ପ୍ରେରିତ 10
10
ପିତର୍ ଆର୍ କର୍ଣ୍ଣୀଲିୟ
1କାଇସରିୟା ସ୍ହରେ କର୍ଣ୍ଣୀଲିୟ ନାଉଁର୍ ଗଟେଲକ୍ ରିଲା, ସେ “ଇତାଲିକ୍” ନାଉଁର୍ ସ୍ଇନ୍ ମ୍ନ୍କାର୍ ଦ୍ଳାର୍ ଗଟେକ୍ ସେନାପତି ରିଲା। 2ସେ ଗଟେକ୍ ଦ୍ର୍ମ୍ ଲକ୍ରିଲା, ତାର୍ ଗ୍ରାର୍ ସ୍ବୁଲକ୍ ଇଶ୍ଵରାର୍ ଆରାଦନା କ୍ର୍ତି ରିଲାଇ, ସେ ଗ୍ରିବ୍ ଇନସ୍ତା ତ୍ଇରିଲା ଯିହୁଦିମ୍ନ୍କେ ବେସି ଦାନ୍ କ୍ର୍ତିରିଲା, ସ୍ବୁବ୍ଳ୍ ଇଶ୍ଵର୍କେ ପାର୍ତେନା କ୍ର୍ତି ରିଲାଇ।
3ଗଟେଦିନ୍ ମୁଣ୍ତେବେଳ୍ ତିନ୍ଟା ବ୍ଳ୍ କର୍ଣ୍ଣୀଲିୟ ଗଟେକ୍ ବ୍ଲ୍କ୍ରି ଦ୍କ୍ଲା, ସ୍ଡେବ୍ଳ୍ ଇଶ୍ଵରାର୍ ଦୂତ୍ ଆସିକ୍ରି ତାକେ କୁଦ୍ଲା, “କର୍ଣ୍ଣୀଲିୟ।” 4ସେ ଡିରିକ୍ରି ସ୍ର୍ଗ୍ ଦୂତ୍ ହାକ୍ ଦ୍କି କଇଲା, “ଏ ମାପ୍ରୁ କାଇରି କ୍ମ୍ଲିସ୍।” ସ୍ର୍ଗ୍ ଦୂତ୍ ତାକେ କଇଲା, “ଇଶ୍ୱର୍ ତର୍ ପାର୍ତେନା ଆର୍ ଦାନ୍କେ ଦ୍କିଆଚେ, ସେ ତକ୍ ତାର୍ ଆଶିର୍ବାଦ୍ ଦେମ୍କେ ମ୍ନ୍କ୍ରୁଲା। 5ଅବେ ତୁଇ ଯାଫ ସ୍ହରେ ଲକ୍ ହ୍ଟାଇକ୍ରି ଶିମୋନ୍ ପିତର୍ ନାଉଁର୍ ଗଟେଲକ୍ କୁଦିଆଣ୍। 6ସ୍ମ୍ଦୁର୍ କ୍ଣ୍ତାଇ ବାସା କ୍ର୍ତିରିଲା ଶିମୋନ୍ ନାଉଁର୍ ଗଟେକ୍ ଚାମ୍ଳା କାମ୍ କ୍ର୍ତିରିଲା ଲକାର୍ ଗ୍ରେ ସେ ବାସା କ୍ରୁଲା।”
7ତାର୍ସ୍ଙ୍ଗ୍ କ୍ତା ଅଇଲା ଦୂତ୍ ଗ୍ଲାହ୍ଚେ, କର୍ଣ୍ଣୀଲିୟ ତାର୍ ଗ୍ରେ କାମ୍ କ୍ର୍ତିରିଲା ଜଳେକ୍ ଦାସ୍କେ ଆର୍ ତାର୍ ସେବା କ୍ର୍ତିରିଲା ସ୍ଇନ୍ ମ୍ନ୍କାର୍ ବିତ୍ରେହ୍ଣି ଗଟେକ୍ ଦ୍ର୍ମ୍ ଲକ୍କେ ସେ କୁଦ୍ଲା, 8ତାର୍ ଗିନେ ଜୁଇରି ସ୍ବୁ ଗ୍ଟିରିଲି ସେ ସ୍ବୁ ସେମ୍ନ୍କେ କଇଲା ଆର୍ ସେମ୍ନ୍କେ ଯାଫ ସ୍ହରେ ଜା ବ୍ଲି ହ୍ଟାଇଲା।
