuhan, jakaieh Iko oko nyan intoi sorinaieh, maka konduang kuh aroko matoi. 22Tapi makitu mahi ka, akuh yakin bahawa Mohotara angar mihi ome bewe co tonyawot-Mu ma-Eh.”
23Antun Yesus ma Marta, “Konduangmu angar bolum hopuli!”
24Hien Marta, “Akuh monau are angar bolum hopuli nyan ahir jaman, waktu kokon dulun bolum hopuli.”
25Hien Yesus maeh, “Akuhboh co umpi dulun bolum hopuli ingkan pompatoi. Akuh ka mihi dulun bolum co tuu-tuu. Sika dulun co porocaya ma-Akuh, oluco are matoi, are angar bolum. 26Sika dulun co bolum hintang porocaya ma-Akuh, are aroko angar matoi sokotahi-tahieh. Marta, mainboh iko porocaya aang cioh?”#11:25-26 Nyan ayat 25, Yesus bopander tintun pompatoi nyan pindaondo tuh. Uras dulun co porocaya ma-Eh angar matoi nyan pindaondo tuh, tapi iroh angar ngohaba kobolum sumong kotahi nyan sorga. Nyan ayat 26, Yesus bopander tintun pompatoi sumong kototahieh. Uras dulun co porocaya ma-Eh hintang bolum ma Are, iroh aroko angar mongalami pompatoi sumong kototahieh nyan noraka.
27Useh eh, “Iyoh, Tuhan! Akuh porocaya Iko iyohco Kristus, Laca Co Tomonjanji Mohotara. Iko iyohco Anak Mohotara co tonyoruhan hia dunia tuh.”
28Opah Marta mantun sanioh, are tulak naah konduang eh Maria. Marta nosinok Maria. Hieeh, “Pa Guru oko nyan intoi. Are nyau sopopak ma iko.” 29Ngoneh iyoh, Maria paluh tonjok, tulak nyopopak Yesus. 30(Yesus incah oko nyan ika Marta nyopopak Are. Are arinai muntam hia ponah desa cioh.) 31Kotika kawan dulun Yahudi co dahat mohibur Maria kito are tonjok hintang jonyo-jonyo pusit ingkan lopo. Iroh bopikir Maria tulak hia kolowong ika nangih nyan intin. Awi iyoh, iroh ngonulueh ka.
32Waktu Maria dapot nyan ika Yesus holuh kitai Yesus, lansung Maria nukup bolutut nyan muka paai-Eh. Hien Maria ma-Eh, “Tuhan, jakaieh Iko oko nyan intoi sorinaieh, mositi konduang kuh aroko matoi.”
33Maria nangih hintang kawan dulun Yahudi co dombut homboh are mahi nangih. Kotika Yesus kito iyoh, atoi-Eh jorung hintang mohoong. 34Hie-Eh, “Nyan omohboh ikan ngolowong are?”
Hien doh, “Yu umbaboh, Tuhan, hintang notoeh.”
35Holuh, Yesus nangih. 36Maka, kawan dulun Yahudi taiyoh mantun, “Noto, Are tuu-tuu masi Lasarus!” 37Tapi pira-pira dulun nyan haloeh mantun, “Are umpi dulun bobuto noto. Kura Are aroko hegah umpi aranaang ina Lasarus aroko matoi?”
38Atoi Yesus mahi jarin mohoong kole, holuh Are tulak hia kolowong. (Kolowong cioh iyohco guha co calan muntam eh tomantop ma loong batu.) 39Hien Yesus, “Nyarobat batu conon.”
Tapi, Marta, konduang dulun co naat yoh, are museh, “Tuhan, are ocop matoi kotahin opat ondo. Mositi ocop buan karam!”
40Yesus mantun maeh, “Mingkatleh ome co ocop Kuh mantun ma iko: Amun iko porocaya, maka iko angar noto bahawa korinah kahai kuasan Mohotara.” 41Maka, kawan dulun nyaro batu cioh.
