ଯୋହନ୍ 11
11
ଲାଜାରାର୍ ମ୍ଲା କ୍ତା
1ବେଥନିଆ ଗାମାର୍ ଲାଜାର୍ ନାଉଁର୍ ଗଟେକ୍ଲକ୍ ର୍ଗେ ହ୍ଳିରିଲା। ତାର୍ ଜ୍ତେକ୍ ବେଣ୍ସି ରିଲାଇ ସେମ୍ନ୍କାର୍ ନାଉଁ ଅଇଲି ମରୀୟମ୍ ଆର୍ ମାର୍ଥା ସେ ଗାମାର୍ ଲକ୍। 2ଇ ମରୀୟମ୍ ଗଟେତର୍ ମାପ୍ରୁର୍ ଉହ୍ରେ ବାସ୍ନା ଚିକାଣ୍ ଡାଳିକ୍ରି ନିଜାର୍ ବାଳେ ତାର୍ ହାଦ୍କେ ହୁଚି ଦ୍ଇରିଲି। 3ଏ ମ୍ନ୍କାର୍ ବାଇସି ଲାଜାର୍ ର୍ଗେ ହ୍ଡ୍ଲାକ୍ ସେମ୍ନ୍ ଯୀଶୁର୍ ଲ୍ଗେ କ୍ବର୍ ହ୍ଟାଇଲାଇ, “ମାପ୍ରୁ ତର୍ ଲାଡାର୍ ସ୍ଙ୍ଗ୍ ରଗେ ହ୍ଡିଆଚେ।” 4ଯୀଶୁ ଇ କ୍ବର୍ ଶୁଣ୍ଲା ଆର୍ କଇଲା, “ଲାଜାର୍ ରଗାର୍ ଗିନେ ମ୍ରିନ୍କେରେ, ମ୍ତର୍ ଇ ରଗାର୍ ଗିନେ ଇଶ୍ଵରାର୍ ହଇସି ହେଁ ମଇମା ହାଇଦ୍।” 5ଯୀଶୁ ମାର୍ଥା, ମରୀୟମ୍ ଆର୍ ଲାଜାର୍କେ ବେସି ଲାଡ୍ କ୍ର୍ତିରିଲା। 6ମ୍ତର୍ ଲାଜାରାର୍ ରଗେ ହ୍ଡ୍ଲାର୍ କ୍ବର୍ ଶୁଣିକ୍ରି ଯୀଶୁ ସେତି ଆରେକ୍ ଦୁଇଦିନ୍ ତେବ୍ଲା। 7ତାର୍ ହ୍ଚେ ସେ ଚେଲାମ୍ନ୍କେ କଇଲା, “ଆଶା ଅମିମ୍ନ୍ ଯିହୁଦା ଦେଶ୍କେ ଜୁମା।” 8ଚେଲାମ୍ନ୍ ତାକେ କଇଲାଇ, “ଏଗୁରୁ, ଯିହୁଦି ଲକ୍ମ୍ନ୍ ତକେ କ୍ତିଦିନ୍ ଆଗେ ଟେଡା ସ୍ଙ୍ଗ୍ ମ୍ର୍ନେ ମାରୁକେ ଚେଷ୍ଟା କ୍ରିରିଲାଇ, ତୁଇ ସେତିକେ ଆରେକ୍ ଜୁମା ବ୍ଲି କ୍ମ୍ଲିସ୍ କି?” 9ଯୀଶୁ ସେମ୍ନ୍କେ କଇଲା, “ଗଟେଦିନ୍ ବେଳାର୍ ଉଜାଳ୍ ବାର୍ ଗଣ୍ଟା ନଇକି? ଦିନ୍ବ୍ଳ୍ ଇଣ୍ଡ୍ତା ଲକ୍କେ ଜଟିଆଇ ନ୍ଉତି, କାଇତାକ୍ ହୁର୍ତିବି ଲ୍ଗେ ଉଜାଳ୍ ର୍ଇଦ୍ ଲାଗି। 10ମ୍ତର୍ କେ ରାତିବ୍ଳ୍ ଇଣ୍ଡ୍ତାଲକ୍ ଜଟିଆଇ ଅଇଦ୍, କାଇତାକ୍ ସେ ଉଜାଳ୍ ନଇଲାର୍ ଗିନେ ଅନ୍ଦାରେ ଇଣ୍ତୁ ନାହାରେ।” 