ପିତରାର୍ ରାଇଜ୍
9ତାର୍ ଆରେଗଟ୍ ଦିନ୍ ମୁଣ୍ତେବେଳ୍ ସେମ୍ନ୍ ଯାଫ ସ୍ହର୍ ଲ୍ଗେ ହଚ୍ତା ଆଗେ ପିତର୍ ପାର୍ତେନା କ୍ରୁକେ ଉହ୍ରାର୍ ବ୍କ୍ରାଇ ଗ୍ଲା, 10ସ୍ଡେବ୍ଳ୍ ସେ ବୁକ୍ହାଇ କ୍ରି ଆର୍ କାଇରିଅଲ୍ କାମ୍କେ ମ୍ନ୍କ୍ଲା, ମ୍ତର୍ କାଦି ନ୍କାତା ଆଗେ ସେ ଜାକ୍ ମାଡି ଅଇ ଦ୍କ୍ଲା, 11ସ୍ର୍ଗ୍ ଉଗାଳି ଅଇଆଚେ ଆର୍ ଗଟେକ୍ ବ୍ଡ୍ ହ୍ଚିଆ ଲଗେ ଚାରି କନେ ଦ୍ରିକ୍ରି ଗଟେକ୍ ଜିନିଷ୍ ହୁର୍ତିବି ଉହ୍ରେ ଆସ୍ତାର୍ ଦ୍କ୍ଲା। 12ସେ ହ୍ଚିଆ ଲ୍ଗେ ହୁର୍ତିବିର୍ ସ୍ବୁ ପର୍କାର୍ ଚାରି ଗଡିଆ ଜ୍ତୁ, ଆର୍ ଆକାଶାର୍ ଚେଳେ ଆର୍ ସାହ୍ ରିଲାଇ।
13ଆର୍ ସ୍ଡେବ୍ଳ୍ ପିତର୍ ଗଟେକ୍ ଶ୍ବ୍ଦ ଶୁଣ୍ଲା, “ଏ ପିତର୍ ଉଟ୍, ମାରିକ୍ରି କାମ୍।” 14ମ୍ତର୍ ପିତର୍ କଇଲା, “ମାପ୍ରୁ ମୁଇ କ୍ବେହେଁ ଅନ୍କ୍ରି କ୍ରୁ ନ୍ହାରି, ମୁଇ କ୍ବେ ଅଶୁଚି ଆର୍ ବ୍ର୍ନ୍ କାଦି କାଇ ନ୍କେରି।” 15ଆର୍ ତରେକ୍ ଅନ୍କ୍ରି ସେ ଶ୍ବ୍ଦ କଇଲି, “ଇଶ୍ୱର୍ ଜୁଇତାକ୍ ପବିତର୍ କ୍ଲାଆଚେ ସେତାକ୍ ଅଶୁଚି ବ୍ଲି କ୍ଉନାଇ।” 16ଅନ୍କ୍ରି ତିନିତର୍ ସେ ଶ୍ବ୍ଦ ଅଇଲି, ଆର୍ ସ୍ଙ୍ଗେ ସ୍ଙ୍ଗେ ସେ ଡକା ଆକାଶେ ଉଟାଇ ନିଲା।
17ଶିମୋନ୍ ପିତର୍ ଜୁଇରି ଦ୍କ୍ଲା, ସେ ଅର୍ତ କାଇରି ଅଇଦ୍ ବ୍ଲି କାବା ଅଇଲା, ସ୍ଡେବ୍ଳ୍ କର୍ଣ୍ଣୀଲିୟ ହ୍ଟାଇଲା କ୍ତେକ୍ ଲକ୍କେ ସିମନାର୍ ଗ୍ର୍ କଜୁକ୍ ହ୍ଟାଇରିଲା, ସେମ୍ନ୍ ତାର୍ ବାଟ୍ହାଳି ଲ୍ଗେ ଟିଆ ଅଇରିଲାଇ, 18ସେମ୍ନ୍ ହ୍ଚାର୍ଲାଇ, “ଶିମୋନ୍ ପିତର୍ ନାଉଁର୍ ଗଟେଲକ୍ ଗତିଆ ଇତି ଆଚେକି?”
