ଯୋହନ୍ 12
12
ବେଥନିଆ ଗାମେ ଗଟେକ୍ ମାଇଜି ଯୀଶୁର୍ ମୁଣ୍ତେ ବାସ୍ନା ଚିକାଣ୍ ଲାଗାଇଲି
1ଯୀଶୁ ନିସ୍ତାର୍ ହ୍ର୍ବ୍ ଚଅଦିନ୍ ଆଗ୍ତୁ ବେଥନିଆ ଗାମେ ଲାଜାର୍ ଗ୍ରେ ଆସିରିଲା। ଜୁଇ ଲାଜାର୍କେ ଯୀଶୁ ଜୀବନ୍ ଦ୍ଇକ୍ରି ଉଟାଇ ରିଲା, ସେ ସେ ଜାଗାଇ ରିଲା। 2ସେତି ଯୀଶୁର୍ ଗିନେ ଗଟେକ୍ ବଜି ତିଆର୍ କ୍ରିରିଲାଇ। ସେ ବଜିଲ୍ଗେ ମାର୍ଥା ବାଟାକ୍ରି ଦେତିରିଲି, ଲାଜାର୍ ଯୀଶୁର୍ ସ୍ଙ୍ଗ୍ କାମ୍କେ ବ୍ସ୍ଲା। 3ସ୍ଡେବ୍ଳ୍ ମରୀୟମ୍ ଅଦା ଲିଟର୍ ଜଟା ମାସାର୍ ବାସ୍ନା ଚିକାଣ୍ ଆନ୍ଲି, ଆର୍ ଯୀଶୁର୍ ହାଦେ ଡାଳିତାର୍ ନିଜାର୍ ବାଳ୍ସ୍ଙ୍ଗ୍ ତାର୍ ହାଦ୍କେ ହୁଚିଦିଲି, ସେ ବାସ୍ନା ଗୁଳାଗ୍ର୍ ଗ୍ମ୍କି ଗ୍ଲି। 4ଯୀଶୁର୍ ଚେଲା ଇଷ୍କାରିୟତ୍ ଯିହୁଦା ଯେ କି ଯୀଶୁକେ ଶ୍ତ୍ରୁ ଆତେ ସ୍ହ୍ରିଦିଲା, ସେ କଇଲା, 5“ଇ ବାସ୍ନା ଚିକାଣ୍ ତିନିଶ ରୁହାର୍ ଟ୍କାଇ ବିକିକ୍ରି ଗ୍ରିବ୍ ଲକ୍ମ୍ନ୍କେ ଦିଲେକ୍ ନ୍ଇଲି ହ୍ଣି କି?” 6ସେ ଗ୍ରିବ୍ ଲକ୍ମ୍ନ୍କେ ଯେ ଯିହୁଦାର୍ ଦ୍ନ୍ ଦେତା ମ୍ନ୍ ଆଚେ, ସେତାର୍ଗିନେ ସେ ନ୍କଇ, ମ୍ତର୍ ସେ ଗଟେକ୍ ଚର୍ ଲକ୍ରିଲା, ଆର୍ ତାର୍ ଲ୍ଗେ ସ୍ବୁ ଡାବୁ କାସୁ ସ୍ଙ୍ଗାଉତି ରିଲାଇ ଲାଗି, ସେ ସେତିହ୍ଣି ଅଳକ୍ ଅଳକ୍ ଡାବୁ ଚରି କାତିରିଲା ଲାଗି କଇଲା। 7ମ୍ତର୍ ଯୀଶୁ କଇଲା, “ଇତାକେ ଚାଡିଦିଆସ୍, ଜ୍ନ୍କ୍ରି ସେ ମର୍ ମ୍ଳ୍କେ ତହ୍ତା ଦିନାର୍ ଗିନେ ଇ ଚିକାଣ୍ ଲାଗାଇଲି ଆଚେ। 8ଗ୍ରିବ୍ ଲକ୍ମନ୍ ତୋ ସ୍ବୁବ୍ଳ୍ ତୁମାର୍ମ୍ନ୍କାର୍ ଲ୍ଗେ ଆତ୍ତି, ମ୍ତର୍ ମୁଇ ସ୍ବୁବ୍ଳ୍ ତୁମାର୍ମ୍ନ୍କାର୍ ଲ୍ଗେ ର୍ଇ ନ୍କେରି।”
