ପ୍ରେରିତ 5
5
ହନନୀୟ ଆର୍ ତାର୍ ଡକୁର୍ସି ସଫିରା
1ତ୍ବେ ବିଶ୍ବାସିମ୍ନ୍କାର୍ ବିତ୍ରେ ଏକ୍ଲା ଜାର୍ ନାଉଁ ହନନୀୟ, ଆର୍ ତାର୍ ଡକୁର୍ସି ସଫିରା ସେମ୍ନ୍ ତାକାର୍ ନିଜାର୍ ବେଡାକେ ବିକ୍ଲାଇ। 2ଆରେକ୍ ସେ ଆର୍ ତାର୍ ଡକୁର୍ସି ଦୁଇ ଲକ୍ ସେ ବିକ୍ଲା ଟ୍କାଇହ୍ଣି କ୍ତେକ୍ ଲୁକାଇକ୍ରି ସ୍ଙ୍ଗାଇଲାଇ ଆର୍ ବାକି ଟ୍କାକେ ଆଣି ହ୍ଟାଇଲା ଚେଲାମ୍ନ୍କାର୍ ହାଦ୍ତ୍ଳେ ସ୍ଙ୍ଗାଇ ଦିଲାଇ। 3ସେତାର୍ଗିନେ ପିତର୍ କଇଲା, “ଏ ହନନୀୟ, ବେଡା ବିକି ରିଲା କ୍ତେକ୍ ଡାବୁ ଲୁକାଇକ୍ରି ସ୍ଙ୍ଗାମ୍କେ କାଇତାକ୍ ଶଇତାନ୍ ତୁମାର୍ ମ୍ନ୍ ବିତ୍ରେ କାମ୍କ୍ଲି, ତୁମି କାଇତାକ୍ ପବିତର୍ ଆତ୍ମାର୍ ଲ୍ଗେ ମିଚ୍କ୍ତା କ୍ମ୍ଲାସ୍, ବିକ୍ତା ଆଗେ କି ସେ ବେଡା ତୁମାର୍ ନ୍ରିଲି? 4ବିକ୍ଲା ଉତାରେ ହେଁ କାଇରି ସେରି ତୁମାର୍ ଅଇନ୍ରିଲି କି? ତ୍ବେ ତୁମିମ୍ନ୍ କ୍ନ୍କ୍ରି ନିଜାର୍ ମ୍ନେ ଇ ବିଷୟେ ବାବ୍ଲାସ୍? ତୁମି ଯେ ମାନାଇ ଲ୍ଗେ ମିଚ୍ କଇଲାସ୍, ସେରି ନଇ, ମ୍ତର୍ ଇଶ୍ଵରାର୍ ଲ୍ଗେ ମିଚ୍ କଇଲାସ୍।” 5ହନନୀୟ ଇ ସ୍ବୁକ୍ତା ଶୁଣ୍ଲା ଦାହ୍ରେ ତ୍ଳେ ଅଦୁର୍ଲା ଆର୍ ମ୍ଲା। ସେତି ଜ୍ତେକ୍ ଲକ୍ମ୍ନ୍ ଇକ୍ତା ଶୁଣ୍ଲାଇ, ସେମ୍ନ୍ ବେସି ଡିର୍ଲାଇ। 6ଆର୍ ତାକାର୍ ଦ୍ଳାର୍ ଦ୍ଙ୍ଗ୍ଳା ହିଲାମ୍ନ୍ ଆଇଲାଇ, ଆର୍ ହନନୀୟର୍ ମ୍ଳ୍କେ ହ୍ଚିଆ ସ୍ଙ୍ଗ୍ ଗୁଳିଆଇକ୍ରି ମ୍ସ୍ଣେ ନିଲାଇ ଆର୍ ତହ୍ଲାଇ।
