IMBOMBO SYA BATUMIGWA 8
8
1Umwene Sauli yo alinkuti, “Bayile apa bangogile.”
Sauli ikukifwima ikipanga
Lelo musi gugo, po bulinkwanda ubufwimigwa ubukulumba nkipanga kya mu Yerusalemu; popapo abitiki bosa balinkubalanila mfisu fya mu Yudai nifya mu Samaria, balinkusyala bene ba batumigwa. 2Abandu abatila-Kyala balinkunsyila Stefani, balinkundilila ifwa ingulumba.
3 #
Imbo 22.4-5; 26.9-11 Umwene Sauli loli alinkulonda ukukyonanga ikipanga, alinkwingila nnyumbannyumba, alinkubakwaba abanyambala nabakikulu nukwakubigalila nnyumba ya bannyololo.
Inongwa Inunu sikufumusigwa nkaya ka Samaria
4Abene loli abitiki aba babalanile kosakosa, bo balinkwembela nkulifumusya ilisyu. 5Umwene Filipu yo alinkusuluka ukubuka nkaya ka Samaria, alinkubafumukisya Kristi abandu ba mumo. 6Ifyene ifilundilo fya bandu filinkupilikisya nindumbula yimoyene kuli isi Filipu ayobaga, filinkupilika nukufibona ifika in apelaga. 7Namanga bingi aba bali nimbepo inyali, balinkwaga sikusoka bo sikukuta fiyo; kangi bingi aba bakokonyele naba bakwemaga balinkubumbuluka itolo. 8Popapo lulinkuyamo ulusekelo ulukulumba nkaya mumo.
9Lelo alimo mumo umundu yumo uyu ali yo Simoni ingamu, yo abombaga amanjele nukubaswigisya abandu ba nkaya ka Samaria, bo ikwiyoba ukuya yo mundu yumo unkulumba; 10abandu bosa nkaya kala abanandi nabakulumba aba bampilikaga, balinkuyoba balinkuti, “Uyu yo yu maka ga Kyala aga bikuti ‘Maka Makulumba.’ ” 11Balinkumpilikisya, papo amasiku ga mingi abaswigisyaga namanjele gake. 12Lelo bo bagitike amasyu ga Filipu, apa alumbililaga Inongwa Inunu sya butwa bwa Kyala ningamu ya Yesu Kristi, popapo balinkosigwa abanyambala nabakikulu. 13Yope na yu Simoni alinkwitika; lelo bo osigwe alinkumumilila Filipu, alinkuswiga bo ikufibona ifika nifiswigu ifikulumba ifi apelaga. 14Abatumigwa aba nkaya ka Yerusalemu balinkupilika ukuti aba nkaya ka Samaria balyambilile ilisyu lya Kyala, po balinkubatumila ba Peteri na Yohani. 15Abene bo basulwike, balinkubasumila ukuti bambililege Mbepo Mwikemo. 16Namanga Mbepo Mwikemo akali ukubasololokela, loli balyokesigwe itolo mungamu ya Ntwa Yesu. 17Popapo Peteri na Yohani balinkubabikapo amaboko, po lelo balinkwambilila Mbepo Mwikemo.
18Umwene Simoni bo asibwene ukuti abandu bikwambilila Mbepo Mwikemo, bo abatumigwa bikubabikapo amaboko, popapo alinkubatwalila indalama ba Peteri na Yohani, 19alinkubabula alinkuti, “Nanine mumbege amaka gagaga, ukuti uyu linga nikumbikapo amaboko, ambililege Mbepo Mwikemo.” 20Umwene Peteri alinkumwamula alinkuti, “Bukaga nindalama syako kubupyutigwa, namanga kwinogona ukukikaba ikyabupi kya Kyala nindalama. 21Ukayamo nakamenya kamo, nalinga ko kayabo kamo, munongwa sisisi, papo indumbula yako yikagoloka nkyeni mwa Kyala. 22Upindukege lelo kububibi bwako bububu, unsumege uNtwa ukuti akuswege inyinogono sya mundumbula yako; 23buno ngubwene ukuti mmyako mo mwiswile inyongo ingali kangi uli ndugoye lwa buniongafu.”