ଯିହୁଦିମ୍ନ୍ ଲାଜାରକେ ମ୍ର୍ନେ ମାରୁକେ ଚେଷ୍ଟା କ୍ଲାଇ
9ଯୀଶୁ ବେଥନିଆ ଗାମେ ଆଚେ ବ୍ଲି ଶୁଣିକ୍ରି ଗାଦି ଯିହୁଦି ଲକ୍ମ୍ନ୍ ସେତିକେ ଗ୍ଲାଇ, ଯୀଶୁକେ ଦ୍କୁକେ ନ୍ଗେଲାଇ ମ୍ତର୍ ମ୍ଲାତ୍ଇହ୍ଣି ବାଚିରିଲା ଲାଜାର୍କେ ଦ୍କୁକେ ଗ୍ଲାଇ। 10ସେତାର୍ଗିନେ ମୁକିଆ ଜାଜକ୍ମ୍ନ୍ ଲାଜାର୍କେ ମ୍ର୍ନେ ମାରୁକେ ଚେଷ୍ଟା କ୍ଲାଇ, 11କାଇତାକ୍ ଲାଜାରାର୍ ଗିନେ ଗାଦିସ୍ବୁ ଯିହୁଦିଲକ୍ ଯୀଶୁର୍ ଲ୍ଗେ ବିଶ୍ବାସ୍ କ୍ର୍ତିରିଲାଇ।
ଯିରୁଶାଲମ୍ ସ୍ହରେ ଯୀଶୁ ଗ୍ଲା
12ତାର୍ ଆର୍ ଗଟେଦିନ୍ ନିସ୍ତାର୍ ହ୍ର୍ବ୍କେ ଆସ୍ତିରିଲା ବେସି ମ୍ନ୍ଦାଲକ୍ 13ଯୀଶୁ ଯିରୁଶାଲମ୍ ସ୍ହରେ ଆସୁଲା ବ୍ଲି ଶୁଣିକ୍ରି ବେସିଲକ୍ କ୍ଜ୍ରି ଡାଳ୍ ବାଙ୍ଗିକ୍ରି ଯୀଶୁକେ ବେଟ୍ ହାମ୍କେ ଆଇଲାଇ, ବେଲ୍କି ଅଇକ୍ରି କ୍ମ୍କେ ଲାଗ୍ଲାଇ, “ହସାନା, ମାପ୍ରୁର୍ ନାଉଁଏ ଯେ ଆସୁଲା ସେ ଦନ୍ୟ। ଇଶ୍ୱର୍ ଇସ୍ରାଏଲାର୍ ର୍ଜା।” 14ଯୀଶୁ ଗଟେକ୍ ଗ୍ଦ ହିଟି ଲ୍ଗେ ବ୍ସି ଆସ୍ତିରିଲା ସେତାର୍ଗିନେ ଦ୍ର୍ମ୍ ଶାସ୍ତର୍ ଲ୍ଗେ ଲେକା ଅଇରିଲା ଇ ବାକ୍ୟ ହୁରା ଅଇଲି, 15“ହେ ସିୟୋନାର୍ ଲକ୍ମ୍ନ୍ ଡିରାନାଇ। ଦ୍କ୍ ତର୍ ର୍ଜା ଆସୁଲା, ଗ୍ଦ ଉହ୍ରେ ବ୍ସି ତର୍ଲ୍ଗେ ଆସୁଲା।” 