ଯୋହନ୍ 20
20
ଯୀଶୁ ମ୍ରିକ୍ରି ଆରେକ୍ ଉଟ୍ଲା
1ବିଶାଉଣିଦିନ୍ ବର୍ ସ୍କାଳିଆ ଅନ୍ଦାର୍ ରେମ୍ ରେମ୍ ମଗ୍ଦଲୀନୀ ମରୀୟମ୍ ମ୍ସ୍ଣେ ଗ୍ଲି, ଆର୍ ମ୍ସ୍ଣାର୍ ଟେଳା ଗୁଚାଇରିଲାର୍ ସେ ଦ୍କ୍ଲି। 2ସେତାକ୍ ସେ ଦ୍ବ୍ଳି ଗ୍ଲି ଆର୍ ଶିମୋନ୍ ପିତର୍, ଆର୍ ଯୀଶୁ ଜାକେ ବେସି ଲାଡ୍ କ୍ର୍ତିରିଲା ସେ ଚେଲାକେ ଇ କ୍ବର୍ କଇଲି, “ମାପ୍ରୁକେ କେଅଲ୍ ନିଲାଇ ଆତ୍ତି ଆର୍ କ୍ଇ ସ୍ଙ୍ଗାଇଲାଇ ଆତ୍ତି ଅମି ନ୍ଜାଣୁ।” 3ଇକ୍ତା ଶୁଣିକ୍ରି ପିତର୍ ଆର୍ ସେ ଚେଲା ଦୁଇ ଲକ୍ ମ୍ସ୍ଣେ ଦ୍ବ୍ଳି ଗ୍ଲାଇ। 4ସେମ୍ନ୍ ଦୁଇ ଲକ୍ ଗଟେମାଡେ ଦ୍ବ୍ଳୁକେ ଲାଗ୍ଲାଇ, ଆର୍ ସେ ବିନ୍ ଚେଲା ପିତରାର୍ ହ୍ଚେ ହ୍ଳାଇ ଆଗେ ମ୍ସ୍ଣେ କେଟ୍ଲା, 5ସେ ଲ୍ସି କ୍ରି ମ୍ସ୍ଣେ ଇରି ଜୁଇ ହ୍ଚିଆ ଗୁଳିଆଇ ରିଲାଇ ସେ ହ୍ଚିଆକେ ଦ୍କ୍ଲା, ମ୍ତର୍ ସେ ମ୍ସ୍ଣେ ହୁରୁ ନ୍ଚ୍ଲା। 6ହ୍ଚେ ଶିମୋନ୍ ପିତର୍ ଆସି ସିଦା ମ୍ସ୍ଣେ ଗ୍ଲାଇ ଆର୍ ଇରି ଦ୍କ୍ଲାଇ, ଯୀଶୁକେ ଗୁଳିଆଇରିଲା ହ୍ଚିଆ ଗଟେକ୍ ଜାଗାଇ ରିଲି, 7ତାର୍ ମୁଣ୍ତେ ବାନ୍ଦିଦିଲା ହାତୁଳ୍ ହ୍ଚିଆ ସ୍ଙ୍ଗ୍ ସେ ହ୍ଚିଆ ମିସିକ୍ରି ନ୍ରିଲି ମ୍ତର୍ ଅଲ୍ଗା ଜାଗାଇ ରିଲି। 8ସେଡେବ୍ଳ୍ ସେ ବିନ୍ ଚେଲା ହେଁ ମ୍ସ୍ଣେ ଗ୍ଲା, ଆର୍ ଇ ସ୍ବୁ ଦ୍କିକ୍ରି ବିଶ୍ବାସ୍ କ୍ଲା। 9ଯୀଶୁ ଯେ ମ୍ରିକ୍ରି ଆରେକ୍ ଜୀବନ୍ ହାଇ ଉଟେଦ୍, ଦ୍ର୍ମ୍ ଶାସ୍ତରାର୍ ଇ ବାକ୍ୟ ସେଡେବ୍ଳ୍ ହ୍ତେକ୍ ସେମ୍ନ୍ ବୁଜି ନ୍ରିଲାଇ। 10ମ୍ସ୍ଣେ ଦ୍କିକ୍ରି ଚେଲାମ୍ନ୍ ତାକାର୍ ଗ୍ରେ ଲେଉଟି ଗ୍ଲାଇ।
ମଗ୍ଦଲୀନୀ ମରୀୟମ୍କେ ଯୀଶୁ ଦ୍କାଇ ଅଇଲା