Opaiyoh Yesus nolangon hia langit. Hie-Eh, “Torima kasih, Tamang-Kuh, awi Iko ocop ngoneh Akuh. 42Akuh monau Iko horoholuh ngoneh Akuh. Tapi, Akuh mantun otuh awi tului dulun orong co oko nyan intoi; ina doh porocaya bahawa Ikoboh co nyoruhan Akuh.” 43Opah mantun nain iyoh, Yesus mantun ma suara muhat, “Lasarus, haas pusit bat!” 44Maka, pusitbat are yoh co niin matoi. Silun-paaieh incah bopungkuh ma kawan lambar kain bura. Tampaeh mahi incah tolilit ma benang. Hien Yesus ma kawan dulun nyan intin, “Mukoi kain tanon, ina are lampas nyalan.”
Kawan pomimpin dulun Yahudi ngewak ika ngompatoi Yesus
11:45-57
(Mat. 26:1-5; Mrk. 14:1-2; Luk. 22:1-2)
45Kawan dulun Yahudi co dombut ika mohibur Maria, iroh kito ome co ocop tongompian Yesus yoh. Orong ingkan iroh jarin porocaya ma-Eh. 46Tapi oko ingkan kawan dulun Yahudi yoh co tulak hia kawan dulun Parisi. Kawan dulun taiyoh ngesah eh ma kawan dulun Parisi ome co ocop tongompian Yesus. 47Tului iyoh, kawan dulun Parisi taiyoh homboh kawan imam kopala naah kokon kumpulan pomimpin agama Yahudi. Hien doh, “Ome co sobulih tongompian to? Awi, Are umpi orong aang co mosotahir. 48Amun ito moholu Are tarus, uras dulun angar porocaya maeh. Maka kawan dulun Roma co monguasa ito makitu, iroh angar mohancur Lopo Mohotaran to hintang ngolauh bangsa to.”
49Nyan halo kawan imam taiyoh oko imam co araieh Kayapas, are iyohco Imam Kopala co poko bokuasa nyan toun cioh. Hieeh ma iroh, “Ikan aroko monau ome-ome! 50Ikan sobulih tohoku! Meleh pio indam me amun ico dulun leh matoi indan bangsa to hangki ngolauh bangsa to hancur.” 51(Antun cioh aroh ingkan arop eh leh, tapi are mantun tungon ingkan Mohotara awi are iyohco Imam Kopala co poko bokuasa nyan toun cioh. Antun cioh maksut eh Yesus angar matoi indan bangsa Yahudi. 52Aroh indan bangsa cioh bewe, tapi Are matoi ina kokon dulun tioh Mohotara co topisah darai nyan orong ika bokon, uras doh lian hokumpur jarin ico.)
53Jadi, molai ondo cioh kawan pomimpin dulun Yahudi nguan kewak ina ngompatoi Yesus. 54Tului iyoh, Yesus aroko nyola bat nyan tohimo dulun ngarun nyan halo kawan dulun Yahudi yoh. Are naat derah cioh, paluh tulak hia ico kota co araieh Epraim, dokin padang gurun co ngolohiui. Are nukui nyan intin ma kawan murid-Eh.
55Hiah waktu iyoh, Ondo Raya Paskah indan dulun Yahudi ocop dokin. Orong dulun ingkan kawan desa ocop tulak hia kota Yerusalem ika umba upacara agama Yahudi ika ngorasih arop sorinai Pesta Paskah yoh molai. 56Iroh nganyap Yesus. Samir tonjok nyan polontaran Lopo Mohotara, iroh mantun ico ma co bokon, “Maindeoi pondapatmu? Mungkin Are aroko dombut umba pesta cotuh, jah?” 57(Hiah waktu cioh, kawan imam kopala hintang kawan dulun Parisi ocop pokusit porintah cotuh: Amun oko dulun co monau nyan omoh Yesus oko, dulun cioh sobulih mara ma iroh, ina doh lian nawan Yesus.)
Currently Selected:
Yohanes 11: TBSS
Highlight
Share
Copy
Want to have your highlights saved across all your devices? Sign up or sign in
