YOHANI 20

Ilipumba lili bwasi

(Mat 28.1-8; Mar 16.1-8; Luk 24.1-12)

1Lelo pisiku lya kwanda ilya ndungu, Maria Magadalena alinkutemelela ukubuka kwipumba bo kukali nukukya, alinkwakwaga ilibwe liseguligwepo pipumba. 2Popapo alinkubopa ukubuka kwa Simoni Peteri, na kumfundigwa uyungi uyu Yesu alinganile, alinkubabula alinkuti, “Bansosisyemo uNtwa mwipumba, lelo tukamanya nakuno bambikile.” 3Popapo Peteri alinkusoka pamopene numfundigwa uyungi yula, balinkubuka kwipumba. 4Balinkubopa bo babili, loli umfundigwa uyungi yula alinkubopa alinkundekelela Peteri, alinkutala ukufika kwipumba; 5alinkwinama nukwinangila, alinkugibona imyenda loli alinkusita nukwingilamo. 6Popapo yope Simoni Peteri uyu ankongaga alinkufika, alinkwingila mwipumba; alinkugibona imyenda mumo, 7nikitambala iki balimpinyile Yesu pantu, kyo kikali pamopene nimyenda, loli kyaliniengenie pasima itolo. 8Popapo yope umfundigwa uyungi, uyu atalile ukufika kwipumba alinkwingila, alinkuketa, alinkwitika. 9Namanga bakali bakasyagenie isi sisimbigwe isya kuti, “Fikuti asyukege mbafwe.” 10Popapo abafundigwa bala balinkugomoka kangi ukubuka kumyabo.

Yesu ikunsetukila Maria Magadalena

(Mat 28.9-10; Mar 16.9-11)

11Umwene Maria loli alyimile panja pipumba alilaga; lelo bo akali ikulila, alinkwinama alinkuketa mwipumba; 12alinkubabona abandumi babili aba bafwele imyenda imyelu, batugesye yumo kuntu yumo kumalundi, apa gwalambalele umbili gwa Yesu. 13Abene balinkundalusya balinkuti, “Gwe nkikulu, kulila fiki?” Umwene alinkwamula alinkuti, “Papo bansosisyepo uNtwa gwangu, kangi ngamanya nakuno bambikile.”

14Lelo bo ayobile sisisi, alinkusyutukila kunyuma, alinkumbona Yesu imile; loli alinkusita nukummanya ukuti yo Yesu. 15Umwene Yesu alinkundalusya alinkuti, “Gwe nkikulu, kulila fiki? Kundonda ywani?” Umwene Maria papo atigi yo ndindililangunda, alinkumbula alinkuti, “Malafyale, linga yo ugwe umpimbile, po ulimbulaga kuno umbikile ukuti ngansosyepo.” 16Umwene Yesu alinkukolela alinkuti, “Maria!” Popapo Maria alinkusanuka, alinkuyobela nkiHiburi alinkuti, “Rabuni,” (ko kuti “Mmanyisi”). 17Popapo Yesu alinkumbula alinkuti, “Ungambalamasyaga, buno ngali ukufyuka kwa Tata; loli bukaga kubamyitu ukababulege ukuti, nsumwike kwa Tata, uGwisemwe; kwa Kyala gwangu, kangi Kyala gwinu.” 18Popapo Maria Magadalena alinkubuka, alinkwakubapangila abafundigwa alinkuti, “Numbwene uNtwa,” po lelo alinkubabula ukuti, “Ambulile syo isi syo isi.”

Yesu ikubasetukila abafundigwa

(Mat 28.16-20; Mar 16.14-18; Luk 24.36-49)

19Lelo namayolo, pisiku lilyo ilya kwanda ilya ndungu, bo inyigi sigaligwe muno balimo abafundigwa, panongwa ya kubatila abaYuda, popapo Yesu alinkwisa, alinkwima pakati, alinkubabula alinkuti, “Ulutengano luyege nanumwe.” 20Lelo bo ayobile lilili, alinkubanangisya amaboko gake napalubafu. Popapo abafundigwa balinkusekela bo bambwene uNtwa. 21Umwene Yesu alinkwandisya kangi alinkuti, “Ulutengano luyege nanumwe; bo mumo Tata alindumile une, mo mumo nanine nikubatumila umwe.” 22Lelo bo ayobile lilili, alinkubaputila umuyi alinkuti, “Amwambililege Mbepo Mwikemo. 23#Mat 16.19; 18.18Aba linga mukubaswa inongwa, bo baswegigwe; aba linga mutikubaswa, bo bakaswegigwa.”

Yesu na Tomasi

24Loli Tomasi, yumo muli bala kalongo na babili, uyu batigi yo Didimo, akali nabo apa Yesu isaga. 25Popapo abafundigwa abanine balinkumbula balinkuti, “Tumbwene uNtwa.” Loli umwene alinkubabula alinkuti, “Linga ngagaketa amakoko ga misumali mmaboko gake, linga ngabikamo ulobe muno gyalimo imisumali, nukubika ikiboko kyangu palubafu lwake, ndisakwitikamo siku.”

26Lelo bo gakindile amasiku mahano na matatu, popapo abafundigwa bake balinkuya nnyumba mumo kangi, yope Tomasi alinkuya nabo. Alinkwisa Yesu bo inyigi sigaligwe, alinkwima pakati alinkuti, “Ulutengano luyege nanumwe.” 27Popapo Yesu alinkumbula Tomasi alinkuti, “Twala ulobe lwako kuno, ukete amaboko gangu, twala nikiboko kyako ubike palubafu lwangu; ungayaga nsitakwitika loli gwitikege itolo.” 28Umwene Tomasi alinkwamula alinkuti, “Gwe Ntwa gwangu, gwe Kyala gwangu!”

29Umwene Yesu alinkumbula alinkuti, “Gwitike papo umbwene une? Basayigwa aba bikwitika bo bakaketa.”

Inongwa ya buku uyu

30Umwene Yesu alinkupele ifika ifingi, fi fingi nkyeni mbafundigwa bake, ifi fikasimbigwamo mwa buku uyu. 31Loli ifi fyo fisimbigwe ukuti mwitikege, ukuti Yesu yo Kristi uMwana gwa Kyala; kangi ukuti bo mwitike, muyege nubumi mungamu yake.

Currently Selected:

YOHANI 20: NNBII

Highlight

Copy