YOHANI 19

1Popapo Pilati alinkumwega Yesu, alinkulagila ukuti bankome nifikoti. 2Abene abasikali balinkuluka ikitili kya bunyafyale kya mifwa, balinkumbika pantu, balinkumfwika unselekesye umfubifu; 3balinkwisa kumyake balinkuti, “Tukukuponia gwe Malafyale gwa baYuda!” Kangi balinkunkoma namapi. 4Pilati alinkusoka kangi, alinkubabula alinkuti, “Keta, nikuntwala kumyinu, ko kuti mumanye ukuti ndikuyagamo inongwa yimo mmyake.” 5Popapo Yesu alinkusoka panja, bo afwele ikitili kya bunyafyale ikya mifwa nunselekesye umfubifu. Umwene Pilati alinkubabula alinkuti, “Amunkete umundu uyu!” 6Lelo bo abaputi abakulumba nababombi bambwene, popapo balinkuywega balinkuti, “Nkomele pakipingika! Nkomele pakipingika!” Umwene Pilati alinkubabula alinkuti, “Mumwege yuyumwe mukankomelege pakipingika; buno une ndikuyagamo yimo inongwa mmyake.” 7Abene abaYuda balinkumwamula balinkuti, “Uswe tuli nululagilo, ndulagilo lululu kumbagile ukufwa, papo ipelile mwene ukuya Mwana gwa Kyala.”

8Lelo bo Pilati apilike ilisyu lilili, alinkukindapo ukutetema. 9Alinkwingila kangi nnyumba ya bulindililakisu, alinkundalusya Yesu alinkuti, “Ufumile kugu?” Loli Yesu alinkusita nukumwamula limo. 10Popapo Pilati alinkumbula alinkuti, “Utikuyoba nanine? Ukamanya ukuti ndi namaka ga kukwabulila ugwe, kangi ndi namaka ga kukukomela pakipingika?” 11Umwene Yesu alinkumwamula alinkuti, “Angali ukaya namaka pamyangu linga ukapegigwe ukufuma kumwanya; panongwa iyi, uyu ambikile mmaboko gako yo ali ninongwa ukukindapo.” 12Ukufuma papo Pilati alinkulonda ukumwabula Yesu, loli abaYuda balinkuywega balinkuti, “Linga kumwabula umundu yuyuyu, bo ukaya mmanyani gwa Kaisari; gwesa uyu ikwipela mwene ukuya malafyale, bo akindene na Kaisari.”

13Lelo bo Pilati agapilike amasyu gagaga, popapo alinkusoka nagwe Yesu panja, alinkutugasya pakikota kya bulongelo, pabuyo ubu batigi lwalo lwa mabwe, apa nkiHiburi bikuti Gabata. 14Pali po pisiku lya kutendekesya ifyakulya fya Pasa, pakabalilo ka buhano na kamo,#19.14 Buhano na kamo: ntandatu, ko kuti bo tili pantu. alinkubabula abaYuda alinkuti, “Keta Umalafyale gwinu!”

15Abene loli balinkuywega balinkuti, “Nsosyepo! Nsosyepo! Nkomele pakipingika!” Umwene Pilati alinkubalalusya alinkuti, “Nunkomele pakipingika Umalafyale gwinu?” Abene abaputi abakulumba balinkwamula balinkuti, “Tukaya nagwe umalafyale uyungi, loli mwene yu Kaisari.” 16Popapo alinkumbika mmaboko gabo, ukuti akomeligwege pakipingika.

Yesu ikukomeligwa pakipingika

(Mat 27.32-44; Mar 15.21-32; Luk 23.26-43)

17Abene balinkumwega Yesu. Popapo alinkusoka bo apimbile ikipingika kyake, alinkubuka pabuyo ubu bikuti po palupaya, ubu nkiHiburi bikuti “Golgota.” 18Po balinkwakunkomela pakipingika; kangi balinkukomeligwa lumo nagwe abangi babili, yumo kuno yumo kuno, umwene Yesu alinkuya pakati. 19Umwene Pilati alinkusimba ubusimbe, alinkububika pamwanya pakipingika; ubu bwasimbigwe ukuti, “YESU GWA NKAYA KA NAZARETI, UMALAFYALE GWA BA YUDA.” 20Ubusimbe bububu abaYuda ba bingi balinkububala, namanga ubuyo ubu Yesu akomeligwepo pakipingika, bwali pabupipi nakaya. Bwasimbigwe nkiHiburi, nkiRoma, na nkiGriki. 21Abene abaputi abakulumba ba baYuda, balinkumbula Pilati balinkuti, “Ungasimbaga ilya kuti, ‘Umalafyale gwa baYuda,’ loli utigi, ‘Atigi une ndi Malafyale gwa baYuda.’ ” 22Umwene Pilati alinkwamula alinkuti, “Isi nsimbile syo nsimbile popapo.” 23Abene abasikali bo bankomile pakipingika Yesu, po balinkwega imyenda gyake balinkugiyabania pana, unsikali gwesa alinkuya nikiyabo kyake, gope nunselekesye gwake balinkwega. Ugwene loli unselekesye ugu gukali nubusone bumo, gwali nduke gosa itolo ukufuma ku kuntu. 24#Salimo 22.18Popapo balinkuyobana balinkuti, “Go tungagunyafulaniaga, loli tubikege ubulagusi, ukuti tumwage uyu gukuyaga gwake,” ko kuti mo sisilege isi sisimbigwe ukuti, “Bayabene imyenda gyangu, panselekesye gwangu babikile ubulagusi.”

