UBWANDILO 16
16
Hagara na Ishimaeli
1Pa kabalilo aka Sarayi, unkasi gwa Abramu alinkusita nukumpapila Abramu nabana nabamo. Umwene Sarayi yo ali nu mbombi gwake unkikulu, ugwa kikolo kya ba Egiputi, uyu ingamu yake ali yo Hagara. 2Popapo Sarayi alinkumbula Abramu alinkuti, “Keta, Untwa anyimile imbapo; bunobuno gwingilege mu mbombi gwangu unkikulu uyu ukuti ayege nkasigo; pamo mo mbagile ukubagilamo abana muli yuyo.” Umwene Abramu alinkugitika amasyu ga Sarayi. Bunobuno bo Abramu agonile ifyinja kalongo nkisu kya Kanani; 3Sarayi unkasi gwake, alinkumwega Hagara umbombi gwake unkikulu, alinkumpa undume Abramu ukuti ayege nkasi. 4Umwene Abramu alinkumwega Hagara, alinkuya nikifuba. Bo Hagara ibwene ukuti ali nikifuba alinkwenda nukunhelula umwehe gwake. 5Popapo Sarayi alinkumbula Abramu alinkuti, “Yo yuyugwe gwe umpelile Hagara ukuti anyasyege une. Nakupele umbombi gwangu ukuti uye nagwe, loli bo ibwene ukuti afinikifuba, po endile nukunhelu la une. Untwa yo ayege ndongi gwitu — ugwe nanine.” 6Loli Abramu alinkumbula Sarayi alinkuti, “Keta umbombi gwako unkikulu uyu ali mmaboko gako; sili mmyako ukumbombela syosa isi gwiganile.” Popapo Sarayi alinkusita nukumpakisya Hagara, bunobuno Hagara alinkwenda nukubopa.
7Ugwandumi gwa Kyala Ntwa linkumwaga Hagara mmatengele, pabupipi ninyibuko ya misi ku njila iyi yikulabila ku buyo bwa Shuru. 8Umwene ugwandumi alinkundalusya alinkuti, “Gwe Hagara, gwe mbombi gwa Sarayi, ufumile kugu? Ukutwaku?” Umwene Hagara alinkuti, “Nikumbopa umwehe gwangu Sarayi.” 9Popapo ugwandumi gwa Ntwa alinkumbula alinkuti, “Gomokelaga ku mwehe gwako ukilambikege itolo kumyake.” 10Popapo ugwandumi yula alinkwandisya alinkumbula Hagara alinkuti, “Nisakubolosyaga aba nduyungu lwako, kangi nayumo atisakufikapo ukubabala.” 11Ugwandumi gwa Ntwa alinkumbula Hagara alinkuti, “Keta, uli nikifuba; kwisakupapaga umwana undumyana; yo gwise umpege ingamu ya Ishimaeli, papo Untwa abubwene ubutolwe bwako. 12Umwanike yuyuyu yo isakuyaga bo yi mbunda ya mmatengele isakulwaga na bandu bosa, kangi na bandu bosa bisakulwanaga nagwe; mbumi bwake bosa isakuyaga gwakukindana na bakamu bake bosa.”
13Bunobuno Hagara alinkumpa ingamu Untwa uyu ayobaga nagwe, alinkuti, “Yo ugwe Kyala uyu ikuketa;”#16.13 Ikuketa: Untwa uyu ikuketa nkiHiburi kokuti “Ele-royi”. namanga inogonaga atigi, “Ngimba naloli numbwene Kyala, kangi ngali ndi mumi?” 14Panongwa yiyiyi alinkuyipa inyibuko yila ingamu ya Beeri-lahayi-royi#16.14 Beeri-lahayi-royi: ko kuti inyibuko ya uyu ikuketa. iyene yili pakati pa kisu kya Kadeshi nu buyo bwa Beredi.
15 #
Gal 4.22
Umwene Hagara alinkumpapila Abramu umwana undumyana. Popapo Abramu alinkumpa ingamu ya Ishimaeli umwana uyu apapile mwa Hagara. 16Abramu ali nifyinja amalongo mahano namatatu (86) lula Hagara ampapege Ishimaeli.
Currently Selected:
UBWANDILO 16: NNBII
Highlight
Share
Copy
Want to have your highlights saved across all your devices? Sign up or sign in
BAIBULO INONGWA INUNU © Bible Society of Malawi, 2017.