19ପିତର୍ ସେ ଦ୍କ୍ଲା ବିଷୟ୍ ଚିନ୍ତା କ୍ର୍ତିରିଲାବ୍ଳ୍ ଆତ୍ମା ତାକେ କଇଲି, “ଦ୍କ୍ ତକେ ତିନିଲକ୍ କଜୁଲାଇ। 20ସେତାର୍ଗିନେ ତୁଇ ଉଟ୍ ତ୍ଳେ ଜା ଆର୍ ମ୍ନେ କାଇରି ନ୍ବାବିକ୍ରି ତାର୍ ସ୍ଙ୍ଗେ ଜା ଆର୍ ମୁଇ ସେମ୍ନ୍କେ ହ୍ଟାଇ ଆଚି।” 21ତ୍ବେ ପିତର୍ ତ୍ଳେ ଗ୍ଲା ଆର୍ ସେ କଜ୍ତା ମାନାଇମ୍ନ୍କେ କଇଲା, “ତୁମିମ୍ନ୍ ଯାକେ କଜୁଲାସ୍ ମୁଇ ହ୍କା ସେ ଲକ୍, କାଇତାକ୍ ତୁମିମ୍ନ୍ ଆସିଆଚାସ୍?”
22ସେମ୍ନ୍ କଇଲାଇ, “କର୍ଣ୍ଣୀଲିୟ ନାଉଁର୍ ଗଟେଲକ୍ ସେନାପତି ଅମୁକେ ହ୍ଟାଇ ଆଚେ, ସେ ଗଟେକ୍ ଦ୍ର୍ମ୍ ଲକ୍ ଆର୍ ଇଶ୍ଵର୍କେ ଡିର୍ତା ଲକ୍, ସ୍ବୁ ଯିହୁଦି ଲକ୍ମ୍ନ୍ ତାକେ ବେସି ମାନ୍ତି କ୍ରୁଲାଇ, ଇଶ୍ଵରାର୍ ପବିତର୍ ଦୂତ୍ ତାକେ ଜାଣାଇ ଆଚେ ଯେ ତୁଇ ଶିମୋନ୍ ପିତର୍କେ ତର୍ ଗ୍ରେ କୁଦାଇକ୍ରି ଆଣା ଆର୍ ସେ ଜୁଇକ୍ତା କଇଲେକ୍ ସେରି ଶୁଣା।” 23ସେତାକ୍ ପିତର୍ ସେମ୍ନ୍କେ ଗ୍ରେ କୁଦିକ୍ରି ନିଲା, ଆର୍ ସେ ରାତି ସେତି ତେବାଇ କ୍ରି କାମ୍କେ ହିମ୍କେ ଦିଲା, ତାର୍ ଆରେଗଟ୍ ଦିନ୍ ସେ ସେମ୍ନ୍କାର୍ ସ୍ଙ୍ଗେ ଗ୍ଲା, ଆର୍ ଯାଫ ସ୍ହରାର୍ କ୍ତେକ୍ ବିଶ୍ବାସ୍ କ୍ର୍ତା ବାଇମ୍ନ୍ ତାକାର୍ ସ୍ଙ୍ଗ୍ ଗ୍ଲାଇ।
