ପ୍ରେରିତ 8
8
ଶାଉଲ ମ୍ଣ୍ଡଳି ଲ୍ଗେ ବିଶ୍ବାସିମ୍ନ୍କେ ଡ୍ଣ୍ତ୍ ଦେତା କ୍ତା
1ଶାଉଲ ସ୍ତିଫାନାର୍ ମ୍ର୍ନ୍ କେ ଟିକ୍ ବ୍ଲି କ୍ଉତିରିଲା, ସେଦିନ୍ ହ୍ଣି ଯିରୁଶାଲମ୍ ସ୍ହରେ ରିଲା ମ୍ଣ୍ତଳିର୍ ବିଶ୍ବାସିମ୍ନ୍କେ ଯିହୁଦିମ୍ନ୍ ବେସି ଲିନ୍ଦା ତାଳ୍ନା କ୍ଲାଇ। ତ୍ବେ ହ୍ଟାଇଲା ଚେଲାମ୍ନ୍ ଆର୍ ଅଲ୍ଗା ବିଶ୍ବାସିମ୍ନ୍ ଯିହୁଦା ଆର୍ ଶମିରୋଣୀଆ ଚାରିବାଟ୍ ଚିନ୍ବିନ୍ ଅଇ ହ୍ଳାଇଲାଇ। 2ଇରି ଅଇଲେକ୍ ହେଁ ଜୁଇଲକ୍ ଇଶ୍ଵର୍କେ ମାନ୍ତି ରିଲାଇ, ସେମ୍ନ୍ ବ୍ଡ୍ ଟଣ୍ତ୍କ୍ରି କାନ୍ଦ୍ଲାଇ ଆର୍ ସ୍ତିଫାନାର୍ ମ୍ଳ୍କେ ନ୍ଇକ୍ରି ତହ୍ଲାଇ। 3ମ୍ତର୍ ଶାଉଲ ମ୍ଣ୍ତଳିକେ ନ୍ଷ୍ଟ୍ କ୍ରୁକେ ଚେଷ୍ଟା କ୍ର୍ତିରିଲା, ଗ୍ରେ ଗ୍ରେ ଜାଇକ୍ରି ଖ୍ରୀଷ୍ଟକେ ବିଶ୍ବାସ୍ କ୍ର୍ତିରିଲା ଅଣ୍ଡ୍ରା ଆର୍ ମାଇଜି ଟମିମ୍ନ୍କେ ଜିକି ଆଣିକ୍ରି ଜ୍ଇଲେ ହୁରାଉତି ରିଲା।
ଶମିରୋଣୀୟ ତ୍ଇ ଫିଲିପ୍ପାର୍ ପର୍ଚାର୍ କ୍ଲା
4ସେତି ଜୁଇ ବିଶ୍ବାସିମ୍ନ୍ ଚିନ୍ବିନ୍ ଅଇରିଲାଇ, ସେମ୍ନ୍ ଜୁଇତି ଗ୍ଲେକ୍ ସେତି ଯୀଶୁର୍ ସୁବ୍କ୍ବର୍ ପର୍ଚାର୍ କ୍ର୍ତି ରିଲାଇ। 5ଆରେକ୍ ଫିଲିପ୍ପ ଶମିରୋଣାର୍ ବ୍ଡ୍ ସ୍ହରେ ଗ୍ଲା ଆର୍ ଲକ୍ମ୍ନ୍କାର୍ ଲ୍ଗେ ଖ୍ରୀଷ୍ଟର୍ ବିଷୟେ ପର୍ଚାର୍ କ୍ଲା। 6ଆର୍ ସେତିର୍ ଲକ୍ମ୍ନ୍ ଫିଲିପ୍ପାର୍ କ୍ତାଶୁଣି ଆର୍ ଚମ୍ତ୍କାର୍ କାମ୍ ସ୍ବୁ ଦ୍ରିକ୍ରି ଆରେକ୍ ତାର୍କ୍ତା ଶୁଣୁକେ ମ୍ନ୍କ୍ଲାଇ। 7କାଇତାକ୍ ବୁତ୍ଆତ୍ମା ଡ୍ସିରିଲା ଗାଦାଲକ୍ ମ୍ନ୍କାର୍ ତ୍ଇହ୍ଣି ସେ ଆତ୍ମା ବ୍ଡ୍ ଟଣ୍ତ୍କ୍ରି ବାରି ଜାତିରିଲାଇ, ଆରେକ୍ ବେସି କୁଷ୍ଟରଗି ଆର୍ ଚଟାମ୍ନ୍ ହେଁ ବ୍ଲ୍ ଅଇଲାଇ। 8ସେତାର୍ଗିନେ ସେ ସ୍ହରାର୍ ଲକ୍ମ୍ନ୍ ବେସି ସ୍ର୍ଦା ଅଇଲାଇ।
