UBWANDILO 26

Isaka ali nkaya ka Gerara ku kibafu kya Biyere-sheba

1Lilino lelo yilinkugwa injala nkisu, bo mumo yagwilile ulutasi lula nkabalilo ka Abrahamu. Popapo Isaka alinkusama ukubuka ku kaya ka Gerara, kwa Abimeleki umalafyale gwa kikolo kya baFilisiti. 2Umwene Untwa alinkunsetukila Isaka, alinkumbula alinkuti, “Komma ukwikilila ukubuka nkisu kya Egiputi; gwitugalege nkisu iki nikukubulaga yuyune. 3#Bwa 22.16-18Lilino uyege mponi nkisu kikiki, une nikuyaga nanugwe, kangi nikukusayaga; namanga nisakukupaga ugwe pamopene na ba nduyungu lwako ifisu fyosa fififi. Nisakumalisyaga ulufingo lwangu ulu nafingene nuguso Abrahamu, 4nikubolosyaga aba nduyungu lwako bisakuyaga bo si ndondwa sya kumwanya, kangi nisakubapaga ifisu fyosa fififi. Nifikolo fyosa ifya bandu ba nkisu fisakusayiligwaga mmyabo; 5papo Abrahamu angindikaga une nukukonga indagilo syangu, kangi ni ngomelesyo syangu.”

6Popapo Isaka alinkwitugala nkaya ka Gerara. 7#Bwa 12.13; 20.2Bo abandu ba nkaya kala bikundalusya isya nkasi gwake, umwene alikubamula alinkuti, “Uyu yo ilumbu gwangu.” Namanga atilaga ukubabula ukuti yo nkasi gwangu; alinkwinogona ukuti pamo lumo bisakungoga panongwa ya Rebeka; unkikulu yuyuyu ali mmogi fiyo pakunketa. 8Bo Isaka agonilemo fiyo nkaya kalakala, Abimeleki, umalafyale gwa baFilisiti, alinkuketa pasi ukufuma pi bwindo, alinkumbona Isaka ikukinakina na Rebeka unkasi gwake. 9Popapo Abimeleki alinkumbilikila Isaka alinkumbula alinkuti, “Keta, uyu yo yu nkasi gwako naloli! Nongwa ya fiki gwayobaga ukuti, uyu yo ilumbu gwako?” Umwene Isaka alinkumwamula alinkuti, “Papo ninogonaga ukuti lumo bisakungoga linga mbabulile ukuti nkasi gwangu.” 10Abimeleki alinkuti, “Syo nongwangi isi utubombile uswe? Keta, lumo angali amwegile yumo nkati mbandu bangu po lelo twayaga ninongwa.” 11Bunobuno lelo, Abimeleki alinkubasoka abandu bosa alinkuti, “Uyu linga ambombile simo imbibi umundu uyu, pamo unkasi gwake, isakugogigwaga naloli.”

12Popapo Isaka alinkulima imigunda nkisu kila, alinkufyaga ifyakulya iyingi fiyo nkyinja kilakila. 13Umwene Untwa alinkunsaya Isaka, alinkuya nkabi, abuya aya nifyuma ifyingi fiyo. 14Alinkuya ni mbene ni ng'ombe kangi na bambombo ba bingi, popapo aba kikolo kya baFilisiti balinkuya nakabini kumyake. 15Balinkwisusya numfu ifisiba fyake ifi bakumbile ababombi ba Abrahamu ugwise, bo akali mumi. 16Popapo umwene Abimeleki alinkumbula Isaka alinkuti, “Sokamo mmyitu muno, papo uli gwa maka fiyo ukutukinda uswe.”

