ପ୍ରେରିତ 4
4
ଯିହୁଦିମ୍ନ୍କାର୍ ମିଟିଙ୍ଗେ ପିତର୍ ଆର୍ ଯୋହନ୍କେ
1ପିତର୍ ଆର୍ ଯୋହନ୍ ଇ ସ୍ବୁ ବିଷୟ୍ ଲକ୍ମ୍ନ୍କେ କ୍ଉତି ରିଲାବ୍ଳ୍ ଜାଜକ୍ମ୍ନ୍, ମନ୍ଦିରାର୍ ସେନାପତି ଆର୍ କ୍ତେକ୍ ସାଦ୍ଦୂକୀମ୍ନ୍ ସେତି ଆଇଲାଇ। 2ସେମ୍ନ୍ ପିତର୍କେ ଆର୍ ଯୋହନ୍କେ ବେସି ରିସା ଅଇଲାଇ, କାଇତାକ୍ ସେ ହ୍ଟାଇଲା ଚେଲାମ୍ନ୍ ଯୀଶୁ ମରିକ୍ରି ଜିଇ ଉଟିଆଚେ ବ୍ଲି ଲକ୍ମ୍ନ୍କେ ଶିକ୍ୟା ଦେତିରିଲାଇ, ଆର୍ ମ୍ଲା ଲକ୍ମ୍ନ୍ ଅନ୍କ୍ରି ବାଚ୍ତି ବ୍ଲି କ୍ଉତିରିଲାଇ। 3ସେତାର୍ଗିନେ ଇ ଦୁଇ ଲକ୍କେ ଦ୍ର୍ଲାଇ, ଆର୍ ସେ ଦିନ୍ ବେଳ୍ ଅଇରିଲି ଲାଗି ତାର୍ ଆରେଗଟ୍ ଦିନ୍ ବିଚାର୍ କ୍ରୁକେ ଜ୍ଇଲେ ର୍କ୍ଲାଇ।
4ମ୍ତର୍ ବେସିଲକ୍ ତାର୍ ପର୍ଚାର୍ ଶୁଣିକ୍ରି ବିଶ୍ବାସ୍ କ୍ଲାଇ, ଆର୍ ତାକାର୍ ଦ୍ଳେ ମିସ୍ଲାଇ ସେମ୍ନ୍ ସ୍ବୁ ହାଁଚ୍ ହ୍ଜାର୍ ଅଣ୍ଡ୍ରାହିଲା ରିଲାଇ।
5ତାର୍ ଆରେଗଟ୍ ଦିନ୍ ଯିହୁଦି ନେତାମ୍ନ୍, ମନ୍ଦିରାର୍ ପାରାଚିନ୍ମ୍ନ୍ ଆର୍ ନିଆଇ ଶିକାଉତା ଲକ୍ମ୍ନ୍ ଯିରୁଶାଲମ୍ ସ୍ହରେ ରୁଣ୍ତ୍ଲାଇ। 6ସେତି ମୁକିଆ ଜାଜକ୍ ହାନାନ, କୟାଫା, ଯୋହନ୍, ଆଲେକ୍ଜାଣ୍ତାର୍, ଆର୍ ମୁକିଆ ଜାଜକାର୍ ବ୍ଉଁଶାର୍ ସ୍ବୁ ଲକ୍ମ୍ନ୍ ରୁଣ୍ଡି ରିଲାଇ। 7ସେ ସ୍ବୁ ଲକ୍ମ୍ନ୍ ଦୁଇ ଲକ୍କେ ତାକାର୍ ଲ୍ଗେ ଆଣୁକେ କଇଲାଇ, ଆର୍ ସେମ୍ନ୍କେ ତାକାର୍ ମ୍ଜାଇ ଟିଆକ୍ରି, ସେମ୍ନ୍କେ ହ୍ଚାର୍ଲାଇ, “ତୁମିମ୍ନ୍ ଇ ସ୍ବୁ କାର୍ ଶ୍କ୍ତିଏ ଆର୍ କାର୍ ନାଉଁଏ ଇ ସ୍ବୁ କ୍ରୁଲାସ୍?” 