11ମରୀୟମ୍ ହ୍ଦାଇ ଟିଆଅଇ କାନ୍ଦୁକେ ଦ୍ର୍ଲି, କାନ୍ଦି କାନ୍ଦି କ୍ରି ସେ ମ୍ସ୍ଣେ ଲ୍ହ୍ଟିକ୍ରି ଦ୍କ୍ଲି, 12ଦବ୍ ହ୍ଚିଆ ହ୍ଜିରିଲା ଜଳେକ୍ ସ୍ର୍ଗାର୍ ଦୂତ୍ ଯୀଶୁର୍ ଗ୍ଗାଳ୍ ଜୁଇ ଜାଗାଇ ସ୍ଙ୍ଗାଇ ରିଲାଇ ସେତି ବ୍ସିରିଲାଇ, ଗଟେଲକ୍ ମୁଣ୍ତ୍ ବାଟ୍ ଆର୍ ଏକ୍ଲା ଗଡ୍ ବାଟ୍। 13ସେ ଦୂତ୍ମ୍ନ୍ ହ୍ଚାର୍ଲାଇ, “ଏ ଆୟା ତୁଇ କାଇତାକ୍ କାନ୍ଦୁଲିସ୍?” ମରୀୟମ୍ ଉତର୍ ଦିଲି, “କେଅଲ୍ ମର୍ ମାପ୍ରୁକେ ନିଲାଇ ଆତ୍ତି, ଆର୍ କ୍ଇ ସ୍ଙ୍ଗାଇଲାଇ ଆତ୍ତି ସେରି ଅମିମ୍ନ୍ ଜାଣୁ ନାହାରୁଲୁ।” 14ଅନ୍କ୍ରି କଇ ମରୀୟମ୍ ହ୍ଚ୍ବାଟ୍ ବୁଲ୍ଲି ଆର୍ ସେ ଯୀଶୁକେ ଟିଆ ଅଇରିଲାର୍ ଦ୍କ୍ଲି, ମ୍ତର୍ ସେ ତାକେ ଚିନୁ ନାହାର୍ଲି। 15ଯୀଶୁ ତାକେ କଇଲା, “ତୁଇ କାଇତାକ୍ କାନ୍ଦୁଲିସ୍, ଆର୍ କାକ୍ କଜୁଲିସ୍?” ମରୀୟମ୍ ଯୀଶୁକେ ବଗିଚା ବାଳାର୍ ଚାଷି ବ୍ଲି ବାବିକ୍ରି କଇଲି, “ତୁଇ ଯଦି ମର୍ ମାପ୍ରୁକେ ନ୍ଇ ଆଚ୍ସି ତ୍ବେ ତାକ୍ କ୍ଇ ସ୍ଙ୍ଗାଇ ଆଚ୍ସି ମକେ କ୍ଉ, ମୁଇ ଜାଇନ୍ ଆର୍ ତାକେ ନେଇନ୍।” 16ଯୀଶୁ ତାକେ କଇଲା, “ମରୀୟମ୍।” ସେ ହ୍ଚ୍ବାଟ୍ ବୁଲି କଇଲି, “ରାବ୍ବୁନି” ବ୍ଲେକ୍ ଏବ୍ରୀ ବାଷାଇ ତାର୍ ଅର୍ତ ଅଇଲି, “ଏଗୁରୁ।” 17ଯୀଶୁ ତାକେ କଇଲା, “ମକେ ଦ୍ରି ର୍କୁକ୍ ଚେଷ୍ଟା କ୍ରାନାଇ, କାଇତାକ୍ ମୁଇ ଅବେହ୍ତେକ୍ ମର୍ ଉବାର୍ ଲ୍ଗେ ଜାଇ ନ୍କେରିତା, ମ୍ତର୍ ମର୍ ବାଇମ୍ନ୍କାର୍ ଲ୍ଗେ ଜା, ଆର୍ ସେମ୍ନ୍କେ କ୍ଉ, ମୁଇ ମର୍ ଉବା ଆର୍ ତୁମାର୍ ଉବା, ମର୍ ଇଶ୍ୱର୍ ଆର୍ ତୁମାର୍ ଇଶ୍ଵରାର୍ ଲ୍ଗେ ଜ୍ମ୍ଲେ।” 18ମଗ୍ଦଲୀନୀ ମରୀୟମ୍ ହ୍ଳାଇଲି, ଆର୍ ଯୀଶୁ ତାକେ କ୍ନ୍କ୍ରି ଦ୍କାଇ ଅଇଲା, ଆର୍ ଜୁଇରି ସ୍ବୁ କଇଲା, ସେ ସ୍ବୁ ଚେଲାମ୍ନ୍କେ କ୍ବର୍ ଦିଲି।
