ପ୍ରେରିତ 9
9
ଶାଉଲାର୍ ମ୍ନ୍ ବାଦୁଲ୍ଲି
(ପ୍ରେରି. ୨୨:୬-୧୬; ୨୬:୧୨-୧୮)
1ମ୍ତର୍ ଶାଉଲ ଅବେହ୍ତେକ୍ ମାପ୍ରୁର୍ ଚେଲାମ୍ନ୍କେ ଲିନ୍ଦା ତାଳ୍ନା କ୍ର୍ତିରିଲା, ଆର୍ ମ୍ର୍ନେ ମାର୍ତା କ୍ତା ସ୍ଙ୍ଗ୍ ଦ୍ମ୍କାଇ କ୍ରି ମୁକିଆ ଜାଜକାର୍ ଲ୍ଗେ ଗ୍ଲା, 2ଆରେକ୍ ଯୀଶୁକେ ବିଶ୍ବାସ୍ କ୍ର୍ତା ଅଣ୍ତ୍ରା କି ମାଇଜି ଟକିମ୍ନ୍ ଇ ର୍ସ୍ତାଇ ଦ୍କାଇ ଅଉତି, ସେମ୍ନ୍କେ ଜ୍ନ୍କ୍ରି ବାନ୍ଦିକ୍ରି ଯିରୁଶାଲମ୍ ସ୍ହର୍କେ ଆଣୁ ହାର୍ତି, ଇତାର୍ଗିନେ ଦମେସ୍କସ୍ ସ୍ହରେ ରିଲା ସ୍ବୁ ପାର୍ତେନା ଗ୍ର୍ମ୍ନ୍କେ ହ୍ଣି ଚିଟି ଲେକାଇ ଆଣିରିଲା।
3ହ୍ଚେ ସେ ଦମେସ୍କସ୍ ସ୍ହର୍ ଲ୍ଗେ ଅଇଲା ବ୍ଳ୍, ଆକାଶେ ହ୍ଣି ଗଟେକ୍ ଉଜାଳ୍ ଆସିକ୍ରି ତାର୍ ଚାରିବାଟ୍ ଉଜାଳ୍ ଅଇଲି। 4ସେତାର୍ଗିନେ ସେ ବୁଏଁ ଅଦୁର୍ଲା, ଆର୍ ସ୍ର୍ଗେ ହ୍ଣି ସେ ଇକ୍ତା କଇଲାର୍ ଶୁଣ୍ଲା, “ଏ ଶାଉଲ, ଏ ଶାଉଲ, ତୁଇ କାଇକ୍ରୁକ୍ ଅମୁକେ ଲିନ୍ଦା ତାଳ୍ନା କ୍ରୁଲିସ୍।”
5ସେ କଇଲା, “ଏ ମାପ୍ରୁ, ତୁଇ କେ?” ଆର୍ ସେ କଇଲା, “ତୁଇ ଜାକେ ଲିନ୍ଦା ତାଳ୍ନା କ୍ରୁଲିସ୍ ମୁଇ ସେ ଯୀଶୁ। 6ମ୍ତର୍ ତୁଇ ଉଟ୍, ଆର୍ ସ୍ହରେ ଜା ତୁଇ କାଇରି କ୍ରୁକେ ହ୍ଳେଦ୍, ସେରି ସେତି ତକେ କ୍ଉଆ ଅଇଦ୍।” 7ଜୁଇସ୍ବୁ ଲକ୍ମ୍ନ୍ ଶାଉଲାର୍ ସ୍ଙ୍ଗ୍ ଜାତିରିଲାଇ, ସେମ୍ନ୍ ସେ ସ୍ବ୍ଦକେ ଶୁଣିକ୍ରି କାକେ ହେଁ ନ୍ଦେକ୍ଲାଇ ଲାଗି କାବା ଅଇଲାଇ।