16ସେଡେବ୍ଳ୍ ଚେଲାମ୍ନ୍ ଇକ୍ତାର୍ ଅର୍ତ ବୁଜୁ ନ୍ହାର୍ଲାଇ, ମ୍ତର୍ ଯୀଶୁ ଜ୍ଡେବ୍ଳ୍ ମ୍ରିକ୍ରି ଜୀବନ୍ ହାଇ ଉଟ୍ଲା ସେଡେବ୍ଳ୍ ଇରି ସେମ୍ନ୍କାର୍ ମ୍ନେ ହ୍ଳ୍ଲି, ଯୀଶୁର୍ ବିଷୟେ ଦ୍ର୍ମ୍ ଶାସ୍ତର୍ ଲ୍ଗେ ଇ ସ୍ବୁ ଲେକା ଅଇରିଲି, ଆର୍ ସେନ୍କ୍ରି ଯୀଶୁ କାମ୍ କ୍ର୍ତିରିଲା। 17ଯୀଶୁ ମ୍ଲା ଲାଜାର୍କେ କୁଦିକ୍ରି ଜୀବନ୍ ଦିଲାବ୍ଳ୍ ଜ୍ତେକ୍ ସ୍ବୁ ଲକ୍ମ୍ନ୍ ତାର୍ସ୍ଙ୍ଗ୍ ରିଲାଇ, ସେମ୍ନ୍ ଇ ସ୍ବୁକ୍ତା ଚାରିବାଟ୍ ପର୍ଚାର୍ କ୍ଲାଇ। 18ସେତାର୍ଗିନେ ଯୀଶୁର୍ ଇ ଚମ୍ତ୍କାର୍ କାମ୍ ଶୁଣିକ୍ରି ଲକ୍ମ୍ନ୍ ଯୀଶୁକେ ବେଟୁକେ ଜାଇରିଲାଇ। 19ଇରି ଦ୍କିକ୍ରି ଫାରୂଶୀମ୍ନ୍ ତାକାର୍ ତାକାର୍ ବିତ୍ରେ କ୍ଉଆ କୁଇ ଅଇଲାଇ, “ଦ୍କୁଲାସ୍ ଅମିମ୍ନ୍ କାଇରି କ୍ରୁ ହାରୁଲୁ। ଦ୍କା ହୁର୍ତିବିର୍ ସ୍ବୁ ଲକ୍ମ୍ନ୍ ତାର୍ ହ୍ଚ୍ ହ୍ଚ୍ ଜ୍ମ୍ଲାଇ।”
ଯୀଶୁର୍ ହ୍ଚେ ସ୍ବୁ ଲକ୍ ଗ୍ଲାଇ
20ହ୍ର୍ବ୍ ବ୍ଳ୍ ଆରାଦନା କ୍ରୁକେ ଯିରୁଶାଲମ୍ କ୍ତେକ୍ ବିନ୍ଜାତିର୍ ଗ୍ରୀକ୍ ଲକ୍ ଆସିରିଲାଇ। 21ସେମ୍ନ୍ ଗାଲିଲୀ ରାଜିର୍ ବେଥ୍ସାଇଦାର୍ ଲକ୍ମ୍ନ୍ ରିଲାଇ, ସେମ୍ନ୍ ଫିଲିପ୍ପାର୍ ଲ୍ଗେ ଆସି ତାକେ କଇଲାଇ, “ଆଗ୍ୟା, ଅମିମ୍ନ୍ ଯୀଶୁକେ ଦ୍କୁକ୍ ମ୍ନ୍କ୍ରୁଲୁ।” 22ଫିଲିପ୍ପ ଗ୍ଲା ଆର୍ ଆନ୍ଦ୍ରିୟ୍କେ କଇଲା, ଆରେକ୍ ଆନ୍ଦ୍ରିୟ ଆର୍ ଫିଲିପ୍ ଜାଇକ୍ରି ଯୀଶୁକେ କଇଲାଇ। 23ଯୀଶୁ କଇଲା, “ମାନାଇ ହିଲା ମଇମା ହାଉତାର୍ ସ୍ମୟ୍ ଅବେ ଆସିଆଚେ। 