Lukas 8
8
Kawan bawe co dohop polayanan Tuhan Yesus
8:1-3
1Opah iyoh, Yesus tulak ingkan kota hia kota, ingkan desa hia desa, momborita Tarung Pio tintun Korojaan Mohotara,#8:1 Sangan Tarung Pio tintun Korajaan Mohotara cukup orong, tapi ico ingkan aang co penting iyohco Yesus mombukti bahawa Are iyohco Laca Co Tomonjanji Mohotara. Are ocop dombut ika umpi calan ina kawan dulun boraoi tonyolamat ingkan hukuman dosa. duo balas rasul-Eh mahi umba tulak. 2-3Kawan bawe oko orong ka co umba. Iroh ocop topomambuh ingkan orong macam toro hintang tonyarung kawan roh jahat. Nyan halo iroh yoh oko Maria co tonisi Makdalena (pitu roh jahat ocop tomusir ingkan are), Yohana, hintang Susana. Yohana tuh oruh Kusa, bondahara Herodes. Kawan bawe co umba Yesus yoh mihi duit doh tarop ika dohop polayanan Yesus hintang kawan murid-Eh.
Yesus ngesah maindeon cara kokon dulun co norima Antun Mohotara#8:4-15 Antun Mohotara boraoi boarti antun Yesus, iyohonon Tarung Pio Tintun Korojaan Mohotara, Laca Co Tomonjanji Mohotara yoh ocop dombut (noto Lukas 8:1).
8:4-15
(Mat. 13:1-23; Mrk. 4:1-20)
4Orong dulun co hopompaluh dombut ingkan bobagai kota. Hayak dulun ocop orong hokumpur, Yesus majar hapo kesah cotuh, 5“Oko ico beti dulun co tukang nyumo tulak ika morawuh jangoi. Kotika are morawuh eh, oko jangoi co nokah nyan calan, tonicak dulun, paluh kanon beleu dapot punah. 6Oko ka jangoieh co nokah nyan tana co hobatu. Hayak during paluh molanyu tului tanaeh tojah. 7Oko ka jangoieh co nokah nyan tohun humput duhi. Humput duhi nyuluh homboh ma jangoi cioh, ngaluk siwuh eh dapot matoi. 8Tapi oko ka jangoi co nokah nyan tana subur, during eh bolunyah, takit eh solatuh kali lipet.” Opah iyoh Yesus mantun, ma suara co muhat, “Amun iko jere paham, ngoneh eh pio-pio!”
9Kawan murid-Eh ngisok ome arti kesah cioh. 10Yesus museh, “Ikan ocop tomihi pomahaman tintun Korojaan Mohotara co arinai tomonau dulun bokon. Tapi ma dulun bokon Akuh majar hapo tindung ina ‘Iroh nolangon tapi aroko bujur-bujur noto. Iroh ngoneh tapi aroko bujur-bujur paham.’#8:10 Kawan antun cotuh tomonu ingkan Yesaya 6:9-10. Tindung tuu mika arti hintang ajaran co jalom arti indan dulun co jere bolajar. Tapi kawan dulun co aroko kolu bolajar, aroko angar paham ma arti tindung cotuh. Yesus majar hapo tindung, awi amun hapo tindung yoh aang co tomantun eh monarik, toingat-ingat, hintang mohinai tomingkat, sohinga amun pikiran dulun ocop molai tobuka kolu bolajar, arti tindung cioh angar jelas indan doh. 11Tuh boh arti kesah cioh nin. Jangoi cioh soumpama Antun Mohotara. 12Jangoi co nokah nyan saran calan cioh nin soumpama kawan dulun co norima Antun Mohotara baya sokedar ngoneh eh bewe. Tapi opah iyoh dombut Lacan Setan, ngaluk ina doh solingo Antun Mohotara, dapot iroh aroko porocaya. Maka iroh yoh aroko tonyolamat. 