8ପିତର୍ ପବିତର୍ ଆତ୍ମାର୍ ଶ୍କ୍ତିଏ ବ୍ର୍ତି ଅଇକ୍ରି ସେମ୍ନ୍କେ କଇଲା, “ଏ ଯିହୁଦି ନେତାମ୍ନ୍ ଆର୍ ପାରାଚିନ୍ମ୍ନ୍।” 9ଆଜି ଯଦି ତୁମିମ୍ନ୍ ସେ ଚଟା ଲକାର୍ ଗିନେ ଗଟିରିଲା ସେ ବ୍ଲ୍କାମାର୍ ବିଷୟେ ବିଚାର୍ କ୍ରି ହ୍ଚାରୁଲାସ୍, ଯେ ସେ କ୍ନ୍କ୍ରି ବ୍ଲ୍ ଅଇଲାଆଚେ? 10ତ୍ବେ ତୁମିମ୍ନ୍ ଆର୍ ଇସ୍ରାଏଲ୍ ଲକ୍ମ୍ନ୍ ଜାଣ୍ତା ଦ୍ର୍କାର୍ ଯେ, ତୁମାର୍ ମୁଏଁ ବ୍ଲ୍ ଅଇକ୍ରି ଟିଆ ଅଇରିଲା ଇ ମାନାଇ ନାଜରିତିୟ ଯୀଶୁ ଖ୍ରୀଷ୍ଟର୍ ଶ୍କ୍ତି ସ୍ଙ୍ଗ୍ ବ୍ଲ୍ ଅଇଲାଆଚେ। ସେ ଯୀଶୁକେ କୁର୍ଶକାଟେ ମ୍ର୍ନେ ମାରି ରିଲାସ୍, ମ୍ତର୍ ଇଶ୍ୱର୍ ତାକେ ଆରେକ୍ ଜୀବନ୍ ଦ୍ଇକ୍ରି ଉଟାଇଲା ଆଚେ। 11ଇ ଯୀଶୁର୍ ବିଷୟେ ହ୍କା ଦ୍ର୍ମ୍ ଶାସ୍ତରେ ଲେକାଆଚେ, ଜୁଇ ଟେଳାକେ ଗ୍ର୍ ତିଆର୍ କ୍ର୍ତା ଲକ୍ମ୍ନ୍ ମ୍ନ୍ ନ୍କେଲାଇ, ସେରି ହ୍କା ଗ୍ରାର୍ ମୁଳ୍ ଟେଳାରିଲି। 12ଯୀଶୁର୍ ଗିନେ ହ୍କା ଉଦାର୍ କ୍ର୍ତାର୍ ବାଟ୍ ଆଇଲିଆଚେ, ଆକାଶ୍ ତ୍ଳେ ମାନାଇମ୍ନ୍କାର୍ ବିତ୍ରେ ଆର୍ କାଇ ନାଉଁ ଦିଆଅଇ ନ୍କେରେ, ତାର୍ଗିନେ ଅମି ଉଦାର୍ ହାମ୍ନ୍ଦ୍।
13ସେମ୍ନ୍ ପିତର୍ ଆର୍ ଯୋହନାର୍ ସାସ୍ ଦ୍କି ଆର୍ ହାଟ୍ ନ୍ହଳ୍ତା ଲକ୍ ଆର୍ ବୁଦି ନଇଲା ଲକ୍ମ୍ନ୍ ଇ ମିଟିଙ୍ଗ୍ ବ୍ସିରିଲା ଲକ୍ମ୍ନ୍ ଜାଣିରିଲାଇ, ସେତାର୍ଗିନେ ସେମ୍ନ୍ ସେ ଦୁଇଲକାର୍ ସାସ୍ ଦ୍ରିକ୍ରି ଚାନିଆ ଅଇଲାଇ, ଆର୍ ସେମ୍ନ୍ ଯୀଶୁର୍ ସ୍ଙ୍ଗ୍ ରିଲାଇ ବ୍ଲି