7ତିନି ଗଣ୍ଟା ହ୍ଚେ ତାର୍ ଡକୁର୍ସି ସଫିରା ଆଇଲି, ମ୍ତର୍ କାଇରି ଗ୍ଟିଆଚେ, ସେରି ସେ ଜାଣି ନ୍ରିଲି। 8ଆର୍ ପିତର୍ ସଫିରାକେ ହ୍ଚାର୍ଲା, “ତୁମିମ୍ନ୍ ଅତେକ୍ ଟ୍କାଇ ତୁମାର୍ ବେଡାକେ ବିକି ଆଚାସ୍ କି?” ସେ କଇଲି, ହେଁ ସ୍ତେକ୍ ସେ। 9ସେତାର୍ଗିନେ ପିତର୍ ତାକେ କଇଲା, “ତୁଇ ଆର୍ ତର୍ ଡକ୍ରାଦି କାଇତାକ୍ ମାପ୍ରୁର୍ ପବିତର୍ ଆତ୍ମାକେ ପରିକ୍ୟା କ୍ରୁକେ ମ୍ନ୍ କ୍ଲାସ୍?” ଜୁଇଲକ୍ ତର୍ ଡକ୍ରାଦିକେ ନ୍ଇକ୍ରି ତହ୍ଲାଇ ଆତ୍ତି, ସେମ୍ନ୍ ଅବେ ବାଟ୍ହାଳି ଲ୍ଗେ ଆତ୍ତି ତକେ ହେଁ ସେମ୍ନ୍ ବଇକ୍ରି ନେତି। 10ସେ ଦାହ୍ରେ ସେ ପିତରାର୍ ଗଡ୍ତ୍ଳେ ଅଦ୍ରି କ୍ରି ମ୍ଲି, ସେତିରିଲା ଦ୍ଙ୍ଗ୍ଳା ହିଲାମ୍ନ୍ ଗ୍ର୍ ବିତ୍ରେ ଆଇଲାଇ ଆର୍ ସେ ମ୍ରି ରିଲାର୍ ଦ୍କ୍ଲାଇ, ତାକେ ହେଁ ମ୍ସ୍ଣେ ବଇକ୍ରି ନିଲାଇ ଆର୍ ତାର୍ ଡକ୍ରାସିର୍ ଲ୍ଗେ ତହ୍ଲାଇ। 11ଯିରୁଶାଲମ୍ ସ୍ହରାର୍ ସ୍ବୁ ମ୍ଣ୍ତଳିର୍ ବିଶ୍ବାସିମ୍ନ୍ ଆର୍ ବାହାରାର୍ ଜୁଇସ୍ବୁ ଲକ୍ମ୍ନ୍ ଶୁଣ୍ଲାଇ, ସେ ସ୍ବୁ ଲକ୍ମ୍ନ୍ ବେସି ଡିର୍ଲାଇ।
ଚିନ୍ ଆର୍ ଚାନିଆକାମ୍
12ହ୍ଟାଇଲା ଚେଲାମ୍ନ୍ ଗାଦାସ୍ବୁ ଚିନ୍ ଆର୍ ଚାନିଆକାମ୍ କ୍ଲାଇ। ସ୍ବୁ ମ୍ଣ୍ତଳିର୍ ଲକ୍ମ୍ନ୍ ଖ୍ରୀଷ୍ଟର୍ ଲ୍ଗେ ବିଶ୍ବାସ୍ କ୍ଲାଇ, ଆର୍ ଗଟେମ୍ନେ ଶଲୋମନାର୍ ମଣ୍ତପ୍ ଲ୍ଗେ ରୁଣ୍ତ୍ତି ରିଲାଇ, 13ମ୍ତର୍ ବିନ୍ ଲକ୍ମ୍ନ୍ ସ୍ବ୍କେ ହେଁ ତାକାର୍ ଦ୍ଳେ ମିସୁକେ ସାସ୍ ନ୍କେର୍ତିରିଲାଇ। ସେ ସ୍ବୁ ଲକ୍ମ୍ନ୍ ଇ ଦ୍ଳାର୍ ଲକ୍ମ୍ନ୍ ବ୍ଲ୍ ବ୍ଲି ଟେକିକ୍ରି କ୍ଉତିରିଲାଇ। 