13Jangoi co nokah nyan tana co hobatu cioh nin soumpama dulun co ngoneh Antun Mohotara, jorih norimaeh. Tapi iroh baya sonyulu leh porocaya. Samah ma imbun nyan tana co hobatu, baya during sonyulu tului tanaeh mipih. Amun kawan dulun co isan iyoh buah tingkoh, iroh aroko porocaya kole ma Antun Mohotara. 14Jangoi co nokah nyan tana co karas humput duhieh soumpama dulun co ngoneh Antun Mohotara, tapi hayak tahi opah eh, iroh giha tintun kobolum doh nyan dunia tuh, nganyap koponatou, kosanang. Kokon aang cioh ngaluk iroh dapot iroh bolum aroko sosuai ma kojere Mohotara. Samah ma co tomanyek humput duhi, tuluieh bua imbun cioh aroko kojuan osak. 15Tapi, oko kawan dulun co norima Antun Mohotara samah ma jangoi co nokah nyan tana co bolunyah. Iroh ngoneh eh, paluh mikaeh ponah songan doh co pio hintang jujur. Iroh bangkah noro amun toningkoh, iroh yoh hopompaluh nompi gawi co ngonyorih songan Mohotara. Samah ka ma imbun co bolunyah mohasir bua.”
Sika kolunon sobulih ngoneh hintang nontumun antun Yesus pio-pio
8:16-18
(Mrk. 4:21-25)
16“Aroko dulun co ngomolum lampu paluh nyongkulop eh ma kantang, atawa mikaeh nyan pinda ranjang. Tapi are sobulih mikaeh nyan tungkui meja ika kokon dulun co muntam hia ponah lopo yoh tongompandau lampu cioh. 17Somporengu kopandau cioh, kokon aang co tonyuhuk angar leha; kokon aang co tomulim angar tomonau hintang tongompandau pian Mohotara. 18Tului iyoh, nyoluhieh pio-pio ma cara me norima kokon antun-Kuh. Awi dulun co ocop empun ome-ome, angar tomihi meleh orong kole indai; tapi dulun co aroko empun ome-ome, mahi co tomangap tioh, angar tomonu.”#8:16-18 Yesus hapo tindung cotuh ika monjelas pomahaman dulun tintun aang co bujur hintang Korojaan Mohotara. Kawan dulun co bujur-bujur norima Are angar paham labih orong hintang labih jalom. Tapi dulun co kuloi Are, aroko angar monau ome-ome.
Tinan Yesus hintang kawan konduang kuhung-Eh
8:19-21
(Mat. 12:46-50; Mrk. 3:31-35)
19Tinai hintang kawan konduang Yesus dombut jere nyopopak Are. Tapi aroko boraoi awi dalo kuhat dulun ngorumbung-Are ika ngoneh ajaran-Eh. 20Jadi, oko dulun co mara ma-Are, “Tinam hintang kawan konduang-Mu oko nyan luar, nyau nyopopak Iko.” 21Tapi hien Yesus, “Dulun co ngoneh Antun Mohotara paluh tuhit maeh, iroh boh tinang-Kuh hintang kawan konduang-Kuh.”
Yesus poranai ondolowut
8:22-25
(Mat. 8:23-27; Mrk. 4:35-41)
22Nyan ondo bokon kole, Yesus hintang kawan murid-Eh dahat doh nyan danau Galilea. Yesus mantun ma iroh, “Haas ito mitah hia pohoi danau.” Jadi, iroh cakat ico jukung, paluh mitah.
23Dahat iroh nyan tohun danau cioh, Yesus potontirui. Songola dombut ondolowut nampuh danau cioh. Umbak bahai pian lowut cioh paluh danum molai muntam ponah jukung. Bohaya lau aang cotuh. 24Kawan murid Yesus yoh monyun Are. Hien doh, “Guru, Guru! Mositi ito colaka!” Yesus monyun, paluh ngorangat lowut hintang umbak co bahai yoh ika ranai. Maka, paluh lowut hintang umbak co bahai yoh paluh ranai kotika cioh ka.
