Yohanes 10
10
Yesus iyohco Tukang nyorunuh co pio
10:1-21
1 Yesus ngoholuh kopomander, “Ngoneh eh boh! Tuu bujur ome co tomantun-Kuh tuh: Dulun co muntam hia ponah kandang domba, hintang aroko calan tungkang kandang cioh tapi nukat buah calan co bokon, dulun cioh ponako hintang porampuk. 2Tapi dulun co muntam calan tungkang, are iyohco nyorunuh domba. 3Dulun co bojaga kandang, mukap tungkang indan tukang nyorunuh domba yoh. Kawan domba ngoneh jaraieh. Are naah kawan dombaeh ma aran doh hopomasing. Are horulut iroh pusit. 4Opah tukang nyorunuh mehen kokon domba tioh pusit ingkan kandang yoh, are nyalan nyan muka kawan dombaeh. Kawan domba taiyoh ngonulu are awi iroh nyono jaraieh. 5Iroh aroko angar ngonulu dulun bokon. Iroh angar buho ingkan dulun cioh awi iroh aroko nyono jaraieh.”
6Yesus ngesah tindung cioh, tapi iroh aroko paham ome aang co hie-Eh. 7Tului iyoh Yesus mantun kole, “Ngoneh eh boh! Tuu bujur ome co tomantun-Kuh tuh: Akuh boh tungkang kandang hia kawan domba taiyoh. 8Kokon dulun co dombut soun ma Akuh, iroh iyohco ponako hintang porampuk. Tapi kawan domba aroko ngoneh iroh. 9Akuh iyohco tungkang. Sika dulun co muntam calan Akuh, are angar solamat. Are angar muntam hintang pusit, kawun sopopak pulou uru. 10Dulun ponako dombut baya nako, ngompatoi, ngolumat. Tapi Akuh dombut ika mihi kobolum, iyohonon kobolum co aroko kotopah kongurang eh.
11Akuh boh tukang nyorunuh co pio. Tukang nyorunuh co pio selang matoi ika nyolamat kawan dombaeh. 12Dulun co tonombah ika bojaga domba, are bokon tukang nyorunuh. Are aroko empun kawan domba taiyoh. Amun are kito srigala dombut, are buho naat kawan domba. Ma sanioh srigala nukom hintang norawuh noracam kawan domba taiyoh. 13Dulun cioh buho awi are baya dulun co tonombah. Are aroko poduli kawan domba taiyoh.
14-15Tapi Akuh iyohco tukang nyorunuh co pio. Samah isan Mohotara Tama nyono Akuh hintang Akuh nyono Tamang-Kuh, sanioh ka Akuh nyono kawan domba-Kuh hintang iroh nyono Akuh. Aku selang matoi ika nyolamat iroh. 16Akuh mahi empun kawan domba bokon co aroh ingkan pumpun domba tatuh.#10:16 Kawan domba bokon maksut eh kawan dulun bokon ma Yahudi co jarin porocaya ma Yesus. Akuh sobulih horulut iroh ka. Iroh angar ngoneh jarang-Kuh. Kokon domba-Kuh angar jarin ico pumpun ma ico tukang nyorunuh, iyohonon Akuh. 17Otuhboh tuluieh Tamang-Kuh mongasihi Akuh: Awi Akuh selang matoi ina Akuh lian bolum hopuli. 18Arelu oko ico dulun mahi co hegah monu tambung songang-Kuh. Tapi Akuh lera mihieh monurut kojere-Kuh tarop. Akuh oko kuasa ika hoo dulun ngompatoi Akuh. Akuh mahi oko kuasa ika bolum hopuli. Ononboh porintah co tonorima-Kuh ingkan Tamang-Kuh.”
19Poko tului antun Yesus yoh, maka oko kole kohokoleang nyan samah iroh dulun Yahudi. 20Orong ingkan iroh co mantun, “Are bobujon hintang tonyarung setan! Aroh ikan ngoneh Are!” 21Tapi co bokon mantun, “Antun dolang tanon bokon ingkan dulun co tonyarung setan! Aroko bodai setan lian umpi dulun bobuto dapot boraoi noto.”