8ଆରେକ୍ ଶାଉଲ ବୁଏଁ ହ୍ଣି ଉଟିକ୍ରି ଜ୍ଡେବ୍ଳ୍ ନିଜାର୍ ଆକି ଦ୍କ୍ଲା, ସ୍ଡେବ୍ଳ୍ ସେ କାଇରି ହେଁ ଦ୍କୁ ନ୍ହାର୍ଲା। ସେତାର୍ଗିନେ ତାର୍ସ୍ଙ୍ଗ୍ ଜାତିରିଲା ଲକ୍ମ୍ନ୍ ତାକେ ଆତେ ଦ୍ରି ଦମେସ୍କସ୍ ସ୍ହରେ ନିଲାଇ। 9ଆର୍ ସେ ତିନ୍ଦିନ୍ ହ୍ତେକ୍ କାଣା ଅଇରିଲା, ଆରେକ୍ କାଇରି ହେଁ ଅଣ୍ତା କାମ୍ ନ୍ହାର୍ଲା କି ହେଜ୍ ଡୁକୁ ନ୍ହାର୍ଲା।
10ଦମେସ୍କ ସ୍ହରେ ହନନୀୟ ନାଉଁର୍ ଗଟେକ୍ ଚେଲାରିଲା। ମାପ୍ରୁ ତାକେ ଦ୍କାଇଅଇକ୍ରି କଇଲା, “ହନନୀୟ” ସେ କଇଲା, “ହେଁ ମାପ୍ରୁ ମୁଇ ଶୁଣୁଲେ କ୍ଉ।” 11ସେତାର୍ଗିନେ ମାପ୍ରୁ ତାକେ କଇଲା, “ଉଟ୍ ସଳଖ୍ ନାଉଁର୍ ବାଟେ ଜା ଆର୍, ତାର୍ଷ ସ୍ହରେ ଯିହୁଦାର୍ ଗ୍ରେ ଶାଉଲ ନାଉଁର୍ ଗଟେଲକ୍କେ କଜା। କାଇତାକ୍ ଦ୍କା ସେ ପାର୍ତେନା କ୍ରୁଲା। 12ଆର୍ ଶାଉଲ ଜ୍ନ୍କ୍ରି ଆକି ଦ୍କୁହାରେ, ଇତାର୍ଗିନେ ହନନୀୟ ନାଉଁର୍ ଗଟେଲକ୍ ଆସିକ୍ରି ତାର୍ଉହ୍ରେ ତାର୍ ଆତ୍ ସ୍ଙ୍ଗାଇ କ୍ରି ପାର୍ତେନା କ୍ରୁଲା ବ୍ଲି ସେ ଚ୍ହ୍ନେ ଦ୍କିଆଚେ।”
13ମ୍ତର୍ ହନନୀୟ ଉତ୍ତର୍ ଦିଲା, “ମାପ୍ରୁ ଯିରୁଶାଲମ୍ ସ୍ହରେ ତର୍ ଲକ୍ମ୍ନ୍କେ ଇଲକ୍ ଯେ କ୍ତେକ୍ ଲିନ୍ଦା ତାଳ୍ନା କ୍ରିଆଚେ, ସେରି ମୁଇ ବେସିଲକାର୍ ତ୍ଇହ୍ଣି ଶୁଣି ଆଚି। 14ଆର୍ ଯିରୁଶାଲମାର୍ ଜ୍ତେକ୍ ଲକ୍ମ୍ନ୍ ତର୍ ନାଉଁଏ ପାର୍ତେନା କ୍ରୁଲାଇ, ସେମ୍ନ୍କେ ବାନ୍ଦିନେତାର୍ ଗିନେ ସେ ମୁକିଆ ଜାଜକାର୍ ଲ୍ଗେହ୍ଣି ଅଦିକାର୍ ହାଇଆଚେ।” 15ମ୍ତର୍ ମାପ୍ରୁ ତାକେ କଇଲା, “ଜ୍ହା। କାଇତାକ୍ ସେ ଯିହୁଦି ଚାଡି ବିନ୍ଜାତି ଲକ୍, ର୍ଜା ଆର୍ ଇସ୍ରାଏଲାର୍ ଲକ୍ମ୍ନ୍କାର୍ ମୁଏଁ ଅମାର୍ ନାଉଁ ଟେକ୍ତାର୍ ଗିନେ ଅମାର୍ ଏକ୍ଲା ବାଚ୍ଲା ଲକ୍। 16ଆରେକ୍ ଅମାର୍ ନାଉଁର୍ ଲାଗି ତାକେ ଯେ କ୍ତେକ୍ ଦୁକ୍ ସ୍ମ୍କ୍ ହ୍ଳେଦ୍, ସେରି ଅମି ତାକେ ଜାଣାମା।”
