UBWANDILO 24

Isya bwegi bwa Isaka

1Pa kabalilo aka Abrahamu akangele fiyo, Untwa alinsayile mu njila syosa. 2Popapo Abrahamu alinkuyoba ku mbombi gwake unkulumba, uyu ali mweneleli gwa fyosa ifi ali nafyo, alinkuti, “Mbapo ulobe lwako, ufinge ulufingo nkyeni mu Ntwa Kyala ugwa kumwanya na pasi apa ukuti, 3utisa kwakumwegela umwanangu unkikulu umfuma mbakikulu ba nkisu kya baKanani. 4Loli ufinge ukuti gwisakubukaga ku kisu kyitu, ku bakamu bitu, ko kwakumwegelaga unkikulu umwanangu Isaka.” 5Popapo umbombi gwake alinkwamula alinkuti, “Bule, linga unkikulu ayile kukana ukwisa nanine ku kisu iki, ngimba ngabukege nu mwanako ku kisu kilakila gwafumileko?” 6Umwene Abrahamu alinkwamula alinkuti, “Ungisakusulwa unkuntwala umwanangu ku kisu kila. 7Untwa Kyala gwa kumwanya, uyu alinyegile une ukufuma nnyumba ya tata na nkisu iki napapigwemo, uyu afingile ulufingo kumyangu ukuti, ‘Nisakubapaga aba nduyungu lwako ikisu iki,’ yo isakukutumilaga ugwandumi gwake ugwa kukulongolela ugwe nkyeni, bunobuno kwakumwegela unkikulu umwanangu ukufuma kulakula.

8“Loli linga unkikulu atikulonda ukwisa nanugwe kuno, bo uli mwabuke ku lufingo lwangu ulu; umwene umwanangu yo ungantwalaga kula.” 9Popapo umbombi yula alinkugolosya ulobe lwake nukufingana ulufingo na Abrahamu bo mumo alimbulile.

10Popapo lelo umbombi gwa Abrahamu alinkusumuka ukubuka, alinkwegapo ingamila sya malafyale gwake kalongo, kangi nifyabupe fi fingi itolo ukufuma ku malafyale gwake. Popapo alinkubuka ku kisu kya Mesopotamia, nkaya ka Nahori. 11Lelo bo bayile kufika nkabalilo ka mayolo aka abakikulu bikunegela amisi, popapo alinkusifugamisya ingamila ukuti situsye pa bupipi ni kisiba kunja kwa kaya kala. 12Popapo alinkwiputa alinkuti, “Gwe Ntwa, gwe Kyala gwa malafyale gwangu Abrahamu, nikukusuma ukuti umbege ubununu umusyugu, uliyaga nipyana ku malafyale gwangu Abrahamu. 13Keta nimile pa kisiba iki apa abana abalindwana ba bandu ba nkaya aka bikwisa kukunega amisi. 14Linga nguyoba nagwe yumo undindwana ukuti, ‘Oko, nnwemo gamo amisi mu ndeko yako,’ lelo umwene ikuyoba ikuti, ‘Ele nwapo, kangi nikusinwesyaga na si ngamila syako;’ ngwiputa ukuti yo ise ayege yo yuyo umpele umundu gwako Isaka. Muli sisisi mo nikumanyilaga ukuti unangisye ulugano lwako ku malafyale gwangu.”

15Lelo bo akali ikwiputa, alinkunyomoka Rebeka ikwisa itwikile indeko ya misi. Umwene Rebeka yo ali mwana gwa Betuweli umwana gwa Milika unkasi gwa Nahori unnuguna gwa Abrahamu. 16Rebeka ali ndindwana ummogi fiyo, unsitakummanyamo nu nyambala, alinkusuluka nkisiba alinkunegela amisi mu ndeko yake. 17Mbibimbibi itolo umbombi gwa Abrahamu alinkusegelela ku ndindwana yula alinkunsuma alinkuti, “Uli mbapo gamo amisi ga mu ndeko yako ukuti nnwe?” 18Umwene undindwana alinkwamula alinkuti, “Ele isaga unwe tata,” popapo mbibimbibi itolo Rebeka alinkwenda nukusulusya indeko yake ukufuma pantu, alinkuyikola mmaboko bo umundu yula ikunwa. 19Lelo bo anwile popapo Rebeka alinkuti, “Ngusinegelaga syosa na si ngamile syako sibuye sifwane.” 20Nakalinga itolo Rebeka alinkukusya amisi muno syanwelaga ingamila, alinkugomokela kangi nkisiba nkunega amisi agangi, syabuya syafwana syosa. 21Umwene umbombi gwa Abrahamu alinkuketa kimyemye itolo ukuti asimanye na mumo Untwa ikuya pakuntulila.

22Umwene Rebeka bo asinwesisye ingamila amisi, popapo unyambala yula alinkusakula ulundandati lwa golide ulwa busito bwa hafu gwa shekeli#24.22 Shekeli: shekeli kali kalutalama ka baYuda akanandi fiyo. kangi nutukuba twa golide tubili utwa mmaboko utu ubusito bwake bwali pa mashekeli gwa golide kalongo, alinkumfwika Rebeka.

