Lukas 1
1
Lukas nulih surat ika poyakin jolahai
1:1-4
1-2Co tomohormat kuh, Teopilus: Ingkan kosulak Yesus oko nyan dunia, oko orong dulun co noto ma matai tarop. Iroh molayani Mohotara ma cara porapot tarung tintun Yesus yoh. Iroh porapot tarung cioh ma ito ka. Jadi, kawan dulun ngoneh borita cioh. Orong ingkan iroh bousaha nulih maindeoi kawan poristiwa cioh ocop tojadi nyan halo ito. 3Ingkan sulak borita tintun Yesus yoh, akuh ocop toliti nyolidik kokoieh. Jadi, akuh bopikir pio amun tonulih kuh socara toratur buku cotuh indam mu. 4Tujuan kuh, ina mu yakin ma kokon co tomajar ma iko yoh bujur-bujur lau.
Molekat Gabriel nobara Imam Jakaria, oruh eh angar nganak Yohanes
1:5-25
5Kotika Herodes jarin laca co monguasa negri Yudea,#1:5 Laca Herodes monguasa ngolauh tana Israel nyan pinda pomorintahan Romawi hintang kaisar Jolius. kotika iyoh, oko imam agama Yahudi co arai Jakaria. Are ingkan kolompok imam Abia. Aran oruh eh Elisabet, koturunan imam ka, iyohonon koturunan Harun. 6Iroh ruo yoh bolum ngonyorih songan Mohotara. Iroh hopompaluh tuhit ma kokon porentah hintang poraturan Tuhan. 7Tapi iroh aroko nganak awi Elisabet yoh tomanang. Nohani iroh ruo yoh ocop ongko.
8Nyan ico ondo, Jakaria ingkan kolompok imam Abia buah gilir ika molayani nyan Lopo Mohotara,#1:8 Lopo Mohotara tonisi ka Lopo Tuhan. Gedung co mewah nyan kota Yerusalem husus indan Mohotara. Lopo Mohotara oko nyan polontaran co tonoliut pagar kuta. Dulun Israel herak eh boraoi bodoa hintang mihi porsembahan nyan polontaran, tapi baya imam co boraoi muntam Lopo-Eh. botugas sobagai imam nyan tohimo Mohotara. 9Isan co koliin, kawan imam moundi ika nantu tugas doh hopomasing. Jakaria buah tugas husus ika muntam hia ponah Lopo Tuhan hintang mapang tangah. 10Dahat are mapang tangah cioh, oko orong dulun nyan luar dahat bodoa.
11Paluh leha bat Molekat Tuhan hia Jakaria. Molekat cioh tonjok nyan topit kontoun mesbah ika mapang tangah. 12Jakaria tokocit hintang potontakut noto molekat cioh. 13Tapi molekat cioh mantun, “Aroh takut, Jakaria! Mohotara ocop ngoneh doa mu. Oruh mu Elisabet angar nganak ico longa bakah. Iko sobulih ngaran eh Yohanes. 14Iko angar ngorinah jorih lau. Dulun orong co bokon mahi angar umba jorih jerah tului daja cioh tonganak. 15Iroh jorih jerah awi daja cioh angar jarin dulun boleka nyan tohimo Tuhan. Are samah sindo aroko boraoi ngorih angur atawa korih co boraoi ngomuso. Roh Mohotara angar hopompahui mombimbing are, ingkan are incah nyan ponah olom tinaieh. 16Orong dulun Israel angar ngoneh antun eh, paluh hopuli tuhit ma Tuhan, Mohotaran doh. 17Are angar oko sipat hintang kuasaieh samah ma nabi Elia sinan. Are angar dombut houn ma korombut Tuhan. Are angar ngombuah hubungan dulun ongko ma kawan anak bua doh, dulun co aroh tuhit angar tomomimpin eh hopuli hia calan co bujur, iyohonon ika jarin tuhit ma porentah Mohotara. Ma iyoh, are angar nyiap atoi kawan dulun co kolu bolum ma cara co sosuai ma kojere Tuhan. Ika iroh siap norima Tuhan.”
18Opah iyoh Jakaria mantun ma Molekat cioh, “Akuh tuh ocop ongko. Oruh kuh mahi ngolangkun kongongkoeh! Maindeoi akuh boraoi porocaya ma antun mu non angar bujur-bujur tojadi?”
19Useh molekat cioh ma are, “Akuh tuh Gabriel curuhan Mohotara. Akuh ocop tonyoruhan ika mantun ma iko hintang porapot tarung pio cotuh indam mu. 20Antun kuh niin angar tojadi nyan kotikaeh. Tapi tului iko tuh aroko porocaya, co kotuui iko angar uong hintang aroko boraoi mantun dapot kotika tarung cotuh tojadi. Iyohonon dapot kotika daja cioh tonganak.”