25Yesus nagur iroh. Hie-Eh, “Ikan sobulih meleh porocaya kole ma-Akuh!” Iroh takut hintang potohurong-hurong. Paluh mantun samah arop doh, “Dulun cotuh luar biasa. Hayak Are ngorangat morentah, bahi hintang danum mahi tuhit ngoneh nai-Eh.”
Yesus musir orong roh jahat ingkan ico beti nyan kota Gerasa
8:26-39
(Mat. 8:28-34; Mrk. 5:1-20)
26Dapot bat iroh nyan derah Gerasa nyan pohoi danau Galilea. 27-29Nyan intin oko ico beti bakah co tonyarung kawan roh jahat. Ocop tahi aroko holembon. Roh jahat derek nyarung are. Jadi, dulun cioh hopompaluh tomonjaga, silui hintang paaieh tomowot ma rantai umat. Tapi are tenden lian matot rantai yoh. Roh jahat maksa are tulak hia padang gurun co ngolohiui. Tului iyoh, are ocop tahi aroko nukui nyan lopo, are cara nukui nyan kawan luwang guha kolowong.
Hayak are noto Yesus toka ingkan jukung cioh paluh nukat hia tohun tana, Are mahah Yesus, noriak paluh nukup bolutut nyan paan Yesus. Paluh, Yesus morentah roh jahat cioh pusit ingkan dulun cioh. Roh jahat cioh noriak, “Ooi, Iko Anak Mohotara Co Poko Bokuasa! Iko jere dombut nompi ome ma akuh? Akuh nyawot aroh Iko nyiksa akuh.”
30Yesus ngisok ma dulun cioh, “Ome aram mu?”
“Arang kuh, Legion,” awi oko orong roh jahat co nyarung are. 31Kawan roh jahat taiyoh nyawot ina Yesus aroko musir iroh hia ponah noraka. 32Dokin intin, oko orong lau kawan bulo nganyap kanon doh nyan bengke lungkuh. Paluh, kawan roh jahat taiyoh nyawot ma Yesus ina kuhan muntam hia kawan bulo taiyoh. Paluh, Yesus kuhan iroh. 33Hayak, kawan roh jahat pusit ingkan dulun cioh, nyarung kawan bulo taiyoh. Paluh, kawan bulo taiyoh tokoru najun arop doh ingkan bengke lungkuh cioh hia ponah danau, paluh iroh punah matoi pusong.
34Kawan dulun co jaga bulo yoh noto poristiwa cioh. Iroh paluh tokoru hintang nyebar poristiwa cioh nyan kota Gerasa hintang nyan derah co oko ngolumbang eh. 35Opah iyoh, orong dulun dombut nyalan noto poristiwa cioh. Kotika iroh dapot intin, sopopak ma dulun co ocop tongolampas ingkan kawan roh jahat yoh. Are tuot dokin paan Yesus, ocop holembon, hintang ocop pio. Kitan doh kuasan Yesus co dalo kahai. Maka potontakut bat iroh.
36Kawan dulun co noto poristiwa cioh mara ma kawan dulun co dombut ingkan kota Gerasa yoh tintun maindeoi dulun cioh topomambuh. 37Paluh kokon ponduduk derah Gerasa yoh nyawot asi ina Yesus naat ika cioh, tului iroh karas takut. Maka, Yesus cakat hia tungkui jukung homboh ma kawan murid-Eh ika hopuli hia pohoi danau.
38Dulun co ocop tongompio opah tonyarung kawan roh jahat yoh nyawot ma Yesus ika are boraoi umba. Tapi, Yesus nyuhu are buli hia ikaeh. Hie-Eh, 39“Bulileh hia lopomu. Maraeh kokon aang co pian Mohotara ma iko.” Jadi, dulun cioh tulak hia ngolauh kota, mara uras aang co ocop pian Yesus ma are.