ଜାଣିରିଲାଇ, 14ଆର୍ ଜୁଇମାନାଇ ବ୍ଲ୍ ଅଇରିଲା, ସେ ପିତର୍ ଆର୍ ଯୋହନାର୍ ସ୍ଙ୍ଗ୍ ମିସିକ୍ରି ଟିଆ ଅଇରିଲାର୍ ଦ୍ରିକ୍ରି, ଲକ୍ମ୍ନ୍ ତାକାର୍ ବିରୁଦେ କାଇରି ହେଁ କ୍ମ୍ ନ୍ହାର୍ଲାଇ। 15ସେତାର୍ଗିନେ ସେମ୍ନ୍ ଚେଲାମ୍ନ୍କେ ମିଟିଙ୍ଗ୍ ବ୍ସ୍ଲା ତ୍ଇହ୍ଣି ବାର୍ କ୍ଲାଇ, ଆର୍ ସେମ୍ନ୍ ତାକାର୍ ତାକାର୍ ବିତ୍ରେ ଏମ୍ନ୍କେ କ୍ନ୍କ୍ରୁନ୍ଦ୍ ବ୍ଲି କ୍ତାବାର୍ତା କ୍ଲାଇ।
16କାଇତାକ୍ ସେମ୍ନ୍ କ୍ତାବାର୍ତା ଅଇଲାଇ, “ଏମ୍ନ୍ କ୍ରିରିଲା ଚାନିଆକାମାର୍ ବିଷୟେ ଯିରୁଶାଲମାର୍ ସ୍ବୁ ଲକ୍ମ୍ନ୍ ଜାନ୍ଲାଇ ଆତ୍ତି, ଆର୍ ଇସ୍ତ୍ କାମ୍କେ ଅମିମ୍ନ୍ ମ୍ନା କ୍ରୁ ନ୍ହାରୁ। 17ମ୍ତର୍ ଇକ୍ତା ଜ୍ନ୍କ୍ରି ଚାରିବାଟ୍ ଆର୍ ଅଦିକ୍ ଲକ୍ମ୍ନ୍କାର୍ ବିତ୍ରେ ଆଉଜି ନଇ, ସେତାର୍ଗିନେ ଅମିମ୍ନ୍ ସେମ୍ନ୍କେ ଯୀଶୁର୍ ନାଉଁଏ ଆରେକ୍ କ୍ବେ ନ୍କମ୍କେ ଡିରାମା।”
18ହ୍ଚେ ପିତର୍ ଆର୍ ଯୋହନ୍କେ ବିତ୍ରେ କୁଦିକ୍ରି ଆରେକ୍ ଯୀଶୁର୍ ନାଉଁଏ ନ୍କମ୍କେ କି ଶିକ୍ୟା ନ୍ଦେମ୍କେ ଦ୍କାଇକ୍ରି ଆଦେଶ୍ ଦିଲାଇ। 19ମ୍ତର୍ ପିତର୍ ଆର୍ ଯୋହନ୍ ଲକ୍ମ୍ନ୍କେ କଇଲାଇ, “ତୁମିମ୍ନ୍ ଅମୁକେ କ୍ଉଆ କୁଇରି ଟିକ୍, ଇଶ୍ଵରାର୍ କ୍ତା ଶୁଣ୍ତାର୍ ଟିକ୍ ନା ତୁମାର୍ କ୍ତା ଶୁଣ୍ତାର୍ ଟିକ୍ ଇରି ତୁମିମ୍ନ୍ ବିଚାର୍ କ୍ରା।” 20କାଇତାକ୍ ଅମିମ୍ନ୍ ଜୁଇ ଜୁଇରି ଦ୍କ୍ଲୁଆଚୁ ଆର୍ ଶୁଣ୍ଲୁ ଆଚୁ ସେ ବିଷୟେ କାକେ ନ୍କଇକ୍ରି ରେମ୍ ନ୍ହାରୁ। 