24ମୁଇ ତୁମୁକ୍ ସ୍ତ୍ କ୍ମ୍ଲେ, ଗ୍ଉଁ ବିଆନ୍ ଯଦି ବୁଏଁ ଅଦ୍ରି କ୍ରି ନ୍ମେରେ ତ୍ବେ ସେରି ଗଟେକ୍ ମ୍ନ୍ଜି ଅଇକ୍ରି ସେ ର୍ଇଦ୍, ମ୍ତର୍ ଯଦି ସେରି ମ୍ରେଦ୍ ତ୍ବେ ସେତିହ୍ଣି ଗାଦି ହ୍ଳ୍ ହ୍ଳେଦ୍। 25ଯେ ନିଜାର୍ ଜୀବନ୍କେ ବାଚାମ୍କେ ମ୍ନ୍କ୍ରେଦ୍, ସେ ତାର୍ ଜୀବନ୍କେ ଆରାଇଦ୍, ମ୍ତର୍ ଯେ ଇ ହୁର୍ତିବି ତ୍ଇ ନିଜାର୍ ଜୀବନ୍କେ ଗୁର୍ନା କ୍ରେଦ୍, ସେ ତାର୍ ଜୀବନ୍କେ ନ୍ସେର୍ତା ଜୀବନାର୍ ଗିନେ ଉଦାର୍ କ୍ରେଦ୍। 26ଯେ ମର୍ ଦ୍ଙ୍ଗ୍ଳା ଅମ୍କେ ମ୍ନ୍କ୍ରେଦ୍, ତ୍ବେ ସେ ମର୍ହ୍ଚେ ହ୍ଚେ ଆସ। ଆର୍ ମୁଇ ଜୁଇ ଟାଣେ ରେମ୍ଲେ, ମର୍ ଦ୍ଙ୍ଗ୍ଳା ହେଁ ସେତି ର୍ଇଦ୍। ଆର୍ ମର୍ ଆରାଦନା କ୍ରେଦ୍, ତ୍ବେ ଉବା ତାକେ ବେସି ସ୍ର୍ଦା ଅଇଦ୍।”
ନିଜାର୍ ମ୍ର୍ନ୍ ବିଷୟେ ଯୀଶୁ ଜାଣାଇଲା
27“ଅବେ ମକେ ମର୍ ଜୀବନେ ବେସି ବାନିଆ ଲାଗୁଲି, ଆର୍ ମୁଇ କ୍ନ୍କ୍ରିନ୍ଦ୍? ଉବା ଇ ଦୁକ୍ କ୍ଷ୍ଟାର୍ ତ୍ଇହ୍ଣି ମକେ ଉଦାର୍ କ୍ର୍ବ୍ଲି କାଇରି ମୁଇ କାନିକ୍ର୍ମ୍ ଅଇନ୍ଦ୍ କି? ମ୍ତର୍ ମୁଇ ତ ମ୍ରୁକେ ଆସିଆଚି, ମକେ ଇ ସ୍ବୁ ଦୁକ୍କ୍ଷ୍ଟ ବଗୁକେ ହ୍ଳେଦ୍। 28ଉବା ଇଶ୍ୱର୍ ତର୍ ନାଉଁ ମଇମା ଅଉଅ।” ସେଡେବ୍ଳ୍ ସ୍ର୍ଗ୍ ଉହ୍ରେ ହ୍ଣି ଗଟେକ୍ ଶ୍ବ୍ଦ ଶୁଣି ଅଇଲି, “ଅମି ତାକେ ମଇମା କ୍ରିଆଚୁ ଆର୍ ଆରେକ୍ ମଇମା କ୍ରୁନ୍ଦ୍।” 29ସେତି ଟିଆ ଅଇରିଲା ଲକ୍ମ୍ନ୍ ଇ ଶ୍ବ୍ଦ ଶୁଣ୍ଲାଇ, ଆର୍ ମେଗ୍ ଗ୍ର୍ଞୁଲି ବ୍ଲି କଇଲାଇ। ଆର୍ ବିନ୍ ଲକ୍ମ୍ନ୍ କଇଲାଇ, “ସ୍ର୍ଗ୍ ଦୂତ୍ ତାର୍ସ୍ଙ୍ଗ୍ କ୍ତା ଅମ୍ଲା।” 