14ଇଶ୍ଵରାର୍ ଲ୍ଗେ ବିଶ୍ବାସ୍ କ୍ର୍ତିରିଲା ଗାଦି ଅଣ୍ଡ୍ରା ହିଲାମ୍ନ୍ ଆର୍ ମାଇଜି ଟକିମ୍ନ୍ ତାକାର୍ ଦ୍ଳେ ମିସ୍ତି ରିଲାଇ, ମ୍ଣ୍ଡଳି ଦିନ୍କେ ଦିନ୍ ଅଦିକ୍ ବାଡୁକେ ଦ୍ର୍ଲି। 15ହ୍ଟାଇଲା ଚେଲାମ୍ନ୍କାର୍ କାମ୍ ଅଦିକ୍ ବାଡ୍ଲି, ପିତର୍ ଇଣ୍ତିକ୍ରି ଜାତିରିଲାବ୍ଳ୍ ତାର୍ ସାୟ ରଗିମ୍ନ୍କାର୍ ଉହ୍ରେ ହ୍ଳି ବ୍ଲ୍ ଅଉତାର୍ ଗିନେ ରଗିମ୍ନ୍କେ କ୍ଟ୍ ସ୍ଙ୍ଗ୍ ଆଣି ବାଟ୍ଲ୍ଗେ ସଳାଉତି ରିଲାଇ। 16ଯିରୁଶାଲମ୍ ସ୍ହର୍ ଚାରିହାକ୍ ରିଲା ରଗିମ୍ନ୍କେ ଆର୍ ବୁତ୍ଆତ୍ମା ଡ୍ସ୍ଲା ଲକ୍ମ୍ନ୍କେ ଆରେକ୍ ବିନ୍ ରଗିମ୍ନ୍କେ ଚେଲାମ୍ନ୍କାର୍ ଲ୍ଗେ ଆଣ୍ତି ରିଲାଇ, ସେସ୍ବୁ ଲକ୍ମ୍ନ୍ ବ୍ଲ୍ ଅଇଲାଇ।
ହ୍ଟାଇଲା ଚେଲାମ୍ନ୍କେ ଲିନ୍ଦା କ୍ଲାଇ
17ତାର୍ହ୍ଚେ ମୁକିଆ ଜାଜକ୍ ଆର୍ ତାର୍ ସ୍ଙ୍ଗୁଆଳି ସାଦ୍ଦୂକୀ ଦ୍ଳାର୍ ଲକ୍ ଆର୍ ସେତିର୍ ଦ୍ର୍ମ୍ ଶାସ୍ତର୍ ଜାଣ୍ତା ଲକ୍ମ୍ନ୍ ହେଁ ହ୍ଟାଇଲା ଚେଲାମ୍ନ୍କେ ବେସି ରିସା ଅଇଲାଇ ଆର୍ ସେମ୍ନ୍କେ ଡ୍ଣ୍ତ୍ ଦେମ୍କେ ବିଚାର୍ କ୍ଲାଇ। 18ଆର୍ ହ୍ଟାଇଲା ଚେଲାମ୍ନ୍କେ ଦ୍ର୍ଲାଇ ଆର୍ ଜ୍ଇଲେ ସ୍ଙ୍ଗାଇଲାଇ। 19ମ୍ତର୍ ସେ ରାତି ମାପ୍ରୁ ଗଟେକ୍ ସ୍ର୍ଗ୍ ଦୂତ୍ ଜ୍ଇଲାର୍ ବାଟ୍ ଉଗାଳି ଦିଲା ଆର୍ ହ୍ଟାଇଲା ଚେଲାମ୍ନ୍କେ ବାରାଇ ଜାହାବ୍ଲି କଇଲା, 20“ଜାହା ତୁମିମ୍ନ୍ ମନ୍ଦିରେ ଟିଆ ଅଇକ୍ରି ଇ ନ୍ସେର୍ତା ଜୀବନ୍ ବିଷୟେ ଲକ୍ମ୍ନ୍କେ ସ୍ବୁକ୍ତା କ୍ଉଆ।” 