UBWANDILO 23

Ifwa ya Sara Abrahamu ikula ikisu kyakunsilapo

1Umwene Sara alinkugona ifyinja mia yumo na malongo mabili, kangi nifyinja fihano na fibili (127), 2alinkufwila nkaya ka Kiriati-araba aka ko kaya ka Hebroni, nkisu kya Kenani. Abrahamu alinkundilila Sara ifwa ingulumba. 3Popapo Abrahamu alinkusumuka apa umfimba gwalipo alinkwakuyoba na bakikolo kya baHiti alinkuti, 4#Imbo 7.16; Hib 11.9,13“Une ndi nhesya kangi ndi mponi itolo nkati mmyinu, loli ngaya nabo ubuyo bwakunsilapo unkasi gwangu, ngusuma ukuti, mumbepo ikisu kimo ukuti buyege buyo bwitu bwakusyiligwapo uswe.” 5Popapo abakikolo kya baHiti balinkumwamula Abrahamu balinkuti, 6“Gwe malafyale, pilikisya kumyitu, yo ugwe mundu gwa Kyala, kangi gwimikigwe fiyo nkati mmyitu, Gwisalilege itolo ubuyo ubukinde ubununu nkati mmapumba gitu, mo ukagusyile umfimba gwako; akayapo nayumo nkati mmyitu uyu abagile ukukukanisya ugwe ukugusyila umfimba gwako.” 7Popapo Abrahamu alinkusumuka alinkugwa ulupi nkyeni mba kikolo kya baHiti aba bo benekisu. 8Alinkupyelesya kumyabo alinkuti, “Linga mwitike naloli ukumbapo ubuyo bwakuti nsyilepo umfimba gwangu mumbilikisye lelo, natigi munsumile kwa Efroni unnya-Zohara ukuti ambepo imbako yake iyi yili pa Makipela, kubumalikisyo bwa ngunda gwake. 9Anyitikisye pa ntengo ugu apimile bo nanumwe mukuketa nukupilika, ko kuti buyege buyo bwitu ubwakusyilanapo.” 10Umwene Efroni yo alitugele nkati mbakikolo kya baHiti; popapo alinkumwamula Abrahamu bo bikupilika abinake na bosa aba balipo apa babunganaga nkaya kala, alinkuti, 11“Gwe malafyale, pilikisya kumyangu. Ngupele ungunda pamopene na yi mbako iyi yilimo mumo. Nikukupa bo bikupilika bosa aba nkikolo kyangu; ukagusyile mumo umfimba gwako.” 12Popapo Abrahamu alinkugundama pasi nkyeni mbandu bosa abenekisu. 13Alinkunsuma Efroni bo bikupilika bosa alinkuti, “Linga gwitike naloli, ulimbulaga ukuti ngupege indalama sisyo sifwene nu ntengo gwa ngunda. Gwambililege indalama po ngusyilangamo umfimba gwangu.” 14Umwene Efroni alinkumwamula Abrahamu alinkuti, 15“Malafyale gwangu, ikisu kila untengo gwake syo ndalama sya siliva amashekeli aba mia bana (400), lelo ko kafiki kumyako nanine kakako? Bukaga itolo ukagusyile umfimba gwako.” 16Popapo Abrahamu alinkwitika, alinkumpimila Efroni ubusito bwa ndalama sya siliva isi apimile, amashekeli aba mia bana (400), syo alinkumpa nkyeni mbandu bosa abenekisu ukufwana na mumo bapimilaga abandu ba kyusi.

17Bunobuno ungunda gwa Efroni ugu gwali pa Makipela, kubusokelo ilisuba bwa kaya ka Mamure, go balinkumpa Abrahamu, balinkumpa ungunda palikimo ni mbako iyi yalimo, kangi nimipiki gyosa igi gyali mumo. 18Filinkwipela ukuya fyake Abrahamu bo bikuketa bosa aba kikolo kya baHiti aba balipo apa babunganaga nkaya kala. 19Panyuma pali sisisi po Abrahamu alinkunsyila Sara unkasi gwake mu mbako iyi yali mu ngunda pa Makipela, ku busokelo ilisuba bwa kaya ka Mamure (yo yu Hebroni) nkisu kya Kenani. 20Ungunda pamopene na yi mbako iyi yili mumo fyo aba kikolo kya baHiti balinkumpa Abrahamu ukuya buyo bwake bwa kubasyilapo abafwe.

Currently Selected:

UBWANDILO 23: NNBII

Highlight

Copy