30ମ୍ତର୍ ଯୀଶୁ କଇଲା, “ଇକ୍ତା ମ୍ର୍ଗିନେ କ୍ଇନ୍କେରେ, ମ୍ତର୍ ତୁମାର୍ ଗିନେ ସେ କଇଲା ଆଚେ। 31ହୁର୍ତିବିର୍ ବିଚାର୍ କ୍ର୍ତାଦିନ୍ ଅବେ କେଟ୍ଲି ଆଚେ। ଇ ହୁର୍ତିବିର୍ ଶାସନ୍ କ୍ର୍ତାକେ ଇଶ୍ୱର୍ ହ୍ଦାଇ ହିଙ୍ଗେଦ୍। 32ଜ୍ଡେବ୍ଳ୍ ମୁଇ ଇ ହୁର୍ତିବି ତ୍ଇହ୍ଣି ସ୍ର୍ଗେ ଜାଇନ୍ଦ୍, ସେଡେବ୍ଳ୍ ମୁଇ ସ୍ବୁ ଲକ୍ମ୍ନ୍କେ ମର୍ଲ୍ଗେ ଜ୍ନ୍କ୍ରି ନ୍ଇନ୍ଦ୍।” 33ସେ କ୍ନ୍କ୍ରି ମ୍ରୁକେ ଜ୍ମ୍ଲା, ସେ କ୍ତାକେ ସେ ଅନ୍କ୍ରି ବୁଜାଇକ୍ରି କଇଲା। 34ଲକ୍ମ୍ନ୍ କଇଲାଇ, “ଖ୍ରୀଷ୍ଟ ସ୍ବୁବ୍ଳ୍ ବଚି ର୍ଇଦ୍ ବ୍ଲି ଅମାର୍ ମୋଶାର୍ ଦ୍ର୍ମ୍ ଶାସ୍ତର୍ ଲ୍ଗେ ବିଦିବିଦାନ୍ ଲେକାଆଚେ, ତ୍ବେ ତୁଇ କ୍ନ୍କ୍ରି କ୍ମ୍ଲିସ୍, ଯେ ମାନାଇ ହିଲାକେ ଉହ୍ରେ ଉଟାଇ ନେତି ବ୍ଲି? ମାନାଇ ହିଲା କେ?” 35ଯୀଶୁ ଉତର୍ଦିଲା, “ଆରେକ୍ ଅଳକ୍ ଦିନ୍ ହ୍କା ଉଜାଳ୍ ତୁମାର୍ ଲ୍ଗେ ଆଚେ, ଅନ୍ଦାର୍ ଜ୍ନ୍କ୍ରି ତୁମୁକ୍ମ୍ନ୍କେ ନ୍ଗିଳେ ସେତାର୍ଗିନେ ତୁମାର୍ ସ୍ଙ୍ଗ୍ ଉଜାଳ୍ ରେମ୍ ରେମ୍ ଉଜାଳେ ଚାଲାବୁଲା ଅଉଆ। କାଇତାକ୍ ଜୁଇଲକ୍ ଅନ୍ଦାରେ ଚାଲାବୁଲା କ୍ରେଦ୍ ସେ କ୍ଇ ଜ୍ମ୍ଲା ନିଜେ ଜାଣୁ ନ୍ହାରେ।
36ତୁମିମ୍ନ୍ ଜ୍ନ୍କ୍ରି ଉଜାଳ୍ ଲ୍ଗେ ରେମ୍ ରେମ୍ ଉଜାଳ୍କେ ଆଶା ତ୍ବେ ତୁମିମ୍ନ୍ ଉଜାଳାର୍ ହିଲାଜିଲା ଅଉଆସ୍।” 37ଯୀଶୁ ସେନ୍କାର୍ ମୁଏଁ ଚମ୍ତ୍କାର୍ କାମ୍ ମ୍ନ୍ ସ୍ବୁ କ୍ଲାକେ ହେଁ ସେମ୍ନ୍ ତାର୍ ଲ୍ଗେ ବିଶ୍ବାସ୍ ନ୍କେଲାଇ, 38ସେତାର୍ଗିନେ ଯିଶାଇୟ ବବିଶତ୍ କ୍ତା କ୍ଉତା ଲକାର୍ ଇ ବାବବାଣି ହୁରା ଅଇଲି, “ଏ ମାପ୍ରୁ ଅମାର୍ ଶିକ୍ଯାମ୍ନ୍ କେ କାଇରି ବିଶ୍ବାସ୍ କ୍ଲାଇ? ମାପ୍ରୁ କାର୍ ଲ୍ଗେ ତାର୍ ଶ୍କ୍ତିକେ ଜାଣାଇଲା?” 