UBWANDILO 21

Ukupapigwa kwa Isaka

1Popapo Untwa alinkumpakisya Sara bo mumo ayobile, alinkumbombela isi afingile, 2#Hib 11.11Sara alinkuya nikifuba, alinkumpapila Abrahamu umwana undumyana mbukangale bwake pa pakabalilo kako Kyala ayobile. 3Umwene umwana uyu Sara alimpapile Abrahamu, yo ugwise alinkumpa ingamu ya Isaka.#21.3 Isaka: ko kuti ikuseka. 4#Bwa 17.12; Imbo 7.8Abrahamu alinkumbutako kukyeni umwanake Isaka bo ali na masiku mahano namatatu (8), bo mumo Kyala alindagilile. 5Umwene Abrahamu yo ali gwa fyinja mia yumo (100) apa umwanake Isaka apapigwege. 6Sara alinkuti, “Kyala ambele une imbela seko; gwesa uyu ikupilika isakusekaga panongwa yangu,” 7kangi alinkuti, “Kali ywani uyu abagile ukuyoba kwa Abrahamu ukuti, ‘Sara isakongesya abana?’ Po bule, numpapile umwana undumyana mbukangale bwake.”

8Umwene umwanike alinkukula, popapo balinkundekesya amabele; pisiku lilyo Abrahamu alinkupiya ifyakulya fya lusekelo.

Hagara na Ishimaeli bikukagigwa

9Sara alinkumbona Isaka ikwangala nu Ishimaeli umwana uyu Hagara umw'Egiputi yula alimpapile Abrahamu. 10#Gal 4.29-30Bo asibwene sisisi, alinkumbula Abrahamu alinkuti, “Unkage unkikulu untumwa uyu pamopene nu mwanake; namanga umwana gwa nkikulu untumwa uyu atisakwingilanila ikilingo nu mwanangu Isaka.” 11Sisisi syo silinkusita nukunsekesya Abrahamu panongwa ya mwanake. 12#Rom 9.7; Hib 11.18Loli Kyala alinkumbula Abrahamu alinkuti, “Ungasulumaniaga panongwa ya mwanike na panongwa ya nkasigo untumwa yula; syosa isi linga Sara ikuyoba syo usibombege itolo bo mumo ikukubulila, buno mo mwa Isaka muno aba nduyungu lwako bisakuyobeligwaga. 13Yope na yu mwana gwa nkikulu untumwa uyu nisakumpelaga ukuya kikolo kya bandu, papo yope gwa nduyungu lwako.” 14Popapo Abrahamu alinkusumuka nulubunjubunju, alinkwega ifyakulya nulupale lwa misi, alinkumpa Hagara, kangi alinkumbika umwana pa fibega fya Hagara, alinkuntuma ukuti abukege. Umwene Hagara alinkubuka, alinkwembela mmatengele ga ku Berisheba.

15Bo amisi gamalike ndupale, Hagara alinkundeka umwanike musi mu mpiki. 16Popapo umwene alinkutandamalapo alinkwakwitugasya pasi ukufwana nu ntambo ugu untipulo gukwendela linga balasile; alinkuningana numwanake papo atigi, “Ndikulonda ukunketa umwanike bo ikufwa.” Bo Hagara itugele aningene numwana, popapo umwanike alinkulila fiyo. Kyala alinkupilika inguto ya mwanike; bunobuno ugwandumi gwa Kyala alinkunkolela Hagara ukufuma kumwanya alinkuti, “Gwe Hagara, fyo fiki ifi fikukutamya? 17Ungatilaga, buno Kyala apilike bo umwana ikulila apa undamba like. 18Sumuka, umpimbe umwanike, umpagate; buno nisakumpelaga ukuya kikolo ikikulumba.” 19Popapo Kyala alinkumwigula Hagara amaso alinkukibona ikisiba kya misi; alinkubuka, alinkwakwisusya amisi ndupale lwake, alinkumpa umwanike amisi, alinkunwa. 20Umwene Kyala alinkunsaya umwanike, alinkukula; alinkwitugala mmatengele, kangi alinkuya mmaganyi pakubombela ubupindo. 21Alinkwitugala mmatengele ga Parani; unna alinkwakumwegela unkikulu ukufuma nkisu kya Egiputi.

Ulufingo pakati pa Abrahamu nu Abimeleki

22 # Bwa 26.26 Pa kabalilo kalakala bo Abimeleki pamopene na Fikolo, undongosi unkulumba gwa bwite bwake, balinkumbula Abrahamu balinkuti, “Kyala akusayile ugwe muli syosa isi kubomba. 23Loli nikuti ufingege ulufingo kumyangu mu ngamu ya Kyala, ukuti utisakunsyobamo une, nalinga bo banangu, pamo aba nduyungu lwangu. Bo mumo une ngubombile bwila isya busubiligwa, momumo nanugwe gwise umbombelege une, kangi nikisu iki ukuponelamo lilino.” 24Abrahamu alinkuti, “Ena ngufinga.”

25Bo Abrahamu ikwibubusya nisya kisiba kya misi, iki ababombi ba Abimeleki bapokile kumyake, 26Abimeleki alinkuti, “Ngammanya uyu asibombile sisisi. Syo ukambulamo siku sisisi kangi ngasipilikamo siku ukwisakufika umusyugu.” 27Bunobuno Abrahamu alinkwegapo ing'osi simo ni ng'ombe alinkumpa Abimeleki, popapo abandu babili bababa balinkufinga ulufingo. 28Abrahamu alinkumbika pasima utwana twa ng'osi tuhano na tubili ukufuma mu ntimo gwake. 29Popapo Abimeleki alinkundalusya Abrahamu alinkuti, “Syo sikusanusya fiki apa utubikile pasima utwana twa ng'osi uto tuhano na tubili?” Umwene Abrahamu alinkwamula alinkuti, 30“Natigi gwambilile utwana twa ng'osi utu ukufuma kumyangu, ukuti to twipelege ukuya busimiki kumyangu ubwakuti, Youne nakumbile ikisiba iki.” 31Po apa ubuyo bula balinkubupa ingamu ya Berisheba, panongwa yakuti po apa bosa bo babili bafingene ulufingo. 32Bunobuno balinkufinga ulufingo pa kaya ka Berisheba. Abimeleki na Fikolo, undongosi unkulumba gwa bwite bwake balinkubuka, bo bafingile ulufingo, balinkugomokela ku kisu kya baFilisiti. 33Abrahamu alinkubyalapo umpiki umpandapanda pa buyo bwa Berisheba, alinkwiputa ku Ntwa Kyala uyu aliko bwila. 34Umwene Abrahamu alinkuya mponi nkisu kya baFilisiti amasiku ga mingi.

Currently Selected:

UBWANDILO 21: NNBII

Highlight

Copy