11ସେ ଇ ସ୍ବୁକ୍ତା କଇଲା ହ୍ଚେ ଆରେକ୍ କଇଲା, “ଅମାର୍ ସ୍ଙ୍ଗ୍ ଲାଜାର୍ ସଇଲା ଆଚେ, ମ୍ତର୍ ମୁଇ ଜାଇକ୍ରି ତାକେ ଉଟାଇନ୍।” 12ଚେଲାମ୍ନ୍ କଇଲାଇ, “ଏ ମାପ୍ରୁ, ଯଦି ସେ ସଇଲା ଆଚେ ତ୍ବେ ସ୍ତ୍କ୍ରି ଉଦାର୍ ହାଇ ଉଟେଦ୍।” 13ଲାଜାର୍ ମ୍ରିଗ୍ଲା ଆଚେ ବ୍ଲି ଯୀଶୁ କଇଲାକେ ସେମ୍ନ୍ ତାର୍ ଅର୍ତ ବୁଜୁ ନ୍ହାର୍ଲାଇ, ଆର୍ ସେମ୍ନ୍ ସ୍ତ୍କ୍ରି ସଇଲା ଆଚେ ବ୍ଲି ବାବ୍ଲାଇ। 14ସେତାର୍ଗିନେ ଯୀଶୁ କୁଲାକୁଲି ବାବେ କଇଲା, “ଲାଜାର୍ ମ୍ରିଗ୍ଲା ବେ। 15ମ୍ତର୍ ମୁଇ ସ୍ର୍ଦା ଅମ୍ଲେ, କାଇତାକ୍ ସେଡେବ୍ଳ୍ ମୁଇ ସେତି ତାର୍ସ୍ଙ୍ଗ୍ ନ୍ରିଲେ, ଆର୍ ଇରି ତୁମାର୍ ଗିନେ ବ୍ଲାର୍ ବିଷୟ୍, ଅବେ ତୁମାର୍ ବିଶ୍ବାସ୍ ବାଡେଦ୍, ଆଶା ଯୁମା ତାର୍ ଲ୍ଗେ।” 16ଥୋମା, ଯାକେ ଦିଦୁମ୍ ବ୍ଲି କ୍ଉତି, ବିନ୍ସ୍ବୁ ଚେଲାମ୍ନ୍କେ କଇଲା, “ଗୁରୁର୍ ସ୍ଙ୍ଗ୍ ଯୁମା ଆର୍ ସେତି ସ୍ବୁଲକ୍ ମ୍ରୁମା।”
ଯୀଶୁ ମ୍ଲା ଲାଜାର୍କେ ଉଟାଇଲା
17ଯୀଶୁ ବେଥନିୟା ଗାମେ ହ୍ଚ୍ଲା ଆର୍ ଶୁଣ୍ଲା, ଯେ ଲାଜାର୍ ମ୍ରିକ୍ରି ଚାରିଦିନ୍ ଅଇଲି ମ୍ସ୍ଣେ ସ୍ଙ୍ଗାଇଲାନି। 18ବେଥନିଆ ତ୍ଇହ୍ଣି ଯିରୁଶାଲମ୍ ତିନି କିଲମିଟର୍ ବାଟ୍ ରିଲି। 19ଯିହୁଦି ଦେଶାର୍ ଗାଦିସ୍ବୁ ଲକ୍ମ୍ନ୍ ମାର୍ଥା ଆର୍ ମରୀୟମ୍କେ ତାର୍ ବାଇସି ମ୍ଲାଆଚେ ବ୍ଲି ଦୁକ୍ ହାସ୍ରାମ୍କେ ଆସିରିଲାଇ। 20ସେତାର୍ଗିନେ ଯୀଶୁ ଆସୁଲା ବ୍ଲି ଶୁଣିକ୍ରି ମାର୍ଥା ତାକେ ବେଟୁକେ ଗ୍ଲି, ମ୍ତର୍ ମରୀୟମ୍ ଗ୍ରେ ରିଲି। 21ମାର୍ଥା ଯୀଶୁକେ କଇଲି, “ମାପ୍ରୁ ତୁଇ ଯଦି ଇତି ରିଲେକ୍ ମର୍ ବାଇ ନ୍ମେଲା ହ୍ଣି। 22ମ୍ତର୍ ମୁଇ ଜାଣି, ଅବେ ହେଁ ତୁଇ ଜୁଇରି ଇଶ୍ଵର୍କେ ମାଗ୍ସି ସେ ତକେ ସେରି ଦ୍ଇଦ୍।” 