21ସେତାକ୍ ମିଟିଙ୍ଗ୍ ବ୍ସିରିଲା ଲକ୍ମ୍ନ୍ ଆରେକ୍ ସେମ୍ନ୍କେ ଡିରାଇକ୍ରି କଇଲାଇ ଆର୍ ଚାଡିଦିଲାଇ, କାଇତାକ୍ ସେମ୍ନ୍କେ ଡ୍ଣ୍ତ୍ ଦେମ୍କେ ନଇ ବ୍ଲି ଜାନ୍ଲାଇ। ସେ ବ୍ଲ୍ ଅଇରିଲାର୍ ଗିନେ ଲକ୍ମ୍ନ୍ ସ୍ବୁ ଇଶ୍ଵରାର୍ ଦନ୍ୟବାଦ୍ କ୍ର୍ତି ରିଲାଇ। 22କାଇତାକ୍ ଜୁଇଲକ୍ ଚମ୍ତ୍କାର୍ ବାବେ ବ୍ଲ୍ ଅଇରିଲା ତାର୍ ବୟଷ୍ ଚାଳିଶ୍ ବର୍ଷ ହ୍ଣି ଅଦିକ୍ ଅଇରିଲି।
ବିଶ୍ବାସିମ୍ନ୍ ପାର୍ତେନା କ୍ଲାଇ
23ପିତର୍ ଆର୍ ଯୋହନ୍କେ ସେମ୍ନ୍ ଚାଡିଦିଲା ଉତାରେ, ସେମ୍ନ୍ ତାକାର୍ ସ୍ଙ୍ଗ୍ ମ୍ନ୍କାର୍ ଲ୍ଗେ ଲେଉଟି ଗ୍ଲାଇ, ମୁକିଆ ଜାଜକ୍ ଆର୍ ପାରାଚିନ୍ମ୍ନ୍ ସେମ୍ନ୍କେ ଜୁଇସ୍ବୁ କ୍ତା କଇରିଲାଇ, ସେ ସ୍ବୁ ସେମ୍ନ୍କେ ଜାଣାଇଲାଇ। 24ବିଶ୍ବାସିମ୍ନ୍ ଇ ସ୍ବୁକ୍ତା ଶୁଣ୍ଲା ହ୍ଚେ ସେମ୍ନ୍ ସ୍ବୁଲକ୍ ମିସିକ୍ରି ଇଶ୍ଵରାର୍ ଲ୍ଗେ ପାର୍ତେନା କ୍ଲାଇ, ଏ ମାପ୍ରୁ ତୁଇ ସ୍ର୍ଗ୍, ହୁର୍ତିବି ଆର୍ ସ୍ମ୍ଦୁର୍ ସେତିରିଲା ସ୍ବୁ ଜିନିଷ୍କେ ତିଆର୍ କ୍ରି ଆଚ୍ସି। 25ପବିତର୍ ଆତ୍ମାର୍ ଶ୍କ୍ତି ସ୍ଙ୍ଗ୍ ତୁଇ ଅମାର୍ ହୁର୍ବାର୍ କାଳାର୍ ଲକ୍ମ୍ନ୍କେ, ତର୍ ଦାସ୍ ଅମାର୍ ଉବା ଦାଉଦ୍ ର୍ଜା ଇକ୍ତା କଇରିଲା, ଯିହୁଦି ଚାଡି ବିନ୍ଜାତି ଲକ୍ମ୍ନ୍ କାଇତାକ୍ ମାଡ୍ଗଳ୍ କ୍ରୁଲାଇ, ଆର୍ ସ୍ବୁ ଇସ୍ରାଏଲ୍ ଲକ୍ମ୍ନ୍ କାଇତାକ୍ ବେକାରେ ଲିନ୍ଦା କ୍ରୁଲାଇ। 26ମାପ୍ରୁର୍ ବିରୁଦେ ଆର୍ ତାର୍ ଖ୍ରୀଷ୍ଟର୍ ଆଶିର୍ବାଦ୍ ମାନାଇ ବିରୁଦେ, ହୁର୍ତିବିର୍ ର୍ଜାମ୍ନ୍ ଟିଆ ଅଇଲାଇ, ଆର୍ ଶାସନ୍କ୍ର୍ତା ଲକ୍ମ୍ନ୍ ଗଟେକ୍ ଜାଗାଇ ଟିଆ ଅଇଲାଇ। 