କର୍ଣ୍ଣୀଲିୟର୍ ଗ୍ରେ ପିତର୍
24ତାର୍ ହ୍ଚାର୍ ଦିନ୍ ସେମ୍ନ୍ କାଇସରିୟା ସ୍ହରେ ହଚ୍ଲାଇ, ସେତି କର୍ଣ୍ଣୀଲିୟ ତାକାର୍ ନିଜାର୍ ଲକ୍ମ୍ନ୍କାର୍ ସ୍ଙ୍ଗ୍ ଆର୍ ତାର୍ସ୍ଙ୍ଗ୍ ମ୍ନ୍କାର୍ ସ୍ଙ୍ଗ୍ ପିତର୍କେ ଜାଗିରିଲାଇ।
25ପିତର୍ ତାର୍ ଗ୍ରେ ହୁର୍ତା ଆଗେ କର୍ଣ୍ଣୀଲିୟ ପିତରାର୍ ଗଡେ ଡୁଳ୍ଲା ଆର୍ ତାକେ ମୁଣ୍ତିଆ ମାର୍ଲା। 26ମ୍ତର୍ ପିତର୍ ତାକେ ଉଟାଇକ୍ରି କଇଲା, “ଟିଆ ଅଉ ମୁଇ ହେଁ ଗଟେକ୍ ମାନାଇ ଲକ୍।”
27ସେତାକ୍ ପିତର୍ ତାର୍ସ୍ଙ୍ଗ୍ କ୍ତାବାର୍ତା କ୍ରି କ୍ରି ଗ୍ରେ ହୁର୍ଲା, ଆର୍ ସେତି ଜାଇକ୍ରି ବିତ୍ରେ ଗାଦା ସ୍ବୁ ଲକ୍ମ୍ନ୍ ରୁଣ୍ତିରିଲାର୍ ସେ ଦ୍କ୍ଲା। 28ଆରେକ୍ ସେ ସେମ୍ନ୍କେ କଇଲା, “ତୁମିମ୍ନ୍ ବ୍ଲ୍କ୍ରି ଜାଣାସ୍ ଯେ ଗଟେକ୍ ଯିହୁଦିଲକ୍ ତାକାର୍ ଜାତିର୍ ନିୟମ୍ ହର୍ ଯିହୁଦି ଅଇନ୍ରିଲା ଲକାର୍ ଗ୍ରେ ଜାତାର୍ କି ତାକାର୍ ସ୍ଙ୍ଗ୍ ମିସ୍ତାର୍ ନିୟମାର୍ ବିରଦ୍। ମ୍ତର୍ କାକେ ଅଶୁଚି କି ଅପବିତର୍ ବ୍ଲି ନ୍କମ୍କେ ଇଶ୍ୱର୍ ମକେ ଦ୍କାଇ ଅଇଲାଆଚେ। 29ସେତାର୍ଗିନେ ତୁଇ ଜ୍ଡେବ୍ଳ୍ ମକେ କୁଦୁକେ ହ୍ଟାଇ ଆଚ୍ସି ମୁଇ କାଇରି ନ୍ବାବିକ୍ରି ଆଇଲେ। ମୁଇ ହ୍ଚାରୁଲେ କାଇତାକ୍ ତୁଇମକେ କୁଦି ଆଚ୍ସି?”