ଯୀଶୁ ଆର୍ ଗଟେତର୍ ଚେଲାମ୍ନ୍କେ ଦ୍କାଇ ଅଇଲା
19ସେ ରଇବାର୍ ଦିନ୍ ସ୍ଞ୍ବେଳା ଚେଲାମ୍ନ୍ ଯିହୁଦି ନେତାମ୍ନ୍କେ ଡିରିକ୍ରି ଗଟେକ୍ ଗ୍ରେ କାହାଟ୍ ଡାହିକ୍ରି ରିଲାଇ, ସେଡେବ୍ଳ୍ ଉଲ୍ସ୍ତେ ଯୀଶୁ ସେମ୍ନ୍କାର୍ ଲ୍ଗେ ଟିଆଅଇ କଇଲା, “ତୁମାର୍ ଶାନ୍ତି ଅଉଅ।” 20ଆରେକ୍ ଇରି କ୍ଇକ୍ରି ସେ ତାର୍ ଆତ୍ ଆର୍ କୁଚିକେ ଦ୍କାଇଲା, ମାପ୍ରୁକେ ଦ୍କିକ୍ରି ଚେଲାମ୍ନ୍ ବେସି ସ୍ର୍ଦା ଅଇଲାଇ। 21ଯୀଶୁ ସେମ୍ନ୍କେ ଆରେକ୍ କଇଲା, “ତୁମାର୍ ଶାନ୍ତି ଅଉଅ। ଉବା ଇଶ୍ୱର୍ ମକେ ଜ୍ନ୍କ୍ରି ହ୍ଟାଇରିଲା ମୁଇ ହେଁ ତୁମୁକ୍ ସେନ୍କ୍ରି ହ୍ଟାମ୍ଲେ।” 22ତାର୍ ହ୍ଚେ ସେ ସେମ୍ନ୍କାର୍ ଉହ୍ରେ ତାର୍ ହୁଣ୍ତାଣ୍ ଚାଡିକ୍ରି କଇଲା, “ପବିତର୍ ଆତ୍ମାକେ ହାଉଆ।” 23ତୁମିମ୍ନ୍ ଯଦି ଜୁଇଲକାର୍ ପାପ୍ କେମା କେରାସ୍, ଇଶ୍ୱର୍ ସେମ୍ନ୍କାର୍ ପାପ୍ କେମା କ୍ରେଦ୍। ଆର୍ ଜାକେ ତୁମିମ୍ନ୍ କେମା ନ୍କେରାସ୍, ସେମ୍ନ୍କାର୍ ପାପ୍ ଇଶ୍ୱର୍ କେମା ନ୍କେରେ।
ଯୀଶୁ ଆର୍ ଥୋମା
24ଯୀଶୁ ବାରଗଟ୍ ଚେଲାମ୍ନ୍କେ ଦ୍କାଇ ଅଉତାବ୍ଳ୍ ଥୋମା (ଜାକେ ଦିଦୁମ୍ ବ୍ଲି କ୍ଉତି) ସେତି ନ୍ରିଲା। 25ବିନ୍ସ୍ବୁ ଚେଲାମ୍ନ୍ ତାକେ କଇଲାଇ, “ଅମିମ୍ନ୍ ମାପ୍ରୁକେ ଦ୍କ୍ଲୁ”, ଥୋମା କଇଲା, “ତାର୍ କୁଟି ମାରିରିଲା ଆତ୍କେ ନ୍ଦେକ୍ଲେକ୍ ଆର୍ ତାର୍ କୁଚାଇ ବୁସିରିଲା ବାଲାର୍ ଚିନାକେ ନ୍ଚୁଇଲେକ୍ ମୁଇ ବିଶ୍ବାସ୍ ନ୍କେରି।”