39ସେମ୍ନ୍ ବିଶ୍ବାସ୍ ନ୍କେର୍ତି ବ୍ଲି ଯିଶାଇୟ ଜୁଇ ବାବବାଣି କଇରିଲା ସେରି ସ୍ତ୍ ଅଇଲି, 40“ସ୍ତ୍କ୍ରି ଇଶ୍ୱର୍ ସେମ୍ନ୍କେ ଆକି କାଣା କ୍ଲାଆଚେ ଆର୍ ସେମ୍ନ୍କାର୍ ବୁଜ୍ତାର୍ ଶ୍କ୍ତି ନ୍ଷ୍ଟ କ୍ଲାଆଚେ, ଜ୍ନ୍କ୍ରି ସେମ୍ନ୍ ଆକିଏ ଦ୍କି ନ୍କେର୍ତି, ଆର୍ କାନେ ଶୁଣିନ୍କେର୍ତି, ଆରେକ୍ ହୃଦଏ ବୁଜି ନ୍କେର୍ତି, ଆରେକ୍, ମନ୍ ନ୍ବାଦ୍ଲାଆଉତି, ଆରେକ୍ ଅମି ସେମ୍ନ୍କେ ବ୍ଲ୍କ୍ରି ନ୍କେରୁ।” 41ଯିଶାଇୟ କାଇତାକ୍ ଅନ୍କ୍ରି କଇରିଲା, କାଇତାକ୍ ସେ ଆଗ୍ତୁ ଯୀଶୁର୍ ମଇମା ଦ୍କ୍ଲା ଆର୍ ତାର୍ ବିଷୟେ କ୍ତା କଇଲା। 42ସେତାର୍ଗିନେ କ୍ତେକ୍ ଯିହୁଦି ନେତାମ୍ନ୍ ଯୀଶୁର୍ ଲ୍ଗେ ବିଶ୍ବାସ୍ କ୍ଲାଇ, ମ୍ତର୍ ଫାରୂଶୀମ୍ନ୍କେ ଡିରିକ୍ରି ପାର୍ତେନା ଗ୍ରେହ୍ଣି ବାଆର୍ କ୍ର୍ତି ବ୍ଲି ଲକ୍ ଜାଣ୍ତା ହର୍ ସେ ବିଷୟେ କ୍ତାବାର୍ତା ଅଉତି ନ୍ରିଲାଇ, 43ସେମ୍ନ୍ ଇଶ୍ଵରାର୍ ଲ୍ଗେ ବ୍ଲ୍ ବ୍ଲାଇ ଅମ୍କେ ମ୍ନ୍ ନ୍କେଲାଇ, ମ୍ତର୍ ମାନାଇମ୍ନ୍କାର୍ ଲ୍ଗେ ବ୍ଲ୍ ବ୍ଲାଇ ଅମ୍କେ ମ୍ନ୍କ୍ର୍ତିରିଲାଇ।
ଯୀଶୁର୍ ଶିକ୍ୟା ନ୍ମାନ୍ଲାକେ ଇଶ୍ୱର୍ ସେମ୍ନ୍କେ ବିଚାର୍ କ୍ରେଦ୍
