UBWANDILO 17

Ububutigwa kyo kimanyilo kya lufingo

1Bo Abramu agonile ifyinja amalongo mahano na mana, nifyinja fihano na fina (99), Untwa alinkunsetukila, alinkumbula alinkuti, “Yo une Kyala Umwenemaka gosa, gwendege nanine, kangi uyege mpelelesye, 2po nisakufinganaga nanugwe ulufingo, kangi nisakukolosyaga fiyo.”

3Popapo Abramu alinkugundama pasi; umwene Kyala alinkumbula alinkuti, 4“Keta, nikubika ulwitikano pakati pali une nanugwe; ugwe gwisakuyaga gwisabo ku bandu ba fikolo fi fingi. 5#Rom 4.17Lilino po utikubilikiligwaga kangi ingamu ya Abramu, mma, loli kuyaga gwe Abrahamu; papo ngupelile ukuya gwisabo ku bandu ba fikolo fi fingi. 6Nisakukolosyaga fiyo ugwe; kangi ifikolo fya bandu fisakufumaga mmyako ugwe; bope na banyafyale bisakufumaga mmyako. 7#Luk 1.55Nisakumalisya isi nafingile ukumbombela ugwe pamopene naba nduyungu lwako aba bikwisaga panyuma pamyako mungulilo yosa, lo lukuyaga lufingo lwa bwila na bwila; ulwakuti une nisakuyaga Kyala gwako pamopene naba nduyungu lwako aba bisakwisaga panyuma pamyako. 8#Imbo 7.5Ikisu iki ulimo lilino pamopene nikya ba kikolo kya Kanani nisakukupaga ugwe naba nduyungu lwako aba bikwisaga panyuma pamyako, ukuti kiyege kyinu bwila itolo; kangi une nisakuyaga Kyala gwako.”

9Popapo Untwa alinkumbula Abrahamu alinkuti, “Ukumbukege isi nalitikene nanugwe pamopene naba nduyungu lwako aba bikwisaga panyuma pamyako, mungulilo syabo syosa. 10#Imbo 7.8; Rom 4.11Ulwitikano lwangu pakati pali une nanugwe kangi nabanduyungu lwako aba bikwisaga lwakuti: unyambala gwesa nkati myinu yo ise abutigwengeko. 11Mwisakubutigwangako, ukubutigwako kwinu kwisakuyaga kyo kimanyilo kya lwitikano lululu pakati pali une nanumwe. 12Mungulilo syinu syosa kosa akana akanyambala aka linga kafikile pa masiku mahano namatatu aga bukusi, kabutigwengeko, nalinga yo uyu apapigwe nnyumba yako pamo uyu uligwe nindalama ukufuma mbandu abahesya aba bakaya ba nkikolo kyako bo bikubutigwangako bosa bo babili umpapigwa nnyumba yako na uyu uligwe itolo nindalama. 13Bunobuno ulwitikano lwangu lwisakubonekelaga mmibili gyinu, ukuya lwitikano lwa bwila. 14Unyambala gwesa uyu akabutigwako yo bansosyengemo nkati mbandu abanine; papo onangile ulwitikano lwangu.”

15Popapo Kyala alinkumbula Abrahamu alinkuti, “Umwene unkasigo yo ungambilikilaga kangi ingamu ya Sarayi, mma, loli umbilikilege ingamu ya Sara. 16Nisakunsayaga, muli yuyo mo nisakukupelangamo ugwe umwana undumyana. Nisakunsayaga bunobuno isakuyaga yo nnabo gwa fikolo fya bandu; mmyako mo bisakufumaga abalagili ba fisu.” 17Bunobuno lelo Abrahamu alinkugundama pasi, bo ikusinogona alinkuseka mwene itolo alinkuti, “Ngimba naloli abagile ukupapa umwana umundu uyu akangele ali nifyinja mia yumo (100)? Sara uyu lilino ali nifyinja amalongo mahano na mana (90), kali abagile ukupapa umwana!” 18Popapo alinkuyoba kwa Kyala alinkuti, “Pamo linga ukufwana nu lugano lwako gwamwinogonaga Ishimaeli yo loli.” 19Kyala alinkumbula Abrahamu alinkuti, “Mma, loli yu Sara unkasigo yo isakumpapaga umwana undumyana, yo gwise umpege ingamu ya Isaka. Nisakulumalisya ulwitikano lwangu mmyake ukuti luye lwake pamopene naba nduyungu lwake aba bikwisaga kunyuma. 20Mbilike isi gwansumilaga Ishimaeli, nunsayile kangi nisakumolosya, nisakubabasya aba nduyungu lwake, kangi isakuyaga yo gwisabo gwa banyafyale kalongo na babili (12); nisakumpelaga ukuya kikolo ikikulumba. 21Loli nisakumalikisyaga ulufingo lwangu mwa Isaka, uyu Sara unkasigo isakukupapilaga nkyinja iki kikwisaga pa kabalilo kakaka.”

22Umwene Kyala bo amalile ukuyoba, alinkundeka Abrahamu alinkufyuka kumwanya. 23Mwisiku lilyo, Abrahamu alinkumwega Ishimaeli umwanake, na batumwa bosa aba bapapiligwe nnyumba yake, pamopene naba balyuligwe nindalama kangi nu nnyambala gwesa uyu alimo nkati mbandu aba bali nnyumba yake Abrahamu, alinkwakubabutako ku kyeni bomumo Kyala gwake alindagilile. 24Abrahamu ali gwa fyinja amalongo mahano na mana nifyinja fihano na fina (99), lula abutigwengeko. 25Yope na Ishimaeli, umwanake, ali nifyinja kalongo na fitatu (13), lula abutigwengeko. 26Bo babili bababa Abrahamu nu mwanake Ishimaeli balinkubutigwako mwisiku lililyo; 27pamopene na banyambala bosa aba bapapiligwe nnyumba yake, na babo balyuligwe nindalama ukufuma ku bandu abahesya, bope balinkubutigwako palikimo na Abrahamu.

Currently Selected:

UBWANDILO 17: NNBII

Highlight

Copy