21ଚେଲାମ୍ନ୍ ସେ ଦୂତାର୍ କ୍ତା ଶୁଣିକ୍ରି ବର୍ ସ୍କାଳ୍ ମନ୍ଦିରେ ଗ୍ଲାଇ ଆର୍ ଶିକ୍ୟା ଦେମ୍କେ ଲାଗ୍ଲାଇ, ସ୍ଡେବ୍ଳ୍ ମୁକିଆ ଜାଜକ୍ ଆର୍ ତାକାର୍ ସ୍ଙ୍ଗୁଆଳିମ୍ନ୍ ଆର୍ ଇସ୍ରାଏଲାର୍ ଲକ୍ମ୍ନ୍କାର୍ ଦ୍ର୍ମ୍ ଶାସ୍ତର୍ ଜାଣ୍ତା ପାରାଚିନ୍ମ୍ନ୍କେ କୁଟୁମ୍ ବ୍ସୁକେ କୁଦ୍ଲାଇ, ଆର୍ ସେ ଚେଲାମ୍ନ୍କେ ଜ୍ଇଲେ ହ୍ଣି ଅମାର୍ ଲ୍ଗେ ଇତିକେ ଆଣା ବ୍ଲି ଶଇନ୍ମ୍ନ୍କେ କ୍ବର୍ ହ୍ଟାଇଲାଇ। 22ମ୍ତର୍ ଶଇନ୍ମ୍ନ୍ ଜ୍ଇଲେ ଗ୍ଲାଇ ଆର୍ ସେତି ହ୍ଟାଇଲା ଚେଲାମ୍ନ୍କେ ନ୍ହାଇକ୍ରି ଲେଉଟି ଆଇଲାଇ ଆର୍ କୁଟୁମ୍ ବ୍ସ୍ଲା ଲକ୍ମ୍ନ୍କେ ଇ ସ୍ବୁକ୍ତା କଇଲାଇ, 23“ସେମ୍ନ୍ ଆସି କଇଲାଇ ଅମିମ୍ନ୍ ଜ୍ଇଲେ ଜାଇରିଲୁ ଆର୍ ଦ୍କ୍ଲୁ ଜ୍ଇଲାର୍ ବାଟ୍ଲ୍ଗେ କୁଚିକାଡା ହ୍ଳିଆଚେ ଜାଗୁଆଳିମ୍ନ୍ ହେଁ ବ୍ଲ୍ବାବେ ଜାଗି ଆତ୍ତି, କୁଚିକାଡା ଇଟାଇକ୍ରି ଅମି ବିତ୍ରେ ଗ୍ଲୁ ମ୍ତର୍ ସେତି ସେ ହ୍ଟାଇଲା ଚେଲାମ୍ନ୍ ନ୍ରିଲାଇ।” 24ମୁକିଆ ଜାଜକ୍ ଆର୍ ମନ୍ଦିରାର୍ ଜାଗୁଆଳି ମ୍ନ୍କାର୍ ସେନାପତି ଇକ୍ତା ଶୁଣିକ୍ରି କାବାଅଇଲାଇ ଆର୍ ହ୍ଟାଇଲା ଚେଲାମ୍ନ୍କେ କ୍ନ୍ ଅଇଲିଆଚେ ବ୍ଲି ବାବ୍ଲାଇ। 25ସ୍ଡେବ୍ଳ୍ ଗଟେଲକ୍ ଆସିକ୍ରି କଇଲା, ଜୁଇ ହ୍ଟାଇଲା ଚେଲାମ୍ନ୍କେ ତୁମିମ୍ନ୍ ଜ୍ଇଲେ ସ୍ଙ୍ଗାଇ ରିଲାସ୍, ସେମ୍ନ୍ ଆରେକ୍ ମନ୍ଦିରେ ଲକ୍ମ୍ନ୍କେ ଶିକ୍ୟା ଦେମ୍ଲାଇ। 