17Bunobuno Isaka alinkwepukamo, alinkwakuyenga amatembe gake mu ntebela gwa Gerara alinkwitugala mumo. 18Alinkufula kangi ifisiba fya misi ifi fyakumbigwe mmasiku ga gwise Abrahamu; namanga abaFilisiti bafikamwisye bo afwile Abrahamu; umwene Isaka alinkufipa ifisiba fila ingamu sisyo ugwise afipele mbwandilo. 19Loli bo ababombi ba Isaka bikufula mu ntebela balinkuyaga inyibuko pasi. 20Popapo abatimi ba nkisu kya Gerara balinkwanda ukulwana na batimi ba Isaka balinkuti, “Amisi aga gitu.” Umwene Isaka alinkukipa ikisiba kila ingamu ya Eseke, papo abandu balwanaga nagwe.

21Ababombi ba Isaka balinkukumba ikisiba ikinine, loli balinkulwilanila kyope; bunobuno kyope alinkukipa ingamu ya Sitina. 22Alinkusokako kula, alinkwakukumba ikisiba ikinine, pali iki po palinkusita nukuyapo ukulwana, bunobuno alinkwenda nukukipa ingamu ya Rehoboti, alinkuti, “Papo Untwa atupele ubuyo, lilino po tukolokaga nkisu.”

23Isaka bo asamile pa buyo bula, alinkufyuka kulubafu lwa ku Berisheba. 24Popapo Untwa alinkunsetukila ikilo kikyo alinkuti, “Yo une Kyala gwa guso Abrahamu; ungatetemaga, buno ndi nanugwe. Nisakukusaya kangi nukubolosya aba nduyungu lwako, panongwa ya mbombi gwangu Abrahamu.” 25Popapo Isaka alinkwenda nukuyengapo ikigemo kyakwikemekesyapo, alinkumpa Kyala ilikemo, alinkuti ni hema yake alinkuyenga papo. Ababombi ba Isaka balinkukumba ikisiba palapala.

Ilagano pakati pa Isaka na Abimeleki

26 # Bwa 21.22 Popapo Abimeleki alinkwisa kukunketa Isaka ukufuma nkaya ka Gerara, alinkulongosania na Ahuzati untuli gwake, na Fikolo undongosi unkulumba gwa bwite bwake. 27Umwene Isaka alinkubalalusya alinkuti, “Ngimba mubingilile fiki kuno? Keta, mwalimbengile une, kangi mwalingagile kumyinu?” 28Abene balinkuti, “Tusyagenie fiyo isyakuti, Untwa ali nanugwe, tukulonda ukuti, ufinge ulufingo ulwakuti, utisakutubombelamo simo isya bulugu, 29bo mumo nanuswe tukakubombelamo simo isya bulugu, loli tulinkukubombela si nunu ndupu kangi tulinkukusindikila ndutengano. Lilino yogwe mundu uyu Kyala ansayile.” 30Popapo Isaka alinkubapiyila ifindu fya palusekelo balinkulya nukunwa. 31Balinkusumuka nulubunju fiyo, Isaka na Abimeleki, balinkufinga ulufingo uyu kumwinake uyu kumwinake. Umwene Isaka alinkubasindikila, balinkulekana ndutengano itolo. 32Mwisiku lilyo po ababombi ba Isaka balinkwisa balinkumbula isya kisiba iki bakumbile, balinkuti, “Tugagile amisi.” 33Umwene alinkukipa ikisiba kila ingamu ya “Sheba;” yo nongwa iyi na ku lilino kuno ingamu ya kaya kala yo Berisheba.

Abakasi ba Esau aba mfikolo ifihesya

34Bo Esau ali nifyinja amalongo mana (40), alinkumwega Yudifi umwana gwa Beyeeri ugwa nkikolo kya baHiti, ukuya nkasi gwake, kangi alinkumwega Basemati, umwana gwa Eleni, ugwa kikolo kya baHiti. 35Abakikulu bababa balinkumpelela fiyo ubusulumanie Isaka nu nkasi gwake Rebeka.

Currently Selected:

UBWANDILO 26: NNBII

Highlight

Copy