21Pondehan iyoh, dulun orong yoh dahat nganto Jakaria pusit. Iroh hurong ma are awi dalo kotahi hangki co koliin nyan ponah Lopo Tuhan. 22Kosodahaieh, Jakaria pusit tapi aroko boraoi mantun ma iroh. Are baya nungan hapo silui tului are aroko boraoi mantun. Maka koraon doh bat are ocop noto aang co topototo nyan ponah Lopo Tuhan.
23Gilir tugas Jakaria ocop umbot. Paluh, buli are ingkan kota Yerusalem hia lopo tioh. 24Aroko tahi opah iyoh, Elisabet oruh eh botohi. Elisabet ngurung arop eh ponah lopo kotahin limo bulan. 25Hieeh, “Tuhan ocop pototo kopioi-Eh ma akuh. Makitu akuh aroko mohaan bat awi Tuhan ocop kuhan akuh botohi.”
Molekat Gabriel nobara Maria bahawa are angar nganak Yesus
1:26-38
26Kotika Elisabet ocop botohi onom bulan, Mohotara nyuhu molekat Gabriel tulak hia desa Nasaret, ico lowu nyan propinsi Galilea. 27Gabriel tonyoruhan hia ico lehoi tindoh, araieh Maria. Bawen lehoi tindoh cioh ocop tunangan ma ico beti co araieh Yusup, utuh laca Daud.
28Molekat cioh dombut hia Maria. Hieeh, “Sanangboh, iko bawe co tomili Mohotara! Mohotara oko hopompaluh somim mu!”
29Ngoneh antun molekat cioh, Maria tokocit, bingung dapot kisok-kisok ponah atoi, “Ome maksut antun cioh?” 30Maka Molekat cioh mantun maeh, “Aroh takut, Maria, awi Mohotara kolu mihi aang co pio hinut indam mu. 31Iko angar botohi hintang nganak ico beti longa bakah, co sobulih tongaran mu Yesus. 32Are angar jarin dulun bokuasa hintang angar tonisi Anak Mohotara Co Poko Hunyung. Tuhan, Mohotara angar nompi Are jarin laca isan Laca Daud, tatu hiang-Eh. 33Are angar momorintah sobagai laca dapot kototahieh indan utuh utek Yakup, iyoh onon bangsa Israel. Korojaan-Eh aroko kopomupus!”#1:33 Cotuh janji Mohotara co tomihi indan laca Daud jaman sinan. Tonulih nyan Tawarih 17:10b-15.
34Hien Maria ma molekat cioh, “Tapi akuh incah lehoi tindoh. Maindeon aang cioh boraoi tojadi?”
35Molekat cioh museh, “Roh Mohotara angar dombut hia iko hintang kuasan Mohotara angar umpi aang mosotahir ma iko. Tului iyoh daja co angar tonganak yoh angar tonisi Suci, Anak Mohotara. 36Ngoneh eh bat: Bobuham mu Elisabet oluco ocop ongko, tapi makitu botohi. Batuh dulun nisi are tomanang tapi makitu are ocop botohi onom bulan. 37Awi arelu oko co mosotahir indan Mohotara.”
38Paluh Maria mantun, “Akuh tuh siap nompi kejere Tuhan; olueh tojadi ma akuh isan co tomantun mu.” Paluh molekat cioh tulak naat Maria.
Maria tulak nganda Elisabet
1:39-45
39Bopira ondo opah iyoh, Maria paluh tulak hia lowun Elisabet nyan derah pulou puruk Yehuda. 40Maria muntam lopo Jakaria hintang mihi tontoke indan Elisabet. 41Kotika Elisabet ngoneh tontoke cioh, daja co ponah olom eh hokuwut. Roh Mohotara monguasai Elisabet. 42Maka Elisabet mantun muhat, “Tomihi aang co pio hinut iko meleh hangki bawe co bokon. Tomihi aang co pio hinut daja co oko nyan ponah olom mu. 43Sobujur eh, akuh aroko pantas tonganda mu tului daja co ponah olom mu non iyohco Tuhan kuh! 44Akuh ocop monau aang cotuh kotika ngoneh tontoke mu, daja co ponah olom kuh hokuwut jorih. 45Sanang bat iko, awi iko porocaya ma aang co tomantun Tuhan indam mu mositi angar tojadi.”
Maria monyanyi nara Mohotara
1:46-56
46Paluh hien Maria,
“Jiwa kuh nara Tuhan.
47Hintang atoi kuh jorih-jerah tului Mohotara, ponyolamat kuh.
48Awi oluco akuh polayan-Eh co randah,
tapi Are aroko solingo akuh.
Molai makitu dapot turun-tomurun,
kokon dulun angar mantun akuh tomihi aang co pio hinut.
49Tului Mohotara co poko bokuasa nguan kawan aang co korinah kopioi indang kuh.
Suci arai-Eh.
50Turun-tomurun, Are mihi asi-Eh indan kawan dulun co korinah mohormat Are.
51Are pototo kuasai-Eh ma silui-Eh co mamut bangkah.
Sohinga, kawan dulun bolecak, tomisah-misah-Eh.
52Dulun co bokuasa, Mohotara potoka are ingkan kodudukaieh.
