Yohanes 14
14
Baya oko ico calan hia Mohotara Tama, iyohonon porocaya ma Yesus
14:1-14
1 Paluh Yesus mantun ma kawan murid-Eh, “Arohboh atoi me giha! Porocayaleh ma Mohotara. Porocayaleh ka ma-Akuh. 2Oko orong tukui ika nyan lopo Tamang-Kuh. Akuh houn tulak hia idi ika nyodia tukui ika indam me. Amun aang cioh aroko bujur, aroko bodai Akuh monjanji aang co isan iyoh ma ikan. 3Opah Akuh tulak nyodia ika indam me, Akuh angar dombut hopuli paluh mehen ikan hia ika cioh, Akuh angar nguan iyoh ina nyan omoh Akuh oko, nyan intin ka ikan oko. 4Ikan ocop monau calan eh hia ika Kuh tulak.”
5Tomas mantun ma-Eh, “Tuhan, kaih aroko monau hia omoh Iko tulak. Jadi, maindeoi kaih monau calan hia idi?”
6Hien Yesus maeh, “Akuhboh calan co bujur ika nyono Mohotara, calan co nuju hia kobolum co tuu-tuu. Arelu oko ico beti mahi boraoi dombut hia Tama amun aroko molalui Akuh. 7Amun ikan nyono Akuh, borati ikan nyono Tamang-Kuh ka. Makitu tuh ikan ocop nyono Tamang-Kuh hintang kito Are.”
8Maka, Pilipus mantun ma Yesus, “Tuhan, dohop umpi kaih ika lian noto Tama ma matan kaih leh. Cioh ocop cukup indan kaih.”
9Hien Yesus maeh, “Pilipus, Akuh ocop tahi halo ikan. Kura dapot makitu iko arinai nyono Akuh? Dulun co ocop kito Akuh, borati ocop kito Tamang-Kuh ka. Jadi, kura iko mantun, ‘Umpi boh ika kaih boraoi noto Tama ma matan kaih leh!’ 10Mainboh iko aroko porocaya bahawa Akuh hokohico ma Tama, hintang Tama hokohico ma Akuh? Antun-Kuh aroko borasar ingkan arop-Kuh tarop, tapi ingkan Tama co hokohico ma Akuh. Areboh co monggawi uras eh yoh. 11Ikan sobulih porocaya antun-Kuh tuh: Akuh hokohico ma Tama, hintang Tama hokohico ma Akuh. Amun ikan aroko porocaya antun-Kuh, pokongaroh ikan sobulih porocaya awi kokon aang co mosotahir co tongompiang Kuh. 12Ngoneh ehyoh! Tuu bujur co tomantun-Kuh tuh: Dulun co porocaya ma-Akuh, are angar nguan alogawi isan co tonguan Kuh. Malah are angar nguan kawan alogawi co meleh bahai hangki taiyoh. Ikan angar hegah umpi isan iyoh awi Akuh tulak hia Tamang-Kuh 13paluh Akuh angar nguan ome bewe co tonyawot ponah arang-Kuh. Akuh angar nguan eh ina Anak lian poleha ma kawan dulun korinah koharat eh Tamang-Kuh yoh. 14Amun ikan nyawot ome bewe ingkan Akuh ponah arang-Kuh, maka Akuh angar nguan eh.”
Yesus bojanji ika mihi Roh Mohotara ma kawan murid-Eh
14:15-31
15“Amun ikan mongasihi Akuh, ikan angar nuhit kawan porentah-Kuh. 16Akuh angar nyawot ma Tamang-Kuh, paluh Are angar mihi Pondohop co bokon indam me. Are angar nguan iyoh ina Pondohop cioh somim me sokotahi-tahieh. 17Pondohop cioh iyohco Roh Mohotara co porahan kokon co bujur. Kawan dulun nyan dunia co aroko porocaya, iroh aroko lian norima Roh Mohotara yoh, awi iroh aroko kito Are, aroko nyono Are. Tapi, ikan nyono Are awi Are somim me hintang daai Are angar nukui ponah atoi me.
18Akuh aroko angar naat ikan taropme isan anak nulo. Akuh angar dombut hopuli hia ikan. 19Sonyulu oni, kawan dulun nyan dunia aroko angar kito Akuh bat. Tapi ikan angar kito Akuh. Awi Akuh bolum, borati ikan angar bolum ka. 20Nyan waktu iyoh, ikan angar monau bahawa Akuh hokohico ma Tama, ikan hokohico ma Akuh, hintang Akuh hokohico ma ikan.
21Sika dulun co norima kawan porentah-Kuh hintang nuhit eh ka, are iyohco dulun co bujur-bujur mongasihi Akuh, are angar tomasi pian Tamang-Kuh. Akuh mahi angar masi are. Akuh angar poleha arop-Kuh maeh.”
22Yudas (bokon ma Yudas Iskariot) mantun ma Yesus, “Tuhan, kura Iko nyau poleha arop-Mu ma kaih, tapi aroh ma kawan dulun bokon nyan dunia?”
23Useh Yesus maeh, “Dulun co mongasihi Akuh, are angar nuhit antun-Kuh. Tamang-Kuh angar masi are. Tamang-Kuh hintang Akuh angar dombut hiaeh paluh nukui ponah atoieh. 24Tapi dulun co aroko mongasihi Akuh, are aroko nuhit antun-Kuh. Antun-Kuh co koneh me, sobujur eh aroko ingkan Akuh leh, tapi ingkan Mohotara Tama co nyoruhan Akuh.
25Akuh ocop mantun kawan antun tatuh ma ikan hiah Akuh incah hokohalo ma ikan. 26Tapi daai Tamang-Kuh angar nyoruhan Roh-Eh indam me ika kanti Akuh. Roh Mohotara yoh iyohco Pondohop. Are boh co angar majar kokon aranaang ma ikan. Are mahi angar pokingat ikan ma kokon co ocop tomantun-Kuh ma ikan.
27Hiah waktu Akuh tulak, Akuh mihi kongolandah kongolami Kuh indam me. Kongolandah kongolami co ihing-Kuh ma ikan, aroh isan co ihin dunia. Jadi aroh ikan giha. Aroh takut. 28Ikan ocop ngoneh Akuh mantun ma ikan bahawa Akuh angar tulak tapi akuh angar hopuli hia ikan. Amun ikan mongasihi Akuh, sobulih eh ikan jorih jerah bahawa Akuh tulak hia Tamang-Kuh. Sobulih eh ikan jorih jerah tintun iyoh awi Tamang-Kuh meleh bokuasa hangki-Akuh. 29Akuh mantun aang cioh indam me makitu, sorinai aang cioh tojadi. Akuh nguan sanioh ina waktu aang cioh tojadi, maka ikan angar porocaya. 30Akuh aroko angar hopander orong kole ma ikan, awi are co monguasa dunia tuh, iyohonon Lacan Setan rahat dombut hintang Are aroko bokuasa ma Akuh. 31Tapi kokoieh yoh sobulih tojadi. Ma sanioh, kawan dulun nyan dunia angar monau bahawa Akuh mongasihi Tamang-Kuh. Iroh mahi angar monau bahawa Akuh nguan kokon aranaang co tomorentah Tamang-Kuh ma-Akuh.
Nah, makitu haasboh! Ito tulak ingkan intoi!”
Currently Selected:
Yohanes 14: TBSS
Highlight
Share
Copy
Want to have your highlights saved across all your devices? Sign up or sign in