17ସେତାର୍ଲାଗି ହନନୀୟ ଜାଇକ୍ରି ସେ ଗ୍ରେ ହୁର୍ଲା, ଆରେକ୍ ତାର୍ଉହ୍ରେ ଆତ୍ ସଙ୍ଗାଇ କ୍ରି କଇଲା, “ଶାଉଲ ବାଇ, ମାପ୍ରୁ ବ୍ଲେକ୍ ଜୁଇ ଯୀଶୁ ଆସ୍ତା ବାଟେ ତୁମୁକେ ଦ୍କାଇ ଅଇଲା, ତୁଇ ଜ୍ନ୍କ୍ରି ଆକିଦ୍କୁହାର୍ସି ଆର୍ ପବିତର୍ ଆତ୍ମାଇ ବ୍ର୍ତି ଅଉସି, ଇତାର୍ଗିନେ ସେ ମକେ ହ୍ଟାଇ ଆଚେ।” 18ସେମାଡେ ତାର୍ ଆକିଏ ହ୍ଣି ମାଚାର୍ ଚ୍ର୍ଲା ହର୍ ଅଦୁର୍ଲି ଆର୍ ସେ ଆକି ଦ୍କ୍ଲା। ଆରେକ୍ ସେ ଆସି ଡୁବେନ୍ ନିଲା, 19ଆରେକ୍ ସେ କାଦି କାଇକ୍ରି ଶ୍କ୍ତି ହାଇଲା। ଇତାର୍ ହ୍ଚେ ସେ ଦମେସ୍କ ସ୍ହର୍ରେ ରେତା ଚେଲାମ୍ନ୍କାର୍ ସ୍ଙ୍ଗ୍ କ୍ତିଦିନ୍ ରିଲାଇ।
ଦମେସ୍କ ସ୍ହରେ ଶାଉଲାର୍ ପର୍ଚାର୍
20ଆରେକ୍ ଯୀଶୁ ଯେ ଇଶ୍ଵରାର୍ ହଇସି ଇରି ସେ ବେଗିଆସି ପାର୍ତେନା ଗ୍ର୍ଲ୍ଗେ ପର୍ଚାର୍ କ୍ରୁକେ ଲାଗ୍ଲା। 21ଆରେକ୍ ଜୁଇ ଲକ୍ମ୍ନ୍ ତାର୍ କ୍ତାକେ ଶୁଣ୍ଲାଇ, ସେମ୍ନ୍ ସ୍ବୁଲକ୍ ଚାନିଆ ଅଇ କ୍ମ୍କେ ଲାଗ୍ଲାଇ, “ଇ ନାଉଁ ଦ୍ରି ପାର୍ତେନା କ୍ର୍ତା ଲକ୍ମ୍ନ୍କେ ଯେ ଯିରୁଶାଲମ୍ମେ ନ୍ଷ୍ଟକ୍ର୍ତି ରିଲାଇ, ଆରେକ୍ ଜ୍ନ୍କ୍ରି ସେମ୍ନ୍କେ ବାନ୍ଦି ମୁକିଆ ଜାଜକ୍ମ୍ନ୍କାର୍ ଲ୍ଗେ ଜ୍ମ୍ହାରେ, ସେ ଉଦେସ୍ ନ୍ଇ ଇଜାଗାଇ ଆସିରିଲାଇ, ଇରିକାଇରି ସେରି ନଇ?” 22ମ୍ତର୍ ଶାଉଲ ଅଦିକ୍ ଶ୍କ୍ତିଶାଳି ଅଇ ଉଟ୍ଲା, ଆରେକ୍ ଏ ଯେ ଖ୍ରୀଷ୍ଟ ଇରି ହ୍ର୍ମାଣ୍ କ୍ରି ଦମେସ୍କ ସ୍ହର୍ବାସି ଯିହୁଦିମ୍ନ୍କେ ଚୁପ୍ଚାପ୍ କ୍ର୍ତି ରିଲାଇ।