25Bo balinkubomba bunobuno abasikali. Lelo pabupipi nikipingika kya Yesu, po balyimile unna, nugwamyabo gwa nna, Maria unka Kleopa, na Maria Magadalena. 26Umwene Yesu bo ambwene unna, numfundigwa uyu alinganile imile pabupipi, popapo alinkumbula alinkuti, “Gwe nkikulu, keta umwanako!” 27Kangi alinkuyoba kumfundigwa yula alinkuti, “Keta unyoko!” Ukufuma pakabalilo kako, umfundigwa yula alinkumwega Maria, alinkubuka nagwe kumyake.

Ukufwa kwa Yesu

(Mat 27.45-56; Mar 15.33-41; Luk 23.44-49)

28 # Salimo 22.15; 69.21 Panyuma pali sisisi, bo Yesu amenye ukuti simalike syosa, ko kuti mo sisilege isi sisimbigwe mmasimbo, alinkuyoba alinkuti, “Numilwe.” 29Lelo lwalipo ulwangabya papo ulu lwaliswile asiki. Abene balinkufyika kulutete akenda aka bayubike mwa asiki, balinkumbika Yesu kukanwa. 30Lelo bo Yesu anwile asiki, alinkuyoba alinkuti, “Simalike.” Popapo alinkugoboka untu, alinkusililika.

Bikundasa Yesu ningwego pa lubafu

31Papo lyali isiku lya kwitendekesya, abaYuda bakalondaga ukuti imifimba giyege pafipingika pisiku lya Sabati, namanga Sabati yula ali nkulumba, popapo balinkunsuma Pilati ukuti amalundi gabo gakonyoligwege, nukuti bagisosyepo imifimba pafipingika. 32Popapo abasikali balinkwisa, balinkunkonyola amalundi untasi, nunnine uyungi uyu akomeligwe nagwe. 33Lelo bo bisile pa Yesu, balinkwaga afwile litasi. Popapo balinkusita nukunkonyola amalundi. 34Loli yumo unsikali alinkundasa ningwego palubafu, nakalinga itolo ililopa namisi filinkusoka. 35Umwene uyu asibwene yo asisimikisye, ulwene ulusisimikisyo lwake lo lwa naloli; umwene amenye ukuti ikuyoba isya naloli ko kuti nanumwe mwitikege. 36#Kuso 12.46; Kuba 9.12; Salimo 34.20Namanga sisisi syabonike ukuti mo sisilege isi sisimbigwe isya kuti, “Nakimo ikifupa kyake kitisakukonyoligwa.” 37#Zeka 12.10; Buset 1.7Kangi ubusimbe ubungi bukuti, “Bisakunketaga yuyo balindasile.”

Ukusyiligwa kwa Yesu

(Mat 27.57-61; Mar 15.42-47; Luk 23.50-56)

38Panyuma pali sisisi, po Yosefu ugwa nkaya ka Arimatia, uyu ali mfundigwa gwa Yesu kubutitu papo abatilaga abaYuda, alinkunsuma Pilati ukuti agusosyepo umbili gwa Yesu. Umwene Pilati alinkumwitikisya. Popapo alinkubuka, alinkwakugusosyapo umbili gwake. 39#Yoh 3.1-2Alinkwisa yope Nikodemu, uyu ulutasi abukile kwa Yesu pakilo, yo alinkutwala unkota ugu bikuti yo mira, ugu gwalyongene nunkota ugu bikuti yo aloi, guliti gwali pa busito bwa mapaundi mia yumo (100). 40Popapo balinkugwega umbili gwa Yesu, balinkuguniembetelela mmyenda, pamopene nimikota iminunga, bo mumo luyilile ulwiho lwa baYuda ulwa kusyilila. 41Lelo pabuyo ubu balinkomilepo pakipingika, gwalipo ungunda, mo lyalimo ilipumba ilipya ili nayumo akabikigwemo siku; 42mo balinkumbika Yesu, papo lyali lyo isiku lya kwitendekesya abaYuda, kangi ilipumba lyali pabupipi.

Currently Selected:

YOHANI 19: NNBII

Highlight

Copy