26ଇକ୍ତା ଶୁଣି ମନ୍ଦିର୍ ଜାଗୁଆଳି ମ୍ନ୍କାର୍ ସେନାପତି କ୍ତେକ୍ ଶଇନ୍ମ୍ନ୍କେ ଦ୍ରିକ୍ରି ଆଇଲା, ମ୍ତର୍ ବ୍ଡ୍ମତ କ୍ରି ସେମ୍ନ୍କେ ନାଣ୍ଲା କାଇତାକ୍ ଲକ୍ମ୍ନ୍ ସ୍ବୁ ସେମ୍ନ୍କେ ଟେଳାସ୍ଙ୍ଗ୍ ମାର୍ତି ବ୍ଲି ଡିର୍ଲାଇ। 27ସେମ୍ନ୍ ହ୍ଟାଇଲା ଚେଲାମ୍ନ୍କେ ଆଣିକ୍ରି କୁଟୁମ୍ ବ୍ସ୍ଲା ଟାଣେ ଟିଆ କ୍ଲାଇ ତ୍ବେ ମୁକିଆ ଜାଜକ୍ ସେମ୍ନ୍କେ କଇଲା, 28“ଯୀଶୁର୍ ନାଉଁଏ କାଇହେଁ ଶିକ୍ୟା ନ୍ଦେମ୍କେ ଅମି ତୁମୁକେ କଇନ୍ରିଲୁ, ମ୍ତର୍ ଗୁଳାଇ ଯିରୁଶାଲମ୍ ସ୍ହରେ ତାର୍ ପର୍ଚାର୍ କ୍ରି ବୁଲୁଲାସ୍, ତୁମିମ୍ନ୍ କାଇରି ସେ ବ୍ନିର୍ ଦସ୍ ଅମାର୍ ଉହ୍ରେ ଲାଦୁଲାସ୍।” 29ମ୍ତର୍ ପିତର୍ ଆର୍ ବିନ୍ ହ୍ଟାଇଲା ଚେଲା କଇଲାଇ, ଲକାର୍ କ୍ତା ମାନ୍ତା ବାଦୁଲେ ଅମିମ୍ନ୍ ଇଶ୍ଵରାର୍ କ୍ତା ମାନୁକେ ବ୍ଲ୍ ବ୍ଲି ବାବୁଲୁ। 30ତୁମିମ୍ନ୍ ଯୀଶୁକେ କୁର୍ଶକାଟେ ମ୍ର୍ନେ ମାର୍ଲାସ୍, ମ୍ତର୍ ଅମାର୍ ହୁର୍ବାର୍ କାଳାର୍ ଉବା ଇଶ୍ୱର୍ ତାକେ ଆରେକ୍ ଜୀବନ୍ ଦ୍ଇକ୍ରି ଉଟାଇଆଚେ। 31ଇସ୍ରାଏଲ୍ ଲକ୍ମ୍ନ୍ ଜ୍ନ୍କ୍ରି ପାପେହ୍ଣି ମ୍ନ୍ ବାଦ୍ଲାଉତି ଆର୍ ପାପ୍ କେମା ହାମ୍ ହାରତି ସେତାର୍ଗିନେ ଇଶ୍ୱର୍ ଯୀଶୁକେ ନେତା ଆର୍ ଉଦାର୍କ୍ର୍ତା କ୍ରି ଉଟାଇଲା ଆଚେ, ଆର୍ ତାକେ କାତାଆତ୍ ହାକ୍ ବ୍ସାଇଲା ଆଚେ। 32ଆରେକ୍ ଅମିମ୍ନ୍ ଇ ସ୍ବ୍କାର୍ ସାକି ଆଚୁ, ଆର୍ ଜୁଇ ପବିତର୍ ଆତ୍ମାକେ ଇଶ୍ୱର୍ ତାର୍ ଆଦେଶ୍କେ ମାନ୍ତା ଲକ୍ମ୍ନ୍କେ ଦାନ୍ କ୍ଲାଆଚେ, ସେ ହେଁ ଇ ସ୍ବ୍କାର୍ ସାକି ଦ୍ଇଦ୍।