23Popapo alinkundalusya Rebeka alinkuti, “Uli mwana gwani? Ngimba bulimo ubugono nnyumba ya guso ukuti mo tukagone?” 24Umwene undindwana alinkwamula alinkuti, “Une ndi mwana gwa Betuweli, uyu apapigwe mwa Milika unkasi gwa Nahori; ubugono bulimo nnyumba ya tata;” 25kangi alinkuti, “Liliko ilisu palikimo nifyakulya fya ngamila syako.” 26Popapo umundu yula alinkufugama pasi alinkwiputa ku Ntwa, alinkuti, 27“Atufigwege Untwa Kyala gwa malafyale gwangu Abrahamu uyu akibwamo siku ulugano lwake nubusubiligwa bwake ku malafyale gwangu Abrahamu. Untwa andongwisye bununu butupu nukwisa kumfikisya ku nyumba ya gwamyabo gwa malafyale gwangu.”

28Lelo popapo undindwana yula alinkubopa ukubuka ka nnyumba ya nna, alinkubabula syosa isi syabonike. Alinkubanangisya nu nnyololo ugu amfwikile mmakosi nutukuba mmaboko. 29-30Rebeka ali nagwe ilumbu uyu ingamu yake ali yo Labani, umwene Labani bo alubwene ulundandati ulu Rebeka afwele pamopene nutukuba twa mmaboko kangi bo apilike Rebeka ikupanga nisya mundu unhesya yula, popapo alinkubopa ukubuka ku kisiba kuno aliko umundu yula. 31Alinkwakumbula alinkuti, “Gwe nsayigwa gwa Ntwa, tubuke ku kaya, gwitugele ki kuno kunja kwa kaya bo tuli nayo inyumba yakugonamo ugwe kangi na singamila syako?” 32Popapo umundu yula alinkwitika ukubuka ku nyumba. Labani alinkusyabula imbunda, alinkusipa ilisu kangi nifyakulya ilingi, alinkutwala na misi gakusugusula mmalundi umundu yula pamopene naba ali nabo. 33Lelo bo bantegelekisye ifyakulya alinkubabula alinkuti, “Ndisakulya mma, mbuye njobe tasi inongwa isi mbingilile kuno,” umwene Labani alinkuti, “Oko, yobaga.”

34Popapo alinkubabula alinkuti, “Une ndi mbombi gwa Abrahamu. 35Untwa ansayile fiyo umalafyale gwangu, bunobuno mundu nkabi naloli, Kyala ampele imitimo gya ng'osi nigya ng'ombe, ampele indalama sya siliva nisya golide, na babombi abanyambala na bakikulu, kangi ningamila nimbunda. 36Yope na Sara unkasi ampapile umalafyale gwangu Abrahamu umwana undumyana mbukangale, uyu ampele fyosa ukuti fiyege mmaboko gake. 37Lelo umalafyale gwangu alinyingisye une ndufingo alinkuti, ‘Finga ulufingo, ukuti utisa kumwegela umwanangu unkikulu uyu afumile mbalindwana ba nkikolo kya baKanani muno njengile; 38loli gwise ubukege ku ba nkikolo kya tata, ku bakamu bitu, ko ukamwegele unkikulu umwanangu.’ 39Popapo une ndikuyoba ku malafyale gwangu ndikuti, ‘Bule linga ikwakukana ukwisa nanine kuno?’ 40Umwene alinkumbula alinkuti, ‘Untwa uyu ngwenda bwila nkyeni mmyake isakukutumila ugwandumi gwake, yo isakuyipelelaga injila yako ukuya nunu, bunobuno kwakumwegela umwanangu unkikulu umfuma mbamyitu kangi ugwa nkikolo kya batata. 41Bunobuno kwisakuyaga mwabuke ku lufingo lwangu linga ubukile kubakamu bangu lelo abene bakanile ukukupa unkikulu, po ugwe kwisakuyaga mwabuke ku lufingo lwangu lululu.’