Anak Yairus hopuli bolum pian Yesus hintang ico bawe co topomambuh-Eh
8:40-56
(Mat. 9:18-26; Mrk. 5:21-43)
40 Nyan pohoi danau yoh, oko dulun orong nganto Yesus hopuli. Jadi, hayak Yesus dapot, kokon doh nohambang korombut-Eh.
41-42Oko ka nyan intin kopala lopo ika sombayang co araieh Yairus. Are yoh baya oko ico leh anak eh, anak eh yoh bawe, umur eh kira-kira duo balas toun, dahat hotoro hintang jonyo diuh. Yairus nukup bolutut nyan paan Yesus, nyawot dohop ina Yesus dombut hia lopoeh ika pomambuh anak eh yoh.
Nyan solanai hia lopo Yairus yoh, orong dulun norenye Yesus ingkan kokon arah. 43Nyan intin oko ico beti bawe co hopompaluh ngondaha. Ocop duo balas toun kotahi bawe cioh cara ngondaha, aroko boraoi tonawah ome bewe. 44Are ngoroni Yesus ingkan likut, paluh ngoncimai pungko jubah-Eh, opah iyoh paluh umbot kongondaha bawe cioh.
45Yesus ngisok, “Ome co ngoncimai Akuh?” Aroko ico beti mahi co kolu mongakueh. Hien Petrus, “Guru, orong lau dulun co ngorumbung Iko nyan intoi. Jadi, ome bewe boraoi sorotantot Iko.”
46Hien Yesus, “Tapi oko dulun co antaeh buah Akuh. Tului iyoh, Akuh nongkomo oko kuasa co pusit ingkan Akuh.”
47Bawe cioh sadar awi aang co piai yoh koraon. Maka, are paluh dombut, nukup bolutut nyan muka Yesus, kalut kohororiki ma akut eh.#8:47 Bawe cioh takut tului are sadar bahawa Yesus yoh bokuasa. Monurut kawan hukum agama Yahudi, bawe cioh tomangap aroko borasih awi are daha tului pian luse. Jadi, mungkin ka are takut tonagur atawa tomohukum. Nyan tohimo kokon dulun orong yoh, are mantun aang co piai yoh, ome alasan are ngoncimai Yesus dapot maindeoi toroeh yoh paluh pio.
48Hien Yesus ma are, “Anak-Kuh, iko ocop tonyolamat tului iko porocaya ma-Akuh. Buli bat mehen kongolandah.”
49Dahat Yesus incah mantun ma bawe cioh, dombut ico beti coruhan ingkan lopo Yairus, kopala lopo ika sombayang cioh niin. Hie ma Yairus, “Anakmu ocop matoi. Aroh bat iko ngomboo Bapa Guru kole.”
50Tapi Yesus ngoneh antun cioh. Hie-Eh ma Yairus, “Aroh bopikir arelu oko harapan kole. Tenden leh porocaya ma-Akuh, anak mu angar mambuh.”
51Hayak dapot nyan lopo Yairus, Yesus aroko kuhan dulun bokon umba muntam hia ponah bukung, kocuali Petrus, Yohanes, Yokobus, hintang tinan-taman daja cioh leh. 52Kokon dulun nangih, nohuang ma patoi daja cioh. Tapi Are mantun ma iroh “Aroh nangih. Daja conon aroko matoi, baya tirui leh.” 53Iroh ngontao Yesus, awi koraon doh daja cioh ocop matoi.
54Yesus paluh nantot silun daja cioh. Hie-Eh, “Haas nak monyun bat!” 55Kotika iyoh ka daja cioh hopuli bolum, paluh tonjok. Paluh Yesus nyuhu iroh mihi are kanon. 56Tinan-taman daja cioh kagum. Tapi Yesus bosiit iroh mara poristiwa cioh ma dulun bokon.
Currently Selected:
Lukas 8: TBSS
Highlight
Share
Copy
Want to have your highlights saved across all your devices? Sign up or sign in