44ଯୀଶୁ ବ୍ଡ୍ ଟଣ୍ତ୍କ୍ରି କଇଲା, “ଯେ ମର୍ଲ୍ଗେ ବିଶ୍ବାସ୍ କ୍ରେଦ୍, ସେ ମର୍ଲ୍ଗେ ନାଇ, ମ୍ତର୍ ମକେ ହ୍ଟାଇରିଲା ମାନାଇର୍ ଲ୍ଗେ ହେଁ ବିଶ୍ବାସ୍ କ୍ରେଦ୍। 45ଯେ ମକେ ଦ୍କିଆଚେ ସେ ମକେ ହ୍ଟାଇ ରିଲାର୍ ମାନାଇକେ ହେଁ ଦ୍କିଆଚେ। 46ମୁଇ ଇ ହୁର୍ତିବିକେ ଗଟେକ୍ ଉଜାଳ୍ ହର୍ ଅଇ ଆସିଆଚି, ଯେ ମର୍ଲ୍ଗେ ବିଶ୍ବାସ୍ କ୍ରେଦ୍, ସେ କ୍ବେ ଅନ୍ଦାରେ ନ୍ରେଇ। 47ଯେ ମର୍ କ୍ବର୍ ଶୁଣିକ୍ରି ନ୍ମାନେ, ମୁଇ ତାକେ ବିଚାର୍ ନ୍କେରି। କାଇତାକ୍ ମୁଇ ଇ ହୁର୍ତିବିକେ ବିଚାର୍ କ୍ରୁକେ ଆସି ନ୍କେରି, ମ୍ତର୍ ଉଦାର୍ କ୍ରୁକେ ଆସିଆଚି। 48ଯେ ମକେ ମ୍ନ୍ ନ୍କେରେ, ଆର୍ ମର୍ ଶିକ୍ଯାକେ ନ୍ମାନେ, ତ୍ବେ ସେ ମର୍ ଟଣ୍ତାର୍ ବାକ୍ୟ ତାର୍ ବିଚାର୍ କ୍ରେଦ୍, ସ୍ରାସ୍ରି ଦିନ୍ ମର୍ ବାକ୍ୟ ତାର୍ ବିଚାର୍ କ୍ରେଦ୍। 49ଇକ୍ତା ସ୍ତ୍, କାଇତାକ୍ ମୁଇ ମର୍ ନିଜାର୍ ଇଚାଇ କାଇରି ନ୍କ୍ମ୍ଲେ, ଜୁଇରି ସ୍ବୁ କ୍ମ୍କେ ଆର୍ ଜାଣାମ୍କେ ମକେ ହ୍ଟାଇରିଲା ଉବା ଇଶ୍ୱର୍ ଆଦେଶ୍ ଦେମ୍ଲା। 50ମୁଇ ଜାଣୁଲେ ଯେ ତାର୍ ଆଦେଶ୍ ନ୍ସେର୍ତା ଜୀବନ୍ ଦ୍ଇଦ୍ ବ୍ଲି, ମର୍ ଉବା ମକେ ଜୁଇରି କ୍ମ୍କେ ଆଦେଶ୍ ଦେମ୍ଲା, ସେରି ହ୍କା ମୁଇ କ୍ମ୍ଲେ।”
Currently Selected:
ଯୋହନ୍ 12: BDVNT
Highlight
Share
Copy
Want to have your highlights saved across all your devices? Sign up or sign in
Bodo Parja Bible (ବ୍ଡ଼୍ ହ୍ର୍ଜା) by The Love Fellowship is licensed under Creative Commons Attribution-ShareAlike 4.0 License.