30କର୍ଣ୍ଣୀଲିୟ କଇଲା, “ତିନ୍ଦିନ୍ ଆଗେ ଟିକ୍ ଇସ୍ମୟେ ମୁଣ୍ତେବେଳ୍ ତିନି ଗଣ୍ଟା ବ୍ଳ୍ ମୁଇ ମର୍ ଗ୍ରେ ପାର୍ତେନା କ୍ର୍ତିରିଲେ, ସ୍ଡେବ୍ଳ୍ ଗଟେଲକ୍ ଦବ୍ଳା ହ୍ଚିଆ ହ୍ଜି ମର୍ ମୁଏଁ ଟିଆଅଇଲା ଆର୍ କଇଲା, ‘କର୍ଣ୍ଣୀଲିୟ ଇଶ୍ୱର୍ ତର୍ ପାର୍ତେନା ଶୁଣିଆଚେ 31ଆର୍ ତର୍ ଦିଲା ଦାନ୍କେ ଇଶ୍ୱର୍ ଦ୍କିଆଚେ। 32ଅବେ ତୁଇ ଯାଫ ସ୍ହର୍କେ ଲକ୍ ହ୍ଟାଇକ୍ରି ଜୁଇଲକାର୍ ନାଉଁ ଶିମୋନ୍ ପିତର୍ ତାକେ କୁଦିଆଣା, ଚାମ୍ କାମ୍ କ୍ର୍ତିରିଲା ଶିମୋନ୍ ନାଉଁର୍ ଲକାର୍ ଗ୍ରେ ସେ ଗତିଆ ଅଇକ୍ରି ଆଚେ, ତାର୍ ଗ୍ର୍ ସ୍ମ୍ଦୁର୍ କ୍ଣ୍ତାଇ।’ 33ସେତାର୍ଗିନେ ମୁଇ ତକେ କୁଦୁକେ ହ୍ଟାଇଲେ, ତୁଇ ଇତିକେ ଦ୍ର୍ମ୍ କ୍ରି ଆଇଲିସ୍। ମାପ୍ରୁ ତକେ ଜୁଇ ଜୁଇରି ସ୍ବୁ ଜାଣାମ୍କେ ଆଦେଶ୍ ଦିଲାଆଚେ, ସେରି ଶୁଣ୍ତାର୍ ଗିନେ ଅମିମ୍ନ୍ ସ୍ବୁ ଲକ୍ ଇଶ୍ଵରାର୍ ଲ୍ଗେ ଆଚୁ।”
ପିତରାର୍ ଶିକ୍ୟା
34ତାର୍ହ୍ଚେ ପିତର୍ କଇଲା, “ମୁଇ ଅବେ ଜାଣୁଲେ ଯେ ଇଶ୍ୱର୍ କାର୍ ମୁଉଁ ଦ୍କିକ୍ରି କାମ୍ ନ୍କେରେ,
35ମ୍ତର୍ କେ କୁଇ ଗଷ୍ଟିର୍ ଲକ୍ ଆର୍ କେ କୁଇ ଜାତିର୍ ଲକ୍ ସେରି ଲଡାନାଇ, ମ୍ତର୍ ଜୁଇଲକ୍ ଇଶ୍ଵରାର୍ ଲ୍ଗେ ସେବା କ୍ରେଦ୍ ଆର୍ ତାର୍ ଇଚାହର୍ କାମ୍ କ୍ରେଦ୍ ତାକେ ଇଶ୍ୱର୍ ମ୍ନ୍କ୍ରୁଲା, ଇରି ମୁଇ ସ୍ତ୍ବ୍ଲି ବୁଜୁଲେ।
36ତୁମିମ୍ନ୍ ଜାଣାସ୍ ଯେ ଇଶ୍ଵରାର୍ ଜୁଇ ବାକ୍ୟ ଇସ୍ରାଏଲ୍ ଲକ୍ମ୍ନ୍କେ ଦ୍ଇରିଲା ସେ ସ୍ମାନ୍ ଶାନ୍ତିର୍ ବାକ୍ୟ ସୁବ୍କ୍ବର୍ ଯୀଶୁ ଖ୍ରୀଷ୍ଟ ଅମାର୍ ଲ୍ଗେ ପର୍ଚାର୍ କ୍ଲାଆଚେ, ସେ ଯୀଶୁ ସ୍ବୁଲକାର୍ ମାପ୍ରୁ। 