23ଯୀଶୁ ତାକେ କଇଲା, “ତର୍ ବାଇଦି ଆରେକ୍ ସ୍ତ୍ ଜୀବନ୍ ହାଇକ୍ରି ଉଟେଦ୍।” 24ମାର୍ଥା ଉତର୍ ଦିଲି, “ହେଁ ମାପ୍ରୁ ମୁଇ ଜାଣି ମର୍ ବାଇ ସ୍ରାସ୍ରି ଦିନ୍ ମରିକ୍ରି ଜିଇ ଉଟ୍ତା ଦିନ୍ ସେ ଉଟେଦ୍।” 25ଯୀଶୁ ତାକେ କଇଲା, “ମୁଇ ମରିକ୍ରି ଜିଇ ଉଟ୍ତା ଲକ୍। ଯେ ମର୍ଲ୍ଗେ ବିଶ୍ବାସ୍ କ୍ରେଦ୍ ସେ ମ୍ଲେକ୍ ହେଁ ଜୀବନ୍ ଅଇଦ୍, 26ଆରେକ୍, ଯେ ଜୀବନ୍ ର୍ଇକ୍ରି ମକେ ବିଶ୍ବାସ୍ କ୍ରେଦ୍, ସେ କ୍ବେହେଁ ନ୍ମେରେ। ଇକ୍ତା କାଇରି ତୁଇ ବିଶ୍ବାସ୍ କ୍ରୁଲିସ୍?” 27ମାର୍ଥା ଉତର୍ ଦିଲି, “ହେଁ, ମାପ୍ରୁ ମୁଇ ବିଶ୍ବାସ୍ କ୍ରୁଲେ, ଯେ ତୁଇ ଇଶ୍ଵରାର୍ ହଇସି ଆର୍ ଜୁଇ ଖ୍ରୀଷ୍ଟ ହୁର୍ତିବିକେ ଆସ୍ତାର୍ ରିଲି, ତୁଇ ହ୍କା ସେ ମାନାଇ।”
ଯୀଶୁ କାନ୍ଦ୍ଲା
28ଅନ୍କ୍ରି କ୍ଇକ୍ରି ମାର୍ଥା ଲେଉଟି ଗ୍ଲି, ଆର୍ ମରୀୟମ୍କେ ଏକ୍ଲାକେ କୁଦିକ୍ରି କଇଲି, “ଗୁରୁ ଆଇଲା ଆର୍ ତକେ ସେ କୁଦୁଲା।” 29ଇକ୍ତା ଶୁଣିକ୍ରି ମରୀୟମ୍ ସେଦାହ୍ରେ ଯୀଶୁକେ ବେଟୁକେ ବାରାଇ ଗ୍ଲି। 30ସେଡେବ୍ଳ୍ ହ୍ତେକ୍ ଯୀଶୁ ଗାମ୍ ବିତ୍ରେ ଆସି ନ୍ରିଲା, ମାର୍ଥା ଜୁଇ ଟାଣେ ତାକେ ଦ୍କିରିଲି, ସେ ଟାଣେ ଯୀଶୁ ରିଲା। 31ମରୀୟମ୍ ଗ୍ରେ ଯିହୁଦି ଲକ୍ମ୍ନ୍ ଦୁକ୍ ହାସ୍ରାମ୍କେ ଆସିରିଲା ଲକ୍ମ୍ନ୍ ମରୀୟମ୍ ହ୍ଳାଉତାର୍ ଦ୍କିକ୍ରି ସେମ୍ନ୍ ହେଁ ତାର୍ ହ୍ଚ୍ ହ୍ଚ୍ ଗ୍ଲାଇ, ସେମ୍ନ୍ ବାବ୍ଲାଇ ଯେ ମରୀୟମ୍ ମ୍ସ୍ଣେ ଜାଇଦ୍ ଆର୍ କାନ୍ଦେଦ୍। 32ସେତି ଯୀଶୁ ଜୁଇ ଜାଗାଇ ରିଲା ସେଲ୍ଗେ ହଚ୍ଲା ଦାହ୍ରେ ମରୀୟମ୍ ତାର୍ ଗଡ୍ତ୍ଳେ ମୁଣ୍ତିଆ ମାରି କଇଲି, “ମାପ୍ରୁ ତୁଇ ଇତି ରିଲେକ୍ ମର୍ ବାଇ ନ୍ମେଲା ହ୍ଣି।” 