ଗୁଣିଆ କାମ୍କ୍ର୍ତା ଶିମୋନ୍
9ସ୍ଡେବ୍ଳ୍ ଶିମୋନ୍ ନାଉଁର୍ ଗଟେଲକ୍ ସେ ସ୍ହରେ ହୁର୍ବେ ବାସାକ୍ରି ଗୁଣିଆ କାମ୍କ୍ରି ସେତି ଶମିରୋଣ ଜାତିର୍ ଲକ୍ମ୍ନ୍କେ ବକୁଆ କ୍ରି ନିଜ୍କେ ଗଟେକ୍ ବ୍ଡ୍ଲକ୍ ବ୍ଲି କ୍ଉତିରିଲା। 10ସେ ସ୍ହରାର୍ ସ୍ବୁଲକ୍ ବ୍ଡ୍ ତ୍ଇହ୍ଣି ସାନ୍ ହ୍ତେକ୍ ତାକ୍ ମାନ୍ତି ରିଲାଇ, ଆର୍ କ୍ଉତିରିଲାଇ ଇଶ୍ଵରାର୍ ଜୁଇ ଶ୍କ୍ତି ଆଚେ, ସେ ଶ୍କ୍ତିକେ ଇମାନାଇ ହେଁ ହାଇଲା ଆଚେ। 11ଲକ୍ମ୍ନ୍ ତାକେ ବେସି ମାନ୍ତି ରିଲାଇ କାଇତାକ୍ ସେ ବେସିଦିନ୍ ଆଗେହ୍ଣି ଗୁଣିଆ କାମ୍କ୍ରି ସ୍ବୁ ଲକ୍ମ୍ନ୍କେ କାବା କ୍ରିରିଲା।
12ମ୍ତର୍ ଜ୍ଡେବ୍ଳ୍ ଫିଲିପ୍ପ ଇଶ୍ଵରାର୍ ରାଇଜାର୍ ସୁବ୍କ୍ବର୍ ଆର୍ ଯୀଶୁ ଖ୍ରୀଷ୍ଟର୍ ବିଷୟେ ପର୍ଚାର୍ କ୍ଲା, ସ୍ଡେବ୍ଳ୍ ଲକ୍ମ୍ନ୍ ତାର୍ କ୍ତାକେ ବିଶ୍ବାସ୍ କ୍ରି, ଅଣ୍ତ୍ରା ହିଲା ଆର୍ ମାଇଜି ଟକିମ୍ନ୍ ସ୍ବୁ ଡୁବେନ୍ ନିଲାଇ। 13ଆରେକ୍ ଶିମୋନ୍ ହେଁ ନିଜେ ବିଶ୍ବାସ୍ କ୍ଲା ଆର୍ ଡୁବେନ୍ ନିଲା, ସେ ଡୁବେନ୍ ନିଲା ହ୍ଚେ ଫିଲିପ୍ପାର୍ ସ୍ଙ୍ଗେ ସ୍ଙ୍ଗେ ରିଲା, ତାକାର୍ ସ୍ଙ୍ଗ୍ ର୍ଇକ୍ରି ସେ ବ୍ଡ୍ ବ୍ଡ୍ ଚମ୍ତ୍କାର୍ କାମ୍ ସ୍ବୁ ଦ୍କିକ୍ରି ଚାନିଆ ଅମ୍କେ ଲାଗ୍ଲା।
ଶମିରୋଣ ଜିଲାଇ ପିତର୍ ଆର୍ ଯୋହନ୍