37ତୁମିମ୍ନ୍ ଜାଣାସ୍ ଯେ ଡୁବେନ୍ ଦେତା ଯୋହନାର୍ ଲ୍ଗେହ୍ଣି ସେ ସୁବ୍କ୍ବର୍ ପର୍ଚାର୍ ଗାଲିଲୀ ଜିଲାଇ ହ୍ଣି ଆରାମ୍ କ୍ରି ସ୍ବୁ ଯିହୁଦା ଦେଶେ ପର୍ଚାର୍ ଅଇଆଚେ, 38ବଲେକ୍ ତୁମିମ୍ନ୍ ନାଜରିତିୟ ଯୀଶୁର୍ କ୍ତା, କ୍ନ୍କ୍ରି ଇଶ୍ୱର୍ ତାକେ ପବିତର୍ ଆତ୍ମା ଆର୍ ତାର୍ ଶ୍କ୍ତି ଦ୍ଇରିଲା। ଆର୍ ସେ ବ୍ଲ୍କାମ୍ ସ୍ବୁ କ୍ରି କ୍ରି, ଶଇତାନାର୍ ଜାଲେ ହ୍ଡିରିଲା ଲକ୍ମ୍ନ୍କେ ସ୍ବୁହାକ୍ ବୁଲି ବୁଲି ବ୍ଲ୍କ୍ଲା, କାଇତାକ୍ ଇଶ୍ୱର୍ ତାର୍ସ୍ଙ୍ଗ୍ ରିଲା ଲାଗି।
39ଆର୍ ସେ ଯିରୁଶାଲମ୍ ଆର୍ ଯିହୁଦିମ୍ନ୍କାର୍ ଦେଶେ ଜୁଇସ୍ବୁ କାମ୍ କ୍ଲା, ଅମିସ୍ବୁ ଲକ୍ମ୍ନ୍ ସେତିର୍ ସାକି। ତାକେ ସେମ୍ନ୍ କୁର୍ଶକାଟେ ଚ୍ଗାଇକ୍ରି ମ୍ର୍ନେ ମାର୍ଲାଇ। 40ମ୍ତର୍ ଇଶ୍ୱର୍ ତାକେ ତିନିଦିନାର୍ ଦିନ୍ ଆରେକ୍ ଜୀବନ୍ ଦ୍ଇକ୍ରି ଉଟାଇଲା, ତାକେ ସ୍ବୁ ଲକ୍ମ୍ନ୍ ଦ୍କ୍ଲାଇ ଆତ୍ତି। 41ମ୍ତର୍ ସ୍ବୁ ଲକ୍ମ୍ନ୍ ତାକେ ଦ୍କୁ ନ୍ହାର୍ଲାଇ, ଜୁଇସ୍ବୁ ଲକ୍ମ୍ନ୍ ଇଶ୍ଵରାର୍ ବାବିରିଲା ସାକି, ସେମ୍ନ୍କେ ଅମୁକ୍ମ୍ନ୍କେ ସେ ଦ୍କାଇ ଅଇଲାଆଚେ, ଇଶ୍ୱର୍ ତାକେ ଉଟାଇଲା ହ୍ଚେ ଅମିମ୍ନ୍ ତାର୍ସ୍ଙ୍ଗ୍ ମିସିକ୍ରି କାଇଆଚୁ ହିଇଆଚୁ।
42ଆର୍ ଲକ୍ମ୍ନ୍କାର୍ ଲ୍ଗେ ସୁବ୍କ୍ବର୍ ପର୍ଚାର୍ କ୍ରୁକେ, ଆର୍ ଇଶ୍ୱର୍ ଯେ ତାକେ ଜୀବନ୍ ରିଲା ଲକ୍ମ୍ନ୍କାର୍ ଆର୍ ମ୍ଲା ଲକ୍ମ୍ନ୍କାର୍ ବିଚାର୍ କ୍ରୁକେ ବାଚିଆଚେ ବ୍ଲି ସାକ୍ଯ ଦେମ୍କେ, ସେ ଅମୁକ୍ମ୍ନ୍ ଆଦେଶ୍ ଦିଲାଆଚେ। 43ଯେ ତାର୍ ଲ୍ଗେ ବିଶ୍ବାସ୍ କ୍ରେଦ୍, ତ୍ବେ ତାର୍ ନାଉଁର୍ ଶ୍କ୍ତି ତ୍ଇ ତାର୍ ପାପ୍ କେମା ଅଇଦ୍, ସ୍ବୁ ବବିଶତ୍ କ୍ତା କ୍ଉତା ଲକ୍ମ୍ନ୍ ତାର୍ ବିଷୟେ ଇ ବାବବାଣି କଇରିଲାଇ।”