Dulun Yahudi kuloi Yesus
10:22-39
22Bopira ondo opah iyoh, nyan Yerusalem dapot bat Ondo Bahai Moresmi Lopo Mohotara. Waktu cioh sorang sorongin. 23Yesus dahat nyalan nyan ika co tonisi Serambi Salomo nyan Lopo Mohotara. 24Kawan dulun Yahudi dombut hokumpur nyan toliut Yesus. Hien doh ma Are, “Pira kotahi oni Iko moholu kaih ragu-ragu? Amun Iko mula Kristus, Laca Co Tomonjanji Mohotara, mantun ehbat sak rak ma kaih.”
25Useh Yesus ma iroh, “Akuh ocop mara ma ikan, tapi ikan aroko porocaya. Akuh nguan kawan alogawi ponah aran Tamang-Kuh. Kawan alogawi taiyoh mombukti tintun Akuh. 26Tapi ikan aroko porocaya awi ikan aroko tomasuk kawan domba-Kuh. 27Kawan domba-Kuh ngoneh ome co tomantun-Kuh. Akuh nyono iroh, hintang iroh umba Akuh. 28Akuh mihi indan doh kobolum co sumong kototahieh. Iroh aroko piji angar lumat dapot sokotahi-tahieh. Arelu oko ico dulun mahi co hegah ngoras iroh ingkan silung-Kuh. 29Tamang-Kuh co mihi iroh indang-Kuh. Are meleh bokuasa hangki ome bewe. Jadi, arelu oko ico dulun co hegah ngoras iroh ingkan silui-Eh. 30Akuh hintang Tamang-Kuh iyohco ico.”
31Opah iyoh kawan dulun Yahudi monu batu kole ika medak Yesus. 32Tapi Yesus mantun ma iroh, “Ikan ocop kito Akuh nguan orong alogawi pio co tonugas Tamang-Kuh ma-Akuh. Ingkan kokon alogawi taiyoh, comohboh co umpi ikan nyau medak Akuh ma batu?”
33Useh doh, “Kaih aroko nyau medak Iko ma batu tului alogawi pio co tongompiam-Mu, tapi tului Iko mohina Mohotara. Iko baya kolunon leh, tapi Iko nyamah arop-Mu ma Mohotara!”
34Paluh Yesus museh, “Mambu arelu oko tonulih ponah kitab Torat me: Mohotara mantun, ‘Ikan iyohco mohotara’?#10:34 Ingkan buku Masmur 82:6. 35Tomonau to bahawa ome co tonulih ponah kitab bolaku indan sokotahieh. Jadi, amun Mohotara mihi tisi mohotara co bokon ma kawan dulun co norima kawan antun-Eh, 36kura ikan mantun Akuh mohina Mohotara amun Akuh mantun arop-Kuh iyohco Anak Mohotara? Podahar, Mohotara Tama mili Akuh hintang nyoruhan Akuh hia dunia. 37Sompamaeh Akuh aroko nguan kawan alogawin Tamang-Kuh, ikan aroko usah porocaya ma-Akuh. 38Tapi mula Akuh nguan kawan alogawin Tamang-Kuh. Oluco ikan aroko porocaya Akuh, poko ngaroh ikan sobulih eh porocaya tului kawan alogawi taiyoh. Ma sanioh, ikan angar monau hintang paham bahawa Tamang-Kuh hokohico ma Akuh, hintang Akuh hokohico ma Tamang-Kuh.”
39 Opah Yesus mantun iyoh, iroh bousaha kole nawan Are. Tapi Are luput ingkan silun doh.
Orong dulun porocaya ma Yesus nyan derah Sungoi Yordan
10:40-42
40Opaiyoh Yesus tulak kole hia pohoi Sungoi Yordan, ika Yohanes batuh mombaptis dulun. Are nukui nyan idi pira-pira waktu. 41Orong dulun dombut hia-Eh. Hien doh, “Yohanes aroko umpi ico mahi ciri aang co mosotahir. Tapi, kokon co tomantun Yohanes tintun Dulun cotuh mula bujur.” 42Orong dulun nyan idi porocaya ma Yesus.
Currently Selected:
Yohanes 10: TBSS
Highlight
Share
Copy
Want to have your highlights saved across all your devices? Sign up or sign in