14ଶମିରୋଣର୍ ଲକ୍ମ୍ନ୍ ଯେ ଇଶ୍ଵରାର୍ ବାକ୍ୟ ମାନିଆତ୍ତି ଇରି ଜ୍ଡେବ୍ଳ୍ ଯିରୁଶାଲମ୍ମେ ରେତା ହ୍ଟାଇଲା ଚେଲାମ୍ନ୍ ଶୁଣ୍ଲାଇ, ସ୍ଡେବ୍ଳ୍ ସେମ୍ନ୍ ପିତର୍ ଆର୍ ଯୋହନ୍କେ ସେମ୍ନ୍କାର୍ ଲ୍ଗେ ହ୍ଟାଇଲାଇ। 15ସେମ୍ନ୍ ଜାଇ ସେ ଲକ୍ମ୍ନ୍ ଜ୍ନ୍କ୍ରି ପବିତର୍ ଆତ୍ମା ହାଇକ୍ରି, ସେତାର୍ଲାଗି ସେମ୍ନ୍କାର୍ ହାଇଁ ପାର୍ତେନା କ୍ଲା, 16କାଇତାକ୍ ଅବେହ୍ତେକ୍ ପବିତର୍ ଆତ୍ମା ସେମ୍ନ୍କାର୍ ବିତ୍ରେ କାର୍ ଉହ୍ରେ ଆସି ନ୍ରିଲା, ମ୍ତର୍ ସେମ୍ନ୍ ମାପ୍ରୁ ଯୀଶୁର୍ ନାଉଁଏ ଡୁବେନ୍ ଅଇରିଲା। 17ସ୍ଡେବ୍ଳ୍ ସେମ୍ନ୍ ସେମ୍ନ୍କାର୍ ଉହ୍ରେ ଆତ୍ ସ୍ଙ୍ଗାଇଲା, ଆର୍ ସେମ୍ନ୍ ପବିତର୍ ଆତ୍ମାଇ ଅଦିକାର୍ ହାଇଲାଇ।
18ହ୍ଟାଇଲା ଚେଲାମ୍ନ୍କାର୍ ମୁଣ୍ତ୍ ଉହ୍ରେ ଆତ୍ ସ୍ଙ୍ଗାଇଲେକ୍ ଆତ୍ମା ଆସ୍ତି ରିଲାର୍ ଦ୍କି, ଶିମୋନ୍ ସେମ୍ନ୍କେ ଡାବୁ ଜାଚିକ୍ରି କଇଲା, 19“ମକେ ହେଁ ଶ୍କ୍ତି ଦିଆ, ଜ୍ନ୍କ୍ରି ମୁଇ ଜୁଇଲକାର୍ ମୁଣ୍ତ୍ ଉହ୍ରେ ଆତ୍ ସ୍ଙ୍ଗାଇନ୍, ସେ ପବିତର୍ ଆତ୍ମା ହାଉଆସ୍।” 20ମ୍ତର୍ ପିତର୍ ତାକେ କଇଲା, “ତୁଇ ଆର୍ ତର୍ ଡାବୁସ୍ଙ୍ଗ୍ ନ୍ଷ୍ଟ ଅଉଅ, କାଇତାକ୍ ତୁଇ ଡାବୁର୍ ଗିନେ ଇଶ୍ଵରାର୍ ଦାନ୍ ଗେନୁକେ ବାବ୍ଲିସ୍। 21ଇଶ୍ଵରାର୍ କାମେ ତୁମାର୍ମ୍ନ୍କାର୍ ବାଗ୍ ନାଇ କି ଅଦିକାର୍ ନାଇ, କାଇତାକ୍ ଇଶ୍ଵରାର୍ ଆଗେ ତୁମାର୍ ମ୍ନ୍ ବାବ୍ନା ବ୍ଲ୍ନାଇ। 22ସେତାକ୍ ତୁମାର୍ ଇ କ୍ରାପ୍ ବାବ୍ନା ବ୍ନ୍ଦ୍ କ୍ରା ଆର୍ ପାପେହ୍ଣି ମ୍ନ୍ ବାଦ୍ଲାଇ କ୍ରି ମାପ୍ରୁ ତ୍ଇ ପାର୍ତେନା କ୍ରା, କେଜାଣ୍ ଇଶ୍ୱର୍ ତୁମାର୍ କ୍ରାପ୍ ବିଚାର୍କେ କେମା କ୍ରି ଦ୍ଇଦ୍।