33ମରୀୟମ୍ ଆର୍ ତାକେ ଦ୍କୁ ଆସିରିଲା ଯିହୁଦି ଲକ୍ମ୍ନ୍ କାନ୍ଦ୍ତି ରିଲାର୍ ଦ୍କିକ୍ରି ଯୀଶୁ ତାର୍ ମ୍ନେ ବେସି ଦୁକ୍ ଅଇଲା, ଆର୍ ବେସି କ୍ଷ୍ଟ ଅଇଲା, 34ଯୀଶୁ ହ୍ଚାର୍ଲା, “ତାକେ କ୍ଇ ତହି ଆଚାସ୍?” ସେମ୍ନ୍ କଇଲାଇ, “ମାପ୍ରୁ ଯୁ ଦ୍କ୍ସି।” 35ଯୀଶୁ କାନ୍ଦ୍ଲା। 36ଯିହୁଦି ଲକ୍ମ୍ନ୍ ତାକାର୍ ତାକାର୍ ବିତ୍ରେ କ୍ଉଆ କୁଇ ଅଇଲାଇ, “ସ୍ତ୍କ୍ରି ଲାଜାର୍କେ ବେସି ଲାଡ୍ କ୍ର୍ତିରିଲା।” 37ମ୍ତର୍ ଆରେକ୍ କ୍ତେକ୍ ଲକ୍ମ୍ନ୍ କଇଲାଇ, “ସେ କାଣାକେ ଦ୍କାଇଲା ଆଚେ, ଯଦି ସେ ମ୍ନ୍ କ୍ଲେକ୍ ଲାଜାର୍କେ କାଇରି ନ୍ବାଚାଇଲାଣି ହ୍ଣି କି?”
ଯୀଶୁ ମ୍ଲା ଲାଜାରକେ ଜୀବନ୍ ଦିଲା
38ଯୀଶୁ ଦୁକ୍ ଅଇ ମ୍ସ୍ଣେ ଗ୍ଲା। ସେ ମ୍ସ୍ଣେ ଗଟେକ୍ ହାର୍ରିଲି, ସେ ହାରେ ଲାଜାର୍କେ ସ୍ଙ୍ଗାଇ ରିଲାଇ, ସେ ହାରେ ମୁଏଁ ଗଟେକ୍ ବ୍ଡ୍ ଟେଡା ଡାହି ରିଲାଇ। 39ଯୀଶୁ କଇଲା, “ଟେଡା ଗୁଚାଇ ଦିଆସ୍,” ମାର୍ଥା କଇଲି, “ମାପ୍ରୁ ଗ୍ନ୍ଦ୍ ଆସେଦ୍ କାଇତାକ୍ ସେ ମ୍ରିକ୍ରି ଚାରିଦିନ୍ ଅଇଲିବେ।” 40ଯୀଶୁ ତାକେ କଇଲା, “ତୁଇ ବିଶ୍ବାସ୍ କ୍ଲେକ୍ ଇଶ୍ଵରାର୍ ମଇମା କାମ୍ ଦ୍କ୍ସି, ଇରି ମୁଇ ତୁମୁକେ କଇ ନ୍ରିଲେ କି?” 41ଆର୍ ସେମ୍ନ୍ ଟେଡା ଗୁଚାଇ ଦିଲାକ୍, ଯୀଶୁ ସ୍ର୍ଗ୍ ବାଟ୍ ଦ୍କିକ୍ରି ପାର୍ତେନା କ୍ଲା, “ଉବା ତୁଇ ମର୍କ୍ତା ଶୁଣ୍ଲିସ୍ ଲାଗି ତର୍ ଦନ୍ୟବାଦ୍ ଦେମ୍ଲେ। 42ମୁଇ ଜାଣି ତୁଇ ସ୍ବୁବ୍ଳ୍ ମର୍ ପାର୍ତେନା ଶୁଣି ରେସି, ଆର୍ ତୁଇ ଯେ ମକେ ହ୍ଟାଇ ଆଚ୍ସି, ଇରି ଜ୍ନ୍କ୍ରି ଇ ସ୍ବୁ ଲକ୍ମ୍ନ୍ ବିଶ୍ବାସ୍ କ୍ର୍ତି ସେତାର୍ଗିନେ ମୁଇ କ୍ମ୍ଲେ।” 