ଯିହୁଦି ଚାଡି ବିନ୍ଜାତିର୍ ଲକ୍ମ୍ନ୍ ପବିତର୍ ଆତ୍ମା ହାଇଲାଇ
44ପିତର୍ ଶିକ୍ୟା ଦେତିରିଲାବ୍ଳ୍ ଜ୍ତେକ୍ ଲକ୍ ତାର୍ ବାକ୍ୟ ଶୁଣ୍ତି ରିଲାଇ, ସେ ସ୍ବୁଲକାର୍ ଉହ୍ରେ ପବିତର୍ ଆତ୍ମା ଆଇଲି। 45ଯିହୁଦି ଚାଡି ବିନ୍ଜାତିର୍ ଲକ୍ମ୍ନ୍କାର୍ ଉହ୍ରେ ହେଁ ଇଶ୍ୱର୍ ତାର୍ ପବିତର୍ ଆତ୍ମାକେ ଚାଡିଦିଲା ଆଚେ ବ୍ଲି ପିତରାର୍ ସ୍ଙ୍ଗ୍ ଆସିରିଲା ଯାଫ ସହରାର୍ ଯିହୁଦି ବିଶ୍ବାସିମ୍ନ୍ ବେସି କାବାଅଇଲାଇ।
46କାଇତାକ୍ ଯିହୁଦି ବିଶ୍ବାସିମ୍ନ୍ ସେ ଯିହୁଦି ଚାଡି ବିନ୍ଜାତିର୍ ଲକ୍ମ୍ନ୍କେ ଇଶ୍ଵରାର୍ ପର୍ଶଂସା କ୍ର୍ତି ରିଲାର୍ ଆର୍ ବିନ୍ବିନ୍ ବାଷାଇ ପାର୍ତେନା କ୍ର୍ତି ରିଲାର୍ ସେମ୍ନ୍ ଶୁଣ୍ଲାଇ। 47ସ୍ଡେବ୍ଳ୍ ପିତର୍ କଇଲା, “ଅମାର୍ ହର୍ ଇ ସ୍ବୁ ଲକ୍ମ୍ନ୍ ହେଁ ପବିତର୍ ଆତ୍ମା ହାଇଲାଇ ଆତ୍ତି, ଅବେ ଡୁବେନ୍ ନେମ୍କେ କେ ସେମ୍ନ୍କେ ମ୍ନା କ୍ରୁହାରେ?” 48ସେତାର୍ଗିନେ ସେ ସେମ୍ନ୍କେ ଯୀଶୁ ଖ୍ରୀଷ୍ଟର୍ ନାଉଁଏ ଡୁବେନ୍ ନେମ୍କେ ଆଦେଶ୍ ଦିଲା। ତାର୍ହ୍ଚେ ସେମ୍ନ୍ ତାକେ ଆରେକ୍ କ୍ତିଦିନ୍ ସେତି ତେବାମ୍କେ କାନିକ୍ର୍ମ୍ ଅଇଲାଇ।
Currently Selected:
ପ୍ରେରିତ 10: BDVNT
Highlight
Share
Copy
Want to have your highlights saved across all your devices? Sign up or sign in
Bodo Parja Bible (ବ୍ଡ଼୍ ହ୍ର୍ଜା) by The Love Fellowship is licensed under Creative Commons Attribution-ShareAlike 4.0 License.