23କାଇତାକ୍ ନିଜାର୍ କ୍ରାପ୍ ବ୍ଯବହାର୍ ତ୍ଇ ଆର୍ ପାପେ ବାନ୍ଦ୍ଲା ହର୍ ଅଇ ଆଚ୍ସି ବ୍ଲି ମୁଇ ଦ୍କୁଲେ।” 24ସେତାର୍ଲାଗି ଶିମୋନ୍ ଉତର୍ଦିଲା, “ତୁମିମ୍ନ୍ ଜୁଇରି ଜୁଇରି କଇଲାସ୍ ସେତାର୍ କାଇ ବିଷଇ ଜ୍ନ୍କ୍ରି ମର୍ହାଇଁ ଗ୍ଟିନ୍କେରେ, ସେତାର୍ଲାଗି ତୁମିମ୍ନ୍ ମର୍ହାଇଁ ମାପ୍ରୁର୍ ତ୍ଇ ପାର୍ତେନା କ୍ରା।” 25ଇ ପର୍କାର୍ ସେମ୍ନ୍ ସାକ୍ଯ ଦ୍ଇ ଆର୍ ମାପ୍ରୁର୍ ବାକ୍ୟ କଇ ଶମିରୋଣୀୟ ଲ୍ଗାର୍ ଗାମ୍ ମ୍ନ୍କେ ଯିରୁଶାଲମ୍କେ ଲେଉଟି ଆସ୍ତି ରିଲାଇ ସେମ୍ନ୍ ସୁବ୍କ୍ବର୍ ପର୍ଚାର୍ କ୍ଲାଇ।
ଫିଲିପ୍ପ ଆର୍ ଇଥିଓପୀଆ ବେଜୁ
26ହ୍ଚେ ମାପ୍ରୁର୍ ଗଟେକ୍ ଦୂତ୍ ଫିଲିପ୍ପ କଇଲା, “ଉଟ୍ ଦକିଣ ଦିଗ୍ ଜୁଇବାଟ୍ ଯିରୁଶାଲମ୍ ସ୍ହରେ ହ୍ଣି ଗ୍ଜା ସ୍ହର୍ ବାଟ୍ ଅଦ୍ରି ଆଚେ, ସେ ବାଟ୍କେ ଜ୍ହା ସେରି ଶୁନ୍ସାନ୍ ଜାଗା।” 27ସେତାର୍ଲାଗି ସେ ବାରିଗ୍ଲା, ସେମାଡେ ଇଥିଓପୀଆ ଦେଶାର୍ ଗଟେକ୍ ଲକ୍ସ୍ଙ୍ଗ୍ ମିସ୍ଲା, ଯେ ଏକ୍ଲା ବେଜୁ ରିଲା ସେ ଏକ୍ଲା ବ୍ଡ୍ ଅଦିକାରି ରିଲା ଯେ କି ଇଥିଓପୀଆ ଦେଶାର୍ ରାଣିର୍ ସ୍ବୁ ଦ୍ନ୍ ସମ୍ପତି ଦ୍କା ଶୁଣା କ୍ର୍ତିରିଲା, ସେ ଆରାଦନା କ୍ରୁକେ ଯିରୁଶାଲମ୍କେ ଆସିରିଲା।
28ସେ ନିଜାର୍ ଦେଶ୍କେ ବାଉଡି ଜାତିରିଲା ଆର୍ ର୍ତ୍ ଉହ୍ରେ ବ୍ସି ଯିଶାଇୟ ବବିଶତ୍ କ୍ତା କ୍ଉତାଲକ୍ ଲେକ୍ଲା ଦ୍ର୍ମ୍ ସାଶ୍ତର୍କେ ବେଲ୍କି ଅଇ ହଳ୍ତି ରିଲା। 29ସ୍ଡେବ୍ଳ୍ ପବିତର୍ ଆତ୍ମା ଫିଲିପ୍ପକେ କଇଲା, “ଲ୍ଗେ ଜାଇ ଇ ର୍ତାର୍ ସ୍ଙ୍ଗ୍ ଦ୍ର୍।” 