33ମିଟିଙ୍ଗ୍ ବ୍ସ୍ଲା ଲକ୍ମ୍ନ୍ ଇ ସ୍ବୁ କ୍ତାଶୁଣି ସେମ୍ନ୍ ବେସି ରିସା ଅଇଲାଇ ଆର୍ ସେମ୍ନ୍କେ ମ୍ର୍ନେ ମାରୁକେ ଚିନ୍ତା କ୍ଲାଇ। 34ମ୍ତର୍ ସେତି ଗମଲୀୟେଲ୍ ନାଉଁର୍ ଗଟେକ୍ ମାନ୍ତି ହାଉତା ଲକ୍ରିଲା, ସେ ଫାରୂଶୀ ଆର୍ ନିଆଇ ଶିକାଉତା ଲକ୍, ସେ କୁଟୁମ୍ ବ୍ସ୍ଲା ଟାଣେ ଟିଆ ଅଇକ୍ରି ହ୍ଟାଇଲା ଚେଲାମ୍ନ୍କେ ହ୍ଦାଇ ନେମ୍କେ ଆଦେଶ୍ ଦିଲା, 35ତାର୍ହ୍ଚେ ସେ କୁଟୁମ୍ ବ୍ସ୍ଲା ଲକ୍ମ୍ନ୍ କଇଲାଇ, ଏ ଇସ୍ରାଏଲୀୟ ଲକ୍ମ୍ନ୍, ତୁମିମ୍ନ୍ ଇ ସ୍ବୁ ଲକ୍ମ୍ନ୍କାର୍ ଗିନେ ଜୁଇରି କ୍ରୁକେ ମ୍ନ୍କ୍ରୁଲାସ୍ ସେ ବିଷୟେ ଜାଗ୍ରତ୍ କ୍ରି କ୍ରା। 36କାଇତାକ୍ ଅଳ୍କ୍ ଦିନ୍ ଆଗେ ଥିଉଦା ଉଟିକ୍ରି ନିଜ୍କେ ଗଟେକ୍ ବ୍ଡ୍ ମାନାଇ ବ୍ଲି କ୍ଉତିରିଲା, ଚାରିଶ ଲକ୍ମ୍ନ୍ ତାର୍ହ୍ଚେ ହ୍ଚେ ଗ୍ଲାଇ। ସେ ନ୍ଷ୍ଟ ଅଇଲା, ଆର୍ ଜ୍ତେକ୍ ଲକ୍ ତାର୍ ହ୍ଚେ ହ୍ଚେ ଗ୍ଲା, ସ୍ବୁ ଲକ୍ମ୍ନ୍ ଚିନ୍ବିନ୍ ଅଇଲାଇ, ତାର୍ ଦ୍ଳ୍ ନ୍ଷ୍ଟ ଅଇଲି। 37ତାର୍ହ୍ଚେ ନାଉଁ ଲେକାଉତା ବ୍ଳ୍ ଗାଲିଲୀ ଜିଲା ତ୍ଇ ଯିହୁଦା ନାଉଁର୍ ଆରେକ୍ ଗଟେଲକ୍ ବାରାଇଲା, ସେ ସ୍ବୁ ଲକ୍ମ୍ନ୍କେ ତାର୍ ଦ୍ଳେ ଜିକିନିଲା। ସେନ୍କ୍ରି ସେ ହେଁ ନ୍ଷ୍ଟ ଅଇଲା, ତାର୍ ହାକ୍ ଜାଇରିଲା ସ୍ବୁ ଲକ୍ମ୍ନ୍ ହେଁ ଚିନ୍ବିନ୍ ଅଇଲାଇ। 