23ବେସିଦିନ୍ ଗ୍ଲାହ୍ଚେ ଯିହୁଦିମ୍ନ୍ ତାକେ ମାରୁକେ ଗଟେତ୍ଇ ଉପାଇ କ୍ଲାଇ। 24ମ୍ତର୍ ସେମ୍ନ୍କାର୍ ଉପାଇ ଶାଉଲ କାନେ ଶୁଣ୍ଲା। ଆରେକ୍ ସେମ୍ନ୍ ଜ୍ନ୍କ୍ରି ତାକେ ମାରୁହାର୍ତି, ଇତାର୍ଗିନେ ସେମ୍ନ୍ ରାତିଦିନ୍ ଗାମ୍ଲ୍ଗାର୍ ବାଟେ ବାଟେ ଜାଗ୍ଲାଇ, 25ମ୍ତର୍ ରାତିବ୍ଳ୍ ତାର୍ ଚେଲାମ୍ନ୍ ଶାଉଲ୍କେ ନ୍ଇ କ୍ତିବାଟ୍ ଗଟେକ୍ ଡ୍ଲାଇ ଡର୍ସ୍ଙ୍ଗ୍ ବାନ୍ଦି ତାକେ ତ୍ଳେ ଉତ୍ରାଇ ଦିଲାଇ।
ଯିରୁଶାଲମ୍ ସ୍ହରେ ଶାଉଲ୍ ପର୍ଚାର୍ କ୍ଲା
26ତାର୍ହ୍ଚେ ଶାଉଲ୍ ଯିରୁଶାଲମ୍କେ ଜାଇ ଚେଲାମ୍ନ୍କାର୍ ସ୍ଙ୍ଗ୍ ମିସୁକେ ଚେଷ୍ଟା କ୍ର୍ତେରିଲା। ମ୍ତର୍ ସେ ଯେ ଗଟେକ୍ ଚେଲା, ଇରି ବିଶ୍ବାସ୍ ନ୍କେରି ସ୍ବୁଲକ୍ ତାକେ ଡିର୍ତି ରିଲାଇ। 27ମ୍ତର୍ ବର୍ଣ୍ଣବା ତାକେ ତାର୍ସ୍ଙ୍ଗ୍ ହ୍ଟାଇଲା ଚେଲାମ୍ନ୍କାର୍ ଲଗେ ଆଣ୍ଲା, ଆରେକ୍ ବାଟେ ସେ କ୍ନ୍କ୍ରି ମାପ୍ରୁର୍ ଦ୍ର୍ଶନ୍ ହାଇରିଲା ଆର୍ ସେ ଯେ ତାର୍ସ୍ଙ୍ଗ୍ କ୍ତା ଅଇଲା ଆର୍ କ୍ନ୍କ୍ରି ସେ ଦମେସ୍କରେ ଯୀଶୁର୍ ନାଉଁଏ ସାହାସ୍କ୍ରି ପର୍ଚାର୍ କ୍ରିରିଲା, ଇରିସ୍ବୁ ସେ ସେମ୍ନ୍କାର୍ ତ୍ଇ ଜାଣାଇଲା।
28ଆରେକ୍ ସେ ସେମ୍ନ୍କାର୍ ସ୍ଙ୍ଗ୍ ମିସିକ୍ରି ଯିରୁଶାଲମ୍ ସ୍ହରେ ର୍ଇ, 29ମାପ୍ରୁର୍ ନାଉଁ ସାହାସ୍କ୍ରି ପର୍ଚାର୍ କ୍ରୁକେ ଲାଗ୍ଲାଇ, ଆର୍, ସେ ଗ୍ରୀକ୍ ବାସା କ୍ଉତା ଯିହୁଦିମ୍ନ୍କାର୍ ସ୍ଙ୍ଗ୍ କ୍ତାବାର୍ତା ଆର୍ ଯୁକ୍ତି ତର୍କ କ୍ର୍ତିରିଲା, ମ୍ତର୍ ସେମ୍ନ୍ ତାକେ ମାରୁକେ ଚେଷ୍ଟା କ୍ରୁକେ ଲାଗ୍ଲାଇ। 30ସେରି ଜାଣିକ୍ରି ବାଇମ୍ନ୍ ତାକେ କାଇସରିୟା ସ୍ହର୍କେ କୁଦିନ୍ଇ ଜାଜେ ତାକେ ତାର୍ଷ ଦେଶେ ହ୍ଟାଇଲାଇ। 31ଅନ୍କ୍ରି ସ୍ବୁ ଯିହୁଦା ଦେଶେ, ଗାଲିଲୀ ଜିଲା ଆର୍ ଶମିରୋଣ ଦେଶାର୍ ମ୍ଣ୍ତଳି ବିଶ୍ବାସେ ବାଡ୍ଲାଇ ଆର୍ ମାପ୍ରୁକେ ଡିରିକ୍ରି ବ୍ଲ୍କାମ୍କ୍ରି ଶାନ୍ତି ହାଇଲାଇ, ଆର୍ ପବିତର୍ ଆତ୍ମାର୍ ସାଇଜରେ ସେମ୍ନ୍ ବାଡୁକେ ଲାଗ୍ଲାଇ।
