Lukas 2
2
Yesus tonganak
2:1-7
(Mat. 1:18-25)
1Kotika cioh oko laca co momorintah nyan ngolauh negri Roma. Araieh Agustus. Are morentah ina kokon warga co oko nyan ponah pomorintah Korojaan Roma mondaptar arop doh ika tonyensus. 2Sensus co kotuhi tuh tonompi kotika Kirenius molayani laca Agustus sobagai Gubernur nyan derah Siria. 3Kokon dulun tulak hia kota nyan omoh tatu hiang doh batuh nukui ina iroh tongitung dulun Roma.
4Maka, Yusup mahi tulak ingkan kota Nasaret nyan propinsi Galilea, hia kota Betlehem nyan derah Yudea. Iyoh ika laca Daud tonganak. Yusup sobulih hia intin awi are koturunan Daud. 5Yusup tulak mondaptar arop eh homboh-homboh ma Maria tunangaieh, co dahat botohi.
6-7Kotika iroh dapot nyan kota Betlehem, kokon lopo ika hiloi ocop ponu. Jadi iroh tirui nyan ponah lopo ika komolum. Nyan intin Maria nganak ico beti longa bakah, anak tutuh eh. Daja cioh tomungkuh eh ma kain, hintang topokaling eh nyan ponah tolungan kanon komolum.
Molekat porapot tarung Yesus tonganak, Laca Co Tomonjanji Mohotara, ma kawan dulun co tukang nyorunuh komolum
2:8-20
8Momi cioh, oko kawan dulun co tukang nyorunuh komolum dahat jaga kawan domba nyan pulou uru nyan derah dokin kota Betleham yoh. 9Songola molekat Mohotara poleha arop eh ma iroh, cohaya ingkan Tuhan pahau-pahau nyingah iroh, tului iyoh karas lau akut doh. 10Tapi molekat cioh mantun, “Aroh takut! Awi akuh dombut mehen tarung pio indam me, tarung co dalo ngonyorih ngonyerah kokon dulun. 11Ngondaii tuh nyan kota Daud, iyohonon Betlehem, ocop tonganak ponyolamat indam me. Are yoh Laca Co Tomonjanji Mohotara.#2:11 Tisi ‘Mesias’ ponah janji co sulak eh (Bohasa Ibrani) samah artieh ma ‘Kristus’ ponah janji co Baa (Bohasa Yunani). Artieh ‘co tomongurapi’. Maksut eh, Laca Co Tomonjanji Mohotara. Noto nyan Masmur 2:2; 45:2-9; 132:17-18. Imam hintang Nabi mahi tomongurapi. Yesus iyohonon Imam (Ibrani 4:14-16) Nabi (Kesah Rasul 3:22) hintang Laca. Are yoh Tuhan. 12Tuh iyoh cara me ika monau ome co tomantun kuh mula tuu: Ikan angar sopopak ico longa daja. Daja cioh tomungkuh ma kain, topokaling nyan tolungan kanon komolum.”
13Molekat cioh songola tongohomboh kawan molekat co bokon, iroh uras nara Mohotara. Ma antun,
14“Koponara indan Mohotara nyan sorga, ika co poko hunyung. Are angar mihi kongolandah kongolami nyan pindaondo indan dulun co ngonyorih songai-Eh.”
15Opah iyoh, kawan molekat taiyoh hopuli hia sorga, kawan dulun co tukang nyorunuh komolum taiyoh mantun samah arop doh, “Keleh ito tulak hia Betlehem ika noto poristiwa co tojadi yoh, co punan Tuhan maraeh ma ito.”
16Iroh nyua tulak hia Betlehem, nyopopak Maria hintang Yusup, hintang longa daja co dahat kaling nyan ponah tolungan kanon komolum. 17Kotika kawan dulun co tukang nyorunuh komolum yoh noto longa daja cioh, iroh ngesah kawan aang co tomara molekat taiyoh, tintun longa daja cioh. 18Hurong kokon dulun ngoneh kesah kawan dulun co tukang nyorunuh komolum yoh. 19Tapi Maria mika kokoieh ponah songai, momikir kokon aang cioh.
