IMBOMBO SYA BATUMIGWA 2

Ukwisa kwa Mbepo Mwikemo

1 # Levi 23.15-21; Kukumbu 16.9-11 Lelo bo lisile ilisiku lya Pentekosti, popapo abitiki bosa balinkuya pamopene mbuyo bumobwene; 2nakalinga itolo akogo kalinkufuma kumwanya, kalinkufwana kobela kwa mbelo unkulumba; kalinkwisula nnyumba yosa iyi batugelemo. 3Popapo balinkusibona isi syali bo si ndimi sya moto, syo silinkwitapulania, silinkutugala pali bosa yumo yumo. 4Bosa balinkwisula Mbepo Mwikemo, balinkwanda ukuyobela munjobelo isingi itolo, bo mumo Mbepo abapaga ukusiyoba.

5Lelo balimo abaYuda aba bitugalaga nkaya ka Yerusalemu, nabandu aba bantilaga Kyala, bo bafumile mfikolo fyosa fya nkisu kya pasi. 6Lelo bo akogo aka kapilikigwe, popapo ifilundilo fya bandu filinkubungana. Bosa abandu balinkwalangana itolo, namanga umundu gwesa alinkubapilika abitiki bikuyobela munjobelo yake. 7Bosa balinkutenguka balinkuswiganika, balinkuyoba balinkuti, “Keta, bosa aba bikuyoba papapa kali bakaya ba Galilai? 8Syo sili bulebule apa uswe tukupilika bikuyoba injobelo syitu, isi twapapigwe nasyo? 9Twe baPariti, twe baMedi na twe baElamu, na twe tuyengile nkisu kya Mesopotamia, nikya Yudai nikya Kapadokia, nikya Ponti na nkisu kya Asia, 10nikya Frigia nikya Pamfilia, nkisu kya Egiputi na mfisu fya Libiya ifi fipalamene nikisu kya Kireni, na twe baRoma twe bahesya, 11twe baYuda na twe bingisigwa mbuYuda, twe baKreti na twe baArabu; tukubapilika bo bikusiyobela munjobelo syitu imbombo ingulumba isya Kyala.” 12Bosa balinkutenguka balinkwalangana itolo, balinkulalusania balinkuti, “Kali sikunangisya fiki sisisi?” 13Loli abangi silinkuya sya seko kumyabo, balinkuyoba balinkuti, “Bagalile ubwalwa bwa mafilu.”

Amasyu ga Peteri

14Loli Peteri alinkwima nabakalongo na yumo bala, alinkwinula ilisyu lyake, alinkubabula alinkuti, “Mwe bandu ba nkisu kya Yudai, na mwesa mwe mukutugala nkaya ka Yerusalemu, syo musimanyege sisisi, amugapilikisyege amasyu gangu; 15buno abandu aba bakagala bo mumo mukwinogonela, namanga lilino kabalilo ka butatu, lubunju itolo. 16Loli isi syo isi asiyobaga unsololi Yoeli apa atigi,

17 # Yoeli 2.28-32 ‘Bo ikuyoba bunobuno Kyala ikuti,

mmasiku ga kusulo, nisakubonelelaga Mbepo gwangu abandu bosa,

po abaninu abalumyana nabalindwana bisakusololaga,

abalumyana binu abatubwa bisakufibonaga ifisetuka;

bope nabandu abakusi bisakugogwaga injosi;

18ena, bope nababombi bangu abanyambala nabakikulu

nisakubonelelaga Mbepo gwangu mmasiku gago,

po bende nukusolola.

19Nisakupelaga ifiswigu kumwanya kumpalanga,

nifika pasi pakisu,

ilopa numoto nilyosi ilititu;

20ilisuba lisakugalabukaga ukuya ngisi,

gope numwesi gwisakwipelaga ukuya ilopa;

bo likali ukwisa ilisiku lya Ntwa ilikulumba ilisisya.

21Po gwesa uyu isakuyiyobaga ingamu ya Ntwa, isakupokigwaga.’

22“Mwe banyambala mwe banyaIsraeli, amugapilikisyege amasyu aga! Yesu gwa nkaya ka Nazareti, umundu uyu Kyala abanangisye pabwelu nimbombo isya maka, mfiswigu nifika, ifi Kyala afipelelaga mmyake yuyo nkati mmyinu, bo apa musimenye na yuyumwe; 23#Mat 27.35; Mar 15.24; Luk 23.33; Yoh 19.18umundu uyu Kyala alinsosisye bo mumo alinogonile nukumanyila ngani liyolo, yo mwalinkomile pakipingika nukungoga namaboko ga bandu abilandagilo; 24#Mat 28.5-6; Mar 16.6; Luk 24.5yo uyu Kyala alinsyusisye bo amwabwile muno igonjaga mbufwe, namanga ubufwe bukabagile ukunkola.