38ଏବେ ମୁଇ ତୁମୁକ୍ମ୍ନ୍ କ୍ମ୍ଲେ, ଇ ସ୍ବୁ ଲକ୍ମ୍ନ୍କାର୍ ଗିନେ କାଇରି ହେଁ ନ୍କେରୁକେ ଆଦେଶ୍ ଦେମ୍ଲେ, ସେମ୍ନ୍କେ ଚାଡିଦିଆସ୍, ଯଦି ସେମ୍ନ୍ ମାନାଇର୍ ଇଚାତ୍ଇ କାମ୍ କ୍ରୁଲାଇ ତ୍ବେ ସେନ୍କ୍ରି ସେମ୍ନ୍ ହେଁ ନ୍ଷ୍ଟ ଅଉତି। 39ମ୍ତର୍ ସେସ୍ବୁ ଇଶ୍ଵରାର୍ ତ୍ଇହ୍ଣି ଅଇର୍ଇଦ୍, ତ୍ବେ ଅମିମ୍ନ୍ ସେମ୍ନ୍କେ ବ୍ନ୍ଦ୍ କ୍ରୁ ନ୍ହାରୁ, ଯଦି ବ୍ନ୍ଦ୍ କ୍ରୁନ୍ଦ୍ ତ୍ବେ ଇଶ୍ଵରାର୍ ସ୍ଙ୍ଗ୍ ଅମିମ୍ନ୍ ଯୁଜ୍ କ୍ଲାହର୍ ଅଇଦ୍। 40ସେମ୍ନ୍ ହ୍ଟାଇଲା ଚେଲାମ୍ନ୍କେ ବିତ୍ରେ କୁଦ୍ଲାଇ, ଆର୍ ସେମ୍ନ୍କେ ମାଡ୍ ମାରିକ୍ରି ଯୀଶୁର୍ ନାଉଁଏ କ୍ତା ନ୍କମ୍କେ ଆଦେଶ୍ ଦ୍ଇ ଚାଡିଦିଲାଇ। 41ସେତାର୍ଗିନେ ହ୍ଟାଇଲା ଚେଲାମ୍ନ୍ ମିଟିଙ୍ଗ୍ ବ୍ସ୍ଲା ତ୍ଇହ୍ଣି ସ୍ର୍ଦା ଅଇକ୍ରି ବାରିଗ୍ଲାଇ, କାଇତାକ୍ ସେମ୍ନ୍ ଯୀଶୁର୍ ଗିନେ ଦୁକ୍କ୍ଷ୍ଟ ଆର୍ ଡ୍ଣ୍ତ୍ ବଗୁକେ ଦ୍ର୍କାର୍ ବ୍ଲି ଜାଣିରିଲାଇ। 42ଆର୍ ସେସ୍ବୁ ବିଶ୍ବାସିମ୍ନ୍ ସ୍ବୁଦିନ୍ ମନ୍ଦିରେ ଆର୍ ଗ୍ରେ ଗ୍ରେ ଯୀଶୁ ଖ୍ରୀଷ୍ଟର୍ ସୁବ୍କ୍ବର୍ ପର୍ଚାର୍ କ୍ର୍ତି ରିଲାଇ, ଆର୍ ଶିକ୍ୟା ଦେତିରିଲାଇ।
Currently Selected:
ପ୍ରେରିତ 5: BDVNT
Highlight
Share
Copy
Want to have your highlights saved across all your devices? Sign up or sign in
Bodo Parja Bible (ବ୍ଡ଼୍ ହ୍ର୍ଜା) by The Love Fellowship is licensed under Creative Commons Attribution-ShareAlike 4.0 License.