24Umwene Simoni alinkwamula alinkuti, “Amunsumilege yuyumwe kuNtwa, ukuti singanyagaga simo isi muyobile.”
25Abene loli bo balisisimikisye nukuliyoba ilisyu lya Ntwa, popapo Peteri na Yohani balinkugomoka ukubuka mu Yerusalemu. Bo bikwenda munjila balinkulumbilila Inongwa Inunu ntwaya tu twingi utwa nkisu kya Samaria.
Filipu numfule gwa nkisu kya Etiopia
26Popapo ugwandumi gwa Ntwa alinkumbula Filipu alinkuti, “Sumukaga ulabilege kwitongo kunsebo ugu gukusuluka ukufuma nkaya ka Yerusalemu, gukulabila nkaya ka Gaza,” ugu lilino abandu batikwendamo. 27Popapo Filipu alinkusumuka alinkubuka; alinkumbona umundu gwa nkisu kya Etiopia ikwisa, uyu ali mfule, ifumu gwa Kandake umalafyale unkikulu gwa baEtiopia, uyu alindililaga ikyuma kyake kyosa, yo alisile nkaya ka Yerusalemu nkwiputa; 28lilino lelo agomokaga ukubuka kukaya, atugele pigeleti lyake, abalaga buku gwa Yesaya unsololi. 29Popapo Mbepo alinkumbula Filipu alinkuti, “Bukaga segelela, ulongosaniege nigeleti ilyo.” 30Popapo Filipu alinkubopa, alinkupilika bo ikubala buku gwa Yesaya unsololi alinkundalusya alinkuti, “Kali kusyagania isi kubala?” 31Umwene alinkwamula alinkuti, “Po nati nsyaganie bulebule bo nayumo akandingania?” Popapo alinkunsuma Filipu ukuti afyuke, atugasanie nagwe. 32#Yes 53.7-8Loli inongwa iyi abalaga mwa buku yali yo iyi:
“Alongosigwe ukubuka pabubolelo bo yi ng'osi,
bo ka kang'osi aka kikumyeka itolo nkyeni munsenyalusyoya,
bunobuno yope alinkusita nukwinula imilomo gyake.
33Alinkuyweluligwa, balinkunkana nukundongela mbugolofu.
Ywani isakupanga isya luyungu lwake?
Buno ubumi bwake busosigwemo nkisu.”
34Popapo umfule alinkumbula Filipu alinkuti, “Nikukusuma ukuti umbule, Kali unsololi ikumbala ywani papapa? Ikwibala yuyo pamo ikumbala yumo uyungi?” 35Popapo Filipu alinkwanda ukuyoba, ukwanda pabusimbe bububu ukumfumukisya Inongwa Inunu sya Yesu. 36Lelo bo bikwenda munsebo, balinkufika apa galipo amisi; popapo umfule alinkumbula alinkuti, “Keta, amisi galipo apa, fiki fikunganisyaga ukosigwa?”#8.36 Amasimbo gamo gikongelelako: 37 Popapo Filipu alinkumbula alinkuti, “Linga gwitike nindumbula yako yosa, po sibagile.” Umwene alinkwamula alinkuti, “Nikwitika ukuti Yesu Kristi yo yu Mwana gwa Kyala.”
38Popapo umfule yula alinkuyoba ukuti iligeleti lyimege; bo babili, Filipu numfule balinkusuluka mmisi, popapo alinkumosya. 39Lelo bo bikufyuka ukufuma mmisi, Mbepo gwa Ntwa alinkunnyaka Filipu, umwene umfule alinkusita nukumbona kangi, loli alinkwenda itolo injila yake nulusekelo. 40Loli Filipu alinkwakubonekela nkaya ka Azoti, lelo bo ikukinda, alinkufumusya Inongwa Inunu ntwaya tosa ukwakufika nkaya ka Kaisaria.
Currently Selected:
IMBOMBO SYA BATUMIGWA 8: NNBII
Highlight
Share
Copy
Want to have your highlights saved across all your devices? Sign up or sign in
BAIBULO INONGWA INUNU © Bible Society of Malawi, 2017.