26ଆଟ୍ଦିନ୍ ହ୍ଚେ ତାର୍ ଚେଲାମ୍ନ୍ ଆରେକ୍ ଗ୍ର୍ ବିତ୍ରେ ରିଲାଇ ଆର୍ ଥୋମା ହେଁ ସେତିରିଲା। କାହାଟ୍ ସ୍ବୁ ବ୍ନ୍ଦ୍ ଅଇରିଲା ବ୍ଳ୍ ଯୀଶୁ ଆସି ସେମ୍ନ୍କାର୍ ମ୍ଜାଇ ଟିଆଅଇ କଇଲା, “ତୁମାର୍ ଶାନ୍ତି ଅଉଅ।” 27ତାର୍ ହ୍ଚେ ସେ ଥୋମାକେ କଇଲା, “ଇତି ମର୍ କୁଚାଇ ତର୍ ଆଙ୍ଗ୍ଟି ଚୁଇକ୍ରି ଦ୍କ୍ ଆର୍ ମର୍ ଆତ୍କେ ହେଁ ଦ୍କ୍, ତୁଇ ତର୍ ଜୀବନେ ଅବିଶ୍ବାସ୍ ନ୍କେର୍ ମ୍ତର୍ ବିଶ୍ବାସ୍ କ୍ର୍।” 28ଥୋମା ଉତର୍ ଦେଇ କଇଲା, “ମର୍ ମାପ୍ରୁ ମର୍ ଇଶ୍ୱର୍।” 29ଯୀଶୁ ତାକେ କଇଲା, “ମକେ ଦ୍କ୍ଲାକେ ତୁଇ ବିଶ୍ବାସ୍ କ୍ରୁଲିସ୍, ମ୍ତର୍ ଜ୍ତେକ୍ ସ୍ବୁ ଲକ୍ମ୍ନ୍ ମକେ ନ୍ଦେକିକ୍ରି ବିଶ୍ବାସ୍ କ୍ରୁଲାଇ ସେମ୍ନ୍ ଦନ୍ୟ।”
ଯୋହନ୍ ଇ ଶାସ୍ତର୍ ଲେକ୍ଲା ଉଦେଶ୍
30ଚେଲାମ୍ନ୍କାର୍ ମୁଏ ଯୀଶୁ ବେସି ଚମ୍ତ୍କାର୍ କାମ୍ ସ୍ବୁ କ୍ରିରିଲା, ସେ ସ୍ବୁ ଇ ଶାସ୍ତର୍ରେ ଲେକା ନଇ। 31ଅତେକ୍ ସେ ଲେକା ଅଇଲିଆଚେ ଯେ, ଯୀଶୁ ହ୍କା ପରମେଶ୍ପ୍ରାର୍ ହଇସି ଖ୍ରୀଷ୍ଟ ଇ କ୍ତାକେ ତୁମିମ୍ନ୍ ବିଶ୍ବାସ୍ କ୍ରା, ତାର୍ ଲ୍ଗେ ବିଶ୍ବାସ୍ କ୍ଲେକ୍ ତୁମିମ୍ନ୍ ନ୍ସେର୍ତା ଜୀବନ୍ ହାଉଆସ୍।
Currently Selected:
ଯୋହନ୍ 20: BDVNT
Highlight
Share
Copy
Want to have your highlights saved across all your devices? Sign up or sign in
Bodo Parja Bible (ବ୍ଡ଼୍ ହ୍ର୍ଜା) by The Love Fellowship is licensed under Creative Commons Attribution-ShareAlike 4.0 License.