ପିତର୍ ଲୂଦ ଆର୍ ଯାଫ ସ୍ହରେ
32ସେତାକ୍ ପିତର୍ ସ୍ବୁ ଦେଶେ ବୁଲି ବୁଲି ଯୀଶୁର୍ ସୁବ୍କ୍ବର୍ ପର୍ଚାର୍ କ୍ର୍ତିରିଲା, ଆର୍ ଲୂଦ ନାଉଁର୍ ସ୍ହରେ ବାସା କ୍ର୍ତିରିଲା ମାପ୍ରୁର୍ ଲକ୍ମ୍ନ୍କାର୍ ଲ୍ଗେ ଆଇଲା। 33ସେତି ତାକେ ଏନୀୟ ନାଉଁର୍ ଗଟ୍ଲକ୍କେ ବେଟ୍ ହାଇଲା, ଯେ କି ଆଟ୍ ବର୍ଷ ହ୍ତେକ୍ ରଗେ ହ୍ଳି ସଇରିଲା। ତାକେ କୁଷ୍ଟରଗ୍ ଅଇରିଲି। 34ପିତର୍ ତାକେ କଇଲା, “ଏନୀୟ, ଯୀଶୁ ଖ୍ରୀଷ୍ଟ ତକେ ବ୍ଲ୍ କ୍ରୁଲା। ଉଟ୍ ତର୍ ଅଚାଇଲା ପଟି ସ୍ଜାଉ।” ସେତାକ୍ ସେ ସେମାଡେ ଉଟ୍ଲା। 35ଆର୍ ଇରି ଦ୍ରିକ୍ରି ଲୂଦ ଆର୍ ଶାରଣ୍ ତ୍ଇ ବାସାକ୍ରିରିଲା ଲକ୍ମ୍ନ୍ ମାପ୍ରୁର୍ ଗିନେ ମ୍ନ୍ ଦିଲାଇ।
36ଯାଫ ସହର୍ ତ୍ଇ ଟାବିଥା ନାଉଁର୍ ଗଟେକ୍ ବିଶ୍ବାସ୍ କ୍ର୍ତା ମାଇଜି ଟକି ରିଲି, ଗ୍ରୀକ୍ ବାଷାତ୍ଇ ତାର୍ନାଉଁ ଦର୍କା ତାର୍ ଅର୍ତ ଅଇଲି ଚିତାଳ୍। ସେ ତାର୍ ସ୍ବୁ ସମୟ୍ ବ୍ଲ୍ କାମେ ଆର୍ ଗ୍ରିବ୍ ଇନସ୍ତା ଲକ୍ମ୍ନ୍କାର୍ ସେବାତ୍ଇ ଦେତିରିଲା। 37ସ୍ଡେବ୍ଳ୍ ସେ ରଗେ ହ୍ଳିକ୍ରି ମ୍ଲା, ତ୍ବେ ସେମ୍ନ୍ ତାକେ ଗ୍ଦାଇକ୍ରି ଗ୍ରାର୍ ଉହ୍ରାର୍ ବ୍କ୍ରାଇ ନ୍ଇ ସଳାଇ ଦିଲାଇ। 38ଆରେକ୍ ଯାଫ ସ୍ହର୍ ଲୂଦ ଗାମାର୍ ଲ୍ଗେରିଲା, ଯାଫ ସ୍ହରାର୍ ଚେଲାମ୍ନ୍ ପିତର୍ ଲୂଦ ଗାମେ ଆଚେ ବ୍ଲି ଶୁଣିକ୍ରି, ସେମ୍ନ୍ ଦୁଇ ଲକ୍କେ ଅନ୍କ୍ରି କ୍ବର୍ ହ୍ଟାଇ କଇଲାଇ, “ଦ୍ର୍ମ୍ କ୍ରି ତୁଇ ଅମାର୍ ଲ୍ଗେ ବେଗି ଆଉ।” 