ପ୍ରେରିତ 3
3
ପିତର୍ ଗଟେକ୍ ଚଟାଲକ୍କେ ବ୍ଲ୍କ୍ଲା
1ଗଟେଦିନ୍ ପିତର୍ ଆର୍ ଯୋହନ୍ ସ୍ଞ୍ ବେଳାର୍ ତିନିଟା ବ୍ଳ୍ ମନ୍ଦିରେ ଜାତିରିଲାଇ, ସ୍ଡେବ୍ଳ୍ ପାର୍ତେନା କ୍ର୍ତା ସମୟ୍ ରିଲି। 2ସେତି ସୁନ୍ଦୁର୍ ନାଉର୍ ବାଟ୍ଗଳି ଲ୍ଗେ ଜ୍ଲମେହ୍ଣି ଗଟେକ୍ ଚଟାକେ ସ୍ବୁଦିନ୍ ବଇକ୍ରି ଆଣି ସେତି ଉତ୍ରାଉତି ରିଲାଇ, ଆର୍ ସେ ମନ୍ଦିରେ ଜାତିରିଲା ଲକ୍ମ୍ନ୍କେ ବିକ୍ ମାଗ୍ତି ରିଲା। 3ସେ ପିତର୍ ଆର୍ ଯୋହନ୍ ମନ୍ଦିରେ ଜାତିରିଲାର୍ ଦ୍କ୍ଲା, ଆର୍ ସେ ସେମ୍ନ୍କେ ବିକ୍ ମାଗ୍ଲା। 4ପିତର୍ ଆର୍ ଯୋହନ୍ ସେ ଚଟାକେ ସିଦା ଦ୍କ୍ଲାଇ, ଆରେକ୍ ପିତର୍ ସେ ଚଟାକେ କଇଲା, “ଅମାର୍ ବାଟ୍ ଦ୍କ୍।” 5ସେତାର୍ଗିନେ ସେ ସେମ୍ନ୍ କାଇରିଅଲ୍ ଦେତି ବ୍ଲି ଆଶାକ୍ରି ତାକାର୍ ବାଟ୍ ଦ୍କ୍ଲା। 6ମ୍ତର୍ ପିତର୍ କଇଲା, “ମର୍ଲ୍ଗେ ରୁପା କି ସନା ନାଇ ମ୍ତର୍ ଜୁଇରିଆଚେ ସେରି ମୁଇ ତକେ ଦେମ୍ଲେ, ନାଜରିତ ଯୀଶୁ ଖ୍ରୀଷ୍ଟର୍ ନାଉଁଏ ଟିଆ ଅଉ ଆର୍ ଇଣ୍ତ୍।” 7ଆରେକ୍, ସେ ଅନ୍କ୍ରି କଇକ୍ରି ତାର୍ କାତା ଆତେ ଦ୍ରିକ୍ରି ତାକେ ଉଟାଇଲା। ତ୍ବେ ସେ ଦାହ୍ରେ ସେ ଚଟାର୍ ଆତ୍ଗଡ୍ ଗ୍ଟିସ୍ବୁ ଶ୍କ୍ତି ହାଇଲି, 8ଆର୍ ସେ ଚଟା କୁଦାମାରି ଟିଆଅଇଲା। ଆର୍ ସେ ଇବାଟ୍ ସେବାଟ୍ ଇଣ୍ତୁକେ ଦ୍ର୍ଲା, ତାର୍ହ୍ଚେ ସେ ପିତର୍ ଆର୍ ଯୋହନାର୍ ସ୍ଙ୍ଗ୍ ମିସିକ୍ରି ଇଶ୍ଵରାର୍ ମଇମା କ୍ରୁ କ୍ରୁ ମନ୍ଦିରେ ହୁର୍ଲା। 9ସେତିର୍ ସ୍ବୁ ଲକ୍ମ୍ନ୍ ସେ ଚଟାଲକ୍କେ ଇଣ୍ତ୍ତାର୍ ଆର୍ ଇଶ୍ଵରାର୍ ମଇମା କ୍ର୍ତାର୍ ଦ୍କ୍ଲାଇ, 10ଆର୍ କଇଲାଇ ଇ ମାନାଇ ତୋ ସେ ମନ୍ଦିରାର୍ ସୁନ୍ଦୁର୍ ନାଉର୍ ବାଟ୍ଗଳି ଲ୍ଗେ ବ୍ସିକ୍ରି ବିକ୍ ମାଗ୍ତି ରିଲା, ବ୍ଲି ତାକେ ଚିନ୍ଲାଇ, ଆର୍ ତାର୍ଗିନେ ଜୁଇରି ଗଟିରିଲି, ସେରି ଜାଣିକ୍ରି ସେସ୍ବୁ ଲକ୍ମ୍ନ୍ ଚାନିଆ ଅଇଲାଇ ଆର୍ କାବାଅଇଲାଇ।