30ସେତାର୍ଲାଗି ଫିଲିପ୍ପ ଦ୍ବ୍ଳି ଜାଇ ର୍ତ୍ ଲ୍ଗେ ହଚ୍ଲା ଆର୍ ଯିଶାଇୟ ବବିଶତ୍ କ୍ତା କ୍ଉତା ଲକାର୍ ଶାସ୍ତର୍ ହାଟ୍ ହଳ୍ତି ରିଲାର୍ ଶୁଣି ହ୍ଚାର୍ଲା, “ତୁଇ ଜାଇରି ହ୍ଳୁଲିସ୍, ସେରି କାଇରି ବୁଜୁଲିସ୍?” 31ବ୍ଡ୍ ଅଦିକାରି କଇଲା, “ଯଦି କେ ମକେ ବୁଜାଇ ନ୍ଦିଲେକ୍ ମୁଇ କ୍ନ୍କ୍ରି ବୁଜୁ ହାରି?” ସେ ଫିଲିପ୍ପକେ ର୍ତ୍ ଉହ୍ରେ ଚ୍ଗିଆସି ନିଜାର୍ ଲଗେ ବ୍ସୁକେ ଗ୍ଉଆରି କ୍ଲା।
32ଶାସ୍ତର୍ ଜୁଇ ହ୍ତେକ୍ ସେ ହାଟ୍ ହଳ୍ତି ରିଲା, ସେରି ଇରି, “ସେ ମେଣ୍ଢା ହର୍ ଅଇ ମ୍ରୁକେ ନିଆ ଅଇଲି, ଆରେକ୍ ମେଣ୍ଢାର୍ ବାଳ୍ କାଟ୍ତା ଲକାର୍ ମୁଏଁ ମେଣ୍ଢାହିଲା ଜ୍ନ୍କ୍ରି ଚୁପ୍ ର୍ଇଦ୍, ସେନ୍କ୍ରି ସେ ନିଜେ ଟଣ୍ତ୍ ହୁଟାଇ ନ୍କେଲା। 33ତାକେ ଅପ୍ମାନ୍ କ୍ଲାଇ ଆର୍ ନିଆଇ ନ୍ଦିଲାଇ। ତାର୍ ବ୍ଉଁଶାର୍ କ୍ତାକେ କ୍ମ୍ହାରାସ୍? କାଇତାକ୍ ତାର୍ ଜୀବନ୍ ହୁର୍ତିବିର୍ ସ୍ବୁବାଟ୍ ବିଚ୍ରି ଅଇଲି।”
34ବ୍ଡ୍ ଅଦିକାର୍କେ ଉତ୍ତର୍ ଦ୍ଇ ଫିଲିପ୍ପକେ କଇଲା, “ମୁଇ ତକେ ଅନୁରଦ୍ କ୍ରୁଲେ, ବବିଶତ୍ କ୍ତା କ୍ଉତା ଲକ୍ମ୍ନ୍କାର୍ ବିଷୟେ ଇକ୍ତା କ୍ଉତି? ତର୍ ବିଷୟେ କି ଆର୍ କାର୍ ବିଷୟେ?” 35ସେତାର୍ଗିନେ ଫିଲିପ୍ପ ଟଣ୍ତ୍ ହୁଟାଇକ୍ରି ଦ୍ର୍ମ୍ ଶାସ୍ତରାର୍ ଇ ବାକ୍ୟ କ୍ମ୍କେ ଆରାମ୍ କ୍ରି ତାର୍ ଲ୍ଗେ ଯୀଶୁର୍ ସୁବ୍କ୍ବର୍ ପର୍ଚାର୍ କ୍ଲା।