20Kawan dulun co tukang nyorunuh komolum yoh hopuli hia pulou uru samir nara mantun kopion Mohotara, tului ome co ocop tongoneh hintang tonoto, samah ma isan co tomantun kawan molekat taiyoh niin.
Yesus tomalak hintang tonyarah ika bolum husus indan Mohotara
2:21-24
21Opah umur jalu ondo, daja cioh tomalak. Yusup doruo Maria ngaran daja cioh Yesus, aran co tomihi molekat ma Are soun ma Are tongobotohi tinai-Eh.
22-24Dapot bat kotikaeh, Yusup doruo Maria tulak hia Lopo Mohotara nyan kota Yerusalem, ika molalus adat ngorasih arop monurut hukum Musa hintang ka mihi porsembahan indan Mohotara borupa ico kopasang beleu tokukur, boraoi ka duo kontuluh anak burung dara. Nyan kotika iyoh ehen doh ka Yesus ika nyarah Are hia Mohotara tului oko porentah kole ponah hukum Mohotara isan otuh, “Amun ico bawe nganak, anak tutuh eh bakah, maka tinai doruo tamaieh sobulih nyarah eh ma Mohotara ina are bolum husus indan Mohotara.”
Simeon sopopak ma Yesus, Laca Co Tomonjanji Mohotara
2:25-35
25Kotika cioh nyan Yerusalem oko dulun co araieh Simeon. Are yoh dulun co hopompaluh bolum bujur. Are mohormat hintang tuhit ma Mohotara. Are yoh nganto Laca Co Tomonjanji Mohotara ika mihi kongolandah indan dulun Israel. Roh Mohotara oko nyan are. 26Roh Mohotara ocop mara are sinan bahawa are aroko angar matoi amun are arinai noto Laca co tomonjanji Tuhan.
27Yusup doruo Maria mehen Yesus hia Lopo Mohotara nyan kota Yerusalem. Doruo dombut ika nompi aang co tomorentah ponah hukum Mohotara tintun anak tutuh. Pas kotika cioh, Roh Mohotara nompi Simeon tulak hia Lopo Mohotara ka. 28Kotika Simeon noto daja cioh, are paluh monu-Eh, ngentang-Eh paluh nara Mohotara,
29“Tuhan akuh tuh hamba Mu.
Iko ocop molalus janji-Mu,
makitu akuh siap matoi nyan ponah kosanang.
30Awi ma matang kuh tarop akuh ocop noto ponyolamat co ingkan-Iko.
31Ponyolamat cioh ocop tonyiap-Mu indan kokon bangsa.
32Ponyolamat cotuh isan kopandau co poleha kojere Tuhan ma dulun co bokon ma bangsa Yahudi. Are ka nompi umat Tiko Israel tomohormat.”
33Taman doruo tinan daja cioh hurong ngoneh antun Simeon tintun anak doh. 34-35Paluh Simeon mantun aang co pio hinut ma Maria doruo Yusup.
Paluh are mantun ma Maria, tinan daja cioh,
“Daja cotuh ocop tomili ika potinjun kojere Mohotara. Orong dulun Israel angar norima Are. Tapi orong ka dulun co angar kuloi Are. Ma isanioh, maka kitan bat kawan aang co ponah songan doh. Dulun co norima-Eh angar sasar dokin ma Mohotara. Tapi dulun co kuloi Are angar sasar ocu ingkan Mohotara. Iroh angar ngolawan-Eh. Kosoranta co angar tonongkomo-Eh angar nompi iko karas jorung, Maria. Koporoh songam mu daai nusuk songam samah ma padang co nyoot.”#2:34-35 Yesus angar soranta dapot tongompatoi nyan kaju sompolaki. Tului noto iyoh, Maria angar karas jorung.