42“Umusyugu bo mfikile pa kisiba pala, po ndikwiputa ndikuti, ‘Gwe Ntwa gwe Kyala gwa malafyale gwangu Abrahamu, uli ndula ukuti injila yangu iyi yiye nnunu. 43Keta nimile pa kisiba kya misi apa; po lelo linga undindwana yumo ikwisa kukunega amisi, nunsumege ukuti, “Nnwemo gamo amisi mu ndeko yako.” 44Po lelo linga umwene ikuti, “Nwapo, syope na singamila syako nikusinegelaga,” nikwiputa ukuti ayege yo yu nkikulu uyu umpele umwana gwa malafyale gwangu.’ 45Lelo bo ngali nukumalisya Ukwiputa mu ndumbula yangu, ndinkunyomoka Rebeka ikusoka nkaya ikwisa kukunega amisi, itwikile indeko yake; bo asulwike nkisiba anegile amisi, popapo ndinkunsuma ndikuti, ‘Ulimbapo gamo amisi nnwe.’ 46Mbibimbibi itolo alinkusulusya indeko yake ukufuma pantu alinkuti, ‘Ele nwapo, syope ni ngamila silinkunwa.’ 47Ndinkundalusya undindwana ndikuti, ‘Uli mwana gwani?’ Umwene alinkwamula alinkuti, ‘Ndi mwana gwa Betuweli uyu apapigwe mwa Milika unkasi gwa Nahori.’ Popapo ndinkwenda nukumfwika ulundandati kangi nutukuba twa mmaboko. 48Ndinkufugamo pasi ndikwiputa ku Ntwa, ndi kupala Untwa Kyala gwa malafyale gwangu Abrahamu, uyu andongwisye une mu njila inunu ukuti nise numwege unkikulu uyu afumile mbakamu ba malafyale gwangu, ukuti yo ayege nkasi gwa mwanake.” 49Bo amalile ukubabula syosa sisisi, po alinkubalalusya alinkuti, “Lilino lelo, linga mugambilile amasyu ga malafyale gwangu mbusubiligwa na mbwanaloli, po mumbulege, pope linga mutikugambilila mumbule, ko kuti mbukege kubungi.” 50Popapo Labani na Betuweli balinkumwamula umbombi gwa Abrahamu balinkuti, “Inongwa isi sifumile ku ku Ntwa; bunobuno tukabagila ukuyobapo simo kumyako, amasyu amabibi pamo amanunu. 51Keta, Rebeka yope alipo papapa, bukaga nagwe akayege nkasi gwa mwana gwa malafyale gwako bo mumo ayobile Untwa.”

52Umwene lelo umbombi gwa Abrahamu bo apilike amasyu gagaga, popapo alinkugwa ulupi nkyeni mu Ntwa. 53Alinkusakula inyambo sya siliva nisya golide ni myenda fyo alinkumpa Rebeka; umwene ulilumbu nunna bo alinkubapa ifyabupe ifya ntengo gwa pamwanya. 54Popapo lelo umbombi gwa Abrahamu yula pamopene naba ali nabo balinkuti nukulya ifindu fila nukunwa, balinkugona papo. Lelo bo alembwike nulubunju, alinkubabula alinkuti, “Lilino nsumwike ku malafyale gwangu.” 55Ulilumbu gwa ndindwana pamopene nunna balinkumbula balinkuti, “Uleke tasi undindwana agonepo amasiku gamo nalinga gaye kalongo, po lelo gwise ubukege nagwe.” 56Loli umbombi gwa Abrahamu yula alinkwamula alinkuti, “Mma, mungangabisyaga, buno Untwa ayipelile injila yangu ukuya nnunu, ngubasuma ukuti mbukege ku malafyale gwangu.” 57Abene balinkuti, “Oko, tumbilikile undindwana tupilike isi ali nasyo,” balinkumbilikila Rebeka, balinkundalusya balinkuti, 58“Bule ngimba gwiganile ukubuka nu mundu uyu?” Umwene Rebeka alinkwamula alinkuti, “Ena, niganile.” 59Popapo lelo balinkumwitikisya ilumbu gwabo Rebeka ukuti amwege untuli gwake abukege nu mbombi gwa Abrahamu pamopene na bandu aba ali nabo. 60Balinkunsaya Rebeka balinkuti, “Gwe ilumbu gwitu ubukege ukipelege ukuya nnabo gwa bandu aba elifu ba bingi itolo, abanduyungu lwako bise babatolege abalugu babo.” 61Bunobuno lelo Rebeka pamopene na batuli bake balinkusumuka ukubuka, balinkwitoga pa ngamila nukunkonga umundu yula. Umwene umbombi gwa Abrahamu yula alinkumwega Rebeka, alinkusumuka ukubuka.

62Pa kabalilo aka, Isaka afikaga itolo ukufuma ku buyo bwa Beeri-lahayi-royi, alinkwitugala ku lubafu lwa kwitongo. 63Umwene Isaka alinkusumuka ukubuka mmigunda na kamayolo. Lelo bo ikuketa, alinkunyomoke ingamila sikwisa pabutalipo. 64Yope Rebeka bo ikuti ngete alinkumbona Isaka, nakalinga itolo alinkwika pa ngamila; 65alinkundalusya umbombi yula alinkuti, “Ywani umundu yula ikwenda mmigunda, ikwisa pakwaganila nanuswe?” Umwene umbombi gwa Abrahamu alinkuti, “Yo yu malafyale gwangu.” Popapo Rebeka alinkwega umwenda gwake alinkwikinga. 66Popapo umbombi yula alinkumpangila Isaka syosa isi asibombile. 67Popapo lelo Isaka alinkumwingisya Rebeka mu hema yake alinkuya nkasi gwake. Isaka alinganile Rebeka, bunobuno alinkunsubisya bo unna afwile.

Currently Selected:

UBWANDILO 24: NNBII

Highlight

Copy