27ସେ ସ୍ହରେ ହେରୋଦ୍ ର୍ଜା ଆର୍ ପନ୍ତିୟ ପିଲାତ ର୍ଜା ଯିହୁଦି ଚାଡି ବିନ୍ଜାତି ଲକ୍ ରିଲାଇ, ଇସ୍ରାଏଲ୍ ଲକ୍ମ୍ନ୍କାର୍ ସ୍ଙ୍ଗ୍ ମିସିକ୍ରି ସେମ୍ନ୍ ତୁଇ ବାଚିରିଲା, ପବିତର୍ ଦାସ୍ ଯୀଶୁ ଖ୍ରୀଷ୍ଟର୍ ବିରୁଦେ ଲିନ୍ଦା କ୍ଲାଇ, 28ତୁଇ ତର୍ ଇଚାସ୍ଙ୍ଗ୍ ଜୁଇସ୍ବୁ ଗ୍ଟାମ୍କେ ମ୍ନ୍କ୍ରି ରିଲିସ୍, ସେସ୍ବୁ ହୁରାକ୍ରୁକେ ସେମ୍ନ୍ ମିସିକ୍ରି କାମ୍ କ୍ଲାଇ। 29ଏ ମାପ୍ରୁ ଅବେ ସେମ୍ନ୍ ମକେ ମାରୁନ୍ ବ୍ଲି ଡିରାଇ ଆତ୍ତି ସେ ବିଷୟେ ତୁଇ ଅଳକ୍ ଦ୍କ୍। ଆର୍ ନିଡିରି କ୍ରି ତର୍ ବାକ୍ୟ ପର୍ଚାର୍ କ୍ରୁକେ ଅମୁକ୍ମ୍ନ୍ ଶ୍କ୍ତି ଦେ, 30ଆର୍ ତୁଇ ତର୍ ଆତ୍କେ ଲାମାଇ କ୍ରି ବ୍ଲ୍ କ୍ର୍, ଆର୍ ତର୍ ପବିତର୍ ଦାସ୍ ଯୀଶୁର୍ ନାଉଁଏ ଚିନା ଆର୍ ଚାନିଆକାମ୍ କ୍ରୁକେ ଆମୁକ୍ ଶ୍କ୍ତି ଦେ। 31ସେମ୍ନ୍ ପାର୍ତେନା କ୍ରି ସ୍ର୍ଲା ହ୍ଚେ ଜୁଇ ଜାଗାଇ ସେମ୍ନ୍ ରୁଣ୍ତିରିଲାଇ ସେ ଜାଗା ଲ୍ଦ୍ ବ୍ଦ୍ଲି, ସେତିରିଲା ସ୍ବୁ ଲକ୍ମ୍ନ୍ ପବିତର୍ ଆତ୍ମାଇ ହୁରା ଅଇଲାଇ, ଆର୍ ସେମ୍ନ୍ ସାହାସ୍ ଅଇକ୍ରି ଇଶ୍ଵରାର୍ ବାକ୍ୟ ପର୍ଚାର୍ କ୍ରୁକେ ଲାଗ୍ଲାଇ।
ବିଶ୍ବାସିମ୍ନ୍ ତାର୍ ଦ୍ନ୍ସ୍ମ୍ପତି ଆର୍ ସ୍ମାନ୍ ଅଦିକାର୍
