UBWANDILO 25

Abanduyungu lwa Abrahamu aba bafumile mu nkasi gwake Ketura

(1 Syambu 1.32-33)

1Abrahamu alinkwega unkikulu uyungi, ingamu yake ali yo Ketura. 2Yo alinkumpapila abana aba: Zimurani, Yokushani, Medani, Midiani, Ishibake na Shuwa. 3Yokushani alinkumpapa Sheba na Dedani. Abana ba Dedani bo aba: Ashuru, Letushu na Leumi. 4Abana ba Midiani bali bo aba: Efa, Eferi, Hanoki, Abida na Elida. Bosa bababa bali bana ba Ketura. 5Umwene Abrahamu yo alimpele Isaka fyosa ifyuma ifi akabile. 6Loli bo akali nukufwa alinkubapa ifyabupe abanake aba bapapigwe mbakasi bake aba mbutitu. Kangi alinkubatuma ku kisu kya ku busokelo ilisuba kubutali nu mwanake Isaka.

Ukufwa nu kusyiligwa kwa Abrahamu

7Umwene Abrahamu alinkugona ifyinja mia yumo, namalongo mahano namabili, kangi nifyinja fihano (175). 8Popapo alinkubakonga abakamu bake, alinkufwa bo akangele fiyo. 9Abanake babili, Isaka nu Ishimaeli balinkunsyila ugwisabo mu mbako ya pa Makipela, mu ngunda gwa Efroni umwana gwa Zohara, ugwa kikolo kya baHiti, ku busokelo ilisuba kwa kaya ka Mamure; 10#Bwa 23.3-16go gu ngunda ugu Abrahamu alyulile ku baHiti. Pa buyo bulabula po balinkusyila Abrahamu pabupipi na apa balinsyilile Sara unkasi gwake. 11Lelo bo afwile Abrahamu, Kyala alinkunsaya umwanake Isaka apa itugalaga pabuyo bwa Biyere-lahayiroyi.

Aba nduyungu lwa Ishimaeli

(1 Syambu 1.28-31)

12Aba bo bandu banduyungu lwa Ishimaeli, umwana gwa Abrahamu uyu apapigwe mwa Hagara, unkikulu untumwa gwa Sara, ugwa kikolo kya baEgiputi. 13Isi syo ngamu sya bana ba Ishimaeli, ukufwana na mumo bakonganile nkupapigwa kwabo: Nebayoti, yo gwakipanda gwa Ishimaeli, Kedara, Adibeli, Mibisami, 14Mishima, Dumba, Masa; 15Hadada, Tema, Yeturi, Nafishi na Kedama. 16Bababa bo bana ba Ishimaeli. Muli bababa mo syafumile ingamu sya twaya twabo na malinga gabo, abanyafyale kalongo na babili (12), pamopene nifikilo fyabo. 17Ishimaeli agonile ifyinja mia yumo, namalongo matatu, kangi nifyinja fihano na fibili (137); popapo alinkubakonga abakamu bake, alinkufwa. 18Abanake balinkuyenga ukwanda nkisu kya Havila ukwakufika nkisu kya Shuru, iki kiningene nikisu kya Egiputi, kulubafu lwa kisu kya Asiria. Umundu gwesa alinkuyenga mwene ukuningana na bakamu bake.

Ukupapigwa kwa Esau na Yakobu

19Aba bo ba nduyungu lwa Isaka, umwana gwa Abrahamu. 20Abrahamu alinkumpapa Isaka, umwene Isaka ali nifyinja amalongo mana (40), lula amwegege Rebeka undindwana yula umwana gwa Betuweli, ugwa kikolo kya Aramu nkisu kya Padani-aramu, uyu ali ilumbu gwa Labani, ugwa kikolo kya Aramu. 21Popapo Isaka alinkumwiputila unkasi gwake ku Ntwa; namanga ali ngumba. Umwene Untwa alinkupilika Ulwiputo lwake, popapo Rebeka unkasi gwake alinkuya nikifuba. 22Loli abana balinkulwana munda mmyake; umwene alinkuti, “Linga sili bo bunobuno, po nongwa ya fiki nati nendelelege ukuya mumi?” 23#Rom 9.12Popapo alinkubuka nukwakulalusya ku Ntwa. Umwene Untwa alinkumwamula alinkuti,

“Ikifuba ikyo uli nakyo filimo ifikolo fya bandu fibili,

kangi abandu babili aba bisakupapigwaga mmyako bisakulwanaga.

Yumo isakuya gwa maka ukunkinda unnine,

kangi unkulumba yo isakuya gwakumbombela unnandi.”

24Bo kafikile akabalilo kakupapila balinkwaga balimo abana aba mbasa babili, nkifuba kila. 25Ugwakwanda ukusoka ali nkesefu mu mbili gwake gosa alinkuya bo gu mwenda gwa busyoya; bunobuno balinkumpa ingamu ya Esau. 26Panyuma po alinkusoka unnuguna gwake, balinkwaga ikiboko kyake kikolile ikitende kya Esau, balinkumpa ingamu ya Yakobu. Isaka ali nifyinja amalongo mahano nalimo (60), akabalilo kala Rebeka apapilege abana aba.

Esau ikulisya ubukulumba bwake

27Lelo bo bakulile abalumyana bababa, Esau alinkuya mundu mfwimi fiyo umundu uyu bwila alindaga mmatengele. Umwene Yakobu loli yo ali mundu untengamoyo, bwila alinkuya pa pakaya. 28Isaka alinganile Esau, papo bwila alyaga inyama iyi amfwimilaga. Loli Rebeka yo alinganile Yakobu.

29Lumo lelo bo Yakobu ikupiya ikifuge, Esau alinkwenda nukufika bo afumile nkufwima mmatengele. Injala yilinkunduma fiyo. 30Popapo alinkunsuma Yakobu alinkuti, “Mfwile injala, oko, ndyepo ikifuge iki kikeselile,” yo nongwa iyi balimpele ingamu ya Edomu. 31Umwene Yakobu alinkwamula alinkuti, “Umbepo ubwakipanda bwako ukuti tusanie.” 32Esau alinkuti, “Keta, ndipipi nukufwa ni njala, ubwene ubwakipanda bo bukumbumbulilaga fiki?” 33#Hib 12.16Yakobu alinkuti, “Ufinge tasi kumyangu, uyobe ukuti umbele une ubwakipanda bwako.” Popapo Esau alinkufinga, nukulisya ubwakipanda bwake kwa Yakobu. 34Po lelo Yakobu alinkumpa Esau ikifuge kya nandala alinkulya nukunwa amisi, popapo alinkusumuka alinkubuka. Mo muno Esau abuywelulile ubwakipanda bwake.

Currently Selected:

UBWANDILO 25: NNBII

Highlight

Copy