11ସେ ମାନାଇ ପିତର୍ ଆର୍ ଯୋହନାର୍ ସ୍ଙ୍ଗ୍ ଶଲୋମନାର୍ ମଣ୍ତପ୍ ଲ୍ଗେ ଦ୍କ୍ଲାଇ, ସେ ସ୍ବୁ ଲକ୍ମ୍ନ୍ ଚାନିଆ ଅଇଲାଇ ଆର୍ ସେ ମଣ୍ତପ୍ ଲ୍ଗେ ଦ୍ବ୍ଳି ଆଇଲାଇ। 12ପିତର୍ ତାକାର୍ ଲ୍ଗେ ଦ୍ବ୍ଳି ଆସ୍ତିରିଲା ଲକ୍ମ୍ନ୍କେ ଦ୍କ୍ଲା ଆର୍ କଇଲା, “ଏ ଇସ୍ରାଏଲ୍ର ଲକ୍ମ୍ନ୍, କାଇତାକ୍ ତୁମିମ୍ନ୍ ଇ ମାନାଇର୍ ବିଷୟେ ଚାନିଆ ଅମ୍ଲାସ୍? କାଇତାକ୍ ତୁମିମ୍ନ୍ ଆକି ମ୍ରାଇ କ୍ରି ଦ୍କୁଲାସ୍? ତୁମିମ୍ନ୍ କାଇରି ବାବୁଲାସ୍ ଯେ ଅମିମ୍ନ୍ ଅମାର୍ ନିଜାର୍ ଶ୍କ୍ତି ସ୍ଙ୍ଗ୍ ଆର୍ ଅମାର୍ ଦ୍ର୍ମ୍ କାମାର୍ ଗିନେ ଇ ମାନାଇକେ ଇଣ୍ତୁକେ ଶ୍କ୍ତି ଦିଲୁ ଆଚୁ। 13ଅମାର୍ ଦାଦିବାବୁ ଅବ୍ରାହାମ୍, ଇସ୍ହାକ୍ ଆର୍ ଯାକୁବାର୍ ଇଶ୍ୱର୍, ତାର୍ ଦାସ୍ ଯୀଶୁକେ ତାର୍ ନିଜାର୍ ମଇମା ଦିଲାଆଚେ। ମ୍ତର୍ ତୁମିମ୍ନ୍ ତାକେ ମ୍ରୁକେ ଶାସନ୍କ୍ର୍ତା ଲକ୍ମ୍ନ୍କାର୍ ଲ୍ଗେ ସ୍ହ୍ରି ଦିଲାସ୍, ଆର୍ ପିଲାତ ଜ୍ଡେବ୍ଳ୍ ତାକେ ମୁକ୍ଳାମ୍କେ ମ୍ନ୍କ୍ର୍ତି ରିଲା, ସ୍ଡେବ୍ଳ୍ ତୁମିମ୍ନ୍ ମ୍ନ୍ ନ୍କେଲାସ୍। 14ଯୀଶୁ ଗଟେକ୍ ପବିତର୍ ଆର୍ ଦ୍ର୍ମ୍ ଲକ୍ରିଲା, ମ୍ତର୍ ତୁମିମ୍ନ୍ ତାକେ ମ୍ନ୍ ନ୍କେଲାସ୍, ଆର୍ ତାର୍ ବାଦୁଲେ ଗଟେକ୍ ମାନାଇ ମାର୍ତା ଲକ୍କେ ଚାଡି ଦେମ୍କେ ପିଲାତ ର୍ଜାକେ କଇଲାସ୍, 15ମ୍ତର୍ ସ୍ତ୍ ଜୀବନାର୍ ବାଟ୍ ଦ୍କାଉତା ଲକ୍କେ ତୁମିମ୍ନ୍ ମ୍ର୍ନେ ମାର୍ଲାସ୍। ମ୍ତର୍ ଇଶ୍ୱର୍ ତାକେ ଆରେକ୍ ଜୀବନ୍ ଦ୍ଇକ୍ରି ଉଟାଇଲା ଆଚେ, ଅମିମ୍ନ୍ ତାର୍ ସାକି। 