32ବିଶ୍ବାସିମ୍ନ୍ ସ୍ବୁ ଗଟେକ୍ ମ୍ନ୍ ଆର୍ ଗଟେକ୍ ଜୀବନ୍ ଅଇଲାଇ। ସେମ୍ନ୍କାର୍ ବିତ୍ରେ କେ ହେଁ ନିଜାର୍ ନିଜାର୍ ସ୍ମ୍ପତିକେ ମର୍ ବ୍ଲି କ୍ଉତି ନ୍ରିଲାଇ, ସ୍ବୁଲକାର୍ ସ୍ମ୍ପତିକେ ସେମ୍ନ୍ ସ୍ମାନ୍ ଅଦିକାର୍। 33ହ୍ଟାଇଲା ଚେଲାମ୍ନ୍ ବ୍ଡ୍ ଶ୍କ୍ତି ସ୍ଙ୍ଗ୍ ମାପ୍ରୁ ଯୀଶୁ ମ୍ରିକ୍ରି ଜିଇ ଉଟ୍ତା ବିଷୟେ ସାକ୍ଯ ଦେତିରିଲା, ଇଶ୍ୱର୍ ସେମ୍ନ୍କାର୍ ଉହ୍ରେ ତାର୍ ଆଶିର୍ବାଦ୍ ଚାଡିରିଲା। 34ସେମ୍ନ୍କାର୍ ବିତ୍ରେ କାର୍ ହେଁ କାଇରି ଅବାବ୍ ନ୍ରିଲି, ଜୁଇସ୍ବୁ ଲକାର୍ ବେଡା ଆର୍ ଗ୍ର୍ରିଲି ସେ ସ୍ବୁ ବିକିକ୍ରି ସେମ୍ନ୍ ଟ୍କାକେ ଆଣି ହ୍ଟାଇଲା ଚେଲାମ୍ନ୍କାର୍ ହାଦ୍ତ୍ଳେ ସ୍ଙ୍ଗାଉତି ରିଲାଇ, 35ଆର୍ ସେ ଟ୍କାଇ ସେମ୍ନ୍ ଜାକେ ଜ୍ତେକ୍ ଲଡା ସେତେକ୍ ବାଟାକ୍ରି ଚଲ୍ତି ରିଲାଇ।
36ଆରେକ୍ ଯୋଷେପ୍ ନାଉଁର୍ ଗଟେଲକ୍ ଯେ କି ଲେବୀ ବ୍ଉଁଶେ ଜ୍ର୍ନ୍ ଅଇରିଲା ଗଟେକ୍ ସାଇପ୍ରସ୍ ଜାତିର୍ ଲକ୍, ତାକେ ହ୍ଟାଇଲା ଚେଲାମ୍ନ୍ “ବର୍ଣ୍ଣବା” ଗଟେକ୍ ବୁଜା ସୁଜା ଲକ୍ବ୍ଲି କୁଦ୍ତିରିଲାଇ। 37ଇ ମାନାଇ ତାର୍ ଗଟେକ୍ ନିଜାର୍ ବେଡା ରିଲି। ସେ ସ୍ବୁ ବିକିକ୍ରି ହ୍ଟାଇଲା ଚେଲାମ୍ନ୍କାର୍ ହାଦ୍ତ୍ଳେ ସ୍ଙ୍ଗାଇ ଦିଲା।
Currently Selected:
ପ୍ରେରିତ 4: BDVNT
Highlight
Share
Copy
Want to have your highlights saved across all your devices? Sign up or sign in
Bodo Parja Bible (ବ୍ଡ଼୍ ହ୍ର୍ଜା) by The Love Fellowship is licensed under Creative Commons Attribution-ShareAlike 4.0 License.