43ସେ ଏତେକ୍ କ୍ଇକ୍ରି ଯୀଶୁ ବ୍ଡ୍ ଟଣ୍ତ୍କ୍ରି କଇଲା, “ଲାଜାର୍ ବାରି ଆଉ।” 44ସ୍ଙ୍ଗେ ସ୍ଙ୍ଗେ ଲାଜାର୍ ଉଟି ଆଇଲା, ତାର୍ ଆତ୍ଗଡ୍ ସ୍ବୁ ତହ୍ତାବ୍ଳ୍ ହ୍ଚିଆ ସ୍ଙ୍ଗ୍ ଗୁଳିଆଇ ରିଲାଇ, ଆର୍ ମୁଉ ହେଁ ହ୍ଚିଆ ସ୍ଙ୍ଗ୍ ଗୁଳିଆଇ ରିଲାଇ। ଯୀଶୁ କଇଲା, “ତାକେ ଇଟାଇକ୍ରି ଇଣ୍ତୁକେ ଦିଆସ୍।”
ଯୀଶୁର୍ ବିରୁଦେ ଉପାଇ ହାଚ୍ଲାଇ
45ମରୀୟମ୍କେ ଦୁକ୍ ହାସ୍ରାମ୍କେ ଆସିରିଲା ଯିହୁଦି ଲକ୍ମ୍ନ୍କାର୍ ବିତ୍ରେ ଗାଦି ଲକ୍ମ୍ନ୍ ରିଲାଇ, ଯୀଶୁର୍ ଇ କାବାକାମ୍ ଦ୍କିକ୍ରି ତାର୍ ଲ୍ଗେ ବିଶ୍ବାସ୍ କ୍ଲାଇ। 46ମ୍ତର୍ ସେମ୍ନ୍କାର୍ ବିତ୍ରେହ୍ଣି କ୍ତେକ୍ ଲକ୍ମ୍ନ୍ ଯୀଶୁ କ୍ରିରିଲା ଇ କାବା କାମାର୍ କ୍ତା ଜାଇକ୍ରି ଫାରୂଶୀମ୍ନ୍କେ ଜାଣାଇଲା।
47ଇକ୍ତା ଶୁଣି ଫାରୂଶୀମ୍ନ୍ ଆର୍ ମୁକିଆ ଜାଜକ୍ମ୍ନ୍ କୁଟୁମାର୍ ମେମର୍ ମ୍ନ୍କେ ବେଟ୍ଲାଇ ଆର୍ କଇଲାଇ, “ଅମି କ୍ନ୍କ୍ରୁନ୍ଦ୍? ଦ୍କା ଇ ମାନାଇ କ୍ଡେକ୍ ଚମ୍ତ୍କାର୍ କାମ୍ ମ୍ନ୍ ସ୍ବୁ କ୍ରୁଲା। 48ଯଦି ଅମିମ୍ନ୍ ଅନ୍କ୍ରି କାମ୍ କ୍ରୁକେ ତାକେ ଚାଡି ଦେମ୍ନ୍ଦ୍, ତ୍ବେ ସ୍ବୁ ଲକ୍ମ୍ନ୍ ତାର୍ ଲ୍ଗେ ବିଶ୍ବାସ୍ କ୍ର୍ତି, ତ୍ବେ ରୋମିୟମ୍ନ୍ ଆସିକ୍ରି ଅମାର୍ ମନ୍ଦିର୍କେ ଆର୍ ଅମାର୍ ଜାତିକେ ନ୍ଷ୍ଟକ୍ର୍ତି।” 49ମ୍ତର୍ ସେମ୍ନ୍କାର୍ ବିତ୍ରେ ସେ ବର୍ଷ ବ୍ଡ୍ ଜାଜକ୍ ଅଇ ବାଚି ଅଇରିଲାର୍, କୟାଫା କଇଲା, “ତୁମିମ୍ନ୍ କାଇରି ନ୍ଜାଣାସ୍। 50ତୁମିମ୍ନ୍ କାଇରି ନ୍ବୁଜୁଲାସ୍ ସ୍ବୁଲକାର୍ ବ୍ଲାର୍ ଗିନେ ଗଟେଲକ୍ ମ୍ର୍ତାର୍ ବ୍ଲ୍ ବିଷୟ୍।” 