25 # Salimo 16.8-11 Buno Davidi ikuyoba ikuti,

‘Nikumbona uNtwa nkyeni mmyangu bwila,

namanga ali kukiboko kyangu ikililo, ukuti nangayunganikaga.

26Fyobene indumbula yangu yilinkwikyela,

nululimi lwangu lulinkululutila,

kangi umbili gwangu gukuyaga ndusubilo;

27namanga umoyo gwangu utisakugulekaga mbusyuka,

kangi utisakwitika ukuti uMwikemo gwako abolelege mwipumba.

28Unangisye une injila sya bumi,

kunyisusyaga ulusekelo nikyeni kyako.

29“Mwe bamyitu umwe, mbagile ukubabula pabwelu itolo isya mwisukulu gwitu Davidi, ukuti afwile nukusyiligwa, kangi ilipumba lyake tuli nalyo ukufika kulilino kuno. 30#2 Samu 7.12-13; Salimo 132.11Lelo papo umwene ali nsololi, kangi amenye ukuti Kyala afingile ulufingo, ukuti yumo ugwa nduyungu lwake isakutugalaga pakikota kyake ikya bunyafyale, 31umwene alinkusibonela ngani, nukusiyoba isya kusyuka kwake Kristi, alinkuti, ‘Akalekigwe mbusyuka, kangi umbili gwake gukabubwene ububofu.’ 32Yesu yuyuyu, Kyala alinsyusisye mbafwe, uswe twesa tuli baketi ba nongwa sisisi. 33Lilino lelo apa imikigwe ukuya kukiboko ikililo ikya Kyala, apa ambilile kuGwise ulufingo lwa Mbepo Mwikemo, popapo onile isi mukusibona nukusipilika. 34#Salimo 110.1Buno Davidi akafyukako kumwanya, loli umwene ikuyoba ikuti,

‘UNtwa ayobile kuNtwa gwangu atile:

Itugasya kukiboko kyangu ikililo;

35ukafikege apa nikubapelaga abalugu bako ukuya kakota kakukanyapo amalundi gako.’

36“Lelo fikuti bosa abanya Israeli bamanyege kisita kwilamwa, ukuti Yesu, uyu umwe mwankomelaga pakipingika Kyala ampelile ukuya Ntwa, kangi ukuya yo Kristi.”

37Lelo bo bapilike sisisi, popapo silinkubalasa mundumbula, balinkumbula Peteri palikimo nabatumigwa abangi balinkuti, “Mwe bamyitu, po tubombege fiki?” 38Popapo Peteri alinkubabula alinkuti, “Amupindukege, mosigwege mwesa mungamu ya Yesu Kristi, ukuti mubwage ubuswe bwa mbibi syinu, po mwisakwambililaga ikikungilwa kya Mbepo Mwikemo. 39Buno ulufingo ulu lwinu umwe, nabaninu, kangi na bosa aba kubutali, bosa aba ikubabilikila uNtwa Kyala gwitu.”

40Peteri alinkubasisimikisya namasyu agangi ga mingi, alinkubasoka alinkuti, “Amwipokege kungulilo iniongafu iyi.” 41Lelo aba balyambilile ilisyu lyake, bo balinkosigwa; pisiku lilyo balinkongelapo abandu aba baliti bali baelifu batatu (3,000). 42Balinkulumilila ulumanyisyo lwa batumigwa, balinkuya mbulilanisi nabo pakulya ikisyesye kangi na munyiputo.

Muno ubumi bwayilile mbaKristi abakwanda

43Popapo abandu bosa lulinkubaga ulutende; fyope nifiswigu kangi nifika fi fingi filinkupeligwa nabatumigwa. 44#Imbo 4.32-35Bosa aba balitike balinkwendelela ukuya pamopene, mbulilanisi balinkulilanila ifi bali nafyo. 45Balinkulisya ifisu fyabo nifyuma fyabo, balinkubayabania bosa, ukufwana nukwagilwa kwa uyu na uyu. 46Bwila balinkumilisya ukuya pamopene Nnyumba ya Kyala, balinkulilanila ifyakulya nnyumba syabo, balinkulya nulusekelo nindumbula isangalufu, 47balinkuntufya Kyala, balinkuya bakundwe kubandu bosa. Popapo ilisiku lyosa Untwa alinkongelapo ukubingisya nkipanga aba bapokigwaga.

Currently Selected:

IMBOMBO SYA BATUMIGWA 2: NNBII

Highlight

Copy