IMBOMBO SYA BATUMIGWA 6
6
Abatuli bahano na babili
1Lelo mmasiku gago, bo abafundigwa bikongelapo ukubala, abaYuda ba mbuGriki balinkwibubusya kubaHiburi, papo abaYuda bibwaga ukubapakisya pa fyakulya abakikulu babo abafwilwe. 2Popapo abakalongo na babili bala balinkukibilikila ikilundilo fya bafundigwa, balinkubabula balinkuti, “Kukaya kununu uswe ukuleka ukulumbilila ilisyu lya Kyala, ukuti twikolaniege nimbombo ya fyakulya. 3Lilino lelo mwe bamyitu, amusalege mmyinu abandu bahano na babili, aba bafumwike ubununu, aba biswile Mbepo kangi na mahala, ukuti bo tubabikege pambombo yiyiyi. 4Loli uswe tukuyaga nimbombo ya lwiputo niya kulumbilila ilisyu.” 5Inongwa iyi yilinkubafyela bosa aba nkilundilo, popapo balinkubasala abandu aba: Stefani, umundu uyu aliswile ulwitiko na Mbepo Mwikemo, na Filipu na Prokori, na Nikanori na Timoni, na Parmena na Nikolai umwingisigwa mbuYuda gwa nkisu kya Antiokia; 6bo balinkubatwala ku batumigwa. Lelo bo biputile, balinkubabikapo amaboko. 7Popapo ilisyu lya Kyala lilinkubala, nubwingi bwa bafundigwa bulinkongelapo ukubala fiyo nkaya ka Yerusalemu; kangi ikilundilo ikikulumba ifya baputi kilinkulwambilila ulwitiko lula.
Ukukoligwa kwa Stefani
8Umwene Stefani, umundu uyu aliswile ilipyana namaka, yo alinkupela ifiswigu mfika ifikulumba mbandu. 9Loli bamo aba nnyumba yakwiputilamo, iyi batigi ya bandu ababuke, muno balimo abandu ba nkisu kya Kireni na bankaya ka Aliksandria, naba nkisu kya Kilikia, kangi naba nkisu kya Asia, bo balinkusumuka pakukanikana na Stefani, 10loli balinkusita nukugatola amahala ga Mbepo aga ayobelangamo. 11Popapo balinkubasonga abandu bamo balinkuti mukatigi, “Tumpilike umundu uyu bo ikuyoba amasyu aga kunhelula Mose na Kyala.” 12Bunobuno balinkubasambulania abandu, nabakulumba nabamanyandagilo, bo balinkummotokela Stefani balinkunkola, balinkuntwala nkyeni ndukomano, 13balinkubimika abaketi ba butungulu aba bayobaga batigi, “Umundu yuyuyu atikuleka ukuyoba amasyu ga kupahelula pabuyo ubwikemo ubu, nindagilo sya Mose;” 14buno tumpilike bo ikuyoba ikuti, Yesu gwa nkaya ka Nazareti uyu, isakupangulaga Inyumba inyikemo iyi nukusyandula inyiho isi atupele Mose. 15Lelo bo bandulalile Stefani bosa aba bali ndukomano, balinkwaga ikyeni kyake kili bo kyeni kya gwandumi.
Currently Selected:
IMBOMBO SYA BATUMIGWA 6: NNBII
Highlight
Share
Copy
Want to have your highlights saved across all your devices? Sign up or sign in
BAIBULO INONGWA INUNU © Bible Society of Malawi, 2017.