51କୟାଫା ବ୍ଡ୍ ଜାଜକ୍ ଇକ୍ତା ତାର୍ ନିଜାର୍ ଇଚାଇ କ୍ଇ ନ୍ରିଲା, ମ୍ତର୍ ସେ ସେ ବର୍ଷାର୍ ବ୍ଡ୍ ଜାଜକ୍ ଅଇରିଲା ଲାଗି ଯୀଶୁ ଯେ ଉବ୍କା ଇସ୍ରାଏଲ୍ ଜାତିର୍ ଗିନେ ନଇ, 52ମ୍ତର୍ ସେ ସ୍ବୁ ଚିନ୍ବିନ୍ ଅଇରିଲାର୍ ଇଶ୍ଵରାର୍ ଲକ୍ମ୍ନ୍କେ ଗଟେକ୍ ଗଷ୍ଟି କ୍ରୁକେ, ଯୀଶୁ ମ୍ରେଦ୍ ବ୍ଲି ବାବବାଣି ଜାଣାଇ ଦିଲା। 53ସେତାକ୍ ସେଦିନ୍ ହ୍ଣି ଯିହୁଦି ନେତାମ୍ନ୍ ଯୀଶୁକେ ମ୍ର୍ନେ ମାରୁକେ ଚେଷ୍ଟା କ୍ଲାଇ।
54ସେତାର୍ଗିନେ ଯୀଶୁ ଯିହୁଦିମ୍ନ୍କାର୍ ଲ୍ଗେ ସେମ୍ନ୍ ଦ୍କ୍ତା ହର୍ ଆରେକ୍ ବୁଲୁ ନ୍ହାର୍ଲା, ମ୍ତର୍ ବାଲିଆ ବ୍ଟା ଲ୍ଗେରିଲା ଏଫ୍ରିୟିମ୍ ନାଉଁର୍ ଗଟେକ୍ ସ୍ହରେ ଜାଇକ୍ରି ସେତି ଚେଲାମ୍ନ୍କାର୍ ସ୍ଙ୍ଗ୍ ବାସାକ୍ଲା। 55ସେଡେବ୍ଳ୍ ଯିହୁଦିମ୍ନ୍କାର୍ ନିସ୍ତାର୍ ହ୍ର୍ବ୍ ଲ୍ଗେ ଅଇ ଆସ୍ତି ରିଲି, ଆର୍ ସେ ହ୍ରବ୍ ନାସ୍ତା ଆଗ୍ତୁ ନିଜେ ନିଜ୍କେ ହ୍ର୍ଚାଳ୍ କ୍ରୁକେ ଗାମେ ଗାମେ ହ୍ଣି ଗାଦି ଲକ୍ମ୍ନ୍ ଯିରୁଶାଲମ୍ ଆସ୍ତି ରିଲାଇ। 56ସେମ୍ନ୍ ଯୀଶୁକେ କଜୁକେ ଦ୍ର୍ଲାଇ, ଆର୍ ମନ୍ଦିର୍ ସ୍କ୍ଳାଇ କ୍ଉଆ କୁଇ ଅଇଲାଇ, “ଯୀଶୁ ଇ ହ୍ରବ୍କେ ନାସେ କି? ତୁମିମ୍ନ୍ କାଇରି ବାବୁଲାସ୍?” 57ମୁକିଆ ଜାଜକ୍ ଆର୍ ଫାରୂଶୀମ୍ନ୍ ଆଦେଶ୍ ଦ୍ଇରିଲାଇ, ଯେ ଯଦି ଯୀଶୁକେ ଦ୍କେଦ୍ ତ୍ବେ ସେମ୍ନ୍ କ୍ବର୍ ବେଗି ଜାଣାଅତ୍, ତ୍ବେ ସେମ୍ନ୍ ଯୀଶୁକେ ବାନ୍ଦିକ୍ରି ନେତି।
Currently Selected:
ଯୋହନ୍ 11: BDVNT
Highlight
Share
Copy
Want to have your highlights saved across all your devices? Sign up or sign in
Bodo Parja Bible (ବ୍ଡ଼୍ ହ୍ର୍ଜା) by The Love Fellowship is licensed under Creative Commons Attribution-ShareAlike 4.0 License.