16ଆରେକ୍ ତାର୍ ନାଉଁଏ ବିଶ୍ବାସ୍ କ୍ଲାକେ ଇ ଚଟା ବ୍ଲ୍ ଅଇଲାଆଚେ, ଜୁଇ ଗଟ୍ଣାକେ ଆଜି ତୁମି ନିଜେ ଦ୍ରିକ୍ରି ସ୍ତ୍ବ୍ଲି ଜାଣୁଲାସ୍। ସେ ତାର୍ ନାଉଁଏ ବିଶ୍ବାସ୍ କ୍ଲାଲାଗି ସେ ବ୍ଲ୍ ଅଇଲାଆଚେ, ଯୀଶୁର୍ ଲ୍ଗେ ବିଶ୍ବାସ୍ କ୍ଲାର୍ ଗିନେ ବ୍ଲ୍ ଅଇଲାଆଚେ ଇରି ତୁମିମ୍ନ୍ ନିଜେ ଦ୍କି ଆଚାସ୍। 17ଆର୍ ଅବେ, ଏ ବାଇମନ୍ ମୁଇ ଜାଣୁଲେ, ଯେ ତୁମିମ୍ନ୍ ଆର୍ ତୁମାର୍ ନେତାମ୍ନ୍ ଜୁଇରି ଯୀଶୁର୍ ଗିନେ କ୍ରିଆଚାସ୍, ସେରି ନ୍ଜାଣିକ୍ରି କ୍ରିଆଚାସ୍। 18ମ୍ତର୍ ଇଶ୍ୱର୍ ହୁର୍ବେ ବବିଶତ୍ କ୍ତା କ୍ଉତା ଲକ୍ମ୍ନ୍ କଇରିଲାଇ, ଖ୍ରୀଷ୍ଟକେ ବେସି ଦୁକ୍କ୍ଷ୍ଟ ବଗୁକେ ହ୍ଳେଦ୍, ସେରି ଅବେ ହୁରା ଅଇଲିଆଚେ। 19ତୁମିମ୍ନ୍ ତୁମାର୍ ତୁମାର୍ ମ୍ନ୍କେ ପାପେହ୍ଣି ମ୍ନ୍ ବାଦ୍ଲାଉଆ, ଆର୍ ଇଶ୍ଵରାର୍ ଲ୍ଗେ ଲେଉଟି ଆଶା, ତ୍ବେ ସେ ତୁମାର୍ ପାପ୍ସ୍ବୁ କେମା କ୍ରେଦ୍, 20ତ୍ବେ ତୁମିମ୍ନ୍ ହେଁ ଇଶ୍ଵରାର୍ ତ୍ଇହ୍ଣି ପବିତର୍ ଆତ୍ମାର୍ ଶ୍କ୍ତି ହାଉଆସ୍, ଆର୍ ଇଶ୍ୱର୍ ତୁମାର୍ ଗିନେ ଆଗେ ବାବିରିଲା ଯୀଶୁ ଖ୍ରୀଷ୍ଟକେ ଆରେକ୍ ହ୍ଟାଇଦ୍। 21ସ୍ବୁ ବିଷୟ୍ ବବିଶତ୍ କ୍ତା କ୍ଉତା ଲକ୍ମ୍ନ୍ ହୁର୍ବେ ଇଶ୍ଵରାର୍ ଜୁଇସ୍ବୁ ବାବବାଣି କଇରିଲାଇ, ସେ ସମୟ୍ ନାସ୍ତା ହ୍ତେକ୍ ଯୀଶୁ ସ୍ର୍ଗେ ସେ ରେଇଦ୍। 22ଇବିଷୟ୍ ମୋଶା ବବିଶତ୍ କ୍ତା କ୍ଉତାଲକ୍ କଇରିଲା, ‘ତୁମାର୍ ମାପ୍ରୁ ଇଶ୍ୱର୍ ହ୍ଟାଇ ଆଚେ ସେନ୍କ୍ରି ସେ ତୁମାର୍ ଲ୍ଗେ ଗଟେକ୍ ବବିଶତ୍ କ୍ତା କ୍ଉତା ଲକ୍କେ ହ୍ଟାଇଦ୍, ସେ ଅମ୍ଲା ତୁମାର୍ ନିଜାର୍ ଲକ୍ମ୍ନ୍କାର୍ ବିତ୍ରେହ୍ଣି ଗଟେଲକ୍। ସେ ତୁମୁକ୍ମ୍ନ୍ ଜୁଇରି କଇଦ୍ ସେରି ତୁମିମ୍ନ୍ ମାନ୍ତା ଦ୍ର୍କାର୍। 