36ଆରେକ୍ ସେମ୍ନ୍ ର୍ସ୍ତାଇ ଜ୍ମ୍ ଜ୍ମ୍ ଗଟେକ୍ ହାଣିରିଲା ଜାଗାଇ କେଟ୍ଲାଇ। ସେତି ବ୍ଡ୍ ଅଦିକାରି କଇଲା, “ଇତି ହାଣି ଆଚେ, ଅବେ ମୁଇ ଡୁବେନ୍ ନେତାର୍ କାଇ ବାଦା ଆଚେକି?” 37ଫିଲିପ୍ପ କଇଲା, “ତୁଇ ସ୍ବୁ ବିଷୟେ ମ୍ନ୍ ଦିଆନ୍ କ୍ରି ଯଦି ବିଶ୍ବାସ୍ କ୍ର୍ସି, ତ୍ବେ ସେରି ଅଇଲେକ୍ ଅମ୍ହାରେ।” ସେତାର୍ଗିନେ ସେ ଉତ୍ତର୍ ଦିଲା, “ଯୀଶୁ ଖ୍ରୀଷ୍ଟ ହ୍କା ଇଶ୍ଵରାର୍ ହିଲା, ଇରି ମୁଇ ବିଶ୍ବାସ୍ କ୍ରୁଲେ।” 38ଆରେକ୍ ସେ ର୍ତ୍କେ ଟିଆକ୍ରୁକେ ଆଦେଶ୍ ଦିଲା, ତ୍ବେ ଫିଲିପ୍ପ ଆର୍ ଜଡେକ୍ ବେଜୁ ଲକ୍ ହାଣି ବିତ୍ରେ ଗ୍ଲାଇ, ଆର୍ ଫିଲିପ୍ପ ତାକେ ଡୁବେନ୍ ଦିଲା।
39ଜ୍ଡେବ୍ଳ୍ ସେମ୍ନ୍ ହାଣି ବିତ୍ରେହ୍ଣି ହ୍ଦାଇ ବାରାଇ ଆଇଲାଇ, ସ୍ଡେବ୍ଳ୍ ଇଶ୍ଵରାର୍ ପବିତର୍ ଆତ୍ମା ଫିଲିପ୍ପକେ ନିଲା, ଆରେକ୍ ବ୍ଡ୍ ଅଦିକାରି ଫିଲିପ୍ପକେ ଦ୍କୁ ନ୍ହାର୍ଲା। ମ୍ତର୍ ତାକେ ଇଶ୍ୱର୍ ର୍କ୍ଷା କ୍ଲା, ସ୍ର୍ଦା ଅଇକ୍ରି ତାର୍ ବାଟେ ସେ ଇଣ୍ତିଗ୍ଲା। 40ମ୍ତର୍ ଫିଲିପ୍ପ ଅଷ୍ଦୋଦ୍ ସ୍ହରେ ଲ୍ଗେ ଆଚେ ବ୍ଲି ଜାନ୍ଲା, ସେତିହ୍ଣି କାଇସରିୟା ଦେଶେ ଜ୍ମ୍ ଜ୍ମ୍ ଜାତାବାଟେ ରିଲା ସ୍ହର୍ମ୍ନ୍କେ ସେ ସୁବ୍କ୍ବର୍ ପର୍ଚାର୍ କ୍ଲା।
Currently Selected:
ପ୍ରେରିତ 8: BDVNT
Highlight
Share
Copy
Want to have your highlights saved across all your devices? Sign up or sign in
Bodo Parja Bible (ବ୍ଡ଼୍ ହ୍ର୍ଜା) by The Love Fellowship is licensed under Creative Commons Attribution-ShareAlike 4.0 License.