Tapi dulun co randah, Mohotara mangkat eh.
53Dulun co dou, tongomosuh Eh ma kokon aang co pio.
Tapi dulun co tatou, tongomuho-Eh paluh aroko mihi iroh ome-ome.
54-55Mohotara bojanji ma Abraham hintang utuh utek eh.
Janji cioh tenden oko hopompaluh dapot sumong kototahieh.
Mohotara aroko solingo janji cioh ma kawan tatu hiang to. Are mongabur eh. Mohotara mingkat ika hopompaluh mihi asi indan koturunan Abraham, iyohonon Israel co molayani Are.
Mohotara angar nguan aang cioh hopompahui sumong kototahieh.”
56Maria nukui umba Elisabet kotahin tolu bulan. Opah iyoh, are buli hia lopoeh nyan desa Nasaret.
Yohanes Pombabtis tonganak
1:57-66
57Dapot bat kotikaeh, Elisabet nganak ico longa bakah. 58Kawan totangga hintang kawan pumpun bobuhan doh ngoneh tarung cioh, Tarung kopion Tuhan co dalo kahai indan Elisabet. Jadi jorih jerah bat iroh samah-samah ma are.
59Maka dombut bat iroh kokon doh kotika acara malak longa daja cioh nyan umur jalu ondo. Kokon doh hobobuha jere nompi araieh Jakaria, samah ma aran tamaieh, 60tapi Elisabet, tinan daja cioh mantun, “Aroh! Are sobulih tongaran Yohanes.”
61Iroh museh, “Aroko ico beti mahi ingkan ewang bobuhan mu co arai isan onon.” 62Maka, iroh nungan hapo garakan silu ika ngisok Jakaria, taman daja cioh. Iroh jere monau ome arai co jere ihi indan anak eh yoh. 63Are ninju ika tomihi aranaang inaeh boraoi nulih useh eh. Tonulih eh, “Aran longa daja cioh Yohanes.” Potohurong-hurong kokon doh. 64Paluh kotika cioh ka, Jakaria boraoi mantun hopuli, hopander hodolang nara Mohotara.
65Maka hurong lau kokon dulun co nukui nyan toliut iroh yoh. Tarung kojadian cioh jarin antun kokon dulun nyan derah pulou puruk Yudea. 66Kokon dulun co ngoneh tarung cioh, momikir eh ponah songai. Koraon doh kokuatan Tuhan nyomin daja cioh. Maka iroh mantun, “Mositi daja cotuh angar jarin dulun co penting. Are angar nompi aang co luar biasa.”
Jakaria monyanyi nara Mohotara
1:67-80
67Opah iyoh, Roh Mohotara oko monguasai Jakaria. Maka, are mantun tungon Mohotara co angar tojadi.
68Tonara bat Tuhan, Mohotaran bangsa to Israel!
Are dombut dohop hintang polampas umat-Eh.
69Are nyoruhan ico beti ponyolamat co bokuasa indan bangsa to Israel. Are yoh ingkan koturunan laca Daud co molayani Mohotara.
70-75Samah isan co tomonjanji Mohotara.
Janji co toporapot-Eh ma kawan nabi co tomili-Eh.
Janji cioh ika nyolamat ito ingkan kuasa musuh,
ina ito aroko usah takut molayani Are,
molayani Are ma pokocu arop to ingkan dosa,
ma nompi aang co bujur nyan tohimo-Eh,
kotahin to bolum.
Mohotara molalus janji-Eh co suci yoh.
Are nyolamat ito ingkan musuh.
Are polampas ito ingkan kuasan kawan dulun co dolee ma ito.
Mohotara umpi aang conon ika poleha asi-Eh co sotia ma tatu hiang to.
76 Opah iyoh Jakaria mantun ma anak eh.
“Anak kuh, kawan dulun co nyono iko sobagai nabi co ingkan Mohotara co poko hunyung.
Awi, iko angar nosoun Tuhan ika nyiap songan dulun ika siap norima-Eh.
77Iko angar monjelas indan umat-Eh maindeoi caraeh iroh angar tonyolamat tului dosan doh tomongampun.
78-79Kokon aang conon angar tojadi tului Mohotaran to yoh pio songai hintang pomasi.
Dulun co arinai nyono Mohotara, samah ma dulun co nukui nyan ponah aranaang co pindong,
hintang ponah ancaman pompatoi.
Tapi isan matanondo nyomput ingkan ika co hunyung,
Laca Co Tomonjanji Mohotara dombut ingkan sorga monjelas cara bolum co ngonjorih songan Mohotara.
Are monuntun ito ika bolum ponah kongolandah kongolami.”
80Anak Jakaria yoh botambah bahai hintang sasar kuat ponah roh. Are nukui nyan padang gurun co ngolohiui dapot are molai porapot borita indan bangsa Israel.
Currently Selected:
Lukas 1: TBSS
Highlight
Share
Copy
Want to have your highlights saved across all your devices? Sign up or sign in