39ତ୍ବେ ପିତର୍ ସେମ୍ନ୍କାର୍ ସ୍ଙ୍ଗ୍ ଗ୍ଲା, ଜ୍ଡେବ୍ଳ୍ ଦର୍କା ସେତି ହଚ୍ଲା ସେମ୍ନ୍ ତାକେ ଗ୍ରାର୍ ଉହ୍ରାର୍ ବ୍କ୍ରାଇ ନିଲାଇ, ଆର୍ ରାଣ୍ତି ମାଇଜି ମ୍ନ୍ ତାର୍ ଚାରିହାକ୍ ରୁଣ୍ଡି ବ୍ସିକ୍ରି କାନ୍ଦି କାନ୍ଦି ସେ ସିଲାଇ ରିଲା ହ୍ଚିଆ ସ୍ବୁ ତାକେ ଦ୍କାମ୍କେ ଦ୍ର୍ଲାଇ।
40ମ୍ତର୍ ପିତର୍ ସ୍ବୁ ଲକ୍ମ୍ନ୍କେ ସେତିହ୍ଣି ବାର୍କ୍ଲା ଆର୍ ମାଣ୍ଡିକୁଟା ଟେସି ପାର୍ତେନା କ୍ଲା, ତାର୍ହ୍ଚେ ସେ ଦର୍କାରାର୍ ମ୍ଲା ମ୍ଳ୍ ହାକ୍ ଦ୍ରିକ୍ରି କଇଲା, “ଟାବିଥା ଉଟ୍” ସ୍ଡେବ୍ଳ୍ ଦର୍କାରାର୍ ଆକି ଉଗାଳି ଅଇଲି, ଆର୍ ସେ ପିତର୍କେ ଦ୍କି ଉଟିକ୍ରି ବ୍ସ୍ଲା। 41ଆର୍ ପିତର୍ ତାକେ ଆତେ ଦ୍ରିକ୍ରି ଉଟାଇଲା, ତାର୍ହ୍ଚେ ସେତି ରୁଣ୍ତିରିଲା ସ୍ବୁ ବିଶ୍ବାସିମ୍ନ୍କେ ଆର୍ ରାଣ୍ତି ମାଇଜି ମ୍ନ୍କେ କୁଦି ଦର୍କା ଜୀବନ୍ ହାଇଲା ବ୍ଲି ଦ୍କାଇଲା। 42ଇ ଗଟ୍ଣା ଯାଫ ସ୍ହରାର୍ ଚାରିବାଟ୍ ଆଉଜି ଅଇଲି, ଆର୍ ବେସି ଲକ୍ମ୍ନ୍ ମାପ୍ରୁକେ ବିଶ୍ବାସ୍ କ୍ଲାଇ। 43ଆରେକ୍ ପିତର୍ ବେସିଦିନ୍ ଯାଫ ସ୍ହର୍ ତ୍ଇ ଶିମୋନ୍ ନାଉଁର୍ ଗଟେକ୍ ଚାମ୍ଳା କାମ୍ କ୍ର୍ତିରିଲା ଲକାର୍ ଗ୍ରେରିଲା।
Currently Selected:
ପ୍ରେରିତ 9: BDVNT
Highlight
Share
Copy
Want to have your highlights saved across all your devices? Sign up or sign in
Bodo Parja Bible (ବ୍ଡ଼୍ ହ୍ର୍ଜା) by The Love Fellowship is licensed under Creative Commons Attribution-ShareAlike 4.0 License.