Hana bosukur ma kodombut Yesus
2:36-38
36-37Nyan polontaran lopo Mohotara yoh oko ka ico beti nabi bawe co ocop dalo kongongko eh. Araieh Hana. Are anak Panuel ingkan suku Aser. Are piji kawin kotahin pitu toun, tapi opah iyoh banaieh matoi, are jarin balu. Kotika poristiwa cotuh tojadi, umur eh jalun pulu opat toun. Are aroko piji naat Lopo Mohotara. Hondo-homalom are bopuasa, hintang bodoa ika nyembah Mohotara. 38Kotika Yusup, Maria hintang daja cioh oko nyan intin. Hana mahah iroh, paluh bosukur ma Mohotara. Are mantun tintun Daja cioh, Laca Co Tomonjanji Mohotara. Are mantun nohiu daja cioh ma kokon dulun co nganto kotika Yerusalem hintang kokon dulun Israel tomolampas.
Yesus ehen buli hia Nasaret hintang tongomahai nyan intin
2:39-40
39Opah Yusup doruo Maria molekas kokon acara adat indan co tomorentah hukum Mohotara, buli bat iroh hia Nasaret, ika asal doh nyan derah Galilea. 40Daja cioh tongomahai nyan intin. Are jarin bangkah, bopikir akar hintang karas tongosejeng Mohotara.
Yesus majar nyan polontaran lopo Mohotara kotika Are incah umur duo balas toun
2:41-52
41Sika toun dulun ongko Yesus tulak hia kota Yerusalem ika moraya Paskah.#2:41 Dulun Yahudi mingkat jaman sinan, kotika iroh tongombebas ingkan tohocipon dulun nyan tana Mesir Mohotara mohukum dulun Mesir. Sika anak tutuh dulun mesir matoi, dapot komolum doh mahi. Tapi dulun Israel tonyolamat. 42Jadi, kotika Yesus umur duo balas toun, tulak bat iroh ika umba moraya Paskah cioh isan co koliin. 43Kotika porayaan cioh umbot, tinan taman Yesus buli. Tapi iroh aroko monau Yesus incah nukui nyan Yerusalem. 44Iroh hopompaluh nyalan awi iroh monyangka Yesus oko halo rombongan. Opah nyalan ico kondaii, punan doh nganyap Are halo kawan bobuha hintang kawan tongkanyoh-Eh. 45Tapi iroh aroko popak Are. Maka Yusup doruo Maria hopuli kole hia Yerusalem nganyap Are. 46Opah tolu ondo iroh popak-Eh nyan polontaran Lopo Mohotara. Are dahat tuot ma kawan guru agama Yahudi, ngoneh ajaran doh, orong kisok-Eh ma iroh. 47Oko ka dulun bokon nyan intin ngoneh Yesus dahat huseh-huseh ma kawan guru agama taiyoh, iroh uras hurong ngoneh kawan useh Yesus tului pomahaman-Eh jalom lau. 48Dulun ongko-Eh mahi hurong lau noto Are.
“Nak, kura Iko nompi karo tamam isan otuh, karo ocop giha nganyap Iko!” Hien tinai-Eh.
49Yesus museh iroh, “Ikan duo aroko porulu giha nganyap Akuh awi sobujur eh ocop tomonau me Akuh sobulih oko nukui nyan ponah lopo Tamang-Kuh tuh!” 50Tapi iroh aroko paham ma useh Yesus yoh.
51Opah iyoh Are buli homboh iroh hia Nasaret. Are tenden numun nain doh. Kokon aranaang co karas boarti tintun Daja cioh uras tomika tinai-Eh nyan ponah songai. 52Yesus sasar bahai hintang sasar botambah bopikir akar. Mohotara hintang kolunon sasar herak ma Are.
Currently Selected:
Lukas 2: TBSS
Highlight
Share
Copy
Want to have your highlights saved across all your devices? Sign up or sign in