23ମ୍ତର୍ ଜୁଇଲକ୍ ସେ ବବିଶତ୍ କ୍ତା କ୍ଉତା ଲକାର୍ କ୍ତା ନ୍ମାନେ, ତାକେ ଇଶ୍ୱର୍ ତାର୍ ଲକ୍ମ୍ନ୍କାର୍ ବିତ୍ରେହ୍ଣି ଅଲ୍ଗା କ୍ରେଦ୍ ଆର୍ ତାକେ ନ୍ଷ୍ଟ କ୍ରେଦ୍।’
24ଅବେ ଜୁଇସ୍ବୁ ଗଟ୍ଣା ଗଟୁଲି ସେ ବିଷୟେ ସାମୁଏଲ୍ ବବିଶତ୍ କ୍ତା କ୍ଉତାଲକ୍ ତ୍ଇହ୍ଣି ଆରମ୍ କ୍ରି, ହ୍ଚାର୍ ବବିଶତ୍ କ୍ତା କ୍ଉତା ଲକ୍ମ୍ନ୍ ହେଁ ଇ ଗଟ୍ଣାର୍ ବିଷୟେ ସେ କଇରିଲାଇ। 25ତୁମିମ୍ନ୍ ସେ ବବିଶତ୍ କ୍ତା କ୍ଉତାଲକ୍ ମନ୍କାର୍ ସ୍ଙ୍ଗ୍ ଜୁଇସ୍ବୁ ହ୍ର୍ମାଣ୍ କ୍ରି ଇଶ୍ୱର୍ କଇରିଲା, ସେରି ତୁମାର୍ ଗିନେ ସେ କଇରିଲା, ଇଶ୍ୱର୍ ତୁମାର୍ ହୁର୍ବାର୍ କାଳାର୍ ଲକ୍ମ୍ନ୍କେ ଜୁଇ ହ୍ର୍ମାଣ୍ କ୍ଲାଆଚେ, ତୁମିମ୍ନ୍ ସେତିର୍ ହିଲାମ୍ନ୍, ଇଶ୍ୱର୍ ଅବ୍ରାହାମ୍କେ କଇରିଲା, ‘ତର୍ ବ୍ଉଁଶେହ୍ଣି ମୁଇ ହୁର୍ତିବିର୍ ସ୍ବୁ ଲକ୍ମ୍ନ୍କେ ଆଶିର୍ବାଦ୍ କ୍ରିନ୍ଦ୍।’ 26ସେତାର୍ଗିନେ ଇଶ୍ୱର୍ ତାର୍ ଦାସ୍କେ ବାଚିକ୍ରି ହ୍ଟାଇଲା, ଆର୍ ତୁମୁକ୍ମ୍ନ୍କେ କ୍ରାପ୍ ବାଟେହ୍ଣି ଲେଉଟାଇ କ୍ରି ଆଣି ଆଶିର୍ବାଦ୍ କ୍ରେଦ୍ ବ୍ଲି।”
Currently Selected:
ପ୍ରେରିତ 3: BDVNT
Highlight
Share
Copy
Want to have your highlights saved across all your devices? Sign up or sign in
Bodo Parja Bible (ବ୍ଡ଼୍ ହ୍ର୍ଜା) by The Love Fellowship is licensed under Creative Commons Attribution-ShareAlike 4.0 License.
